T. LŪKÖS 5
5
Havëkö Ök Raneh Mahaköp Ang Yēsū
(Mt 4.18-22; Mk 1.16-20)
1Ngaich hē më tömaṙôngö nö singtöre nö in Ò, nö hang ṙô ngam Tēv; höng sökhaka Anga-aṅ nö i Kenneseret nö i kūö mak. 2Nët nòng maheuṅk Anga-aṅ tö kupòk töng ngöh nö el ök mak. Öt aṅhaṅv pöri; pò yik yōm kinëḵeṅ kāḵ nö kiröönngöre nö söichmat nuk inhāṅlre. 3Hĕng nòng chūök Anga-aṅ ngaich nö yôklö nö el ök kupòk Sīmōn; ngaich ve-ekūö ò Anga-aṅ nö rahëch höinytī nö ṙuhöinyre. Ūichngöre Anga-aṅ ngaich, nö mumkahten yik tömaṙôngö nö el ngam kupòk. 4Keuhēthë ṙô Anga-aṅ, ngaich ngö ṙô Ò tö Sīmōn, Ṙuhöinyre man im tö-aṙūk; hô-òti tö ngam inhāṅl, öm ahāl kāḵ. 5Ngaich ngö ṙô Sīmōn nö sapṙô Ò, Mahaköphöti; hĕng mitööm in amòh harëtnyö elmatre; ngaich höng ötpô-òvö. Ngaich pöri yēḵ i ṙô Meh chin ngaich, hôtö ngih inhāṅl. 6Keuheūthëṙen cha-a tö e, ngaich pōyen nuk kāḵ tö ahālhötvö; takaichköṅny ngaich nuk inhāṅl cha. 7Have-eti cha-a ngaich tö yik holre me-el tahëng nòng kupòk, pò cha nö hòṅ hōluṙen tö cha, Yihtöre cha-a ngaich, hatööḵöl tö minë kupòkre, ngaich öhngen anū-ö nö lōngti. 8Höng meuktöre ang Sīmōn Pītör tö e, ngaich sōntökūöre nö i kūö Yēsū, nö ngö ṙô, Ō Mā, kē-ĕngre Man in chu; tön tököölö fālen chin chu-ö tarik. 9Pò ò nö pingangkūö, yik taṙòkhöre hol ò inrē, tö ṙòken nuk pôḵ cha kāḵ. 10Ngati inrē nāṅ Yāköp, nāṅ Yôhan, nak kūön Sepetī, yik hol Sīmōn. Ngaich ngö ṙô Yēsū tö Sīmōn, Uh man pa-ekūö; töngamuhöten man min öm kamëḵ tarik. 11Tūökhöt cha-a tö nuk kupòkre nö el tanyô, ṙā-ang tö u, ngaich tömrit Ò.
Halanken Ök Tarik Ang Yēsū
(Mt 8.1-4; Mk 1.40-45)
12Ngaich hē Ò nö ik tö hĕng panam, hĕng taka ök umuh tarik töpōihangen töyeūnyu, höng meuktöre anga-aṅ tö Yēsū, sōnhöti tö kūöre, nö ve-ekūö Ò, nö ngö ṙô, Me-eṅ Mā, yē Meh lōnuvö, kô-òren Man löökentī tö chu. 13Hateuthöiny Yēsū tö këlre, nö lūölken ò, nö ngö ṙô Hōḵ Chin; lööken man yēḵ. Ngaich ilööṙen minë yeūnyö nö ṙāngen ò. 14Sōtu anga-aṅ ngaich tö Ò, nö ve-enynang tarik; Kiröönngöre pöri me-eṅ, öm hameuktöre ip kūönṙô; kē-ĕti me-eṅ tö nup tökētuvö tökūö lanööken meh, sā hinôtöre tö Môsös; nö inmeukhömat cha. 15Vaichtö ṙuhöinyre hināngö pöri Anga-aṅ; maṙôngö yik tarik yamihtöre tö hòṅ halankaṙen tö nuk vahre. 16Havanngöre pöri Anga-aṅ nö el-inchōnngö; ngaich ve-ekūötēv.
