Génesis 3
3
Adánwan Eva Teyta Diosta mana cäsuyanqan
1Teyta Dios llapan kamanqan animalkunapitapis culebraqa mas sabïdum karqan.#Apoc. 12.9; 20.2. Tsëmi warmi këkanqanman ëwëkur nirqan: <<¿Rasunpaku Dios niyäshurqunki montikunapa wayïninta mana mikuyänëkipaq?>>
2Tsënö tapuptinnam warmi nirqan: <<Llapan montipa wayïninta mikuyänäpaqmi niyämashqa. 3Tsënö kaptinpis huerta chöpinchö këkaq montipa wayïnintaqa mana mikuyänäpaq ni mana yatayänäpaqmi niyämashqa. Tsë montipa wayïninta mikurqa wanuyäshaqshi>>.
4Tsënam culebra nirqan: <<Manam wanuyankitsu. 5Tsë montipa wayïninta mikuyanqëki junaqqa Diosnömi musyariyanki ima alli kanqanta y ima mana alli kanqantapis. Tsëmi Diosqa munantsu mikuyänëkita>>.
6Tsënö niptinmi warmi tsë montipa wayïninta alläpa shumaqta rikëkur munapärirqan. Tsëmi yachaq y musyaq këta munar montipa wayïninta pallarir mikurirqan. Tsëpitanam qowanta makyariptin pëpis mikurirqan. 7Mikurirnam tsë höra mäkuriyarqan qalapächulla këkäyanqanta. Tsë höram hïgus montipa rapranta jirarkur penqëninkunata tsapakuyarqan.
8Inti jeqëkaptinnam Teyta Diosqa huertachö purikarqan. Tsëchö purikanqanta mäkurirmi ishkankuna ratakuyarqan montikuna rurinman. 9Tsëmi Teyta Dios qayarnin kënö nirqan: <<Adán, ¿mëchötaq këkanki?>>
10Tsënö qayëkuptinmi Adánqa yaskirqan: <<Huertachö purikanqëkita wiyëkurmi qalapächulla karnin penqakur ratakurqü, Teyta>>.
11Tsënam Teyta Dios tapurqan: <<¿Pitaq nishurqunki qalapächulla këkanqëkita? Itsa mikurqunki <ama mikunkitsu> ninqä montipa wayïninta>>.
12Niptinnam Adán nirqan: <<Yanaqïpaq qomanqëki warmi makyamaptinmi tsë montipa wayïninta mikukurkullarqü, Teyta>>.
13Tsënam Teyta Dios tapurqan warmita: <<¿Imatataq rurarqunki?>>
Tsënam warmi nirqan: <<Culebra ulipämaptinmi tsë montipa wayïninta mikukurkullarqü>>.#2Cor. 11.3; 1Tim. 2.14.
Jutsata rurayanqanpita Adán y Eva jipananpaq ninqan
14Tsënam culebrata Teyta Dios nirqan:
<<Tsënö ulipanqëkipitam llapan animalkunapitapis maldisishqa kanki.
Pachëkipam purinki.
Allpata mikurllam kawankipis.#3.14 Allpata mikurllam kawankipis nishqanqa alläpa penqakïpaq churashqam kanki ninanmi.
15Kananpitaqa warmiwan alläpam chikinakuyanki.
Tsënöllam warmipita miraqkuna y qampita mirënikikunapis chikinakuyanqa.#Apoc. 12.17.
Warmipita yuriqtam atakanchö kaninki.
Pënam peqapita jalushunki>>.
16Evatanam nirqan:
<<Tsënö rurashqëkipitam qeshyaqyärir feyupa nanatsikunki.
Y feyupa nanatsikïwanran qeshpikunki.
Qowëkitapis munënikimanmi churëta munanki.#3.16 O qowayuq këtam munanki.
Tsënö karpis pëpa mandädunchömi imëpis kanki>>.
17Adántanam nirqan:
<<Mana mikunëkipaq nikaptiqpis warmikita cäsukurmi tsë montipa wayïninta mikurqunki.
Tsënö mikunqëki rëkurmi chakrakunapis maldisishqa kayanqa.
Tsëmi waran waran pasëpa nakarninraq uryanki mikunëkipaq.
18Chakrachöpis tukïläya kashakunallam y mana alli montikunallam winayanqa.#Rom. 8.20; Heb. 6.8.
Tsënö kaptinpis montikunapa wayïnintam mikunki.
19Kawanqëkiyaqqa mikunëkipaqpis sudornikita ramarninran uryanki.
Allpapita kamashqam kanki.
Tsëmi wanurpis allpallaman kutinki>>.
20Tsëpitanam Adánqa warminpa shutin churarqan Evata.#3.20 Hebreo idiömachö Eva ninanqa kawë ninanmi. Tsë shutita churarqan pëllapita llapan nunakunapis mirayänanpaq kaptinmi. 21Adán y Eva yakakuyänanpaqnam animalkunapa qaratsanpita ratashninkuna Teyta Dios rurapurqan.
22Tsëpitanam Teyta Dios nirqan: <<Kananqa noqantsiknö karmi nuna alli kaqtapis y mana alli kaqtapis musyan. Tsënö këkarqa imëyaqpis kawatsikuq montipa wayïninta ama mikutsuntsu. Tsëta mikurqa imëyaqpis kawakunqam>>.#Apoc. 22.14.
23Tsëmi Edén huertapita Teyta Dios nunata qarqurirqan allpapita kamashqa kar chakrachö uryar kawananpaq. 24Nunata tsënö qarqurirmi inti yarqamunan läduman querubinkunata#Éxo. 25.18-22; 26.31; 1Rey. 6.23-29; Eze. 10.1-22; 41.18-19. Teyta Dios churarqan nina rawrëkaq espädawan huertata täpayänanpaq. Tsëmi querubinkunaqa täpëkäyarqan imëyaqpis kawatsikuq montiman pipis mana yëkunanpaq.
Поточний вибір:
Génesis 3: qwhB
Позначайте
Поділитись
Копіювати
Хочете, щоб ваші позначення зберігалися на всіх ваших пристроях? Зареєструйтеся або увійдіть
© 2018, Wycliffe Bible Translators, Inc. All rights reserved.