لوقا ۱۶
۱۶
عیسی تعلیم دهه کی چوطو اَمی پولَ دوروست خرج بوکونیم
۱ بأزین عیسی اَ نقلَ خو شاگردأنٚ رِه بوگفته: «ایتأ پولدارٚ مردای ایتأ مباشر دأشتی کی اونٚ حیساب کیتابأنَ رسیدگی کودی. اونَ وأخبرَ کودید کی مباشر اونٚ اموالَ خیانت کونه. ۲ ارباب خو مباشرَ دوخوأده و وأورسه: ‹اَن چی گبأنی ایسه کی تی جأ می گوش فأرسه، کی می اموالَ حیف و میل کونی؟ تی حیساب کیتابأنَ پس بدن! دِه نتأنی می مباشر بیبی.›
۳ «مباشر خو ورجأ فیکر بوکوده: ‹هسأ چی وأ بوکونم؟ وختی ارباب مرَ بیرونَ کونه، نه قوّتٚ بیل زِئن دأرم و نه روی گدایی کودن.› ۴ خو اَمرأ بوگفته: ‹بفهمستم چی وأ بوکونم. وختی مباشری کارٚ جأ بیرون بوشوم، کسأنی بدأرم کی خودشأنٚ خانه درَ می رو وازَ کونید.› ۵ بأزین خو اربابٚ بدهکارأنَ ایتأ ایتأ دوخوأده و اوّلی‌یَ وأورسه: ‹چقدر می اربابَ بدهکاری؟› ۶ جواب بدَه: ‹صدتأ خمره روغنٚ زیتون.› مباشر بوگفته: ‹دوروست گی. اَنم قبضی ایسه کی امضا بوکودی. هسأ زودتر اَ قبضَ پاره کون، بینیویس پنجاه‌تأ خمره.› ۷ بأزین اینفرٚ دیگرَ وأورسه: ‹تو چقدر بدهکاری؟› وأگردسته بوگفته: ‹صد خروارٚ گندم›. مباشر بوگفته: ‹تی قبضَ فیگیر، بینیویس هشتاد‌تأ.›
۸ «اونٚ ارباب خو نادورستٚ مباشرَ، جٚه اَ خأطر کی زیرکانه عمل بوکوده‌بو، تحسین بوکوده. وأ بدأنید مردومأنی کی به مال و منالٚ دونیا فیکر کونیدی جٚه آدمأنی کی به خودا ایمأن دأریدی زیرکتریدی. ۹ شمرَ گم شیمی مال و منالَ اَ دونیا دورون کسأنی‌یَ فدید کی لازم دریدی شیمی اَمرأ رِفِق بیبید تا وختی کی شیمی پول بی‌ارزشَ به، بتأنید شیمی آخرتٚ رِه خانه‌یی بدأرید.
۱۰ «اگه کوچه کارأنٚ رِه قابلٚ اعتماد بیبید، پیله کارأنٚ رِه شأ شمرَ اعتماد کودن. اونی کی کوچه کارأنٚ رِه قابلٚ اعتماد نبه، پیله کارأنٚ رِه نشَه اونَ اعتماد کودن. ۱۱ بأزین اگه اَ دونیا مال و منالٚ رِه امین نیبید، چی کسی تأنه آسمانی ثروتٚ رِه شمرَ اعتماد بوکونه؟ ۱۲ اگه شومأن دیگرأنٚ رِه امانت‌دارٚ خُبی نیبید، چی اینتظار دأریدی کسی شمرَ چیزی فده کی شیمی شین ببه؟ ۱۳ هیچ غولامی نتأنه دوتأ اربابَ خدمت بوکونه. یا اوّلی جأ نیفرت دأره، دوّمی‌یَ موحبت کونه، ویا اوّلی‌یَ دیل دٚوٚده و او ایتأیَ بد دأره. شومأن نتأنیدی هم خودا بنده بیبید و هم پولٚ بنده.»