Halanken Ök Tölum Ang Yēsū
17Ngaich hĕngheuh ik hē u anū-ö sakāmö tö Ò nö mumkahten, ngaich umuh nö ūichhaka yik Feresī ane inrē yik mahaköptö ngam chöngö, yik ṙamā-ang taṙòkhöre panam i Kelelī, i Yūtā, ane inrē i Yerūsalem ngaich ngam kanô-òṅ ngam Mā Tēv nö in Ò, nö halanken tövahavö. 18Ngaich hĕng taka ök umuh tarik tökētuvö nö el chamamre, ök tölum; ngaich chöh lökhötre cha-a nö kēhöt ò, ane inrē ṙāten ò nö i kūö Yēsū. 19Ngaich öt maheūṅku cha-a tö lökhötre, pò më tömaṙôngö. Yônlö cha-a ngaich nö i kui ök patī, ngaich löktö i kui e tī cha a nö hôten ò nö ël ök chamamre nö i kūö Yēsū. 20Höng meuktöre Anga-aṅ tö mikah cha, ngaich ngö ṙô Ò, Me-eṅ tarik, aṙēlöng nuk tökööl meh nö ngaich. 21Ngaich yik kamūich, yik Feresī in re, nö ngö ṙô nö inrē, Achīö ang ngòh tötmilēḵṙô tö ngam Tēv? Achīö ap tökô nö aṙē-ĕl tökööl, höng humeng taka An, ngam Tēv? 22Akahtöheichlōn pöri ang Yēsū, tö lōn cha, ngaich ngö ṙô nö sapṙô cha, 23Asuh ap ellōn yīö öp lōn? Ngam yòh öng tölööṙen nö ṙô? Aṙēlöngö nuk tökööl meh nö ngaich, ane ṙöng, Choholre man kiröönngöre? 24Hòṅ yīö pöri akahalōn tö ngòh Kūön Tarik nö kô nö aṙē-ĕl tökööl nö ing panam, ngö ṙô Ò tö ngam tölum, Ngö ṙô Chin tö meh, Choholre man; kēḵ ngam chamamre. Kuṙòh; chuh patīre. 25Ilööṙen anga-aṅ ngaich nö choholre, nö i kūö cha; kētam tö ök chūökre nö hulalhaka ngaich chuh patīre, nöng ha-öiny ngam Tēv. 26Ngaich pingangkūö më tömarôngö; ngaich cha-a inrē nö ha-öiny ngam Tēv. Hĕnghöre tööḵlö cha-a tö pinhëṅ-eṅkūöre, ngö ṙô, Meuk tötha-eh in tötaheui.
Havëken Lēvī Ang Yēsū
(Mt 9.9-13; Mk 2.13-17)
27Keuheūthëṙen anū-ö ngaich kiröönngöre Anga-aṅ. Ngaich hĕng taka ök maheuṅk Ò, mahamūl ṙāi kinëhöt chehen, Lēvī ök mine-eny ò; höng ūichhaka anga-aṅ nö i chūök inmūlö ṙāi kinëhöt chehen, ngaich ngö ṙô Yēsū tö ò, Ta-a tömrit Chu man. 28Ṙā-ang anga-aṅ tö nuk taṙòkhöre, ngaich tömrit Ò. 29Ngaich pōyentī anga-aṅ nö halanṙen nya-aṅkūö Ò nö i patīre. Ngaich maṙôngö yik mahamūl ṙāi kinëhöt chehen, yik tahëng inrē, amūichhaka nö holkūö cha nö nyā. 30Ngaich yik Feresī, yik kamūich inrē, nö vahëkuvö nö i yik mahaköp nö in Ò, nö ngö ṙô, Kūö yòh öi yī-ö nyā, òk inrē, öi holkūö mahamūl ṙāi kinëhöt chehen, tököölö fālen inrē? 31Ngaich Yēsū nö sapṙô cha, nö ngö ṙô, vē tölööken rö-ö yin nö hòṅ lamë-evṙen; höng vē tö vahav pöri. 32Rö-ö Chin yamih öich havëkö vē tötmichūṙen; mahavëkö vē tököölö fālen pöri, nö havöötö ellōnre.
Intönö I Alaha Ngam Inhīkö
(Mt 9.14-17; Mk 2.18-22)
33Ngaich ngö ṙô cha-a tö Ò, Ṙöpen yip mahaköp nö in Yôhan nö ahik, ve-ekūötēv inrē; ngatī inrē yip mahaköp nö i yip Feresī. Ngaich pöri më mahaköp nö in Meh, nöng nyā hĕnghöre òk inrē. 34Ngaich ngö ṙô Yēsū tö cha Kò-òren öi tī-ivö tö më hamòl ngam töhapihö nö ahik, yē ò nö ṙòngmöng in cha? 35Tösakāmu yanihih öp min, hē ngam töhapihö nö kē-ĕyö nö ṙā-ang in cha; ngaich möl cha-a min nö ahik hē e. 36Ngaich hĕng ök inchōḵoṙô Ò nö in cha; Öt tarīkuvö tumkaichlö tufömngöre hilā ngaich chōktö e nö i hötṙeh hilā, pòn takaich min ngam tufömngöre, öthōḵen höö anū-ö inrē min tö ngam hötṙeh töm tuföm ngöre. 37Öt tarīkuvö inrē ma-asëhöt tufömngöre vāin, nö ël nup hötṙeh uk. Yē ò nö ngatī, ngaich ngam tufömngöre vāin min nö lakukköṅnykūö tö ngam uk; ngaich aṙösi min angū-ö, ngaich ötkôlò inrē min ngam uk. 38Në tufömngöre pöri vāin asëhötvö nö ël tufömngöre uk; ngaich kö kôlò nyöre anū-ö. 39Ane inrē öt tarīkuvö tö hòṅ òk tufömngöre vāin, yĕn ngaichkūö tö ngam hōtṙeh; pò ò nö ngö ṙô, Ngam hötṙeh an tölöök.
موجودہ انتخاب:
T. LŪKÖS 5: CANIBSI
سرخی
شئیر
کاپی
کیا آپ جاہتے ہیں کہ آپ کی سرکیاں آپ کی devices پر محفوظ ہوں؟ Sign up or sign in
Car Nicobarese (Re-edited) Bible - TÖHET LĪPÖRE
Copyright © 2010 by The Bible Society of India
Used by permission. All rights reserved worldwide.
