Mark 4

Di faama weh gaan out, gaan plaant siid

(Matthew 13.1-9; Luke 8.4-8)

1Ahn agen Jesus staat tiich dong dah di sii-said. Ahn wan paila pipl gyada op roun im. Ih wehn uova big, so Jesus wehn hafy get'op iina wan buot, ahn sidong iina ih. Dehn ker di buot likl wiez out iina di liek, ahn di pipl dem wende stan op pan di bie deh lisn. 2Den Jesus staat tel dem plenty tingz deh yuuz parabl.#4.2 cf. Mark 3.23. Ahn wen ihn wende tiich, ihn tel dem:

3“Unu hier weh Ah gat fi seh! Wan taim wan faama wehn gaan out, gaan plaant som siid. 4Ahn wen ihn wende skyata di siid dem, som a ih faal lang di trak ruod, ahn di bord dem kom ahn iit dem op. 5Ahn som a di ada siid drap pan raky grong, weh paat plenty dort neva deh. Di siid dem sprout op siem taim bikaaz di dort neva diip nof. 6Aftawod wen di son kom out, ih bon'op di likl trii dem, bikaaz di ruut neva gaan diip nof, ahn di plaant dem drai op. 7Ahn som ada siid drap mongs di prikl, ahn di siid dem sprout op, bot di prikl gruo'op uova di likl trii dem ahn chuok dem, so dehn kudn bier notn. 8Ahn som ada siid drap pan gud grong. Ahn di siid dem sprout op ahn gruo strang ahn bier plenty fruut; som a di trii dem wehn gat aan thirty; som a dem wehn gat aan sixty; ahn som a dem wehn gat aan one hundred muo an weh ihn wehn plaant!”

9Den Jesus seh tu dem, “Unu stap unu haad iez, ahn unu hier weh Ah deh seh!”

Jesus eksplien wai ihn yuuz parabl fi tiich di pipl dem

(Mark 13.10-17; Luke 8.9, 10)

10Aftawod wen Jesus wende him wan, som a dem weh wehn hier im, kom wid di twelve disaipl ahn aks im fi eksplien di parabl weh ihn tel dem. 11Ahn Jesus tel dem seh, “Ah deh tel unu som tingz bout God Kingdom weh nonbady neva andastan op til now. Bot fi dem weh dah no paat a ih, dehn no gwain andastan di parabl dem ataal. 12Jos how Isaiah wehn seh,

‘Dehn gwain luk,

ahn no si notn.

Ahn dehn gwain hier,

ahn no andastan notn.

Bikaaz, if dehn du dis,

dehn wuda ton tu God,

ahn ihn wuda paadn dehn sin.’ ”

Jesus eksplien di parabl bout di faama ahn ihn siid

(Matthew 13.18-23; Luke 8.11-15)

13Den Jesus aks dem, “If unu no andastan disya parabl yet, den how unu gwain andastan eny ada parabl weh Ah gwain tel unu? 14Di faama weh deh plaant di siid, dah laik di mesinja weh deh ker God mesij tu ada pipl. 15Som taim, laik di siid weh drap pan di trak ruod, di pipl dem hier di mesij, bot laik di bord weh iit'op di siid, Satan kom faas ahn tek weh di mesij ahn di pipl dem no andastan. 16Som taim, laik di siid weh drap pan di raky grong, di pipl hier di mesij ahn risiiv ih siem taim, ahn ih mek dem glad. 17Bot laik di ruut fi demya trii, di mesij weh dehn hier no go diip iina dem. So dehn no laas lang, ahn wen trobl kom, or wen pipl waahn fuos dem fi stap biliiv di mesij, dehn gi'op kwik. 18Som taim, laik di siid weh drap mongs di prikl, demya pipl dah di wan dem weh hier di mesij, 19bot aftawod dehn wory bout dehn laif, ahn ho moch mony dehn gwain mek, ahn aal kain a ada tingz weh dehn waahn weh kom iina dehn main, ahn dis kiip dong di mesij, ahn dehn no ton tu notn gud. 20Som taim, laik di siid weh drap pan gud grong demya ada pipl dah di wan dem weh hier di mesij ahn aksep ih, ahn put'ih iina praktis, ahn bring op gud tingz aal di taim, laik di trii weh bier fruut thirty taim, sixty taim, ahn one hundred taim, dehn gwain deh du beta ahn beta aal di taim.”

