Luke 23
23
Ko e Fakamāu‘i ‘e Pailato ʻa Si̇̄sū
(Mātiu 27:1,2,11-14; Ma‘ake 15:1-5; Sione 18:28-38)
1Pea tutu‘u kātoa hake ʻa e kau fakatahá ‘o nau tataki atu ʻa Si̇̄sū kia Pailato. 2Pea kamata ke nau talatalaaki‘i ange ia, ʻo pehē: ‟Naʻa mau ma‘u ʻa e sianá ni ‘okú ne fakatupu moveuveu mo fakaloto‘i ʻa e kakai̇́ ke ‘oua te nau totongi tukuhau kia Sisa. Pea naʻe tala holo foki, ko e Mi̇̄saiá ia, ko e tu‘i.”
3Pea fehu‘i ange ‘e Pailato kia Si̇̄sū, ʻo pehē: ‟Ko e Tuʻi koā koe ‘o e kakai Siú?” Pea tali ‘e Si̇̄sū kiate ia: ‟Ko ia pē ʻokú ke laú.”
4Pea talaange ‘e Pailato ki he kau taula‘eiki lahi̇́ pea mo e kakai̇́: ‟‘Oku ‘ikai te u ma‘u ‘e au ha makatuʻunga ke fakahalaia ai ʻa e tangatá ni.”
5Ka naʻa nau vilitaki atu pē, ʻo nau pehē: ‟Kuó ne ueʻi ʻa e kakai̇́ ʻaki ʻene faiako takai holo ʻi Siutea kātoa, ʻo kamata mei Kāleli, pea kuo aʻu mai ʻeni ki heni.”
Ko e Taki ‘o Si̇̄sū kia Hēlota
6Pea ʻi he fanongo ʻa Pailato ki he lau ko iā, naʻá ne fehuʻi ange, pē ko e Kāleli koā ʻa e tangatá ni. 7Pea ʻi heʻene ʻilo ko Si̇̄suú ʻoku mei he vāhenga ‘o Hēlotá, naʻá ne fekau ke nau ‘ave ia kia Hēlota, he naʻe ʻi Selusalema ʻa Hēlota feʻunga mo e taimi ko iā.
8Pea ʻi he mamata ʻa Hēlota kia Sīsuú, naʻá ne fiefia lahi ʻaupito, he kuo fuoloa ʻene fie mamata kiate ia, he naʻá ne fanongo ʻi he ngaahi meʻa ʻoku kau kiate iá, pea naʻá ne fie mamata ki ha mana te ne fai.
9Pea na‘e lahi ʻene fakafehuʻi iá, ka na‘e ‘ikai ha tali ‘e taha ʻa Si̇̄sū kiate ia.
10Pea toki tuʻu hake ʻa e kau taula‘eiki lahi̇́ mo e kau tangata ʻo e Tohitapú, ‘o nau talatalaaki‘i ʻa Si̇̄sū, ʻi ha ngaahi meʻa lahi. 11Pea hanga ‘e Hēlota mo ʻene kau sōtiá ‘o ngaohikovi‘i ia, ʻo nau toki fakakofuʻaki ia ha pulupulu faka‘ofo‘ofa, pea nau fakafoki atu ia kia Pailato. 12Pea talu mei ai, mo e kaumeʻa lelei ʻa Hēlota mo Pailato, ka naʻá na vātamaki kinaua kimuʻa.
