لوقا ۲۱
۲۱
فقیرٚ وِئوه زنأکٚ هدیه فدن
۱ عیسی کی معبدٚ صحنٚ میأنی ایسَه‌بو، خو دور و ورَ فندرسته و بیده کی پولدارٚ آدمأن خوشأنٚ هدیه‌یأنَ معبدٚ پیش‌کشی صوندوقٚ دورون دوکونیدی. ۲ هو وخت بیده ایتأ فقیرٚ وِئوه زنای بمو، دوتأ کوجه‌دأنه سکه، صوندوقٚ دورون تأودَه. ۳ عیسی بفرمأسته: «یقین بدأنید کی اَ فقیرٚ وِئوه زنای صوندوقٚ دورون همه‌تأنٚ جأ ویشتر هدیه فدَه. ۴ پولدارأن جٚه خوشأنٚ ایضافه پولَ فدَه‌ییدی ولی اَ وِئوه زنای تومامٚ خو روزی‌یَ هدیه فدَه.»
معبدٚ ویرانَ بوستن و آخرٚ زمأنٚ نیشأنه‌یأن
۵ بعضی‌یأن اورشلیمٚ معبدٚ وأسی کلٚ گب زِئن دیبید کی چوطویی خوشگلٚ سنگأن و پیش‌کشی‌یأنی اَمرأ کی مردوم وقف بوکوده بید، قشنگ چأکوده بوبوسته‌بو. بأزین عیسی بفرمأسته: ۶ «ایتأ وخت فأرسه کی تومامٚ اَ چیزأنی کی دِئن دریدی همه‌تأن فوگُردیدی. ایتأ سنگم سنگٚ سر بجا نمأنه و همه چیز زیرٚ رو به.» ۷ اوشأن وأورسه‌ییدی: «اوستاد، اَ ایتفاقأن کِی پیش اَیه و وختی قراره تومامٚ اوشأن ایتفاق دکفید، چی نیشأنه‌یی ظاهیرَ به؟» ۸ عیسی بوگفته: «شیمی حواس وأ جم ببه کی هیکس شمرَ جٚه رأ بدٚرَ نوکونه. خیلی‌یأن می نامٚ اَمرأ اَییدی و گیدی: ‹من هونم#۲۱:۸ینی «من مسیح ایسم».› و ‹دونیا به آخر فأرسه›. شومأن نوأستی باور بوکونید. ۹ وختی کی جنگٚ خبر و آشوبَ ایشنأویدی، نوأ ترسئنید. اوّل لازمه کی اَ جورٚ پیشامدأن ایتفاق دکفه ولی اَشأنٚ معنی اَن نی‌یه کی هسأ دونیا تومامَ بوستن دره.»
۱۰ هَطویم عیسی اوشأنَ بفرمأسته: «قومأن همدیگرٚ مره جنگ کونیدی، و هَطویی‌یم حکومتأن. ۱۱ پیله‌دأنه زیمین‌لرزه‌یأن ایتفاق دکفه. خیلی جایأن قحطی و بلا پیش اَیه و آسمانٚ جور وحشتناکٚ چیزأن و باور نوکودنی نیشانه‌یأن دیده به.
۱۲ «قبلٚ تومامٚ اَ پیشامدأن، شمرَ دسگیر کونیدی و آزار رسأنیدی، محاکمه کودنٚ وأسی کنیسه‌یأنٚ دس ایسپأریدی کی اوشأنم شمرَ زندانی کونیدی یا می نامٚ وأسی شمرَ پادشایأن و والیأنٚ ورجأ اوسه کونیدی. ۱۳ هَطویی شِمرِه ایتأ خوروم فرصته کی شهادت بدید. ۱۴ نیگرانٚ اَن نیبید کی چوطویی وأستی شیمی جأ دفاع بوکونید، ۱۵ چونکی من خودم شمرَ حکمت و قودرتٚ گب زِئن فدم ایجوری کی هیچ‌کودامٚ شیمی دوشمنأن جوابی شِمرِه ندأرید و نتأنید شیمی جُلُو بئسید. ۱۶ شیمی پئر و مارأن و برأرأن و قوم و خویشأن و شیمی رِفِقأن شمرَ خیانت کونیدی، شمرَ دوشمنٚ دس تحویل دهیدی و بعضی جٚه شومأنم کوشته بیدی. ۱۷ جٚه اَ خأطر کی مرَ پیروی کونیدی، همه‌تأن شیمی جأ متنفر بیدی. ۱۸ امّا ایتأ خالٚ مو شیمی سرٚ جأ کمَ نیبه#۲۱:۱۸ منظورٚ عیسی مسیح اَ اَیه میأن اَن نی‌یه کی اونٚ شاگردأن هیچ درد و رنجی نیدینیدی، بلکی اون منظور اَنه کی سالم آسمانٚ پادشایی دورون شیدی.. ۱۹ پس وأستی تحمل بوکونید تا شیمی جانَ نجات بدید.
