Luke 22
22
Sivunniuġun Tuqutchukługu Jesus
(Matthew 26.1-5; Mark 14.1-2; John 11.45-53)
1 #
Ex 12.1-27. Niqinaqivik Puvlaksiŋaitchuamik Punniġmik qalliŋaruq, atiqaqtuaq Itqaunmik Qulaurrusiqiviŋmun. 2Aasii aŋaiyyuliqsiqpaich iḷisaurriḷḷu pitquranik piviksraqsiuŋarut qanuġlugu tuqutchukługu Jesus, suiḷauriḷutiŋ sivuuġagivlugich iñuich.
Judas Aŋiqtuq Aitchuutigisukługu Jesus
(Matthew 26.14-16; Mark 14.10-11)
3Tavra Satan isiŋaruq Judas-mun taggisiqaqtuamun Iscariot-mik, iḷauruaq qulit malġuŋnun iḷitchitquranun. 4Ilaa aullaŋaruq aasii uqaqatigiaqsivḷugich aŋaiyyuliqsiqpaiḷḷu atanauraŋiḷḷu aŋaiyyuvikpaum munaqsriŋisa, qanuġlugu aitchuutigisukługu Jesus iliŋiññun. 5Tavra iliŋich quyatchaŋarut, suli aitchuġuŋagaat maniŋñik. 6Tavra Judas aŋiŋammiuq, aasii piviksraqsiugaqsivḷuni aitchuutigisukługu Jesus ilaiññun iñuich quviġlugich.
Jesus Niġiyumiññaksaqtuq Qulaurrusiqiviŋmi
(Matthew 26.17-25; Mark 14.12-21; John 13.21-30)
7Tavra tikiñŋaruq uvlua Puvlaksiŋaitchuam Punniġum, taamna qulaurrusiqutim imnaiyaam tuqutauviksraŋa. 8Tavra Jesus tiliŋagik Peter-lu John-lu uqallakłuni, Aullaġlutik itqanaiyautiyaqtuqtigut qulaurrusiqinikun niġiyumaugut. 9Iliŋikta apiġiŋagaak, Sumun itqanaiyaġiaquvisiguk taavrumiŋa. 10Ilaan kiuŋagik, Naalaġnisitchik. Aullaġitchik iniqpaŋmun, aasii paaġniaġaatik iñuum saagaqtuam qattamun imiġmik. Malikkumagiktik, 11aasii sumupayaaq isiqpan, uqallautiyumagiktik iñua iglum, Iḷisaurri uqallaktuaq, Sumiitpa tuyuġmiaqaġvik, niġġiviksraqput iḷitchitquratkalu qulaurrusiqunmik? 12Tavra iḷisautiniaġaatik inituruamik qiḷaguamik upaluŋaitchuamik. Tavrani itqanaiyautiyumagiptigut. 13Tavra aullaŋaruk, aasii paqinŋagaak Jesus uqausiatun inmiŋnun, aasii iliŋik itqanaiyaŋaruk qulaurrusiqutiksramik.
Atanġum Nullautchiġvia
(Matthew 26.26-30; Mark 14.22-26; 1 Corinthians 11.23-25)
14Tavra ikarraq tikiñman, Jesus aquvinŋaruq niġġiviŋñun piqatigivlugich tilirat iḷitchitqurani. 15Tavra ilaan uqallautiŋagai, Piyummatigipiallakługu niġiqatigiyumaŋagivsi uumiŋa Qulaurrusiqunmik nagliksaaŋaiñŋaġma. 16Qanuq uqallautigivsi, niġitqigñiaŋitkiga tikitchiaġilugu sivunipiaŋa atanniqsimaviani God-im. 17Tavra ilaan tiguŋagaa qallugauraq, aasii quyaanikami God-mun, uqallaŋaruq, Tigulugu taamna, autaaqsiuŋ ilivsiññun. 18Tavra uqallautigivsi paŋmapaŋmiñ aglaan, imiġniaŋitchuŋa uumiŋa wine-mik qaiñiŋanun aglaan atanniqsimavia God-im. 19Jesus tiguŋagaa punniq, aasii quyaanikami God-mun, aviŋagaa aitchuutigivlugu ilaiññun uqallakłuni, Tavra taamna timiga aitchuutauruaq ilivsiññun. Taamna pisiuŋ itqaummatigilugu uvamnun. 20#Jr 31.31-34.Tainnatun suli aitchuŋagai qallugauramik nullautchianikamiŋ, uqallakłuni, Una qallugauraq imaqaqtuq uvaŋa aumnik maqipkaqtauruamik pisigivlusi. Taavrumuuna God-im nalupqinaiġñiaġaa sivunniuġutini iñuŋnun.
