MAFIYU 16

Faa maa‐wɔlɔ‐wɔlɔ gaa‐ziai

1Favilesiitiɛ ƃɔga Sadusiitiɛ te vaani Ziizɛ wɔ vɛ ga te tɛ gá. Te boni má ga é faa maa‐wɔlɔ‐wɔlɔ ta ɣɛ é wulo Gala ta é dɛ ga tiɛ ga kpɔɔ maa zeele. 2É te woi ɣaa woteni é ɣɛ te ma, “A ɣɛ na ga kpɔkɔ wa ɣɛ tea, ‘Woza ɣa vaazu vasu, ƃɔvɛlaale gee wɔlɔgi ƃoeivɛ.’ 3A ɣɛ na ga subu wo ɣɛ tea, ‘Tine ɣa za a pu fãga ƃakpa bu, ƃɔvɛlaale gee wɔlɔgi ɣa ƃoeizu tinei yìɛ tei.’ Velei gee wɔlɔgi ɣa ɣɛɛ la wo kwɛ̃ni ga velei maʋai zu‐wulo‐zuvɛ la. Kɛ̀ faitiɛ ta ɣɛ te ziɛgi zu ʋai lɛ ga seele, wɛ lɛ zooga wɔ maʋaitiɛ zu‐wulo‐zuvɛ lɛ. 4Tuƃo‐vele‐yowũ‐wulo ʋala‐wonɛɛgi nii é ga nui nu lɛ laa la, towaa a faa maa‐wɔlɔ‐wɔlɔ kɛɛ ʋaa maa vele ɣaa ziɛ. Tɔwɔ faa maa‐wɔlɔ‐wɔlɔ nɛpɛ gɛ lɛ ɣɛɛ te ɣaazu é wulo Joona maʋaa maa‐wɔlɔ‐wɔlɔgi wulu.” Ziizɛ te yɛ sa na é ziɣi na.

Favilesiitiɛ ƃɔga Sadusiitiɛ ta ɣala‐bogi

5Tei kala dopoitiɛ te ziɣini ga zɔlaavɛ vele ziɛ walai ʋaa va, kpoolo‐ʋɔɔ nɛpɛ gɛ lɛ ŋɛni te ya. Te yeemani ga te li ga ta. 6Ziizɛ ɣɛni te ma, “A kɛsɛ wo ƃɔɔ wũ maazu vɛtɛ ga Favilesiitiɛ ƃɔga Sadusiitiɛ. Te maʋaa wulove ga kpoolo‐ʋɔɔ ƃokolo ŋɛni.” 7Kala dopoitiɛ te ɣɛni bosu ɣii ma tiɛ ɣɛ tea, “Dɛ lɛ vaani ga kpoolo‐ʋɔɔ ta nɛpɛ.” 8Kɛ̀ nii ɣaa‐ɣaa vele ma Ziizɛ vɛ é ɣɛni te ma, “Wai ŋɛ ni zee‐la‐ma vɛnɛi wo ya, zɛbɛi é kɛɛ wo bosu ɣii ma ga kpoolo‐ʋɔɔ lɛ wo ya? 9?Wɛ lɛ dɛ gaa ɣaani? ?Wo ɣi gɛ lɛ yɛni kpoolo‐ʋɔɔ ƃume looluoi ʋaa zu é ɣɛni nu wulu dooluoi ʋaa ma? Kpɔlɔ diide ɣa wo gaa lɛɛni ba kpoolo‐ʋɔi zu? 10Nii ƃalaa kɔnɔ é ɣɛni ga kpoolo‐ʋɔɔ lɔfelai é ɣɛni nu wulu naagɔi ʋaa ma, kpɔlɔ diide ɣa wo gaa lɛɛni ba kpoolo‐ʋɔi na zu? 11Zɛƃɛi é kɛɛ wɛ lɛ gaa ɣaani ga kpoolo‐ʋɔɔ lei gɔ̀ faa wo ɔ́ vile bá? A wũ maazu vɛtɛ ga Favilesiitiɛ ƃɔga Sadusiitiɛ. Te maʋaa wulovɛ è ɣɛ kpoolo‐ʋɔɔ ƃokolo ŋɛni.” 12Te gaa ɣaani sa ga ɛ́ lɛ ŋɛni ʋaazu ŋɛnii nii ma yá kpoolo‐ʋɔi ƃokolo. Kɛ̀ Favilesiitiɛ ƃɔga Sadusiitiɛ ta ɣala‐bogi ɣa é ɣɛni ʋaazu ma.

