لوقا ۱۵
۱۵
اویرَ بوسته گوسفندٚ مٚثٚل
۱ ایتأ عالمه باجگیرأن و گوناهکارأن جمَ بوسته‌بید کی عیسی مسیحٚ گبأنَ بیشنأوید. ۲ فریسیأن و دینٚ علما غُرغُر کونان گفتیدی: «اَ مردای، گوناهکارأنَ خو ورجأ قوبیل کونه و اوشأنٚ اَمرأ نیشینه و غذایم خوره.» ۳ هَنٚ وأسی بو کی عیسی اوشأنٚ جواب دَئنٚ وأسی ایتأ مٚثٚل بأورده و بوگفته: ۴ «اگه ایتأ جٚه شومأن صدتأ گوسفند بدأره، ایتأ دأنه‌یَ اویرَ کونه، مگه او نود و نُه تأ گوسفندَ صحرا دورون ندأره کی اویتأ دونبأل بگرده؟ ۵ وختی کی اونَ یأفه، شادی اَمرأ اونَ بچانَ گیره، ۶ خو خانه شه، خو رِفِقأن و همساده‌یأنَ جمَ کونه و گه: ‹می اَمرأ شادی بوکونید! من می گوسفندَ کی اویرَ بوسته‌بو بیأفتم.›
۷ «شمرَ گفتن درم هَطویه کی شادی و سرورٚ ویشتری آسمانٚ جور ایتفاق دکفه وختی ایتأ گوناهکار توبه بوکونه و خودا طرف وأگرده تا کی نود و نُه نفر کی پرهیزکار ایسیدی و ایحتیاج به توبه نأریدی.
مٚثٚل اَوردن جٚه سکه‌یی کی اویرَ بوسته‌بو
۸ «اگه ایتأ زنای ده‌تأ سکه نقره بدأره، ایتأیَ اویرَ کونه، مگه چراغَ روشنَ نوکونه و خو خانه‌یَ جارو نوکونه و دقتٚ اَمرأ همه جایَ وئنمجه کی اونَ بیأفه؟ ۹ وختی او سکه‌یَ یأفه، خو رِفِقأن و همساده‌یأنَ دوخوأنه و گه: ‹می اَمرأ شادی بوکونید! می سکه‌یَ کی اویرَ کوده‌بوم بیأفتم.› ۱۰ وأ بدأنید هَطویه کی خودا فرشته‌یأن شادی کونیدی وختی ایتأ گوناهکار توبه بوکونه و خودا طرف وأگرده.»
اویرَ بوسته زأکٚ مٚثٚل
۱۱ بأزین عیسی بفرمأسته: «ایتأ مردای بو کی دوتأ پسر دأشتی. ۱۲ ایتأ روز اونٚ کوجه‌دأنه پسر بوگفته: ‹پئر، می سأمَ کی تی دارایی جأ وأستی مرَ ارث فأرسه، مرَ فأدن!› اونٚ پئر قوبیل بوکوده و خو دارایی‌یَ خو دوتأ پسرأنٚ میأن سأم بوکوده. ۱۳ چن روز بوگوذشته‌بو کی کوجه‌دأنه پسر تومامٚ چیزأنی کی اونَ ارث فأرسه‌بو پولٚ نقد چأکوده و اوسأده بوشو ایتأ سرزیمینی کی خیلی دور بو و همه‌یٚ خو پولَ خرجٚ خو عیاشی بوکوده. ۱۴ او سرزیمینٚ دورون ایتأ پیله‌دأنه قحطی ایتفاق دکفته، جوری بوبوسته کی سخت تنگنا دورون زندگی کودی چونکی اونٚ پولم تومامَ بوسته‌بو. ۱۵ جٚه ناچاری مجبور بوبوسته ایتأ مردأکٚ رِه کی او سرزیمینٚ شین بو، نوکری بوکونه. او مردای، اونَ اوسه کوده خو زیمینأنٚ دورون کی اونٚ خوکأنَ بچرأنه. ۱۶ او پسرٚ آرزو اَن بو کی بتأنه خوکأنٚ خوراکٚ اَمرأ خو شکمَ سِئرَ کونه ولی هیکس هیچی اونَ فنده‌یی کی بوخوره. ۱۷ آخرٚ سر به خودش بمو و خو اَمرأ بوگفته: ‹می پئرٚ کارگرأن، غذا به اندازه‌یٚ کافی دأریدی و ایضافه‌تر جٚه اونم دأریدی ولی من اَیه ویشتأیی جأ کراَ مردَن درم. ۱۸ هسأ من وأستی بشم می پئرَ بگم: ”هم خودا ورجأ و هم تی ورجأ گوناه بوکودم. ۱۹ دِه لیاقتٚ اَنَ نأرم کی مرَ تی پسر بدأنی. بأزین مرَ تی کارگرأنٚ مأنستن بدأن.“›
