T. LŪKÖS 7
7
Halanken Kūön Alaha Ök Mākūö Kumyung
(Mt 8.5-13)
1Keuheūthë ṙô Anga-aṅ, nö el nang yik tarik, ngaich kuhēthötre Anga-aṅ nö i Kafarnahum.
2Ngaich hĕng taka ök kūön ök yöngṙen tö hēngòng kumyung ök hanāngenlōn ò, vahav nö ngaich, nö hòṅ öhngen nö kapah. 3Höng hangtöre anga-aṅ tö yik mākūö Yahūti nö in Ò; ve-ekūö Ò nö yihtöre nö hayööken ök kūön Ò. 4Ngaich cha-a nö yihtöre nö in Yēsū; ngaich kô-òṙô cha-a nö ve-ekūö Ò, nö ngö ṙô: Törôngen öp anga-aṅ nö hayööken Meh; 5Pò ò nö töhāngenlōn tö hī; hĕnghölö ap nö vī-il chūök hī ve-ekūötēv.
6Ngaich ang Yēsū nö hol röön cha. Ngaich öt marôvat Anga-aṅ tö ngam patī; tīnhang ngam yöngṙen töhēngòng kumyung, tö yik holre nö ngö ṙô tö Ò: Mā; uh Man harëtnyö elmatre, Öm yihtöre i patī chu; tön rö-övö chin tökanô-òṅvö. 7Lökten chu ötrēhĕn lōnuvö tö yinihtöre in Meh kūö e. Höng ṙô-òvö Man yĕh; ngaich kô-òren ap kūön chu min nö lööken. 8Pò chu chu-ö inrē me-elkatòh chöngö; aṅhaṅv elkatòh inrē chu-ö tö kumyung. Ngaich hĕng taka tahölṙô chu-ö tö ngòh, Kuṙòh, öich ngö; ngaich kô-òren anga-aṅ nö kiröönngöre. Hēk, Ta-ih, ngö tö ngam tahëng taka; ngaich kô-òren anga-aṅ nö yihtöre. Hēk, La-evṙen man, ngö chu-ö tö ngòh kūönre; ngaich kô-òren anga-aṅ nö la-evṙen tö e.
9Höng hangtöre Yēsū tö u, ngaich uṙeh Anga-aṅ tö ò; havööhöl Anga-aṅ tökūöre, ngaich ngö ṙô Ò tö yik tömaṙôngö, tamömrit Ò, Ngö ṙô Chin tö yīö, öt kanôtuvökūö Chin tö töngatī ṙôken mikah, höngröö rö-övö nö i Israĕl. 10Ngaich më tötīni nö havantöre nö im patī; ngaich kôtökūö tö ngam kūön nö lööken.
Hachohlö Kūön Ök Tafiösi Ang Yēsū
11Ngaich ilööṙen unôichrit e, tö Ò nö chuh ik panam Nēin, ngaich yik mahaköp nö hol Ò, yik tömaṙôngö inrē tarik. 12Ngaich röhta Anga-aṅ nö i kūö inkūp ök panam, ngaich meuk ök tökapah, tökeunnyuvö, töng hĕng maneuk ök, nö kūön ök yöngre, ök tafīösi yöng ò kikānö. Maṙôngö yik tarik aṅ ngam panam nö hol ò. 13Höng meuktöre ngam Mā tö ò, ngaich aheukölōn tö ò, ngaich ngö ṙô Anga-aṅ tö ò, Uh man peuiny. 14Yihtöre Anga-aṅ, nö haröhtöre, ngaich lūölkö ngam chūök ngam tökapah ngaich sökngöre yik kameūnan. Ngaich ngö ṙô Ō, Me-eṅ, tö-ayal tarik, choholre; ngö ṙô Chin tö meh. 15Ngaich ngam tökapah nö ūchlöre, ngaich kaknyöre nö ṙô-òvö; ngaich kētuvö anga-aṅ tö Ò nö ik yöngre. 16Ngaich pa-ekūö yik tömaṙôngö; ngaich ngö ṙô cha-a nö ha-öiny ngam Tēv, Hĕng taka ön ngòh yöng pròfĕt mi-in hī; meukṙen vē tarikre An ngam Tēv. 17Ngaich Anga-aṅ nö hāngö nö i Yūtā, i nup taṙòkhöre ranghöre inrē.
