Matius 23
23
Jumaga-jaga di Gaagaya di Tongokotua di Tulun Joudi
(Mar. 12:38-39; Luk. 11:43, 46; 20:45-47)
1Om pitangarno dii i Yisus dagai di tongotulunJo om i tulun toguu siri, kaDisido, 2“Iri nopo tongotulun monunuduk do Undang-undang Ugama do Joudi om i kumpulan Porisi nga iolono iri sinumuvoli di kuasa di Musa do papaarati diri Undang-undang Ugama i tinulis di Musa pogulu. 3Sabap diri do apatuti vojoon muju iri nituduk diolo, nga ada kouno sumugut diri gaagaya diolo, do monuduk noopo iolo nga aui vojoon diolo iri nituduk diolo kondiri. 4Om potudukon diolo iri undang-undang apagon irad do poiongkoson diolo iri tongotavagat om iposimban diolo do tulun vokon, tapi iolo kondiri nga au tutumudu monulung do kumuut diri niposimban.
5Kasangkat di gaagaya diolo diri nga mokiontongo do tulun. Antangaipo nga piro linaab pinangalapatan diolo diri pinotulisan tinangaran do Kinoringan do onuon diolo do singal#23:5 singal: tulos ko datar om golongon, om palanggauon diolo i rombu di sabungjo#23:5 rombu di sabungjo: Rombu nopo diri sabung diolo nga pongintutunan do rumalan marong iolo maja di Kinoringan. do mokiontongo di tulun. 6Om aandaian marong iolo do mogom siri toogomon di naatur do ogomon di tulun diri ongogagaja pangkat siri saralom poginakanan om siri saralom sasambayangan. 7Om ongaandaian iolo do salamon do tulun siri pasar, om aandaian iolo loovon do rabi#23:7 Rabi nopo nga tangar Ibrani. Komoion nopo dii nga guru. sabap do mokirajou iolo.
8Nga ikovu nopo om ada pokirait do rabi, do isono Rabi muju om kasangkat dikovu nga moisusulod. 9Om ada kou panangamo do tulun siti vonuvo, do isono iri apatut Omoon muju i poingijon soi suruga. 10Om ada kou nogi pokirait do tuan, do iso Okuno Tuan muju, i roitan do i Koristus. 11Nga isaai nopo sino dikovu mokipangkat, irino sumiliu do susuuon muju. 12Om isaai nopo iri misinggagajo nga irino poinsuribakon, nga isaai nopo iri minsuribak i ginavo nga irino poinggojoon,” kadi Yisus.
Pakasala i Yisus do Tulun Puupura Kondiri
(Mar. 12:40; Luk. 11:39-42, 44, 47-52; 20:47)
13Om kadi Yisus kavagu, “Oi dikovu tulun monunuduk do Undang-undang Ugama do Joudi om ikovu nogi kumpulan do Porisi, atukpo dii kararaat ino nasip muju do puupura kou noopo! Ikovuno mangavud di tulun do siasu daa siri Kopomorintaan di Kinoringan, do okonko masu kou dikovu, nga mangavud kou noopo di tulun vokon.
14[Oi dikovu tulun monunuduk do Undang-undang Ugama do Joudi om ikovu nogi kumpulan do Porisi, atukpo dii kararaat ino nasip muju do puupura kou noopo! Monoro kou di tongotongondu napatajan do savo om monolod di valai diolo, om tomodon muju palanggau iri sambayang muju do mokiontong-ontongo do tulun vokon. Irino do okonko naalang-alang vinagat pongukuman do Kinoringan dikovu mantad di tulun vokon.]#23:14 Kivaro piipiro solinan di poguluupo do popioput diti ayat 14. Antangai Mar. 12:40.
15Oi dikovu tulun monunuduk do Undang-undang Ugama do Joudi om ikovu nogi kumpulan do Porisi, atukpo dii kararaat ino nasip muju do puupura kou noopo! Misondipau kou nopo do laut om mitongkop-tongkop kou do vonuvo paasu do ongoisoi tulun dino ugama muju. Om kaasu nopo dino iri om silion muju dii do induvo kararaat mantad dikovu, om makin nogi dii do apatut potunuvon siri tapui naraka.
16Oi dikovu irad do tulun nobolou do mangaak do tulun vokon, atukpo dii kararaat ino nasip muju! Kamuju, ‘Nong sumumpa i tulun do rumait di Valai Sasambayangan Tagajo om aui marong dino akagasan isido diri sumpajo. Nga nong sumumpa isido do rumait di amas silo Valai Sasambayangan Tagajo nga akagasanno isido di sumpajo,’ kamuju. 17Ikovuno tulun do obudu om bolou, ombono batoi agajo nong ilo amas ko ilopo Valai Sasambayangan Tagajo, do irino minongolidang do amas? Amas nopo om olidang sabap do i Valai Sasambayangan Tagajo. 18Om kamuju nogi do, ‘Nong sumumpa i tulun do rumait di panaraban do isogit om aui marong dino akagasan isido diri sumpajo. Nga nong sumumpa isido do rumait di isogit siri timpak panaraban nga akagasanno isido di sumpajo,’ kamuju. 19Ikovuno tulun bolou, ombono batoi agajo nong ilo isogit ko ilopo panaraban do irino minongolidang do isogit? 20Jadi nong irad dino, isaai nopo iri mangajanji do i panaraban do isogit do roiton sumpa, om kasangkat dino diri siri timpak nga kaavaja arait. 21Om isaai nopo iri mangajanji do i Valai Sasambayangan Tagajo roiton sumpa, om i Kinoringan nogi i poingijon siri nga kaavaja arait. 22Om isaai nopo iri mangajanji do i suruga do roiton sumpa, om arait nogi disido i toogomon di Kinoringan om i Kinoringan do mogom siri nogi nga kaavaja arait.