۲۰ «بأزین خو جاجیگایَ ترکَ کوده و خو پئرٚ خانه طرف بوشو. وختی هنوز خو پئرٚ خانه جأ خیلی فاصله دأشتی، اونٚ پئر خو پسرَ بیده و اونٚ دیل بوسوخته، بدوُوٚسته خو پسرٚ طرف، اونَ کشَ گیفته و ماچی بدَه. ۲۱ پسر وأگردسته خو پئرَ بوگفته: ‹پئر جان، من هم خودا ورجأ و هم تی ورجأ گوناه بوکودم. من دِه لایقٚ اَن نی‌یم کی مرَ تی زأی بدأنی.› ۲۲ ولی اونٚ پئر خو نوکرأنَ دوخوأده و بوگفته: ‹عجله بوکونید بیشید، بهترین ردایَ بأورید، می پسرَ دوکونید، انگوشترَ اَنٚ دس تأودید و کفشَ اَن پایَ دوکونید. ۲۳ پیله‌دأنه گوساله‌یَ بأورید و اونٚ سرَ وَوینید تا همه‌تأن بوخوریم و جشن بیگیریم، ۲۴ چونکی می پسر بمرده‌بو، زندَه بوسته و اویرَ بوسته‌بو، پیدا بوسته.› بأزین جشن و شادی بیگیفتید.
۲۵ «هو وخت بو کی پیله‌دأنه پسر کی مزرعه دورون کار کودن دوبو وأگردسته بمو خانه طرف. نزدیکَ کی بوسته، رقص و ساز و نقاره صدایَ ایشنأوه. ۲۶ ایتأ جٚه نوکرأنَ دوخوأنه وأورسه: ‹چی خبر بوبوسته؟› ۲۷ نوکر جواب بدَه: ‹چون تی برأر ساق و سالم وأگردسته، تی پئر ایتأ چاق و چله گوساله‌یٚ سرَ وأوِه و جشن بیگیفته.› ۲۸ پیله پسر، وختی اَنَ بیشنأوسته اونٚ غیظَ گیفته و نخوأستی بشه بخانه کی اونٚ پئر بمو، اونَ منت بوکوده کی بأیه بخانه. ۲۹ پیله پسر وأگردسته خو پئرَ بوگفته: ‹من خیلی زمأته کی تِره ایتأ غولامٚ مأنستن زحمت بکشم، هیوختم تی دستورأنٚ جأ سرپیچی نوکودم. اَ مدت زمأتٚ میأن ایتأ دأنه بوزغاله فئندَه‌یی کی من سر وَوینم و می رِفِقأنٚ اَمرأ خوش ببم. ۳۰ هسأ کی تی پسر تی مال و منالَ خراب زنأکأنٚ رِه خرج بوکوده وأگردسته، تو اونٚ رِه پیله‌دأنه گوساله سر وَوینی!› ۳۱ پئر بوگفته: ‹زأی جان، تو همیشه می اَمرأ ایسه‌یی. من هر چی‌یَ کی دأرم تی شینه. ۳۲ هسأ وأ جشن بیگیریم و شادی بوکونیم چونکی تی برأر بمرده‌بو زندَه بوسته، اویرَ بوسته‌بو پیدا بوسته.›»
موجودہ انتخاب:
لوقا ۱۵: گیلکی (رشتی)
سرخی
شئیر
کاپی
کیا آپ جاہتے ہیں کہ آپ کی سرکیاں آپ کی devices پر محفوظ ہوں؟ Sign up or sign in
© 2010-2019 Gilak Media