No kiip unu talent tu unuself laik wan fuulish man

(Luke 8.16-18)

21Den Jesus kantinyo ahn seh, “Enybady eva bring iin wan lamp ahn den put'ih aanda wan baaskit or aanda di bed? Nonbady no so fuul, bikaaz yu fi put di lamp weh paat ih wi mek yu si. 22Ahn enyting weh haid, gwain kom out weh pipl kyan si'it, ahn enyting weh kova op, aftawod evrybady gwain get fi nuo bout'ih. 23So, unu stap unu haad iez, ahn unu hier weh Ah deh seh!”

24Ahn ihn kantinyo ahn seh, “Pie main tu wat Ah deh tel unu. Di siem wie unu joj sombady, God gwain joj unu plenty haada. 25Bikaaz di man weh hier ahn biliiv dis mesij, ihn gwain andastan muo; bot di man weh hier ahn no biliiv, dongtu di likl bit weh ihn hier, God gwain tek weh fahn im.”

Di parabl bout di siid weh spring'op, gruo ahn bier gud fruut

26Den Jesus kantinyo ahn seh, “God Kingdom dah laik wan faama weh skyata siid dah ihn grong. 27Aftawod, wail ihn deh sliip or wail ihn wiek, di siid dem spring'op ahn gruo, ahn ihn no nuo how ih hapm. 28Di grong bai ihself mek di siid spring'op ahn di trii gruo, ahn bier fruut: fos di stem, den di liif, den di huol trii ful a fruut. 29Wen di fruut raip, di faama go siem taim ahn pik aaf aal di fruut, bikaaz dah taim fi gyada.”

Di parabl bout di mostad siid weh gruo fi bii wan uova big trii

(Matthew 13.31, 32, 34; Luke 13.18, 19)

30Den Jesus aks, “Wat wi kyan kompier God Kingdom wid? Wat kain a parabl Ah gwain yuuz fi eksplien ih tu unu? 31God Kingdom dah laik wan mostad siid, wan a di smaalis siid pan di ort. 32Bot if wan man plaant ih iina di grong, aftawod ih gruo'op ahn ton wan a di bigis trii, weh put out som big lim tu. Ahn di bord dem fahn iina di ier kyan kom ahn mek dehn nes pan ih aanda di sheda a di trii.”

33Ahn Jesus yuuz plenty muo parabl laik dis fi tiich di pipl dem, ahn ihn tel dem az moch az dehn kuda andastan. 34Jesus wehn ongl deh yuuz parabl fi tiich di pipl dem; ahn wen ihn wende him wan wid di disaipl dem, ihn wuda eksplien tu dem di huol miinin a di parabl dem.

Jesus kyaam di big briiz ahn di sii

(Matthew 8.23-27; Luke 8.22-25)

35Dat siem die wen di iivnin kom dong, Jesus tel ihn disaipl dem, “Mek wi go uova di ada saida di liek.” 36So di disaipl dem get iina di buot weh Jesus wende iina, ahn dehn lef di paila pipl bihain. Ahn som ada buot wehn dedeh deh fala dem. 37Den aalava sodn wan big briiz staat bluo, ahn di wiev dehn wap'op di buot so moch ih tek iin waata ahn staat sink. 38Ahn Jesus wende iina di staan a di buot deh sliip wid ihn hed pan wan pila. Ahn di disaipl dem gaan dah Jesus ahn wiek'im op, ahn seh, “Tiicha, yu mosy no kya if aala wi droundid?”

39Den Jesus get'op ahn tel di briiz fi kuul dong, ahn tel di liek, “Stan stil!” Ahn siem taim, di briiz kuul dong ahn evryting get bak kyaam-kyaam! 40Den Jesus aks ihn disaipl dem, “Wai unu fraitn? Unu stil no gat fiet iina mi powa?”

41Bot dehn neva ansa im. Dehn wehn so fraitn, dehn aks wan anada, “Dah huu disa man weh gi aadaz ahn mek di briiz ahn di sii pie im main?”

موجودہ انتخاب:

Mark 4: NTIC

سرخی

شئیر

کاپی