Luke 12
12
Kiliktuun Ukpiŋŋuaġnikun
(Matthew 10.26-27)
1 #
Mt 16.6; Mk 8.15. Iñuich iñugiaksiqpapiaġataqłutiŋ iḷimmata katittuat atautchimun tunmautillasiḷaaqamik unnii, Jesus uqautirraqsiŋagai iḷitchitqurani, Qaunagisitchi imaksrautiŋiññiñ Pharisees, sivuniġigiga ukpiŋŋuaġutaat. 2#Mk 4.22; Lk 8.17.Qanuq ukpiŋŋuaġun satqummiġumaaqtuq, iriqsimagaluaġumi paŋmapak. 3Aasiivsauq ilivsi iḷumun ittuq, sunapayaaq iñuił̣aami uqallautigikkaqsi satqummiġñiaġmiuq. Suli isivruutigikkaqsi inaurani quliaqtuaguniaqtuq iglut qaaŋiññiñ.
Iñuich Sivuuġagiłhaaġnagich
(Matthew 10.28-31)
4Uqallautigivsi, uvaŋa avilaitqatiitkaa, sivuuġaginagich tuqutchiruat timimik, taavruma aquagun sunnikkumiñaitchuat. 5Aglaan uvva kilikkivsi sivuuġagiraksravsiññik. Sivuuġagisiuŋ God, tuqupkaiganikami suaŋŋatiqaqtuaq nagliksaaġviŋmuktitchiyumiñaqłuni. Aaŋ, uqallautigivsi, sivuuġagisiuŋ. 6Tallimat tiŋmiaġruurat tuniñaitpat malġugnun maniuraŋnun? Aasiuvva atausiq unnii iḷaŋat God-im piigulaitkaa. 7Nutchasiunnii niaquvsiññiittuat kisisaaqtaurut. Tavraasii iqsiñasi, akisułhamaaqtusi iñugiaktuaniñ unnii tiŋmiaġruuraniñ.
Quliaqtuaqaġniq Christ Annaurriginivḷugu
(Matthew 10.32-33; 12.32; 10.19-20)
8Aasii uqallautigivsi, kialiqaa quliaqtuaġigumiŋa iñuŋnun piginiḷuni uvamnun, Iġñiŋattauq iñuum tainnatun quliaqtuaġiniaġmigaa isaġuliŋiñun God-im. 9Aglaattauq kialiqaa piiḷaaġikpaŋa iñuŋnun pigiŋiññiḷuni uvamnun, Iġñiŋataptauq iñuum piiḷaaġiniaġmigaa isaġuliŋiñun God-im. 10#Mt 12.32; Mk 3.29.Suli kiñapayaaq uqallakkumi pigiitchuamik Iġñiŋagun iñuum, suliqutigiŋaiqsauyumiñaqtuq itqaumayumiñaiġḷugu, aglaan kiñaliqaa uqallaktuaq pigiitchuamik Ilitqusiġiksuakun, suliqutigiŋaiqsauyumiñaitchuq.
11 #
Mt 10.19, 20; Mk 13.11; Lk 21.14, 15. Aasii qaġġisikpasi isivġiġuglusi Jew-guruat aŋaiyyuviŋiññun kavanauruallu atanaurallu, uŋiariñasi isumalusi sumik kiggutiksravsiññik, naagga patchisaiññiksravsiññik. 12Qanuq Ilitqusiġiksuam iḷisautiniaġaasi taavrumani ikarraġmi sunik uqaqtuksrautilaavsiññik.