Yik Tahīntö Yôhān Ök Vamôk
(Mt 11.2-19)
18Ngaich yik mahaköp nö in Yôhan, nö ve-eny nang ò tö u. Nëttak havëti ngaich ang Yôhan, nö in re tö yik mahaköp; 19Ngaich tīni cha-a nö im Mā, nö ngö ṙô, Me-eṅ Öm yamih? Höngkökūö tahëng ṙöng öi? 20Chalô minā tarik nö in Ò, ngaich ngö ṙô cha-a, Tīntu an in Meh tö Yôhan öp Vamôk, ai hatönö Meh, Me-eṅ Öm yamih? Höngkökūö tahëng ṙöng öi?
21Hē e Anga-aṅ nö halanken yik tö maṙôngö tövahvö, yik töpōihangen, ane inrē tö sī-u alaha; kētö mat yik tömaṙôngö tötmeuk inrē. 22Ngaich ngö ṙô Anga-aṅ nö sapṙô cha, Kuṙòh, kiröönngöre nan; ve-enynang Yôhan tö nup maheuṅkre, nup ahangre inrē; tö vē tötmeuk nö teūngen tö matre; vē tökaròk nö kiröönngöre; vē töyeūnyu nö lööken; ane inrē vē töthang nö hang; hachohlöng inrē tökapah; mikahtuṙen vē yāich, tö ngam tölöök inhānga. 23Tökôlò ön ngòh töt uhā-alōn nö in Chu.
24Chuhhë nak tötīntuvö tö Yôhan; ngaich ngö ṙô Ò tö Yôhan, nö i më tömaṙôngö, Asuh ök maheuṅk yīö, öi chuh el-inchōn? Tafūyö ökuh tökalöka tö kūö kuföt? 25Asuh ṙöng ök maheuṅk yīö? Tarik ṙöng ökuh, nö töhilātö tötanyīka? Yĕh meuk yin, tö vē tölöökö hilā, ane inrē tökôlòṙen, nö iyöng i patī rācha. 26Asuh ök pöri maheuṅk yīö? Pròfĕt ṙöng? Hòṅ; ngö ṙô Chin tö yīö, mööḵlö ṙôkö ap tö pròfĕt. 27Anga-aṅ ök töngö kinūichngö, Yĕh meuk; tīnngö ngam ma-ahānga Chin, nö urēhĕkūö Meh, nö mahalēnken talöökö Meh min nö urĕh? 28Ngö ṙô Chin tö yīö, Rö-övö nö töpōyuvö tö Yôhan i tum tak vē fahötnyö kikānö. Sönen pöri öp tökūöṅnö nö im pūlngö ngam halīöngö, nö pōyö tö ò.
29Ngaich më taṙòhöre tarik hē cha nö hang, yik mahamūl ṙāi kinëhöt chehen inrē ngaich akahngen lanöökö ngam Tēv cha-a; pò cha nö tövōkö i ök tī Yôhan vinôkö. 30Ngaich pöri yik Feresī, ane inrē yik mahaköptö ngam chöngö, nö sōḵo ngam tölöök tī ngam Tēv nö in cha; pò cha nö öt vōkö tö ò.
31Sitih inlahen tī Öichvö min asā tö vē tarik mi-i ngih tūmö? Sā yòh aichvö? 32Sā nyīö yin vē amūichhaka nö i chūök mi-inyih, ngaich nöng kö havëken höö; yip töngö ṙô: Föö in yih in yīö; ngaich rö-ö yī-ö kiṙīöm. Harāmöre in yih; ngaich rö-ö yī-ö peuiny. 33Pò Yôhan ök Vamôk nö yih, ngaich öt nya-aṅvkūö, ötrēhĕn nö òk vāin; ngaich ngö ṙô yī-ö, Sī-u aṅ in an? 34Ngaich ngòh Kūön Tarik nö nya-aṅvkūö, hĕnghöre òk; ngaich ngö ṙô yī-ö, Yĕh meuk, ngòh töpōivat tarik, amòk vāin inrē; hamòl vē mahamūl ṙāi kinëhöt chehen, vē tököölö fālen inrē. 35Akahaiṙen yin vē kūön mikah tö ngam mikah nö tökô-en.
