Juan 4
4
Samaria warmiwan Jesús parlanqan
1 Fariseukunam musyariyarqan Juan bautizashqanpita mas atska nunakunata Jesús bautizëkashqanta y discïpulunkuna mas atskaq kayashqanta. 2(Tsënö kaptinpis manam kikin Jesústsu bautizarqan, sinöqa discïpulunkunam.) 3Fariseukuna tsënö parlayashqanta musyarmi Judeapita Jesús kutikurqan Galileaman.
4Galileaman chäyänanpaqqa Samariaparan pasayänan karqan. 5Tsënö ëwarmi Sicar markaman chäyarqan. Tsë markaqa këkan tsurin Joséta Jacob qoykushqan chakrapa lädunchömi.#Gén. 33.19; Jos. 24.32. 6Tsëchömi këkan Jacob uchkutsishqan pözu. Pullan junaqnöna këkaptinmi tsë pözuman chärir utishqa kar Jesús jamakurirqan. 7Samaria warmi yakuta apaq tsëman chäriptinnam Jesús kënö nirqan: <<Yakullä qarëkallämë>>.
8(Jesús jamashqanyaqmi discïpulunkuna markapa ëwayarqan mikï rantiq.)
9Tsë warminam kënö nirqan: <<Israel nuna këkarqa ¿imanirtaq Samaria warmi këkaptï yakuta mañakamanki?>>
Tsënö nirqan Samaria nunakunawan Israel nunakuna chikinakuyaptinmi.
10Jesúsnam nirqan: <<Teyta Diospita imata chaskinëkipaq kashqanta musyarqa y noqa pï kashqätapis musyarqa qampis yakuta mañakamankimanmi. Mañakamaptikiqa kawatsikuq yakutam qoykuqman>>.#Isa. 44.3; Jer. 2.13; 17.13; Juan 7.37-39.
11Tsë warminam nirqan: <<Tëtë, kë pözuqa hondum. Chaqanëkipaq imëkipis mana këkaptinqa ¿mëpitataq tsë kawatsikuq yakuta jorqamunkiman? 12Unë castantsik Jacobmi kë pözuta uchkutsirqan. Kë pözupitam yakuta upuyarqan wätankunapis, tsurinkunapis y kikinpis. Tsë yakupita mas alli kaq yakuta qomänëkipaq manam pëpita mas puëdiqtsu kanki>>.
13Jesúsnam nirqan: <<Kë pözupita yakuta upuq kaqqa yapëpis yakunëkanqam. 14Noqa qonqä yakuta upuq kaqqa imëpis manam yakunanqanatsu. Tsë qonqä yaku shonqunchö pukyunö kaptinmi wiñëpa kawanqa>>.
15Warminam nirqan: <<Tëtë, imëpis mana yakunänäpaq ni kë pözumanpis mana kutiräkamunäpaq tsë yakuta qoykallämë>>.
16Jesúsnam nirqan: <<Ëwë qowëkita qayamunki>>.
17Niptinnam warmi nirqan: <<Tëtë, manam qowä kantsu>>.
Tsënö niptinnam Jesús nirqan: <<Rasun kaqtam nïkamarqunki. 18Qamqa pitsqaq nunawannam tärarqunki. Kanan tärashqëki nunapis manam qowëkitsu. Tsëmi qowëki mana kashqanta nimarqa rasun kaqta nïkamarqunki>>.
19Warminam nirqan: <<Tëtë, qamqa kanki profëtatsunchi. 20Noqakunapa unë castäkunaqa taqë jirkachömi Teyta Diosta adorayaq. Qamkunaqa Jerusalénchöraq adoranantsikpaqtaq niyanki>>.
21Jesúsnam nirqan: <<Rasunpam niq: Taqë jirkamanpis ni Jerusalénmanpis manana ëwashpana Teyta Diosta adorayänëkipaq kaq tiempu chëkämunnam. 22Qamkunaqa Diosta adorarpis willakïninta manam musyayankitsu. Salvakuq nuna Israelpita kaptinmi noqakunaqa willakïninta musyayä.
23<<Tiempu chämushqanam Teyta Diosta rasunpa adoraqkuna Espíritu Santu munashqannö llapan shonqunkunawan adorayänanpaq. Tsënö adoranantsiktam Teyta Diosqa munan. 24Teyta Diosqa Espïritum. Tsëmi pëta adoraqkuna Espíritu Santu yanapaptin llapan shonqunkunawan adorayänan>>.
25Warminam nirqan: <<Tëtë, Cristo shamunanpaq kashqanta musyämi. Pë shamurnam tsëkunata käyitsimäshun>>.
26Tsënam Jesús nirqan: <<Tsë shamunanpaq kaqqa noqam kä>>.
27Discïpulunkuna kutir warmiwan parlëkaqta tarïkurmi alläpa espantakuyarqan. Tsënö tarikarpis manam mëqanpis: <<¿Imata parlëkäyanki?>> o <<¿Imata tapïkanki?>> nir tapuyarqantsu.
