Matius 12
12
Pisivalan di Tulun pasal do Tadau Koingkajadan
(Mar. 2:23-28; Luk. 6:1-5)
1Kivaro insan tadau, irino Tadau do Koingkajadan, minampanau i Yisus om ikoi tongotulunJo nakavaja siri kodumaan. Nga vitilon nopo dii ikoi om pongkotu dii ikoi di parai do akanon. 2Nga kivaro nogi i kumpulan Porisi siri, om koontong nopo dii iolo dagai do mongkotu di parai, om kadii diolo di Yisus, “Oi Yisus, antangaipo ilo tongotulunNu mangalanggar diri Undang-undang Ugama tokou do au buli kumuri ontok do Tadau Koingkajadan,” kadi kumpulan Porisi.
3Nga jawapno dii i Yisus diolo do, “Nakabasa kouno bo gia diri Kitab pinotulisan nong potingkuro i Daud om i tongotulunjo ontok di vinitilon iolo. 4Do ontok nopo diri au nogi nakasala isido insan minasu isido siri natad do Valai do Kinoringan do mokianu di kuui iri nitaak do Kinoringan do inakanjo. Ombo iti do apatut nopo daa nong maja di Undang-undang Ugama tokou, iri tongoimam noopo do apatut mangakan diri, do au daa aakan do tulun sondiang irad di Daud om iri songkoruanganjo. 5Om nakabasa kouno bo gia diri Undang-undang Ugama tokou, do monikid Tadau Koingkajadan i tongoimam do lumanggar diri ponudukan pasal do Tadau Koingkajadan saralom Valai Sasambayangan Tagajo do kumuri iolo siri. Insan au mingkojod iolo kumuri tadau diri nga au nogi nakasala iolo. 6Nga mitangar Oku dikovu do kivaro Iso siti do kikuasa mantad diri Valai Sasambayangan Tagajo. 7Om kivaro nokotulis siri Kitab do, ‘KouvanganKu nopo om moisusuli osianan, om okoniko manaak noopo do dupot isogit Dogo,’ kadi Kinoringan. Nong kaarati kouno do komoion di Kinoringan si Kitab, aui apatut do papasala kou di tongotulunKu do auso sala.#Antangai Usia 6:6. 8Do Ioku nopo nga i Sinumiliu do Tulun, om Ioku nogi nga Tuhani di kikuasa do Tadau Koingkajadan,” kadi Yisus.
Minongolingos i Yisus di Tulun Nokimai i Longon Sampaping
(Mar. 3:1-6; Luk. 6:6-11)
9Om tilombusno dii kavagu i Yisus do minongoi muntun siri valai sasambayangan diolo. 10Om kivaro dii iso kusai siri do nokimai iri longonjo sampaping. Nga kivaro nogi i kumpulan do Porisi siri do mogium do koontodon do papasala daa di Yisus om daawaan diolo Isido sabap au maja di Tadau Koingkajadan. Om pongoduatno dii iolo di Yisus do ka, “Kalanggar naku do Undang-undang Ugama tokou nong mongolingos do tulun au kataru ontok do Tadau Koingkajadan?” ka.
11Nga kadi Yisus diolo, “Potingkukuro nong kivaro iso dikovu do iso kambing biri-biri do nokoturon siri torobong ontok do Tadau Koingkajadan? Apatut kama do ongoion disido potindal mantad siri. 12Adapo om i tulun do lobi kiguna mantad do kambing biri-biri. Jadi irino kangKu dikovu nong monulungko do tulun ontok do Tadau Koingkajadan, nga aui kalanggarko di Undang-undang Ugama,” kadi Yisus.
13Om kaDisido di tulun kimai longon sampaping do, “Porolojo siti Dogo ino longonnu,” ka. Om porolojono dii disido i longonjo om turus do nolingasan irad di longonjo sampaping. 14Nga labusno dii i kumpulan Porisi do moiupapakat nong potingkuro iolo mamatai di Yisus.
Susuuon di Nopili di Kinoringan
(Mar. 3:7-12; Luk. 6:17-19)
15Nokorongou nopo dii i Yisus do pokipatai Isido, om pogiduno dii Isido mantad siri. Om oguu dii i tongotulun do minaja Disido, om liningasan dii kasangkat iri tongotulun au kataru. 16Nga kadii di Yisus diolo do, “Adano marong sangkaabarai di tongotulun vokon nong isai Oku,” kaDisido. 17Iri nopo tangar di Yisus diolo dii nga porikot diri tinangaran di kinomoi di nabi Yasaya, i popolombus di tinangaran do Kinoringan pogulu. Minonulis i Yasaya di tinangaran do Kinoringan pasal di Yisus do irad diti,
18“ ‘Itino SusuuonKu do nopiliKu
om Isidono au kojuuan om kaandaianKu.
Om poindoouonKu i TatodKu si Disido
om poporongou nogi dino Isido diri tulun di okonko bansa Joudi
do obontol i kopongukumanKu diolo.
19Om aui kumisival om lumuvap Isido,
om aui rongoon do tulun i tinangarJo siri ralan.
20Om aui pukatonJo iri barau nolopu,
irino aui poiduon Disido diri tulun oluoi kaparsayaan.
Om aui pisokon Disido iri sumbu do misun-lisunpo,
irino aui olingan Disido i tulun okurang pangarapan.