Ko e Tautea Mate
(Mātiu 27:15-26; Ma‘ake 15:6-15; Sione 18:39—19:16)
13Pea ui ‘e Pailato ke kātoa mai ʻa e kau taula‘eiki lahi̇́, mo e kau taki̇́, pea mo e kakai̇́. 14Pea naʻe pehē kiate kinautolu: ‟Naʻa mou taki mai ʻa e tangatá ni kiate au, ‘o talamai naʻá ne fakatupu moveuveu ki he kakai̇́. Pea ko ʻeni kuo u faka‘eke‘eke ia ʻo mou fanongo ki ai, pea kuo ‘ikai te u ma‘u ‘e au ha makatuʻunga mei he ngaahi meʻa kuo mou tukuakiʻi ʻaki iá, ke fakahalaiaʻi ai ia. 15Pea pehē pē foki mo Hēlota, he kuó ne fekau ke fakafoki mai ia kiate kitautolu, pea ko eni, kuo mahino naʻe ʻikai ke fai ‘e he tangatá ni ha meʻa ‘e taau ke tautea mate ai ia. 16-17ʻI heʻene pehē: te u hilifaki pē hano tautea tā, pea tukuange ia ke ʻalu.” 18Ka naʻa nau kaikaila kotoa pē, ʻo pehē: ‟Tāmate‘i ʻa e tangatá ni, kae tukuange mai kiate kimautolu ʻa Palāpasa ia!” 19Ko Palāpasá, ko e tangata ia na‘e fakahū pili̇̄sone koe‘uhi̇̄ ko haʻane fakatupu moveuveu ʻi he koló, pea mo ʻene fakapoongi ha tangata.
20Ka naʻe toe kole ʻa Pailató kiate kinautolu heʻene fakaʻamu ke tukuange ʻa Sīsuú. 21Ka naʻa nau kaikaila mai pē kinautolu ʻo pehē: ‟Tutuki ia ki ha kolosi! Tutuki ia ki ha kolosi!” 22Pea naʻá ne toe lea kiate kinautolu, ko hono tuʻo tolú ia: ‟He ko e hā ha hia kuo fai ʻe he tangatá ni? Kuo ʻikai te u maʻu ha makatuʻunga ke tautea mate ai ia, ko ia ai, te u hilifaki pē hano tautea tā, pea tukuange ia.” 23Ka naʻe toe le‘o lahi ange ʻa e kaila ʻa e kakai̇́ o nau vilitaki pē ke tutuki ia ki ha kolosi, pea naʻe mālohi honau leʻó. 24Ko ia, naʻe pehē ʻe Pailato ke hilifaki ʻa e tautea naʻa nau vilitaki ki ai̇́.
25Pea veteange leva ‘e Pailato ʻa e tangata na‘e fakahū pilīsone ko e fakatupu moveuveu mo e tāmaté, ʻa ia naʻa nau kole ki ai̇́, ka naʻe tuku atu ʻa Si̇̄sū, ke nau fa‘iteliha ki ai.
Ko e Tukifaʻo ‘o Si̇̄sū ki he Kolosí
(Mātiu 27:31-44; Ma‘ake 15:21-32; Sione 19:17-27)
26Pea ʻi heʻenau taki atu ʻa Sīsuú, naʻa nau puke mai ʻa Saimone, ko e tangata Sailine, kuó ne ha‘u mei ‘uta, ʻo nau hilifaki ʻa e kolosi̇́ kiate ia, ke ne fua ‘o muimui atu kia Si̇̄sū.
27Pea naʻe muimui atu foki kiate ia mo ha fuʻu kakai tokolahi, pea mo ha kau fefine ʻa ia naʻa nau tangi mamahi koe‘uhi̇̄ ko Si̇̄sū. 28Pea tafoki ʻa Si̇̄sū ‘o lea kiate kinautolu: ‟Kau fefine ʻo Selusalema, ʻoua te mou tangi koe‘uhi̇̄ ko au, ka mou tangi pē koe‘uhi̇̄ ko kimoutolu mo ho‘omou fānaú. 29He ko eni, ʻoku vave mai ha taimi, ʻa ia te mou toki pehē ai, ‘Oku monūʻia ʻa e kau fefine ʻoku ʻikai haʻanau fānaú, mo e ngaahi manava kuo te‘eki ke fanaú, pea mo kinautolu kuo ʻikai fakahuhu ha fānaú. 30Peá te nau toki kaila ki he ngaahi mo‘ungá, Mou holo mai ‘o tanu kimautolu. Pea ki he ngaahi tafungofungá, Mou ʻufi‘ufi‘i kimautolu. 31He kapau ‘oku lava ke nau fai ʻa e ngaahi meʻá ni ki he ʻakau matá, pea huanoa ʻa e meʻa ʻe ala fai ki he ʻakau mōmoá.”