23Oi dikovu tulun monunuduk do Undang-undang Ugama do Joudi, om ikovu nogi kumpulan do Porisi, atukpo dii kararaat ino nasip muju do puupura kou noopo! Manaak kou noopo do sogumau, om bawing, om dulau onuon muju do saralom di opulu pataakon muju iri iso boogian si di Kinoringan. Nga pisingkuolingan muju iri nisuu di opigot, irino kotulidan do ginavo, kosianan, om rumalan maja do Kinoringan, do irino apatut marong do vojoon muju. Om ada tolibai muju saralom di opulu pataakon muju iri iso si di Kinoringan. 24Oi dikovu irad do tulun nobolou do mangaak kou do tulun vokon! Au kou kopusu mamaal do duso do topoyok irad do manaas kou di iso togonok iri nakaasu siri pinongiupan muju. Nga opusu kou nogi mamaal do duso agajo irad do unta tolonon muju.
25Oi dikovu tulun monunuduk do Undang-undang Ugama do Joudi, om ikovu nogi kumpulan do Porisi, atukpo dii kararaat ino nasip muju do puupura kou noopo! Mongolidang kou marong dino kojuvan muju, irad di mongolidang kou diri likud do pinggan om misoliput diri sangkir muju, nga ikovu nopo om kiginavo do monoro do tulun om mokimamaa kou marong. 26Oi kumpulan do Porisi, iri irad do tulun nobolou! Ugasai mujupo ino saralom do pinggan om sangkir muju, om olidang nogi ino soribaujo, om irad nogi dino ginavo om kojuvan muju.
27Oi dikovu monunuduk do Undang-undang Ugama do Joudi, om ikovu nogi kumpulan do Porisi, atukpo dii kararaat ino nasip muju do puupura kou noopo! Ikovu nopo nga irad do lobong sinaat di kapur, do aandai daa kaantangan mantad soribau, nga saralom nopo nga noponu do tulang di tulun napatai om kasasaim. 28Irad kou nogi dino, do nong antangan pamarasan#23:28 pamarasan: vuros muju mad diri abanar i ginavo muju, nga saralom ginavo muju nopo om noponu do taraat om puupura kou noopo.
29Oi dikovu monunuduk do Undang-undang Ugama do Joudi, om ikovu nogi kumpulan do Porisi, atukpo dii kararaat ino nasip muju do puupura kou noopo! Puupura kou do manaap di tongolobong di tongonabi, i popolombus di tinangaran do Kinoringan, iri pinatai di taki muju pogulu, om i lobong di tulun vokon iri abanar nga tandaian muju, 30om mitangar kou nogi do, ‘Nong sino tokouno daa ontok di kinapamatajan di taki tokou di tongonabi pogulu, au tokovi daa daton#23:30 daton: ditokou maja mamamatai diolo diri,’ kamuju. 31Na! Nong irad dino, ikovu kondiri mangakun do ikovuno koturunan di tulun minamamatai diri tongonabi pogulu. 32Ikovu nga sumugut diri gaagaya diolo taraat, nga tundanai mujuno iri karaato di taki muju.
33Oi ikovuno irad do vulanut, om irad do koturunan do vulanut do momudut kou! Kumukuro koupo dii mogidu mantad diri ukuman siri tapui naraka? 34Om sabap diri do kivaropo suuonKu di tongonabi om i tongotulun diri opintar om i tongoguru mongoi sino monuduk dikovu. Nga patajon muju i vokon, om posolibon muju i vokon, om pinlapasan muju i vokon siri sasambayangan muju, om poisuut-suutan muju i vokon pokoruol siri tongobandar. 35Om irino dii sabap do ipatanggung dikovu iri ukuman diri kinapamatajan kasangkat di tulun di abanar di pinatai siti vonuvo, timpuun diri kinapamatajan diAbil, i tulun di auso sala, om gosob do korikot i kinapamatajan di Jokoria, tanak di Borokia, i pinatai muju siri pialatan do Valai Sasambayangan Tagajo om i panaraban do isogit. 36Om patangaronKu marong dikovu iti, do ikovuno tongotulun do maino diti do mananggung kasaangkat diri kasalaan di tulun mantad pogulu,” kadi Yisus.
Nosianan i Yisus di Tulun Yorusalim
(Luk. 13:34-35)
37Om aandaman dii di Yisus i gaagaya di tongotulun si Bandar Yorusalim, om minitangar Isido do, “Osusa ginavoKu dikovu tongotulun do Yorusalim do minamatai kou di tongonabi, i popolombus di tinangaran do Kinoringan, om i minongodumpau do vatu di tongotulun i sinuu do Kinoringan mongoi siti dikovu. Nga soumur Oku daa do uvang do monguntun dikovu irad diri puunan do moninong di tongotanakjo do kungkuban daa nga au kovi moo. 38Nga sumiliu pogun iti ijonon muju do iduanKu ikovu. 39Do mitangar Oku dikovu do mantad maino au kouno dii koontong Dogo gosob do orikot i maso do mitangar kou do irad diti, ‘Kibarakatno Isido i sinuu do Tuhan do rumikot siti,’ kamuju,” kadi Yisus.#Antangai Buuk Sinding 118:26.
Поточний вибір:
Matius 23: LabukPKV
Позначайте
Поділитись
Копіювати
Хочете, щоб ваші позначення зберігалися на всіх ваших пристроях? Зареєструйтеся або увійдіть
© 1995, Wycliffe Bible Translators, Inc. All rights reserved.
