یوحنا ۲
۲
معجزه‌یٚ عروسی میأن
۱ سوّمی روز قانایٚ جلیلٚ میأن عروسی بو و عیسی مارم اویه ایسَه‌بو. ۲ عیسی و اونٚ شاگردأنم به عروسی دعوت بوبوسته‌بید. ۳ وختی کی شراب تومامَ بوسته، عیسی مار، عیسایَ بوگفته: «اَشأن دِه شراب نأریدی.»
۴ عیسی اونَ بوگفته: «بانو، مره چی به اَ کارأن؟ می وخت هنوز فَنرسه.»
۵ اونٚ مار پیشخدمتأنَ بوگفته: «هر چی شمرَ گه، بوکونید.»
۶ اویه شیش‌تأ خمره‌یٚ سنگی نهَه‌بو کی برای رسمٚ تطهیرٚ یهودیأن#۲:۶ یهود مذهبٚ میأن، یهودیأن از اَ آب بدن و وسایلٚ پاکٚ وستی استفاده کودیدی. به کار اَمویی و هر کدام ظرفیتٚ دو یا سه‌تأ پیمانه‌یَ#۲:۶ هر پیمانه ۷۵-۱۱۵ لیتر جا دأشتی. دأشتی. ۷ عیسی خدمتکارأنَ بوگفته: «اَ خمره‌یأنَ از آب پورَ کونید.» پس اوشأنَ لبالب پورَ کودیدی. ۸ بعداً اوشأنَ بوگفته: «الأن ایپچه از اون اوسَنید و صاحبٚ مجلسٚ‌ره ببرید.» اوشأنم هوطو بوکودیدی.
۹ صاحبٚ مجلس نأنستی کی اونَ از کویه بأوردیدی، ولی خدمتکارأنی کی اونَ اوسَده بید، دأنستیدی. او وخت آبی کی شراب بوبوسته‌بو بیچیشته، دامادَ دوخوأده ۱۰ و اونَ بوگفته: «همه اوّل شرابٚ نابَ اَوریدی و پذیرایی کونیدی و وختی مهمانأن مستَ بیدی، بعداً شرابٚ ارزانترَ اَوریدی؛ امّا تو شرابٚ نابَ تا اَ لحظه بدأشتی!»
۱۱ اَطویی عیسی خو اوّلی معجزه‌یَ قانایٚ جلیلٚ میأن انجام بده و خو جلالَ نیشأن بده و اونٚ شاگردأن به اون ایمأن بأوردیدی.
۱۲ بعد از اون، خو مار و خو برأرأن و شاگردأنٚ اَمرأ به کَفَرناحوم بوشو و چند روزی‌یَ در اویه بِیسَه‌ییدی.
عیسی معبدٚ میأن
۱۳ چونکی یهودیأنٚ عیدٚ پِسَخ نزدیک بو، عیسی به اورشلیم بوشو. ۱۴ معبدٚ صحنٚ میأنی بیده کی تعدادی به فروختنٚ گاب و گوسفند و کبوتر مشغولیدی و صرافأنم به کاسبی نیشته‌بید. ۱۵ پس، از طناب شلاق چأکوده اوشأنَ با همه‌یٚ گابأن و گوسفندأن از معبد بیرونَ کوده و صرافأنٚ سکه‌یأنَ، زیمینٚ رو فوکوده و اوشأنٚ میزأنَ وأگردأنه ۱۶ و کبوتر فروشأنَ بوگفته: «اَشأنَ از اَیه بیرون ببرید و می پئرٚ خانه‌یَ به محلٚ کاسبی تبدیل نوکونید!» ۱۷ او وخت اونٚ شاگردأن به یاد بأوردیدی کی بینیویشته بوبوسته‌بو: «غیرتی کی تی خانه وستی دأرم، مرَ سوزنه.» #۲:۱۷ تورات، کیتابٚ مزمور، بابٚ ۶۹، آیه ۹.
۱۸ پس یهودیأن بخاطرٚ اَ کارأن اونَ بوگفتیدی: «چی معجزه‌یٚ اَمرَ نیشأن دیهی کی بدأنیم تو اجازه‌یٚ اَ کارأنَ دأری؟»
۱۹ عیسی در جواب اوشأنَ بوگفته: «شومأن اَ معبدَ خرابَ کونید، من سه روزه اونَ دوواره چأکونم.»
۲۰ یهودیأن اونَ بوگفتیدی: «اَ معبدٚ ساختن چهل و شیش سال طول بکشه، و الأن تو خوأیی سه روزَ اونَ چأکونی؟» ۲۱ ولی معبدی کی عیسی از اون حرف زه‌یی، خودشٚ بدن بو. ۲۲ پس وختی کی از مُرده‌یأن ویریشته، اونٚ شاگردأن اَ گفته‌یَ به یاد بأوردیدی و به کیتابٚ موقدّس و اونٚ حرفأن ایمأن بأوردیدی.
۲۳ وختی کی عیسی عیدٚ پِسَخِ‌ره اورشلیمٚ میأن ایسَه‌بو، خیلی‌یأن بخاطرٚ معجزاتی کی انجام بده‌بو، به اونٚ نام ایمأن بأوردیدی. ۲۴ امّا عیسی به اوشأنٚ ایمأن اعتماد نأشتی، چونکی همه‌یَ شنأختی ۲۵ و لازم نوبو کسی درباره‌یٚ اینسان چیزی اونَ بگه، چونکی خودش دأنستی کی اینسانٚ دورونی چی نَهه!
موجودہ انتخاب:
یوحنا ۲: گیلکی (رشتی)
سرخی
شئیر
کاپی
کیا آپ جاہتے ہیں کہ آپ کی سرکیاں آپ کی devices پر محفوظ ہوں؟ Sign up or sign in
© 2010-2019 Gilak Media
