مرقوس 3

علئل بئر آدامین شفاسی

(متّا 12‏:9‏-14، لوقا 6‏:6‏-11)

1عئسا گئنه کنئسه‌یه گئردی. اورادا اَلی قوروموش بئر آدام وار ائدی. 2اونلار عئسانی دئقّتله گؤز آلتینا آلمیشدیلار کی، سبّت گونونده او کئشئیه شفا ورسئن و بونون اوچون اونا ائتّئهام وورسونلار. 3عئسا اَلی قوروموش آداما ددی: «اورتادا دور.» 4و اونلارا ددی: «سبّت گونونده نه اتمک جائزدئر یاخشیلیق اتمک، یوخسا پئسلئک اتمک؟ جان قورتارماق، یوخسا جان آلماق؟» اونلار ساکئت دورموشدولار. 5عئسا اطرافیندا اولان آداملارا قضبله باخیب، اونلارین اورَکلرئنئن برکلئیئندن چوخ قمگئن اولدو و او کئشئیه ددی: «الئنی اوزات.» او آدام الئنی اوزاتدی و اَلی اوّلکی کئمی اولدو.

6فرئسئلر آنَن چیخیب هئرودچولارلا برابر عئسانی اؤلدورمک اوچون مشورت اتدئلر. 7آمّا عئسا شاگئردلری ائله دهنز طرفئنه چکئلدی و جلئلدن چوخ آداملار اونون دالینجا گتدئلر. 8و اونون بوتون اتدئکلرئنی اشئدنلر یهودئیه‌دن، اورشلئمدن، ائدومئیه‌دن، اوردون چایینین او تاییندان، صور و صیدانین اطرافلاریندا یاشایانلاردان بؤیوک بئر جاماعات اونون یانینا گلدی. 9جاماعاتین اونو سیخیشدیرماسی اوزوندن عئسا شاگئردلرئنه ددی کی، اونون اوچون بئر قاییق حاضیرلاسینلار. 10چوخ ائنسانلاری شفا وردئیی اوزوندن ناخوش آداملاردان چوخلاری عئسانین اوستونه آتیلیردیلار کی، اونا توخونسونلار. 11و ناپاک روحلار اونو گؤرنده قاباغیندا یره قاپانیردیلار و باغیریب دیئردئلر: «سن تارینین اوغلوسان.» 12آمّا عئسا اونلارا قدغن ادئردی کی، اونون کئم اولدوغونو آشکار اتمه‌سئنلر.

اون‌ائکی شاگئردئن سچئلمه‌سی

(متّا 10‏:1‏-4، لوقا 6‏:12‏-16)

13عئسا داغا چیخیب، اؤزو ائسته‌دئیی آداملاری یانینا چاغیردی و اونلار اونون یانینا گتدئلر. 14و اون‌ائکی نفر تعیئن اتدی کی، اونونلا قالسینلار و اونلاری وعظ اتمه‌یه گؤندَ‌رسئن 15و ائقتئدارلاری اولسون کی، ناپاک روحلاری آداملاردان قووسونلار. 16تعیئن اتدئیی آداملار بونلار ائدئلر: شمعون کی، اونا «پطروس» لقبئنی ورمئشدی، 17زِبِدِی اوغلو یعقوب و قارداشی یوحنّا کی، اونلارا «بواَنرجس» لقبئنی ورمئشدی، بواَنرجس یعنی ائلدیرم اوغوللاری، 18آندریاس، فئلئپوس، بَرتولوما، متّا، توماس، و آلفاعوس اوغلو یعقوب، تَدای، وطن‌پرست شمعون، 19و ائسکاریوتلو یهودا کی، اونو دوشمن اَلئنه تسلئم اتدی.

عئسا و بَعَلزِبول

(متّا 12‏:22‏-32، لوقا 11‏:14‏-23، 12‏:10)

20اونلار اِوه گلدئلر و گئنه جاماعات ییغیلدی، اِله کی، چؤرک یمه‌یه بله ائمکانلاری اولمادی. 21قوحوملاری بونو اشئدن زامان اونو آپارماغا گلدئلر. دیئردئلر:#3‏:21 یا دا «خالق دیئردی:» «دلی اولوب.» 22اورشلئمدن گلن عالئملر دیئردئلر: «بعلزبول اونون ائچئنه گئرئب و ائبلئسلر ریئسئنئن واسئطه‌سئله ائبلئسلری قووور.» 23عئسا اونلاری یانینا چاغیریب مثل‌له ددی: «شیطان، شیطانی نجه قووا بئلر؟ 24ائکی یره بؤلونموش بئر مملکت داوام گتئره بئلمز. 25اؤز ائچئنده ائکئیه بؤلونن بئر اِو ده آیاق اوستونده قالا بئلمز. 26اگر شیطان اؤزونه ضئدّ دوروب اؤزونده آیریلیق سالسا، داوام گتئره بئلمز و اونون آخیری یتئشئب. 27هچ کئم گوجلو بئر آدامین اِوئنه گئرئب مالینی اوغورلایا بئلمز، مگر اوّلجه اونون قوللارینی باغلاسین. او زامان اونون مالینی اوغورلایا بئلر. 28دوغروسونو سئزه دیئرم، هامی گوناهلار، هامی کوفرلر ائنسان اوغوللارینا باغیشلانار 29آمّا موقدّس روح حاقّیندا کوفر دئین آدامین گوناهی هچ واخت باغیشلانماز و تقصئری ابده کئمی اوستونده قالار.» 30چونکی اونلار «اوندا ناپاک روح وار» دیئردئلر.

عئسانین آناسی و قارداشلاری

(متّا 12‏:46‏-50، لوقا 8‏:19‏-21)

31عئسانین آناسی و قارداشلاری گلدئلر و اشئکده دوروب عئسانی چاغیرماق اوچون اونون یانینا آدام گؤندَردئلر. 32عئسانین اطرافیندا اوتوران خالق اونا ددئلر: «آنان و قارداشلارین اشئکده دوروب سنی آختاریرلار.» 33عئسا اونلارا جاواب ورئب ددی: «آنام و قارداشلاریم کئملردئر؟» 34و اطرافیندا اوتورانلارا باخیب ددی: «باخین، آنام و قارداشلاریم. 35هر کس تارینین ائسته‌دئیئنی یرئنه یتئرسه، قارداشیم، باجیم، و آنام اودور.»

موجودہ انتخاب:

مرقوس 3: موقدس کتاب

سرخی

شئیر

کاپی