T. LŪKÖS 3
3
Mikāhaten Ang Yôhan Ök Vamôk
(Mt 3.1-12; Mk 1.1-8; Jn 1.19-28)
1Im tinneui sīö samyeūheu Tipērias Kaisöör nö hayöng, vīlöngö ang Pòntiös Pailĕt nö mākūö Yūtā, ang Hēròt inrē kun rācha Këlelī, ök kahëm ò inrē Filip kun rācha Itūriā ane inrē Trakônītis, ang Lusaniās inrē kun rācha Apilēnī. 2Hē Annas, Kaifas inrē nö yöng kūönṙô; ngam ṙô ngam Tēv nö yih nö in Yôhan, nö el-inchōn, ök kūön Sakariā. 3Ngaich yihtöre anga-aṅ nö i Yôtön i nup töng ranghö e inrē, mumkahten tö vinôkö invöötö ellōn, nö inṙēlö tökööl. 4Sā kinūichngö e, nö i mat līpöre nö ṙô ök pròfĕt Isayā, Ngam ṙô öp hamūḵaṅ el-inchōn, Halēnken talöökö ngam Mā Tēv yin; hachipkö minë kanröönö Ò. 5Hatööḵlöngö nup min vëlö; piṙāptukui inrē në rôngö; chip min nup tö kuròk; faṙë cha ël inrē nup talöökö töpisūköre. 6Ane inrē ṙòkhöre min tarik nö meuk ngam inyööken aṅ im Tēv. 7Lökten ò nö ṙô tö yik tömaṙôngö tarik chamuh in ò, Yī-ö kūön pēch, achīö ap hamôten yīö hatūingöre tö ngam lanīnö yamih? 8Lökten yin la-evṙen tö nup la-en ngam invöötö ellōn. Ui hòṅ ngö ṙô tö lōnre, yöngu in tö Aprahām. Tön ngö ṙô chin tö yīö, tö ngam Tēv nö kô-òren nö kēḵ në ihong nö vī-il u nö kūön Aprahām. 9Ngaich ap yih hanīöng nö hulalhaka nö i rööntö nup chōn; lökngen nup taṙòkhöre chōn tötlöökö ṙòng nö kūöltuvö, ngaich kavalhötvö nö i kūö tameūyö. 10Ngaich ngö ṙô më tömaṙôngö tarik tö ò, Sitih inlaha öi pökeh? 11Ngaich sapṙô cha anga-aṅ nö ngö ṙô, Yē ngòh tö nëtö inyut, hökngen ò nö kē-ĕkūö ngam tötaṅhaṅv-in; ngòh tönya-aṅvkūö inrē, hökngen ò nö ngatī. 12Ngaich yihtöre nö in ò inrē yik mahamūl ṙāi kinehet chehen, nö hòṅ vōkö; ngaich ngö ṙô cha-a tö ò, Mahaköphöti; sitih inlaha öi pökeh? 13Ngaich ngö ṙô anga-aṅ tö cha, Ui harū-ul ṙôken nup hinôtöre kahëḵ yīö. 14Sitih inlaha öi pökeh ihö? Ngö ṙô yik kumyung tö ò; ngaich ngö ṙô anga-aṅ tö cha, Ui chökhuṙen tö tarik; ui rēhĕn kahë-ev öi ötlöknyu chööḵnyi, höng ngāichölōn tö nup töng raneushöre.
15Ngaich pò më tarik nö höng meūka, ane inrē më taṙòkhöre tarik nöng ellōnre lōn tö Yôhan, yē ò uvöh nö Kristū. 16Ngö ṙô Yôhan nö sapṙô cha, Höng vamôkö yīö takô chin chu-ö, öich aṅti tö mak; Öp ihih pöri yamih, tömööḵlö kanô-òṅ tö chu; ötrēhĕn chin kô luhnyö nup rehen kunröpö Ò. Anga-aṅ min vamôkö yīö nö aṅtī tö ngam Töhet Fanöinylö, tameūyö inrē. 17Öp tö-aṅhaṅv eltī tö haneui, ma-ahetlö ël ap chūökre; föngi pöri min tö ò nup uk nëlö nö i kūö öp töng ötnyangngö tameūyö.