21 #
Ps 41.9. Aglaattauq uvva iñuk uvaniittuq niġġiviŋñi aitchuutiginniktuaq uvamnik. 22Qanuq Iġñiŋa iñuum tuqutinniaqtuq God-im sivunniutaatun, aglaan qanutun naglignaqtigiruq taamna iñuk aitchuutiginniktuaq ilaanik. 23Tavra apiqsruqtuutirraqsiŋarut avanmun nalliqsiŋ aitchuutiginnigniaġmagaan ilaanik.
Uqavaaġun Kamanaġugnikun
24 #
Mt 18.1; Mk 9.34; Lk 9.46. Uqavaarraqsiŋarut iḷitchitqurat, nalliqsiŋ isumakkusiaqaġniaqtilaaksraŋanik kamanaġniqsraulugu. 25Tavra Jesus uqallaŋaruq ilaiññun, umialiŋich Jew-guŋitchuat atanniqsimasuugaich iñutiŋ suli tamatkua umialgich tairauvlutiŋ anniqsuiriñik. 26#Mt 23.11; Mk 9.35.#Mt 20.25-27; Mk 10.42-44.Aglaan tainna ilivsi piñiaŋitchusi. Aglaan kamanaġniqsrauruaq akunnavsiññi iḷiḷi nukaqłiqsun, suli aullarriruaq kivgatun. 27#Jn 13.12-15.Nalliak kamanaġniqsrauva, iñuk aquppiruaq niġġiviŋñi, naagga niqłiqsuqtuaq? Taamna aquppiruaq niġġiviŋñi. Aglaan uvaŋa kivgaġimmatun itkivsiŋa.
28Ilivsi nayuŋagivsiŋa iluqaiññi uuktuaġusiamni. 29Aapamali aitchuŋammaŋa atanniqsimmanmik, tainnatulli aitchuġniaġmigivsi atanniqsimmanmik, 30#Mt 19.28.aasii niġiñiaqtusi imiġlusiḷu niġġivimñi atanniqsimavimñi, suli aquppiḷusi umialgich aquppiutaŋiññi isivġiġḷugich qulit malġuk maŋŋuġiich Israel-guruat.
Jesus Uqautigigaa Piŋaiñŋaan Peter-m Piiḷaaġniksraŋa
(Matthew 26.31-35; Mark 14.27-31; John 13.36-38)
31Simon, Simon, naalaġniiñ. Satan uuktuaġumiñaqsiŋagaasi iluqasi, nunaliqiritun palauvaksranik amiġaiyairuatun. 32Aglaan Simon, aŋaiyyutiŋagikpiñ ukpiġutaiquŋił̣ł̣utin, aasii isumalitqianikkuvich, suaŋasiḷaagaksraġigitin aniqatiitin. 33Tavra Peter-m kiuŋagaa, Ataniiq, itqanaitchuŋa tigutaaqtauqatigiyumiñaqłutin tuquqatigiyumiñaqłutillu. 34Jesus uqallautiŋagaa, Uqallautigikpiñ Peter, tiŋmiaq nipanniaŋitchuq uumani uvlumi, ilivich piŋasuiqsuaġlutin piiḷaaganiksiaġilutin naluniḷuŋa.
Maniqaġvik Puukataġlu Savikpaglu
35 #
Mt 10.9, 10; Mk 6.8, 9; Lk 9.3; 10.4. Tavra Jesus uqallautiŋagai, Taimani aullaqtinnavsi maniqaġviił̣aaqłusi puukataiḷaaqłusiḷu aluġuġutaiḷaaqłusiḷu, sumik inuqtuŋavisi? Iḷitchitqurat kiuŋagaat, Inuqtuuraŋaitchugut sumik. 36Ilaan uqallautiŋagai, Aglaan paŋmapak, kiñaliqaa maniqaġviqaqtuaq puukataqaqtuaġlu saagaġligik. Suli kiñaliqaa savikpaitchuaq tauqsiġḷi savikpaŋmik tuniḷugu quppiġaani. 37#Is 53.12.Qanuq uqallautigivsi, Bible uqaluat sivuniqaqtuaq uvamnik inna nalauttuksrauruq, “Ilaa kisiuqatauŋaruq piḷuusiqirinun.” Suli supayaat aglausimaruat Bible-ni uvapkun taŋŋiġñiaqtut. 38Tavra iḷitchitqurat uqallaŋarut, Tautugiñ Ataniiq, uvva malġuk savikpaak. Ilaan uqallautiŋagai, Naamaruk.
