'Anga'anga Nō runga i tēia puka
Nō runga i tēia puka
Ko te rua tēia o te puka tei tātā'ia e Luka. Ko te puka mua tāna i tātā, ko ia tei mātau'ia ē, ko Te 'Ēvangelia a Luka. I roto i te reira, kua 'akakite mai aia i te “au mea kātoatoa tā Iēsū i rave ē i 'āpi'i mei te 'akamata'anga mai, e tae 'ua atu ki tōna 'apaina'ia atu'anga ki runga i te rangi” (1.1-2). I roto i tēia puka nei, tē taki nei rāi a Luka i te tua nā roto i te 'akakite'anga mai i tēta'i au manamanatā tei tupu ki te au pipi, i a rātou e tāmata ra i te kauraro i te 'akaue'anga a Iēsū: “Ka riro 'oki kōtou 'ei au kite nōku i Iērūsalēma nei, ē i Iūdea katoa e pini 'ua ake, ē i Sāmāria, e tae 'ua atu ki te 'openga o te 'enua ra” (1.8).
'E ma'ata te au pā 'enua tūkēkē tei tā'iku'ia i roto i te 'Anga'anga, mei te mea atura ē, kua tātā'ia tēia puka nei nō te 'akakite 'ua'anga i te toto'a'anga o te karere Keretitiāno. Ko tēta'i tu'anga 'ua rā ia o te tua. I muri ake i tō Iēsū 'apaina'anga'ia ki runga i te rangi, ko tēta'i manatā ma'ata i tupu ki tāna au pipi, koia te 'akatikatika'anga ē, ko 'ai te ka 'āriki'ia 'ei 'iti tangata nō te Atua. I te mea 'oki ē, 'e Ngāti Iūda a Iēsū ē tāna au pipi mua, 'e mea ngō'ie 'ua ki te ma'ata'anga i ō rātou i te manako ē, nō te Ngāti Iūda anake 'ua tāna karere. Inārā, i roto i te 'Anga'anga, tē no'o tinamou 'ua ra te Vaerua, nāna i 'akakite mai ē, i 'aere mai a Iēsū e 'akaora i te Ngāti Iūda ē te au 'ētene katoa, ē tē anoano maira te Atua i te au pipi nō te au pā 'enua ē te au 'iti tangata kātoatoa, kia riro mai rātou 'ei 'iti tangata 'okota'i.
Kua tupu te tau'ētono'anga mua i rotopū i te au Keretitiāno ē te Ngāti Iūda i te kōpae'anga tēta'i pāpāki arataki o te 'ākono'anga Ngāti Iūda i te karere nō Iēsū (4.1-31; 7.1-59). Kua tupu rā te manamanatā ma'ata ki te 'ēkālēsia mua, nō te mea i te 'akamata'anga, kāre te au pipi i nakiro ē, ko tēta'i 'ua atu tangata te ka tika'ia kia riro mai 'ei pipi nā Iēsū ma te kore e nā mua i te 'akariro i aia 'ei Ngāti Iūda. Kua 'akamata tēia i te taui i te tīmata atu’anga a Philipa i te kave atu i te tuatua meitaki ki te 'iti tangata Sāmāria (8.7-25), ē i te 'aere'anga atu a Pētero ki te ngutu'are o Korenēlio, tēta'i rangatira 'ānere i roto i te nuku va'e'au Rōma (10.1-48).
Ē i te 'openga i'ora, kua 'akakitekite atura a Pētero ki te 'ēkālēsia i Iērūsalēma (11.1-18), ē kua rave'ia atu tēta'i 'uipā'anga ki reira (15.3-35) nō te 'uri'uri'anga i te ui'anga ē, ko 'ai ka tika'ia kia riro mai 'ei au pipi nā te Mesia. I mua ake ka 'akaoti ei te 'uipā'anga, kua 'akatika te kātoatoa rava ē, ko te Vaerua o te Atua tēia e arataki nei i a rātou kia toto'a atu rātou i te karere meitaki o Iēsū ki te au 'ētene, ē pērā katoa 'oki ki te au Ngāti Iūda.
Ko Paulo te tangata 'okota'i tei ma'ata rava atu tāna i rave nō te toto'a'anga i te 'akarongo, ē ko te tuatua ma'ata tā tēia puka e 'akakite nei, ko tāna au ako'anga rāi ia ki te au 'ētene. Ē i te pae 'openga, kua 'apai atura aia i te karere ki Rōma, ki te 'ōire pāpānunui rava atu o tēianei ao i taua tuātau ra (28.16-31). Ko tēta'i 'akakoro'anga ma'ata i tātā ai a Luka i tēia puka, koia 'oki, ko te 'akaāri mai ē, kāre te karere Keretitiāno e rauka i te tāpū i te toto'a'anga atu ki te au ngā'i rava rāi.
“No'o atura a Paulo e rua akera mata'iti pūpū ki roto i tōna 'ua'orāi 'are tāra'u ra, ē kua 'āriki maira aia i te tangata rava rāi tei 'aere mai e 'ārāvei i aia ra, ma te 'akakite atu i te bāsileia o te Atua ē te 'āpi'i atu i te karere o te 'Atu ra ko Iēsū Mesia ma te matakukore, ē kāre tākiri aia i ārairai'ia” (28.30-31).
Te 'akano'ono'o'anga o tēia puka
1. Te 'akakite'anga i te karere meitaki i Iērūsalēma 1.1—8.3
2. Te karere meitaki i Iūdea ē Sāmāria 8.4—12.12
3. Te tere mua o Paulo nō te tūtū i te karere meitaki 13.1—14.28
4. 'E tuku'anga tika pu'apinga i Iērūsalēma 15.1-35
5. Te rua o tō Paulo tere nō te tūtū i te karere meitaki 15.36—18.22
6. Te toru o tō Paulo tere nō te tūtū i te karere meitaki 18.23—21.16
7. Tō Paulo 'opukina'anga'ia i Iērūsalēma 21.17—23.22
8. Kua 'apaina'ia atu a Paulo ki Kaisarea 23.23—26.32
9. Kua 'apaina'ia atu a Paulo ki Rōma 27.1—28.31
موجودہ انتخاب:
'Anga'anga Nō runga i tēia puka: CIMRNT
سرخی
شئیر
کاپی
کیا آپ جاہتے ہیں کہ آپ کی سرکیاں آپ کی devices پر محفوظ ہوں؟ Sign up or sign in
Cook Island Maori Revised New Testament © Bible Society of the South Pacific, 2021.