I Patī Sīmōn Ök Feresī Ang Yēsū
36Ngaich hĕng tak ök Feresī, hamôten Ò nö holkūö ò nö nyā. Kuhēthötre Anga-aṅ ngaich, nö ël ök patī ök Feresī; ngaich ūichngöre nö nyā. 37Ngaich hĕng tak ök kikānö, aṅ im panam, tököölö fālen ök; ngaich akahalōn anga-aṅ tö Ò, nö ūichhaka nö nyā nö el patī ök Feresī, kēhöt anga-aṅ ngaich tö ök tö tā hūsa tavī-i nö el pilön. 38Sökhaka anga-aṅ nö la-uk kunröön Ò, nöng peuiny; ngaich mu-uhôngi kunröön Anga-aṅ tö makmat ò; ngaich chūtö anū-ö tö ò nö aṅtī tö keūyöre; ngaich hāṅmökūö nuk kunröön Ò tö ò; ngaich hachāmö anū-ö tö ök tötahūsa tavī-i. 39Ngaich hē ngam Feresī nö meūkö e, ngam mahavëken Ò, ngaich ngö ṙô anga-aṅ, nöng in re ṙô, Yē ngòh tarik öre nö pròfĕt, ngaich kô-òren nö akahalōn tö inlahen ngam kikānö, ngam lamūölken Ò, nö tököölö fālen.
40Ngaich ngö ṙô Yēsū nö sap ṙô ò, Sīmōn; rahëichyen öp ṙô Chu in meh. Ngaich ngö ṙô ò, Mahaköphöti; ṙô-òv Man yĕh. 41Hĕng taka ök mahaṙūönghökūö ngaich nët tak nak tö hötṙehevö nö in ò. Hĕng taka ök tö taneūyòng hötṙeh, tö rupīö; hĕng taka ök tö taneui anāi hötṙeh. 42Ngaich hē cha nö öt kahëtuvö, ngaich nëtre taka cha-a nö aṙēlöngö tö ò. Ap yòh ap öre tö cha ap tömööḵlö hanāngenlōn tö ò? 43Ngaich ngö ṙô Sīmōn, nö sap ṙô Ò, Ngam töpōilö inṙē-ĕl an, tö lōn chu. Ngaich ngö ṙô Ò tö ò, Huveū-eu elmat man. 44Havööhöti tökūöre nö im kikānö. Ngaich ngö ṙô Ò tö Sīmōn, Meuk ngòh öm kikānö. Kuhēthötre Chin el patī meh. Ngaich öt kē-ĕvkūö tö mak, sanöich röönre; ngaich pöri anga-aṅ nö mu-uhòngngö kunröön Chu tö makmatre; ngaich chūti anū-ö tö ò nö aṅtī tö keūyöre. 45Yih chū-ö, rö-ö me-eṅ hāmkūö Chu; anga-aṅ pöri hēten tö yanihih Chu, nöng öt ṙākenre nö hām kunröön Chu. 46Rö-ö yih me-eṅ hacham elkui Chu tö tavī-i; hachāmö kunröön pöri Chu-ö tö ngam tötahūsa tavī-i. 47Lökten Chin ngö ṙô tö meh, Nup tökööl ò, nup töpōyen, nö aṙēḵlöngö; pò ò nö pōyen hanāngenlōn. Ngòh törahëichyen inṙēlö pöri, ngaich rahëichyen hanāngen?
48Ngaich ngö ṙô Ò tö ngam kikānö, Aṙēḵlöng nup tökööl meh. 49Ngaich yik hamòlkūö Ò nö nyā, nö ngö ṙô nö in re, Achīö ang ngòh tö uroh nö aṙē-ĕl tökööl? 50Ngaich ngö ṙô Ò tö ngam kikānö, Ap mikah meh ap mahayööken meh. Kumchik ngöröönre man ngaich kuṙòh kiröönngöre.
موجودہ انتخاب:
T. LŪKÖS 7: CANIBSI
سرخی
شئیر
کاپی
کیا آپ جاہتے ہیں کہ آپ کی سرکیاں آپ کی devices پر محفوظ ہوں؟ Sign up or sign in
Car Nicobarese (Re-edited) Bible - TÖHET LĪPÖRE
Copyright © 2010 by The Bible Society of India
Used by permission. All rights reserved worldwide.