32Pea naʻe taki atu ai mo ha ongo tangata faihia kehe ʻe toko ua, ke tāmate‘i fakataha mo ia.
33Pea ʻi heʻenau aʻu atu ki he feitu‘u ʻoku ui ko ‘Ulupokó, naʻa nau tutuki ai ia ki he kolosi̇́, fakataha mo e ongo tangata faihiá, ko e taha mei hono to‘omata‘ú, pea taha mei hono to‘ohemá.
34Pea folofola ʻa Si̇̄sū: ‟‘E Tamai, fakamolemole‘i ange muʻa kinautolu, he ‘oku ‘ikai te nau ʻilo ʻa e meʻa ‘oku nau fai̇́!” Pea naʻa nau vahevahe ʻa hono valá, ʻaki ʻenau talotalo pē kohai te ne maʻú. 35Pea tuʻu pē ʻa e kakai̇́ ai ʻo mamata. Pea laukovi kiate ia ʻa e kau taki̇́, ‘o nau pehē: ‟Naʻá ne fakahaofi ʻa e kakai kehé, tuku ke ne fakahaofi ‘e ia ia, ‘okapau moʻoni ko e Mīsaia ʻeni ʻa e ‘Otuá, ko e toko taha kuó ne fili̇́.”
36Pea kau foki mo e kau sōtiá hono vaʻingaʻaki iá, ʻaki ʻenau omi ʻo ‘ohake kiate ia ha vinika; 37Mo nau pehēange: ‟Kapau ko e Tuʻi koe ‘o e kakai Siú, peá ke fakahaofi koe!”
38Pea na‘e tohi foki ʻi ʻolunga ʻi hono kolosi̇́, ʻo pehē: ‟Ko e Tuʻi ʻeni ‘o e kakai Siú.”
39Pea ko e taha ʻo e ongo hiamatea na‘e tutuki fakataha mo iá, naʻá ne kau he laukovi kiate ia ʻo ne pehē: ‟‘Ikai ko e Mi̇̄saiá koe? Peʻi ke fakahaofi koe, mo kimaua foki!”
40Ka naʻe tali ʻe he hiamatea ‘e tahá, ʻo ne valokiʻi ia, ʻo pehē: ‟‘Oku ‘ikai koā te ke ʻapasia ki he ‘Otuá, he ʻoku tautea‘i fakataha koe mo ia? 41Pea ko hota tauteá, ‘oku tuha pē ia mo e kovi naʻá ta fai̇́. Ka ko e toko taha ko eni̇́, na‘e ‘ikai te ne fai ‘e ia ha kovi ‘e taha.” 42Pea naʻe lea ange: ‟ʻE Si̇̄sū, manatu‘i muʻa au, ‘oka ke ka hokomai kuó ke Tuʻi ʻi ho puleʻangá.”
43Pea folofola ʻa Si̇̄sū kiate ia: ‟Ko hono moʻoni̇́ ʻeni ʻoku ou tala kiate koé, ko e ʻahó ni, te ke ʻi Palataisi mo au.”
Ko e Pekia ʻa Si̇̄suú
(Mātiu 27:45-56; Ma‘ake 15:33-41; Sione 19:28-30)
44Pea ʻi heʻene aʻu ki he ho‘atā mālié, fakafokifā naʻe tō ha poʻuli ki he funga ʻo māmani kotoa pē, ‘o aʻu ki he taimi tolu efiafi̇́. 45He naʻe ʻikai toe ulo mai ʻa e laʻaá, pea naʻe mahae mo e puipui ʻo e Temipalé mei ‘olunga ‘o aʻu ki lalo.