۲۰ «وختی بیدینید کی دوشمنأن، اورشلیمَ محاصره بوکودیدی، وأ بدأنید کی اونٚ ویرانی نزدیکه. ۲۱ بأزین اوشأنی کی یهودیه دورون ایسَه‌ییدی وأستی کوه‌یأنٚ جور فرار بوکونید. اوشأنی‌یم کی اورشلیمٚ شهرٚ دورون ایسَه‌ییدی، شهرٚ جأ بیرون بیشید و اوشأنی‌یم کی دشت و صحرا میأن ایسَه‌ییدی شهرٚ دورون نأیید، ۲۲ چونکی هو وختأن، مکافاتٚ وخته و خودا کلامٚ نیویشته‌یأن حقیقت پیدا کونه. ۲۳ اَی وای شکمدارٚ زنأکأن و شیر ده مارأنٚ وأسی او روزأنٚ دورون، چونکی اَ سرزیمینٚ دورون پیله‌دأنه بلا یوهودٚ قومَ فُتُرکه و خوداوندٚ غیظم اوشأنٚ نصیب به. ۲۴ بعضی جٚه یوهودیأن شمشیرٚ اَمرأ کوشته بیدی و بعضی‌یأنم به خیلی کشورأنٚ دیگر تبعید بیدی. اورشلیمٚ شهر، غیرٚ یوهودیأنٚ پا جیر لقد دمج بِه تا او وختأنی کی خوداوند غیرٚ یوهودیأنٚ‌ره تعیین بوکوده تومامَ به.
۲۵ «آسمانٚ جور عجیبٚ ایتفاقأن دکفه. خورشید، ماه و ستاره‌یأن ترسناکٚ علامتأن نیشأن دهیدی. زیمینٚ سر، قومأن، دریا جوش و خوروش اَمونٚ جأ آشفته و پریشأنَ بیدی. ۲۶ آدمأن جٚه وحشت و ترسٚ اَنکی چی بلایی اَ دونیا سر خوأیه بأیه جٚه هوش شیدی، چونکی تومامٚ چیزأنی کی آسمانٚ جور نهَه، به لرزه دکفه. ۲۷ هو وخت ایسه کی مردومأن، اینسأنٚ پسرَ دینیدی کی پیله قوّت و جلالٚ اَمرأ ابرأنٚ دورون اَمون دره.#۲۱:۲۷ دانیال کیتابَ بابٚ ۷، آیه ۱۳میأن در هَه مورد تأنیدی ویشتر بخوأنید. ۲۸ بأزین کی اَ ایتفاقأن شروع بوبوسته، وأستی قایم بئسید و شیمی سرَ بوجور بیگیرید، چونکی وخت فأرسئن دره کی خودا شمرَ نجات بده.»
۲۹ عیسی اوشأنٚ رِه اَ مٚثٚلَ بأورده و بوگفته: «انجیل دار و الباقی درختأنَ فندرید. ۳۰ وختی کی زپّه زنیدی، تأنیدی بفهمید کی تابستان نزدیکه. ۳۱ هَطویم وختی کی دینیدی اَ ایتفاقأن دکفتَن دره، فهمیدی کی خودا پادشایی نزدیکه. ۳۲ آمین شمرَ گم، تا تومامٚ اَ ایتفاقأن دئنکفه، اَ نسل جٚه بین نیشه. ۳۳ آسمان و زیمین جٚه بین شه ولی می گبأن هیوخت جٚه بین نیشه.
۳۴ «شیمی حواسَ جمَ کونید، ونألید شیمی دیلأن جٚه زیاد خوردن، مستَ بوستن و فیکرأنی کی اَ دونیا شینه، تیره و تار ببه، تا او روزی کی من اَیم شومأن غافلگیرَ نیبید. ۳۵ او روز ایتأ دامٚ مأنستن تومامٚ دونیا مردومأن سر کفه. ۳۶ تومامٚ لحظه‌یأن، می رافا بئسید و همه وختأن دوعا بوکونید کی بتأنید همه‌یٚ او وحشتناکٚ ایتفاقأن پشتٚ سر بنید و اینسأنٚ پسرٚ ورجأ بئسید.»
۳۷ عیسی، روزأن معبدٚ صحنٚ دورون تعلیم دَیی و شبأن کوه جور شویی کی او کوه معروف به «کوهٚ زیتون» بو و شبَ تا صُب هویه ایسه‌یی. ۳۸ صُب کی بوستی، دوواره تومامٚ مردومأن معبدٚ صحنٚ دورون عیسی گبأنٚ ایشنأوستنٚ وأسی جمَ بوستید.
موجودہ انتخاب:
لوقا ۲۱: گیلکی (رشتی)
سرخی
شئیر
کاپی
کیا آپ جاہتے ہیں کہ آپ کی سرکیاں آپ کی devices پر محفوظ ہوں؟ Sign up or sign in
© 2010-2019 Gilak Media
