Sione 3
3
Ko Si̇̄sū mo Nikotimasi
1Pea naʻe ai ha tangata Fālesi ko Nikotimasi hono hingoá, ko e taha ʻo e kau taki ʻo haʻa Siú. 2Naʻe haʻu poʻuli ʻa e tangata ko iā kia Si̇̄sū ‘o ne talaange kiate ia: ‟Tangata‘eiki, ‘oku mau lave‘i kuó ke hokomai mei̇́ he ‘Otuá ke fakahinohino kimautolu, he ʻoku ‘ikai ke lava ʻe ha taha ‘o fai e ngaahi mana ko ʻeni ʻokú ke fai̇́, ‘o kapau ʻe ‘ikai ke kau mo ia ʻa e ‘Otuá.”
3Pea tali ‘e Si̇̄sū ʻo ne folofola kiate ia: ‟Ko hono mo‘oni̇́ ʻeni ‘oku ou talaatú, kapau he‘ikai fanau‘i ha taha mei ʻolunga, ʻe ʻikai ʻaupito te ne lava ke mamata ki he Puleʻanga ʻo e ʻOtuá.”
4Pea ‘eke ange ‘e Nikotimasi kiate ia: ‟‘O lava fēfē ha tangata ke toe fanau‘i mai, kapau kuo motuʻa? ʻE lava koā ke ne toe hū ki he manava ʻo ʻene faʻeé, ke toe fanauʻi tuʻo ua mai ia?”
5Pea tali ‘e Si̇̄sū: ‟Ko e moʻoni ʻo e moʻoni ʻa e meʻa ko ʻeni ʻoku ou tala kiate kimoutolu, ‘okapau ʻe ʻikai fanau‘i ha taha mei̇́ he vaí mo e Laumālié, ʻe ʻikai ʻaupito ke hū ia ki he Puleʻanga ʻo e ʻOtuá. 6Ko e meʻa ʻoku fanauʻi fakakakanó, ko e kakano ia, ka ko e meʻa ʻoku fanau‘i fakalaumālié, ko e laumālie ia. 7‘Oua te ke ofo he‘eku talaatú, kuo pau ke mou fanau‘i fo‘ou. 8ʻOku angi ʻa e matangi̇́ heʻene faʻiteliha ʻaʻaná pea ʻokú ke fanongo ki heʻene feangi‘aki̇́, ka ‘oku ‘ikai te ke ‘ilo pē ko ʻene angi̇́ mei fē, pē ‘okú ne angi ki fē. Pehē foki mo kinautolu kotoa pē kuo fanau‘i mei̇́ he Laumālié.”
9Pea tali ‘e Nikotimasi: ‟‘E lava fēfē ke hoko ʻa e ngaahi meʻa ko ʻeni̇́?” 10Pea tali ‘e Si̇̄sū ʻo ne folofola kiate ia: ‟Ko koé ko e faiako ‘o ‘Isileli̇́, pea kuo teʻeki koā ke mahino kiate koe ʻa e ngaahi meʻa ko ʻeni̇́? 11Ko e moʻoni ʻo e moʻoni ʻa e meʻa ʻoku ou tala kiate kimoutolú, he ‘oku mau leaʻaki ʻa e ngaahi meʻa ‘oku mau ‘ilo pau, mo mau fakamatala ki he ngaahi meʻa kuo mau mamata pau ki ai, ka kuo ‘ikai te mou tali ʻa e ngaahi meʻa ‘oku mau tala atú. 12Kapau kuo u fakamatala atu ʻa e ngaahi meʻa ʻo māmani̇́ kae ʻikai te mou tui ki ai, pea fēfē ai haʻamou tui ʻokapau te u fakamatala atu ʻa e ngaahi meʻa ʻo Hēvani̇́?
13Kuo te‘eki ai ha taha ‘e ‘alu hake ki Hēvani, tukukehe pē ʻa e Toko Taha kuo ‘alu hifo mei Hēvani̇́, ʻa ia ko e Foha ʻo e Tangatá.” 14Pea hangē naʻe hiki ki ʻolunga ‘e Mōsese ʻa e ngata palasá he toafá, pehē foki kuo pau ke hiki ki ʻolunga ʻa e Foha ʻo e Tangatá. 15Koeʻuhi̇̄ ko ia kotoa pē ʻe tui kiate iá, ke ne maʻu ʻa e mo‘ui ta‘engatá.
16Pehē foki, naʻe ‘ofa ʻa e ‘Otuá ki māmani̇, ko ia, naʻá ne foaki hono ʻAlo pē ‘e taha mei ʻitāniti̇́, koe‘uhi̇̄ ko ia kotoa pē ‘e tui kiate iá, ke ʻoua naʻa ‘auha, ka ne ma‘u ʻa e mo‘ui ta‘engatá. 17He naʻe ‘ikai ke fekau mai ‘e he ‘Otuá hono ʻAló koeʻuhi̇̄ ke ne fakamāau‘i ʻa māmani, ka ke fakamo‘ui ʻa māmani ʻiate ia. 18Ka ai ha taha ‘oku tui kiate ia, ʻe ʻikai ke toe fakamāauʻi ia, peá ka ai ha taha ‘e ‘ikai ke tui, kuo ‘osi fakamāau‘i ia, koe‘uhi̇̄ kuo ʻikai te ne tui ki he ʻAlo pē ‘e taha ‘o e ‘Otuá mei ʻitāniti̇́. 19Pea ko e tuʻutuʻuni ia ʻa e fakamāaú, he kuo hoko mai ʻa e māamá ki māmani, kae kei ʻofa ange pē ʻa e kakai̇́ ki he fakapo‘uli̇́ ‘i he māamá koeʻuhi̇̄ ko ‘enau tō‘onga mo‘ui̇́, ‘oku kovi. 20He ko ia kotoa pē ʻoku ngāue kovi̇́, ʻokú ne fehiʻa ki he māamá, pea ‘e ‘ikai te ne fie haʻu ki he māamá, naʻa ‘iloʻi ai ‘enau tō‘onga mo‘ui̇́. 21Ka ko ia ʻokú ne mo‘ui ‘aki ʻa e mo‘oní, ‘okú na haʻu ki he māamá koe‘uhi̇̄ ke hā ai, ʻoku fai ʻene moʻui̇́, ʻi he ʻOtuá.