46Pea kaila le‘olahi ʻa Si̇̄sū, ʻo pehē: ‟‘E Tamai, ʻoku ou tuku atu hoku laumālié ki ho ʻaofonnima!” Pea hili ʻene leá pehē: naʻá ne mānava fakaʻosi.
47Pea ʻi he mamata ʻa e ʻeikitau Lomá, ki he meʻa kuo hokó, naʻá ne fakahi̇̄kihikiʻi ʻa e ‘Otuá, ʻo ne pehē: ‟Tā ko e mo‘oni pē, ko e tangata māʻoniʻoni ʻeni!”
48Pea ko e kotoa ʻo e fuʻu kakai naʻa nau tuʻu ai ʻo mamata ki he meʻa fakalilifu na‘e hokó, naʻe mamahi honau lotó, pea nau foki atu ki honau ngaahi ‘api̇́.
49Pea ko kinautolu kotoa pē ʻa e ngaahi maheni ‘o Sīsuú, ‘o kau ai mo siʻi kau fefine kuo nau muimui mai kiate ia mei Kāleli̇́, naʻa nau tutuʻu pē mei he mamaʻó, ʻo mamata mei ai ki he ngaahi meʻa ni.
Ko Hono Telio ‘o Si̇̄suú
(Mātiu 27:57-61; Ma‘ake 15:42-47; Sione 19:38-42)
50Pea ko eni, na‘e ʻi ai ha tangata ko Siosifa, hono hingoá, ʻa ia naʻá ne kau ki he Fakataha Tokoni̇́, ko e tangata failelei ia mo māʻoniʻoni. 51Ko e toko taha ko iā, na‘e ‘ikai te ne loto ki he tu‘utu‘uni na‘e fai ‘e he Fakatahá pea mo hono fakahoko ʻenau tuʻutuʻuni̇́. Ko e tangata ia mei he kolo ʻo Siutea, ko ʻAlematea, ʻa ia naʻá ne nofo ʻamanaki, ki he hokomai ʻa e Puleʻanga ʻo e ʻOtuá.
52Pea ʻalu ʻa e tangata ko iā kia Pailato, ‘o naʻe kole ke tuku mai muʻa ʻa e sino ‘o Sīsuú. 53Pea naʻe fakahā‘ele hifo ia mei he kolosi̇́, ‘o naʻe kofuʻaki ia ha tupenu li̇̄neni mahu‘inga, pea naʻe toki telio ia ʻi ha fonualoto kuo tā ʻi ha makatu‘u, pea kuo te‘eki ke tanu ai ha taha.
54Pea ko e ʻaho teuteu ia ki he kamataʻanga ʻo e Sāpate ʻo haʻa Siú. #23:54 Ko e ʻaho Tokonakí ia ʻi onopooni. Ko e ʻaho tapu ia ʻa e kakai Siú.
55Pea muimui atu ai pē ʻa siʻi kau fefine na‘e fononga fakataha mai mo Si̇̄sū mei Kāleli̇́, ‘o nau mamata ki he fonualotó, pea mo e anga hono fakatoka ki ai ‘o e sino ‘o Sīsuú.
56Pea toki foki ʻa e kau fefiné ki ʻapi, ‘o nau teu ha ngaahi ʻakau kakala mo ha ngaahi lolo tākai. Ka naʻa nau mālōlō he Sāpaté, ‘o talangofua ki he Laó.
موجودہ انتخاب:
Luke 23: TCNT
سرخی
شئیر
کاپی
کیا آپ جاہتے ہیں کہ آپ کی سرکیاں آپ کی devices پر محفوظ ہوں؟ Sign up or sign in
Tongan Contemporary New Testament © Bible Society of the South Pacific, 2011.