Uuktuun Iñukun Suġalliruakun Isumalaaġutaił̣ł̣uni
13Iḷaŋata iñusalaich uqallautiŋagaa, Iḷisaurrii, uqallauttuuŋ aniqatiga autaaqatigitquluŋa kiŋuvaannaktaaksrautiptiŋnik. 14Tavra Jesus kiuŋagaa, Iñuuk, kia isivġiqsiġuqpaŋa naagga autaaqtiliutivluŋalu suġautavsiññun. 15Tavra Jesus uqallautiŋagai iñuich, Qaunagisitchi piḷḷatuvaił̣aŋniġmiñ, qanuq iñuk suġallakkaluaqami unnii sippakuutaallasivḷuni suġaliŋisa iñuggutiksriḷaitkaat. 16Tavra ilaan quliaqtuaġutiŋagai uuktuunmik uqaqłuni, Nunaŋa iñuum suġalliruam nauriqpaŋaruq. 17Aasii isumaŋaruq, Sulaŋatuġuvaŋa, qanuq uvva tutquqsiviksraitkaqsiruŋa sumun nauriamnik. 18Tavra uqallaŋaruq, Innauvva piñiaqtuŋa. Iguminniaġitka suġalliqpitka, aasii nappaiḷuŋa aŋiłhaaqtuanik, aasii tavruŋa tutquġlugich palauvaksrat nauriatka, iluqaisalu suġalitka. 19Tavraasii uqallautiniaqtuŋa uvamnun, Piḷḷuataqtuŋaasuuvaŋa. Iḷaŋaniñ suġaliġmik tutquqsiruŋa ukiuksranun iñugiaktuanun. Siġġaqiŋaiġḷaŋa, niġiugaġlaŋa, imiġluŋalu, aliasuŋiḷḷuŋalu. 20Tavrali God-im uqallautiŋagaa suġalliruaq, Isumalluaġiitchuatiin. Unnuapak iñuggutaiqsauniaqtutin, aasii kia piginiaqpagich suġalġich katitatin? 21Tavra Jesus uuktuun aġiusausiŋagaa, uqallakłuni, Tainnauvva iñuk ittuq nulauksiruaq suġaliġnik piksramiñik, ukpiġigaluaġnagu God.
Ukpiġutiqaġniq God-mun
(Matthew 6.25-34)
22Tavra Jesus uqallautiŋagai iḷitchitqurani, Taapkuniŋa uqallautigivsi, uŋiarrisiginagu iñuggurri, sumik niġiñiaqtilaaksraqsi, naaggaunnii sumik annuġaaġniaqtilaavsiññik. 23Qanuq iñuggun naumałhaaqtuq niqiksraqsiuqsiññaġniġmiñ, timisuli naumałhaaqtuq annuġaaniñ. 24Qiñiqsigik tulukkat. Kanġaqsruiḷaitchut nautchiaksranik kivriḷaitchullu. Suġalliqpiitchut, tutquqsiviiñmiut, naaggauvva God-im niġipkaqsimaaġai. Ilivsi akisułhaaqtusi tiŋmianiñ. 25Aasiiḷi nalliqsi iñuuniqtusiḷaaġumiñaitchuq uŋiarigiññaġluni. 26Tavraasii piḷḷayumiñaiññiġuvsiuŋ tainnatun mikitigiruaqunnii, summan uŋiarrisaġivisigik tamatkua. 27#1 K 10.4-7; 2 Ch 9.3-6.Qiñiqsigik nauriat qanuq nausuutilaaŋat, siġġaqilaitchut annuġarriulaitchullu, uqallautigivsi naaggauvva Solomon unnii qanutun kamanaqtigigaluaqłuni annuġaaŋaitchuq atautchisun-unnii tamatkunatun nauriatun qiñiyunaqtigiliġḷuni. 28Tainnatun God-im qaunagillaniqpagich nauriallu ivgiḷḷu uvlupałhiñaq nauruat aasii uvlaakun qirriutivlugich igniġviŋmun, nalupqinaitchuq annuġaaksraqaqtinniaġaasi. Qanutun ilivsi ukpiġutikisigirusi. 29Tavraasii uŋiariñasi. Apiqsruqtuġnasi inna, sumik niġiñiaqpisa? Sumik imiġniaqpisa? Uŋiarrisiqaġnasi. 30Qanuq ukpiŋaitchuat mattumani nunami piññagnialarut iluqaiññik tamatkuniŋa. Aapari iḷisimaruq ilivsiññun pigiraksraġitilaaŋannik tamatkua. 31Tavraasii piqaqtinniaġaasi iluqaiññik tamatkuniŋa ilivsi atanniqsimapkaqqaaġuvsi God-mun.
