Ioane Nō runga i tēia puka
Nō runga i tēia puka
Ko 'ai tikāi a Iēsū Mesia? Kua pa'u a Ioane i tēia ui'anga i roto i te pene ta'i o tāna 'ēvangelia. Nā roto i te tā'iku'anga mai i te au tuatua 'īmene a te au Keretitiāno mua, i 'akakite ei aia ē, ko Iēsū te Tuatua, ē nā roto i aia i 'anga ai te Atua i te au mea kātoatoa, ē nā roto mai i aia te 'ōronga'anga mai i te ora ki te tangata tātakita'i (1.3,4). Kua 'akaāri mai aia i tā Ioane Bāpetīto i 'akakite nō tō Iēsū 'aere'anga mai, “Ka 'ākara na i te Punua Māmoe a te Atua, ko tei 'apai kē atu i te 'ara a tō te ao nei” (1.29). I tō Philipa 'ārāvei'anga i a Iēsū, kua nakiro aia ē, ko Iēsū, “tā Mōse ē tā te au peroveta ra i tātā” (1.45). Ē i roto i tā Nātanāela i tuatua, ko Iēsū, “te Tamaiti a te Atua ē te ariki o Īserā'ela” (1.49).
I roto i tā Ioane 'ēvangelia, 'e mānganui te au mea tei 'akaāri mai ki a tātou ē, ko 'ai tikāi a Iēsū, nā roto i te 'ākarakara'anga i tāna i tuatua ē tāna i rave i rotopū i te au tangata. Kua kāpiti katoa'ia mai i roto i tēia au mea nei: tō te va'ine Sāmāria 'āriki'anga i te vai ora tā Iēsū i 'ōronga atu ki aia; te va'ine 'ara tei 'opu'ia; tōna 'oa ko Lāzaro tei 'akatū'ia e Iēsū mei te mate mai; ē tāna pipi ko Toma tei 'ēkōkō i te tū'aka'ou'anga a Iēsū mei te mate maira. E tā'iku katoa ana a Iēsū i aia 'ua'orāi ē, “KO AU” koia 'oki “TĒ VAI NEI AU,” 'e tākiato tuatua tei 'uri'ia nō te ingoa tapu nui rava atu nō te Atua i roto i te Tātā'anga 'Ēbera. Kua tā'iku aia i tēia ingoa nōna 'ua'orāi i te 'akakite'anga aia ē, ko au te kai ora; ko au te mārama o te ao nei; ko au te tiaki māmoe meitaki; ē, ko au te vine mou.
E 'itu au 'anga'anga ūmeremere tā Iēsū i rave tei ma'ata atu tō rātou tūranga i te semeio. 'E au “'akairo” te reira tei 'akakite mai ki a tātou ē, ko Iēsū ko te Tamaiti aia nā te Atua. 'Ei 'ākara'anga: kua 'akaora'ia tēta'i tangata maki (5.1-8), ē kua 'akaāri mai a Iēsū ē, kua 'āite rāi aia ki tōna Metua tei kore e tīvata i te 'anga'anga (5.17). Tē 'āpi'i katoa mai nei tēia 'akairo ē, ko tā te Tamaiti 'ua ka rave, ko tāna ia i kite i tōna Metua i te rave'anga (5.19), ē mei te Metua rāi “koia katoa 'oki te Tamaiti i te 'ōronga'anga mai i te ora ki tēta'i 'ua atu tāna e anoano ra” (5.21).
Ko te tū o tā Ioane taki'anga i te tua nō Iēsū, e tūkē te reira ki tā ēta'i ngā 'ēvangelia e toru. I roto i tēia puka nei, 'e au 'uri'uri'anga manako roa tā Iēsū i rave ki te tangata ē ko 'ai aia, ē 'e a'a te 'anga'anga tā te Atua i tono mai i aia kia rave. I roto i ēia 'uri'uri'anga nei, 'e mānganui 'ua atu rāi te au mea pu'apinga tāna i 'āpi'i. 'Ei 'ākara'anga: koia 'oki te mataara, te tuatua mou ē te ora (14.6).
'E a'a rā te tumu i tātā ai a Ioane? Ko Ioane 'ua'orāi tei 'akakite mai ki a tātou, “Kia 'irinaki kōtou ē, ko Iēsū te Mesia, te Tamaiti a te Atua” (20.31). Ka 'akapē'ea e tupu ei tēia? Kua pa'u a Iēsū i taua ui'anga ra nā roto i tāna tuatua'anga ki a Nīkōdemo:
“Kua aro'a mai te Atua i te ao nei, kua tae roa mai ki te 'ōronga'anga mai i tāna Tamaiti 'ānau ta'i, kia kore e mate te tangata tātakita'i tei 'irinaki i aia, kia rauka rā i aia te ora mutukore” (3.16).
Te 'akano'ono'o'anga o tēia puka
1. 'Īmene 'akapa'apa'a i te Tuatua 1.1-18
2. Te karere a Ioane Bāpetīto 1.19-34
3. Tō Iēsū 'iki'anga i tāna au pipi mua 1.35-51
4. Tā Iēsū 'akairo Takakē e 'itu 2.1—12.50
5. Tō Iēsū 'akavā'anga'ia ē tōna mate'anga 13.1—19.42
6. Tē ora nei rāi a Iēsū 20.1-10
7. Tō Iēsū mama'anga mai ki tāna au pipi 20.11—21.25
موجودہ انتخاب:
Ioane Nō runga i tēia puka: CIMRNT
سرخی
شئیر
کاپی
کیا آپ جاہتے ہیں کہ آپ کی سرکیاں آپ کی devices پر محفوظ ہوں؟ Sign up or sign in
Cook Island Maori Revised New Testament © Bible Society of the South Pacific, 2021.