THRÜNTAN 1
1
Athrüntan Yukhean
1Atankih ching Thrünpuhnü thüningbo tüsho alomi thrün. 2Alomi ju tümü mükamkhitdü lang akeangkeang lakheah; tüsho amiting ju kekim mi kheak lakheah. Tüsho Thrünpuh me kebo kumung aphapde alakheah. 3Judüki Thrünpuhnü tha, “Ayin akhiukang,” tüsho ayin akhiuk. 4Thrünpuhnü ayin ju tsülah de kheah; tüsho apinü ayin ju amiting chingnü chamkhit. 5Thrünpuhnü ayin ki, “Animung” tüsho amiting ki “Azhing” de ji. Tüsho akhuhbe nimung arelim tüsho yapsu lakheah.
6Tüsho Thrünpuhnü tha, “Kebo chingnü kebo chamnakde akhunung khülang kamang.” 7Junangde Thrünpuhnü akhunung khülang thsübah ke akube chingnü abobe büthsüjih; tüsho junangde kam. 8Apinü akhunung ki ju “Thüning” de ji. Tüsho ju mahnepü nimung arelim tüsho yapsu lakheah.
9Thrünpuhnü tha, “Thüningbo bukkhüp lakhi ke alala dangpungkhüh kingmukhungang tüsho alo akung akhiukang”; tüsho junangde kam. 10Thrünpuhnü alo akung ki “Alomi” tüsho ke kingmukhungkhi ki “Kekim” de ji. Tüsho Thrünpuhnü ju tsülah de kheah. 11Thrünpuhnü tha, “Alonü rim, sangrungbo mungji alala akhiukshang, tüsho jurübo müjihphünü asobebo tüsho sangsolungso asobe thsüang”; tüsho junangde kam. 12Alonü rim, sangrung mungji alala, müjih asobe tüsho aso asobe sangdung alala akhiukshih. Tüsho Thrünpuhnü ju tsülah de kheah. 13Tüsho ju mahsam nimung arelim tüsho yapsu lakheah.
14Thrünpuhnü tha, “Azhing kheaknü animung büthsüpü thüning ching ayinatrümbo lashang, tüsho jurübonü nimungbo, kambo, tüsho akheahmünchibo müchitpü thsüang; 15tüsho alomi kheak yinshihpü thüning ching ayinatrümbo lashang”; tüsho jude alakheah. 16Jumonü Thrünpuhnü ayinatrüm atobo mahne thrün; animung thsungkheak ani, tüsho azhing thsungkheak khinu. Apinü chiningbo she thrün. 17Thrünpuhnü jurübo alomi yinshihpü thüning ching zojih, 18tüsho animung le azhing kurungkheak yakzan shuhpü, tüsho amiting kheaknü ayin büthsüpü lashih. Tüsho Thrünpuhnü ju tsülah de kheah. 19Tüsho ju aphüyipü nimung arelim tüsho yapsu lakheah.
20Thrünpuhnü tha, “Ke ju rhangdung lakhi lorilokobonü mishang; tüsho wuhnubo alo kumung thüning ching phinshang.” 21Thrünpuhnü keto shiwüh atobo, ke ching labe lorilokobo tüsho wuhnubo mungji alala thrün. Tüsho Thrünpuhnü ju tsülah de kheah. 22Apinü jurübo alala müngühjihde tha, “Aso asoang tüsho wüh buang, tüsho ketobo ching kebonü mishang, tüsho alomi kheak wuhnubo wüh bushang.” 23Tüsho ju aphüngü nimung arelim tüsho yapsu lakheah.
24Judüki Thrünpuhnü tha, “Alonü rhangdung lakhi shiwüh mungji alala: akam-shiwüh tüsho abüde atsahbe mütüm shiwüh, ato tüsho anini akhiukshang,” tüsho jude alakheah. 25Tüsho Thrünpuhnü alomi ching mütüm shiwüh, akam-shiwüh tüsho alo kheak abüde atsahbe mungji alala thrün. Tüsho Thrünpuhnü ju tsülah de kheah.
26Judüki Thrünpuhnü tha, “Isanü isa kiphahkhi ching mihtsürü thrünanü; tüsho keto ngüh, thüning wuhnubo, akam-shiwüh tüsho mütüm shiwüh tüsho alo kheak abübe alala kurungkheak arü atungrü thsüshihanü.” 27Jumonü Thrünpuhnü api kiphahkhi ching mihtsürü thrün; apinü athrürü tüsho aliberü thrün. 28Thrünpuhnü arü müngühjihde tha, “Aso asoang tüsho wüh buang; alomi mishang tüsho ju danyukang; keto ching thüngüh, thüning wuhnubo tüsho alo kheak abübe alala kurungkheak atungrü thsang.” 29Thrünpuhnü tha, “Alomi ching lakhi aso asobe, sangrung tüsho aso asobe sangdung alala inü nüsa kilim jihchoh; nüsa thsungkheaknü ju tsühyungbe thsübah. 30Tüsho alomi ching lakhi shiwühbo, thüning wuhnubo tüsho alo kheak abübe alala kilim inü sangrung phüyakbo tsühyungbe thsüpü jihdo”; tüsho jude alakheah. 31Thrünpuhnü apinü athrünkhi alala ngü tüsho ha khide tsüde alakheah. Tüsho ju athuruk nimung arelim tüsho yapsu lakheah.
موجودہ انتخاب:
THRÜNTAN 1: YIMCBSI
سرخی
شئیر
کاپی
کیا آپ جاہتے ہیں کہ آپ کی سرکیاں آپ کی devices پر محفوظ ہوں؟ Sign up or sign in
Yimkhiung Naga CL Bible - AMÜSÜH HÜM
Copyright © 2008 by The Bible Society of India
Used by permission. All rights reserved worldwide.