Jesus Iḷisaurriruq Suġaliqtigun
(Matthew 6.19-21)
32Iqsiñasi iñukitchuasii imnaich, qanuq Aapari iviġaumaruq atanniqsimasukłusi aasii qaunagilusi. 33Tavraasii tunisigik suġalisi, aasii nagliktuutigilugich. Tainna piguvsi maniqaġviqaġmatun maqulaitchuanik inniaqtusi, suġaliqaġmatun qiḷaŋmi nuŋulaiḷaanik. Tatpagmani tigligayuktit piyumiñaitkaich, qupilġullu maqunniaŋitkaich. 34Qanuq irvianni suġaliqpich, tavraniitchugniaġmiutin.
Kivgat Quviqtaiḷiruat
35 #
Mt 25.1-13. Itqanaitchitchi annuġaaqtummaġiksaaŋalusi, nannisi ikumalugich, ataramik niġiugilugu Ataniqsi utiġumaaqtuaq. 36#Mk 13.34-36.Irrusiqaġlusi kivgatun niġiuktuatun ataniġmiŋnik aiyumaaqtuamik niqinaqiruaniñ katirrusiqivlutiŋ, upkuiġutiyumavlugu tavrauvvaa qaiḷuni tigluktuqpan. 37Quviasuglich taapkua kivgat atanġata paqinniakkaŋi itqumalugich qaigumi. Iḷumun uqallautigivsi, ilaa qalliġñik annuġaaġiksuanik annuġaagiyaġluni aquvitillugich niġġiviŋñun, niqłiqsuġniaġai. 38Qanutun quviasuglich kivgat Atanġata iḷitchuġikkaŋi itqanaił̣ł̣ugich unnuam qitqani naagga aksraksaaġaluaqpan. 39#Mt 24.43, 44.Una suli iḷisimalugu. Igluqpiraqti iḷisimaŋagumi suqpatigun tigligayukti siqumutiluni qaiñiaqtilaaŋanik, isiqtinnayaitkaa. 40Ilivsivsauq itqanaitchitchi, qanuq Iġñiŋa iñuum qaiñiaqtuq ikarrami niġiugvigiŋisavsiññi.
Ukpiġnaqtuaq Naagga Ukpiġnaitchuaq Kivgaq
(Matthew 24.45-51)
41Peter uqallaŋaruq, Ataniiq, quliaqtuaġiviuŋ taamna uuktuun sivuniġivluta naagga sivuniġivlugich iñupayaat? 42Tavra Atanġum kiuŋagaa, kiuniaqpaasii ukpiġnaqtuaguvluni isumaturuaguvluniḷu kivgaq? Taamnauniaqtuq kivgaq atanġata qaukłiḷiutiniakkaŋa allanun kivganun niqiksritqulutiŋ piñaqsikpan. 43Quviasugli taamna kivgaq atanġata qaigumi paqinniaqtaŋa tainna savaktuagulugu. 44Iḷumun uqallautigivsi, ilaan atanġata atanniutiniaġaa iluqaiññun suġaliġmiñun. 45Tavraaglaan taamna kivgaq isummiġumi, Ataniġa qaiḷḷaiġutiruq, aasii anaumiaqsiḷugich aŋutit kivgat aġnallu kivgat, niġivḷuni imiqłuniḷu imiŋasivḷuniḷu. 46Atanġa taavruma kivgam qaiñiaqtuq uvlumi ilaanun niġiugvigiŋisaŋani suli kisumi ikarraġmi nalukkaŋani, aasii tatavsapiaġataġniaġaa, piqasiutilugu kamakkutaitchuanun.