Ko Si̇̄sū mo Sione Papitaiso
22Pea hili ʻa e ngaahi meʻa ko iā, naʻe ʻalu ʻa Si̇̄sū mo ʻene kau akó ki he fonua ko Siuteá, ‘o nau nofo ai, pea naʻá ne faipapitaiso ai.
23Pea naʻe faipapitaiso foki mo Sione ‘i ‘Ēnoni, ofi ki Selemi, he naʻe lahi ʻa e vai̇́ ʻi he feituʻu ko iā, pea na‘e holo mai ʻa e kakai̇́ ki ai ʻo papitaiso.
24He naʻe pehē ʻene meʻa naʻe fai̇́, ʻi he te‘eki ai ke fakahū pili̇̄sone ʻa Sioné.
25Ko ia, naʻe hoko ha fakakikihi ʻi he kau ako ʻa Sione mo ha taha mei̇́ he kau Siú, ‘o fekauʻaki mo e ouau fakamaʻa ʻo e lotu faka-Siú. 26Pea naʻa nau omi kia Sione ʻo nau pehē: ‟Tangata‘eiki, ko e Toko Taha ko ē naʻá mo feohi, ʻi he kauvai fakahahake ‘o e Vaitafe Soatani̇́, ʻa ē naʻá ke fakahāaʻi̇́, vakai, ko e Toko Taha ko iā, ‘oku fai papitaiso mo ia foki, pea kuo ‘osi kotoa ki ai, ʻa e kakai̇́.”
27Pea tali ‘e Sione ʻo ne pehē: ‟‘Oku ʻikai lava ke maʻu ʻe ha tangata ha meʻa ʻe taha, kae ʻoua kuo foaki kiate ia mei he langi̇́. 28Ko kimoutolu foki te mou fakamoʻoni naʻá ku talaatu, ‘Oku ‘ikai ko e Mi̇̄saiá au, ka naʻe fekau mai au, ke u muʻomuʻa mai ʻi he Toko Taha ko ʻená.
29Ko e toko taha ʻokú ne maʻu ʻa e taʻahine mali̇́, ko e tangata mali̇́ ia. Ko e fakafeʻao ʻo e tangata mali̇́, ʻokú ne tuʻu pē ʻo fanongo fiefia lahi ʻaupito, ki he leʻo ʻo e tangata mali̇́. Ko ia, ko ʻeku fiefia ʻaʻakú, kuo kakato. 30Ko e Toko Taha ko iā, kuo pau ke fakaʻaʻau ai pē ia kimuʻa, ka te u fakaʻaʻau ai pē au ki mui.”
Ko e Toko taha Na‘e ‘Alu Hifo mei Hēvani
31‟Ko e Toko Taha ʻoku ʻalu hifo mei ʻolungá, ʻokú ne māʻolunga noa pe, pea ko e Toko Taha ‘oku tupu mei māmani, ‘e lea pē ia ʻo kau ki he ngaahi meʻa ‘o māmani̇́. Ka ko e Toko Taha na‘e ‘alu hifo mei he langi̇́, ‘oku mā‘olunga hake ia ʻi he meʻa kotoa pē. 32‘Ilonga ʻa e ngaahi meʻa kuó ne mamata tonu mo fanongo tonu ki ai̇́, te ne fakamoʻoni ki he ngaahi meʻa ko iā. Ka ko e fakamoʻoni ʻaʻaná ʻe ʻikai tali ʻe ha taha. 33Ka ko ia ʻokú ne tali ʻene fakamoʻoni̇́, ‘okú ne fakapapauʻi ʻoku falalaʻanga ʻa e ʻOtuá. 34He ko e Toko Taha naʻe fekau mai ‘e he ‘Otuá, ʻokú ne leaʻaki ʻa e ngaahi folofola ʻa e ‘Otuá, he ʻoku taʻefakangatangata ʻene foaki ʻa e Laumālié.
35‘Oku ‘ofa ʻa e Tamai̇́ ki he ʻAló pea kuó ne tukuange ke ne pule ki he meʻa kotoa pē. 36Ko ia ‘oku tui ki he ʻAló, ʻokú ne maʻu ʻa e mo‘ui ta‘engatá, ka ko ia ‘oku ‘ikai ke tui ki he ʻAló, he‘ikai mamata ia ki he mo‘ui̇́, he ʻoku nofomaʻu ʻiate ia ʻa e houhau ‘o e ‘Otuá.”
موجودہ انتخاب:
Sione 3: TCNT
سرخی
شئیر
کاپی
کیا آپ جاہتے ہیں کہ آپ کی سرکیاں آپ کی devices پر محفوظ ہوں؟ Sign up or sign in
Tongan Contemporary New Testament © Bible Society of the South Pacific, 2011.