18Pōyen ṙô an tö nup tahëng, ṙinuhöl alaha më tarik, nö mumkahten tö ngam tölöök inhānga. 19Ngaich ang Hērôt ap kun rācha kūöre nö ve-evkūö tö ò, pòkūö Hērôti ök pīhö ök kahëm ò, ane inrē pòkūö nup töpōyen tötlöök la-en Hērôt. 20Ṙuhöllōnre anga-aṅ nö hòṅ haköpngökūö ò nö el kinlōngö.
Vinôktö Kui Yēsū
(Mt 3.13-17; Mk 1.9-11)
21Ngaich hē kinheūṅten vinôkö yik tömaṙôngö tarik, ang Yēsū inrē nö vōkö; ve-ekūötēv, ngaich löpnyörekūö ngam halīöngö. 22Ngaich ngam Töhet Fanöinylö nö yônti, nö sā tö alahavö nyö-öṅ nö i kui Ò; ngaich löktö el halīöngö ök ṙô yamih, Me-eṅ Man hanāngenlōn Chu, Öm Kūön Chu; in Meh Chin Öich ṙāmölōn takô.
Yik Lökngörit Yēsū
(Mt 1.1-17)
23Ngaich ang Yēsū nö lūöi anāi samyeūheu, hē ranehten Ò nö mumkahten; nö kūön Yôsĕf (tö lōn), nö kūön Hēlī. 24Nö kūön Mattat, nö kūön Lēvī, nö kūön Melkī, nö kūön Yannai, nö kūön Yôsĕf. 25Nö kūön Mattatiās, nö kūön Amôs, nö kūön Nahom, nö kūön Eslī, nö kūön Nakkai. 26Nö kūön Māt, nö kūön Mattatiās, nö kūön Semëin, nö kūön Yôsĕk, nö kūön Yôta. 27Nö kūön Yôanan, nö kūön Rēsa, nö kūön Sĕrupāpĕl, nö kūön Sialti-ĕl, nö kūön Nērī, 28Nö kūön Melki, nö kūön Atī, nö kūön Kôsam, nö kūön Elmātam, nö kūön Er, 29Nö kūön Yēsū, nö kūön Eli-ēsör, nö kūön Yōrim, nö kūön Mattat, nö kūön Lēvī. 30Nö kūön Sumōn, nö kūön Yūtā, nö kūön Yôsĕf, nö kūön Yônām, nö kūön Ēllīakim, 31Nö kūön Melëa, nö kūön Menna, nö kūön Mattatā, nö kūön Natān, nö kūön Tāvit, 32Nö kūön Yēsi, nö kūön Opĕt, nö kūön Pōas, nö kūön Sāla, nö kūön Nāsön, 33Nö kūön Aminatap, nö kūön Atmin, nö kūön Arnī, nö kūön Hesròn, nö kūön Pērĕs, nö kūön Yūta, 34Nö kūön Yāköp, nö kūön Isak, nö kūön Aprahām, nö kūön Tīöra, nö kūön Nāhôr. 35Nö kūön Sēruk, nö kūö Rēu nö kūön Pēlĕk, nö kūön Eper, nö kūön Sēla, 36Nö kūön Kāinan, nö kūön Arfaksāt, nö kūön Sem, nö kūön Nō-a, nö kūön Lāmek, 37Nö kūön Matūsala, nö kūön Ēnòk, nö kūön Yāret, nö kūön Mahalëlĕl nö kūön Kāinan, 38Nö kūön Enòs, nö kūön Set, nö kūön Ātöm, nö kūön ngam Tēv.
موجودہ انتخاب:
T. LŪKÖS 3: CANIBSI
سرخی
شئیر
کاپی
کیا آپ جاہتے ہیں کہ آپ کی سرکیاں آپ کی devices پر محفوظ ہوں؟ Sign up or sign in
Car Nicobarese (Re-edited) Bible - TÖHET LĪPÖRE
Copyright © 2010 by The Bible Society of India
Used by permission. All rights reserved worldwide.