Jesus Aŋaiyyuruq
(Matthew 25.36-46; Mark 14.32-42)
39Tavra Jesus aniŋaruq, aasii aullaqłuni piḷġusikaamisun iġġimun atiqaqtuamun Olives-mik. Iḷitchitqurat maliŋammigaat. 40Tavra tikiññami inimun ilaan uqallautiŋagai, Aŋaiyyusitchi payaritquŋiḷḷusi ikł̣igutchaktinniaġunmun. 41Tavra ilaa taikuŋaqtaallavsaaŋaruq iliŋiññiñ uyaġaŋmik miḷuqsalgutilaavalliqsun, aasii sitquqłuni aŋaiyyuŋaruq. 42Aapaaŋ, pisuutigigupku, piiġuŋ nagliksaaġutiqpak uvamniñ. Aasiivsauq uvaŋa pisuutiŋiḷaaptun, aglaan ilivich pisuutin piḷi. 43Tavra tavrani isaġulik qiḷaŋmiñ niptaŋaruq ilaanun aasii suaŋŋasiqł̣ugu. 44Aasii iłuiḷḷiuġutiqpaqaqłuni ilaa aŋaiyyuŋaruq qapiŋaipiaġataqłuni, suli ilaan siiqsipkaġniŋa kutaaŋaruq nunamun auktun kusiqsuatun. 45Tavra makinnami aŋaiyyuŋaiqł̣uni, ilaan ullaŋagai iḷitchitqurat suli tautuŋagai siñiktuat, isumaaqpaił̣ł̣utiŋ. 46Tavra ilaan uqallautiŋagai, Summan siñikpisi? Makillusi aŋaiyyusitchi payariŋitchumagaasi ikł̣igutchaktinniaġutim.
Tigurauruq Jesus
(Matthew 26.47-56; Mark 14.43-50; John 18.3-11)
47Tavra Jesus uqaġniaqtillugusuli, iñusalaich qaiŋarut, suli taamna Judas-mik atilik, iḷaŋat qulit malġuk iḷitchitqurat, aullarrivḷuni iliŋiññik. Ilaan ullaŋagaa Jesus kunigiaqługu. 48Tavra Jesus uqallaŋaruq ilaanun, Judas, aitchuutigiyumaviuŋ Iġñiŋa iñuum kunigḷugu? 49Tavra iḷitchitqurat avataaniittuat Jesus, iḷitchuġikamiŋ suna piaqsisilaaŋanik, uqallaŋarut, Ataniiq, savikpagaġniaqpisa? 50Tavra iḷaŋata anauŋagaa aŋaiyyuliqsiqpaum kivgaŋa, aasii siutaiqł̣ugu taliqpianik. 51Tavra Jesus iñiqtiŋagai, Tavraaġitchi. Aasii ilaan aksiuŋagaa siutaa iłuaqsivḷugu.
52Tavra Jesus uqallaŋaruq aŋaiyyuliqsiqpaŋnun atanauraŋiññullu aŋaiyyuvikpaum munaqsriŋisa umialiŋnanullu tiguriyaqtuqtuanun inmiñik, Qaiŋavisi tigligayuktimik pisaġmatun, savikpaŋnik anauttaniglu satkuqaqłusi tigusaqtuqłuŋa? 53#Lk 19.47; 21.37.Nayuqtigiraġikavsi uvlumiñ uvlumun aŋaiyyuvikpaŋmi tigulaitkivsiŋa. Aglaan piviksraqsi nalautittuq, taavrumalu suaŋŋataata taaqtuam.