28Warminam puyñunta jaqirïkur markaman ëwëkur nunakunata willarqan: 29<<Juk nunam pözu kaqchö këkan. Pëmi nimashqa imanö kashqätapis. Aku rikaq ëwashun. ¿Manatsuraq Teyta Dios kachamushqan Cristo pë?>>
30Tsënö niptinnam nunakuna ëwayarqan Jesús këkashqanman. 31Manaraq chäyaptinmi discïpulunkuna Jesústa niyarqan: <<Rabí, mikurishunraq>> nir.
32Jesúsnam nirqan: <<Noqapa mikïnïqa mana reqiyashqëki mikïmi>>.
33Tsënam discïpulunkuna kikinkunapura ninakuyarqan: <<¿Piraq mikïnin aparamushqa?>>
34Tsënö yarpäyashqanta käyirnam Jesús kënö nirqan: <<Noqapa mikïnïqa kachamaqnï nimashqanta cumplishqäyaq ruranqämi. 35Musyayankim nunakuna kënö niyanqanta: <Murushqantsikpita chusku killataran cosechantsik>. Tsënö niyaptinpis noqam niyaq: Rikäyë. Chakrakunachö mikïkuna ëlluyänëkipaq poqurishqa cuentam nunakuna këkäyan. 36Tsë cosëchachö uryaqkunam nunakuna wiñë kawëta tariyänanpaq uryayanqa. Tsënö uryayashqanpita Teyta Diosmi paganqa. Tsëmi murukuqpis y cosëcha ëlluqpis kushikuyanqa.#4.36 Murukuqkunapis y cosëcha ëlluqkunapis Diospa willakïninta willakuqkunam kayan. Murukuqkuna willakuptinqa manam creyiyanraqtsu. Cosëcha ëlluqkuna willakuyaptinnam creyiyan.
37<< <Juk murushqantaqa juknam cosechan> niyashqanqa rasun kaqmi këkan. 38Tsënöllam qamkunatapis kachayarquq juk murushqanta cosechayänëkipaq. Tsëmi wakinkuna jipar muruyashqanta qamkunana ëlluyämunki>>.
39<<Imanö kashqätapis Jesúsmi nïkamashqa>> nir tsë warmi willakuptinmi atska Samaria nunakuna Jesúsman creyikuyarqan. 40Tsëmi Jesús kaqman ëwëkur rowayarqan pëkunawan quedakunanpaq. Tsënö rowayaptinmi pëkunawan ishkë junaq quedakurqan. 41Tsëchö willapäkuptinmi mas atskaq nunakuna Jesúsman creyikuyarqan. 42Tsëmi tsë warmita kënö niyarqan: <<Manam qam niyämashqëkillapitatsu kananqa creyiyä, sinöqa kikïkuna wiyarmi musyayä llapan nunakunata salvananpaq Cristo rasunpa kashqanta>>.
Autoridäpa tsurinta Jesús kachakätsinqan
Mateo 8.5-13; Lucas 7.1-10
43Tsëchö ishkë junaq quedarirmi Galileaman Jesús kutikurqan. 44Jesús nishqannöllam Teyta Diospa profëtanta markanchöqa chaskiyantsu.#Mat. 13.57; Mar. 6.4; Luc. 4.24. 45Tsënö kaptinpis marka mayinkuna Pascua fiestapaq Jerusalénman ëwar milagrukunata rurashqanta rikashqa karmi#Juan 2.23-24. pëta chaskiriyarqan.
46Galileachö këkarnam Caná markaman Jesús yapë kutirqan. Tsëchömi yakuta vïnuman nöpata tikratsirqan.#Juan 2.1-11. Capernaúm markachönam reyta yanapaq juk autoridä karqan. Pëpa tsurinmi qeshyëkarqan. 47Judeapita Galileaman Jesús chashqanta musyarirnam tsë autoridä rowakuq ëwarqan. Chëkurnam rowarqan wayinman ëwëkur qeshyëkaq tsurinta kachakëkatsinanpaq. 48Jesúsnam nirqan: <<Milagru rurashqäta mana rikarqa qamkuna manam creyiyankitsu>>.
49Tsë autoridänam nirqan: <<Tëtë, tsurillä wanukïkunqam. Ras ëwëkulläshun>>.
50Jesúsnam nirqan: <<Kutikïna. Tsurikiqa kachakashqanam>>.
Jesús nishqanta creyirmi wayinman kutikurqan. 51Capernaúmman yëkurëkaptinnam sirwiqninkuna taripëkur niyarqan: <<¡Tëtë, tsurikiqa kachakashqanam!>>
52Tsënö niyaptinmi sirwiqninkunata tapurqan imë höra kachakar qallëkushqanta. Tsënam niyarqan: <<Qanyan tardi la ünam fiebrin pasarirqan>>.
53Tsënö willayaptinmi tsë nuna käyirirqan Jesús tsë höra <<tsuriki kachakashqanam>> nishqanta. Tsëmi wayinchö kaqkunawan Jesúsman markäkuyarqan.
54Judeapita Galileaman kutir tsë wamrata kachakätsishqanwanqa ishkë kutinam milagruta Jesús rurarqan.
Поточний вибір:
Juan 4: qwhB
Позначайте
Поділитись
Копіювати
Хочете, щоб ваші позначення зберігалися на всіх ваших пристроях? Зареєструйтеся або увійдіть
© 2018, Wycliffe Bible Translators, Inc. All rights reserved.