۱۴ فریسیأن کی اَ گبأنَ بیشتأوستید عیسایَ مسخره بوکودید، چونکی پول دوست بید. ۱۵ عیسی اوشأنَ بوگفته: «شومأن کسأنی ایسیدی کی شمرَ مردومأنٚ ورجأ خوروم آدم نیشأن دیهید ولی خودا شیمی باطنٚ جأ وأخبره. او چیزأنی کی مردومأنَ خوش بأیه، خودا ورجأ زشت و ناپسنده. ۱۶ تا قبلٚ یحیایٚ پیغمبر، موسی کیتابٚ تورات و پیغمبرأنٚ دیگرٚ کیتابأن شیمی رأنما بو. هسأ کی خودا پادشایی خوروم خبر اعلام بوبوسته، همه‌تأن خوأییدی زورٚ اَمرأ پادشایی دورون بیشید. ۱۷ آسانتره کی آسمان و زیمین جٚه بین بیشید تا کی ایتأ نقطه توراتٚ کیتابٚ جأ بکفه. ۱۸ هر کی خو زنَ طلاقَ ده و ایتأ زنٚ دیگر ببره، زنا بوکوده. هر کی‌یم طلاقَ گیفته زنأکَ ببره، زنا بوکوده.»
پولدارٚ مردای و ایفلیجٚ ایلعازر
۱۹ عیسی بفرمأسته: «ایتأ پولدارٚ مردای بو کی گیران قیمتٚ لیباسأنٚ ارغوانی و لطیفٚ کتان دوکودی و همه‌تأ روزأن خوشگوذرأنی و عیش و نوشٚ مشغول بو. ۲۰ هر روز ایتأ گدا کی اونٚ جان زخم دأشتی و اونٚ نام ایلعازر بو، او پولدارٚ مردأکٚ خانه درٚ جُلُو نهَه‌یید. ۲۱ ایلعازرٚ آرزو اَن بو کی او مردأکٚ غذایأنٚ پس مانده‌یَ بوخوره. حتی سکأن#۱۶:۲۱ سک ینی سگ اَموییدی اونٚ زخمَ وألیشتید. ۲۲ ایتأ روز، او فقیرٚ مردای بمرده و فرشته‌یأن اونَ ایبراهیمٚ ورجأ ببردید. او پولدارٚ مردأکم بمرده و اونَ دفنَ کودید. ۲۳ هَطو کی مورده‌یأنٚ دونیا دورونی عذاب کشئن‌دوبو، خو چومأنَ وأکونه او بوجورَ نیگاه کونه و جٚه دور دستأن ایبراهیمَ دینه کی ایلعازر اونٚ ورجأ ایسَه ۲۴ و فریاد زنه: ‹اَی می پئر ایبراهیم، مرَ رحم بوکون، ایلعازرَ اوسه کون بأیه خو انگوشتَ آب بزنه و می زوانَ خونکَ کونه، چونکی آتشٚ شعله‌یأنٚ دورونی سوختَن‌درم.›
۲۵ «ایبراهیم وأگردسته بوگفته: ‹زأی جان، وأستی ترَ بخأطر بأیه کی وختی زنده بی همه‌یٚ خوروم چیزأن تی نصیب بو و بدٚ چیزأن ایلعازرٚ نصیب. هسأ اون اَیه آسایش دأره و تو عذاب کشئن دری ۲۶ و پیله‌دأنه شکافی‌یم اَمی میأن نهَه کی نه تو تأنی بأیی اَ طرف و نه اَشأنی کی اَیه ایسَه‌ییدی تأنید بأیید او طرف.› ۲۷ او ثپولدارٚ مردای بوگفته: ‹اَی پئر ایبراهیم، ترَ ایلتماس کونم کی ایلعازرَ می پئرٚ خانه اوسه کونی، ۲۸ چونکی من پنج‌تأ برأر دأرم، کی اوشأنَ وأخبرَ کونه و هشدار بده کی می مأنستن اَیه نأیید تا به عذاب دنکفید.› ۲۹ ایبراهیم بفرمأسته: ‹اوشأن موسی و پیغمبرأنٚ دیگرٚ کیتابأن دأریدی. تی برأرأن وأستی اوشأنٚ گبأنَ گوش بدید.› ۳۰ بوگفته: ‹نه پئر، اوشأنٚ گبأنَ گوش نوکودیدی. ولی اگه مورده‌یأنٚ دونیا جأ اینفر اوشأنٚ ورجأ بشه، توبه کونیدی.› ۳۱ ایبراهیم اونَ بوگفته: ‹اگه تی برأرأن موسی و پیغمبرأنٚ دیگر گبأنَ گوش نوکونید، اگرم مورده‌یأنٚ دونیا جأ اینفر زندَه به و بشه، اوشأن اونٚ گبأنَ باور نوکونیدی.›»
موجودہ انتخاب:
لوقا ۱۶: گیلکی (رشتی)
سرخی
شئیر
کاپی
کیا آپ جاہتے ہیں کہ آپ کی سرکیاں آپ کی devices پر محفوظ ہوں؟ Sign up or sign in
© 2010-2019 Gilak Media