47Aasii taamna kivgaq iḷisimaŋagaluaqłuni ataniġmi pisuutaanik, aasii itqanaiyaŋitchuaq kamagiŋił̣ł̣ugulu pisuutaa ataniġmi, ipiġaqtuusiaqapalugniaqtuq. 48Aglaan kivgaq naluruaq ataniġmi piraksriutaanik, pigaluaqtuaq ipiġaqtuusiaqaġnaġumiñaqtuamik, ipiġaqtuusiaqapiaġniaŋitchuq. Iñupayaaq savaaksriusiaqpaqaqtuaq Atanġum niġiugviginiaġaa tainnatun pitqulugu, suli iñupayaaq savaaksriusiaqavsaaqtuaq niġiugvigirauvsaaġniaġmiuq tainnatuttauq pitqulugu.
Jesus Atiŋirrutiġullaruq Iñuŋnun
(Matthew 10.34-36)
49Nunamuŋaruŋa isumaaluutauyyaqłuŋa. Qaiñiġa ittuq igniqsuġmatun nunamun, ami igniq ikuallaaniquyumagaluaġiga. 50#Mk 10.38.Nalautchaagaksraġigitka isumaaluutit paptaiġutigimmatun piḷugich, aasii qanutun iłuiḷḷiuġutigisaġataġitka pilluŋniŋannun aglaan. 51Isumavisi nunamuŋanasugaluŋa atisipkaġiaqsaqługich iñuich? Naagga, uqallautigivsi, qaiŋaruŋa atinġiġiaqługich. 52Qanuq paŋmapaŋmiñ aglaan iglumi atautchimi tallimat atinġiġñiaqtut, piŋasut akiḷḷiulutiŋ malġugnun, suli malġuk piŋasunun. 53#Mic 7.6.Atinġiġñiaqtut aapa iġñiġmun suli iġñiq aapamun, aaka paniŋmiñun suli paniuruaq aakamiñun, aakaruaq ukuamiñun suli ukuaguruaq aakaruamiñun.
Kaŋiqsisiqaġniq Sutigun Piyumaaqtuatigun
(Matthew 16.2-3)
54Jesus uqallautiŋammigai iñusalaich, Tautukavsiuŋ nuvuya nausaġataqtuaq ualiñaami, uqallagnasaalaitchusi sialuguġniaġaa, taimmaasii sialuguġuuruq. 55Suli tautukavsiuŋ uŋalaq anuqłiqsuaq, uqallagmiraqtusi, pasigñaqsiḷuguunnii uunnaġuġniaġaa, taimmaasii uunnaġuġuuruq. 56Ilivsi ukpiŋŋuaqtuasii, iḷisimagaluaqtusi siḷaksramik qiññaŋagun nunam qiḷauvlu, aglaan kaŋiqsiḷaiññiġiksi suliqitilaaġa.
Atisiqatigiuŋ Akiḷḷiñ
(Matthew 5.25-26)
57Summan aasii kaŋiqsiḷaitpisi ilivsiññik, sum nalaunŋatilaaŋanik piraksravsi? 58Iñuum pasikpasi pitquratigun aasii aullautilusi uqaqsitaaġviŋmun, atisiqatiginiḷuksiuŋ pasiriksi uqaqsitaaġviŋmullavsi. Iḷaanni aitchuutigiviaġaasi isivġiqsimun, aasiiḷi isivġiqsim aitchuutigilusi tigurimun, aasii tigurim tigutaaġviŋmuglusi. 59Uqallautigivsi, aniḷġataġumiñaitchusi tigutaaġviŋmiñ akiḷiġaluaġnagich akiḷiaksrapayaurasi.
موجودہ انتخاب:
Luke 12: INUPIAQ
سرخی
شئیر
کاپی
کیا آپ جاہتے ہیں کہ آپ کی سرکیاں آپ کی devices پر محفوظ ہوں؟ Sign up or sign in
Iñupiatun Mumiksat Uqalugiksuat (North Slope Iñupiaq Bible) © American Bible Society.
All rights reserved.
Bible text from the North Slope Iñupiaq Bible is not to be reproduced in copies or otherwise by any means except as permitted in writing by the copyright holder:
American Bible Society, 101 North Independence Mall East, Floor 8, Philadelphia, PA 19106-2155 (www.americanbible.org)