Peter-m Piiḷaaġigaa Jesus
(Matthew 26.57-58, 69-75; Mark 14.53-54, 66-72; John 18.12-18, 25-27)
54Tavra ilaisa tigutaaŋagaat Jesus suli aullautivlugu aŋaiyyuliqsiqpaum igluanun. Peter maliġuaŋaruq aquatigun uŋasikł̣uni. 55Tavraasii igniqsuaniŋmata qitqanun siḷalliata kasimavium suli aquptaaqłutiŋ atautchimun, Peter aquvinŋammiuq akunġannun. 56Tavrani niviaqsiam kivgam, tautukługu Peter aquppipkaqtillugu igniġum qaummaŋani uqallaŋaruq, Una iñuk tuvaaqatauŋammiruaq Jesus-mun. 57Tavra Peter-m piiḷaaġiŋagaa taamna uqallakłuni, Aġnaaq, ilaa uvaŋa nalugiga. 58Akkuliurallaksiññaġman iñuum tamaaŋŋa tautulgitkaa Peter aasii uqallakłuni, Ilivich uvva iḷagimmigaatin. Tavra Peter uqallaŋaruq, Aŋuun, iḷagiŋitkaanŋa. 59Taavruma aquagun ikarraq pianikpalliġman, allasuli iñuk katchuŋaiqsruqłuni uqallaŋaruq, Nalupqinaitchuamik una iñuk piqatauŋaruq Jesus-mun qanuq Galilee-ġmiugummiuq. 60Tavra Peter uqallaŋaruq, Aŋuun, naluruŋa sumik uqautiqaqtilaaġnik. Tavra tavrauvvaa, uqaġniaqtillugusuli, tiŋmiaq nipanŋaruq. 61Aasiisuli Ataniq qiviaqłuni qiñiŋagaa Peter. Tavra Peter itqaiŋaruq uqaluanik Atanġum uqallautaanik inmiñun, Sivuani tiŋmiam nipanniksraŋan uvlupak, piiḷaaġiniaġiŋma piŋasuni naluniḷuŋa. 62Tavra Peter aniŋaruq aasii qiapiaġataŋaruq.
Jesus Kipagigaat Anaumikł̣ugulu
(Matthew 26.67-68; Mark 14.65)
63Tavra taapkua munaqsriruat Jesus-mik kipagiŋagaat anaullaqługu. 64Suli irrak mattutchiqł̣ugik apiġiraġaŋagaat, Kia qakiqpatin? Nalautchaġiñ. 65Suli iliŋich uqallaŋarut iñugiaktuanik uqaluŋnik pisaaŋavlugu uqamaqłuutivlugulu.
Jesus Apiqsruqtuġaat Uqaqsitaaġviŋmi
(Matthew 26.59-66; Mark 14.55-64; John 18.19-24)
66Tavra uvluġman, umialiŋnaŋich Jew-guruat aŋaiyyuliqsiqpaiḷḷu iḷisaurriḷḷu pitquranik katinŋarut atautchimun, aasii qaġġisiŋagaat Jesus uqaqsitaaġviŋmiŋnun. 67Apiġiŋagaat, Ilivich Christ-guvich? Uqallautitigut. Tavra Jesus kiuŋagai, Uqallautigaluaġuvsi ukpiġiniaŋitkivsiŋa. 68Suli apiġigaluaġmiguvsi kiummagaaġma, kiuniaŋiñmigivsiŋa nalaunŋaruamik. 69Aglaan paŋmapaŋmiñ Iġñiŋa iñuum aquppiutchiqsauniaqtuq taliqpiata tuŋaanun Sapiġñaqtuam God-im. 70Tavra iluqaġmiŋ uqallaŋarut, Uvvailivich Iġñiġivatin God-im? Tavra Jesus kiuŋagai, Uqallaktusi Iġñiġinivḷuŋa. 71Tavra iliŋich uqallaŋarut, Iñuvsaanik pasiññiktuksranik ilaanik piqaqtuksrauŋaiqsugut. Uvagut paŋmapak tusaaganikkivut ilaan uqaluŋi Iġñiġinivḷuni God-mun.
موجودہ انتخاب:
Luke 22: INUPIAQ
سرخی
شئیر
کاپی
کیا آپ جاہتے ہیں کہ آپ کی سرکیاں آپ کی devices پر محفوظ ہوں؟ Sign up or sign in
Iñupiatun Mumiksat Uqalugiksuat (North Slope Iñupiaq Bible) © American Bible Society.
All rights reserved.
Bible text from the North Slope Iñupiaq Bible is not to be reproduced in copies or otherwise by any means except as permitted in writing by the copyright holder:
American Bible Society, 101 North Independence Mall East, Floor 8, Philadelphia, PA 19106-2155 (www.americanbible.org)