Fai Pite boni é vile Ziizɛ va

13Tɔwɔ tei sa Ziizɛ vaani Sɛsɔluiya Felepai yui zu, é ná kala dopoitiɛ ɣaa zaɣa kɛɛni é ɣɛ te ma, “Zɛƃɛi numaa te bosu ga nài gè ga nu ƃuse lui gà le?” 14Te ɣɛni ma, “Nu taniga ta bosu ga yà ga Bataize‐ɣɛɛ Jɔ̃, zɔitiɛ tiɛ bo ga yà ga Yiilaija, zɔitiɛ tiɛ wɔnɔ bo ga yà ga Jɛlɛmaiya ɔɔ Gala daa woo‐wo beaitiɛ te ɣila.” 15Ziizɛ ɣɛ sa te ma, “Wa wɔ ƃɛ ɣa wo bosu ga gà le?” 16Saimɔ Pite gaa wote é ɣɛ ma, “Yà ɣa è ga nui Gala zee ƃadogɛi bá ga masa, na ɣa ga Kolai, è wɔnɔ ga ʋululai ma Ɣalagi dui.” 17Ziizɛ goi ɣaa woteni é ɣɛ ma, “Tuuyiɛ ɣa è ma, yài è ga Joona dui Saimɔ! Toku ge zei ga nu ƃuse lei ɔ́ nii wulo kɛnɛ ma è ɣaazu, kɛ̀ kèea Gala nii é gee‐zuvɛ tɔ ve. 18Tɔwɔ gè bo yìɛ, yà ga Pite yài wɔgi è ga kwɔtii nii yà ɣa gè nà Gala pɛlɛi losu è ma. Na ɣa ɣɛɛ na saa na gaa‐ƃai yee lɛ zooga da. 19Gà Gala ta masadai maƃogi mayiliɣii ʋe è ya. Na ɣa ɣɛɛ na nii nɛpɛ yà gili zui ɣa towaa ɣili Gala ta, nii nɛpɛ wɔnɔ yà fũi zui ɣa towaa ʋũi Gala ta.” 20É zɛba sa é ƃaa ƃɔɔ ma kpe é bo ná kala dopoitiɛ ma ga te mɛ lɛ bo nu ta nɛpɛ ma ga tɔ ɣa é ga Kolai.

Ziizɛ ƃɔɛni é ʋile daa‐nɔwɔ‐wogi va ta saa ʋai

21É ziɣi na maziɛ su ma, Ziizɛ vɛɛni sa ga dɛɛ ga ná kala dopoitiɛ ga kɛni yá li Yɛlusulɛɛ é laa nɔwɔ wo faa lamaa zu zuu wũgitiɛ ya ta laa‐ʋaale gwalaitiɛ é vɛɛ tɔ‐dɛɛ ɣala‐mɔitiɛ va, é ɣɛ ga nui ta paa. Tɔwɔ Gala ka bu ziɣi ga foloi sava kelei. 22Pite Ziizɛ ziɣini sa te wulo zɔitiɛ va é vɛɛ ga kpɛɛ dá yíɛ ɣɛ ma, “Gala ge nà yowũ ʋoolo yìɛ, màliɣii. Nii lɛ wɔlɔ‐wɔlɔ ɣɛɛ ga yìɛ.” 23Kɛ̀ é liteni é ɣɛ Pite ma, “Ziɣi pulu, Seeta ƃɔɔ! Yà ga nui kpesagɛi tùo, ƃɔvɛlaale ɛ̀ lɛ ga Gala pɔ vele, nu ƃusea ɣa è ga te wɔ vele.” 24Ziizɛ zɛba sa é ɣɛ ná kala dopoitiɛ ma, “Ani nu nɛpɛ ka ɣɛ na é vile pùlu, pagɛ manui ɣi kulo ƃɔɔ ʋaa zu é ná pɛɛ‐pulu wulu likpii ziɣi é vile da pùlu. 25Toku ge zei ga nui nɛpɛ yá ɣɛ é ƃaa yɛʋui maazu towaa ɣɛ pilisu. Nui wɔgi yá yɛʋui vili màzaƃu ma, manui ɣa pɛtɛ. 26Zɛƃɛ ɣa yá ɣɛ ga mawulo‐nu‐mai nu ʋaa ma ani yá zui ɣaazɔ zɔlɔ wo na, tɔwɔ é vala yɛʋui ma? Ɔɔ zɛƃɛi nu ɣa fe ga yɛʋui maa‐ʋeli? 27Su‐wulo‐zu ɣa ga nu ƃuse lui na keelaitiɛ ta vaazu yɛsu bá te va kéea Gala na bɔɔlɔlai zu. Na ɣa ɣɛɛ na tɔ sa a kɛ nu pɛ ge wulo nii zu‐nu ma te kɛɛ. 28Gè bo wiɛ ga gaama, nui taniga ta loni vɛ te ga numaitiɛ tɛ lɛ saa wɛ̃ɛga tɔ teɣa vɛɛ wɛlɛzu nu ƃuse lui va é ná masadai zu yíɛ va.”

موجودہ انتخاب:

MAFIYU 16: DN1971

سرخی

شئیر

کاپی