Potingkaano gaagayaJo gosob do kamanang Isido
sabap diri kotulidan do ginavoJo.
21Om i tongotulun do okonko bansa do Joudi nogi nga mogondos Disido,’
kadi Kinoringan,” kadi nitulis di nabi Yasaya.#Antangai Yasaya 42:1-4.
I Yisus om i Kotua do Rogon
(Mar. 3:20-30; Luk. 11:14-23)
22Om mantad diri kivaro dii tulun paatod diri iso tulun do pinobolou om pinobobou do rogon siri di Yisus, om lingasaino dii di Yisus isido gosob do nokoontong om nakavantang isido mitangar kavagu. 23Nga osumboijan dii marong kasangkat i tongotulun om mitangar do, “Isidono naku koturunan di Raja Daud iri nijanji di Kinoringan?” kadiolo.
24Nga karangaai nopo dii di kumpulan Porisi om mitangar iolo do, “I Bosibul, i kotua do rogon, minanaak di Yisus do kuasa, om irino dii do kosunsub Isido di rogon,” kadiolo.#Antangai 9:32-34.
25Nga oilaani di Yisus iri ginavo diolo, om kadii Disido, “Aui kama kadapat gumirot iso kopomorintaan saralom iso vonuvo nong moititimbai om moimumusu i tongotulun siri. Om irad nogi dino iso bandar ko sampaganakan nong moioodu-odu nopo, aui alaid om moitotondijangno dii do auso poitotoluadan.#12:25 otoluadan: oinsasamadan 26Om irad nogi dino i Kopomorintaan di Soitan, ngaran di kotua do rogon, nong kokondiri di rogon do monunsub di rogon vokon nga ausoi koingkokoto diri Kopomorintaan di kotua do rogon. 27Nong oinomod do i Bosibul, ngaran koduvo di kotua do rogon, minanaak Dogo do kuasa monunsub do rogon, om isaipo dii minanaak do kuasa di tongotulun muju do monunsub di rogon? Mimang irino i Kinoringan. Nong irad dino i tongotulun muju kondiri do pakasala dikovu. 28Nga okoniko kuasa di Bosibul do nisunsubKu do rogon nga irino kuasa di Tatod do Kinoringan, om koilo kovi do tumimpuunno i Kinoringan do monguasa dikovu,” kadi Yisus.
29Om minaganu i Yisus do iso poiradan do agajo kuasa Disido mantad di kotua do rogon, do i kotua nopo do rogon nga irad diri tulun do ogirot, nga i Yisus nopo nga ogirotpo mantad disido, do kadi Yisus, “Auso kaasu siri valai di tulun togirot do manakau do tongoporompon siri valai disido, nong aupo nakagasan mogulu iri tulun togirot. Nakagasan nopo dii iri tulun togirot diri, nga kapanakauno dii isido do tongoporompon di togirot.
30Isaai nopo iri okonko poirunggum Dogo om irino lumavan Dogo. Om isaai nopo iri au monguup Dogo do mangangat di tulun mongoi si Dogo nga irino popirijang di tongotulun. 31Nga irad nopo dino patangaronKu marong dikovu iti do ompunani kasangkat do duso, om i tongotulun mangararaat do Kinoringan#12:31 mangararaat do Kinoringan: ko: mitangar do araat nga ompunani. Nga iri nopo tulun do mangararaat di Tatod Tolidang om au ompunan. 32Om isai-isai iri mitangar do lumavan Dogo, i Sinumiliu do Tulun, om bulipo ompunan. Nga isai-isai nopo i mangararaat di Tatod Tolidang, insan siti vonuvo ko soipo suruga nga au ompunan isido,” kadi Yisus.
Mongintutun di Ginavo mantad di Gaagaya
(Mat. 7:16-20; Luk. 6:43-45)
33Om kadi Yisus kavagu, “Nong aandai ilo puun, tuva nogi disido nga aandai; nong puun taraat, tuva disido nogi nga araat. Do irino tuva do puun pongintutunan muju do aandai ko araat. 34Oi tulun taraat, ikovuno irad do koturunan di vulanut do araat gaagaya muju. Au kou kadapat mitangar diri aandai, do ginavo muju nopo nga nokolobi karaat. Do onuu nopo iri si ginavo muju nga irino tangaron muju. 35Nong aandai nopo i tulun, nga aandaino iri mimbulai mantad si ginavojo. Nga araat nopo i tulun, nga araatno iri mimbulai mantad si ginavojo.
36Nga mitangar Oku dikovu do tikid-tikid nopo diri tinangaran muju diri auso guna-guna do pinatangar muju nga ikovuno kondiri mananggung diri ontok do Tadau Kopongukuman. 37Do mantadi di tinangaran muju do pakabanaron kou ko ukuman kou di Kinoringan,” kadi Yisus.
Yunus Kointutunan di Kuasa do Kinoringan
(Mat. 16:1-4; Mar. 8:11-12; Luk. 11:29-32)
38Om ontok nopo diri nga kivaro tulun monunuduk do Undang-undang Ugama do Joudi om kumpulan Porisi do minitangar di Yisus do, “Guru, poontongo ikoipo dino kuasaNu do pongintutunanja,” ka.
39Nga jawapno dii i Yisus diolo, “Ikovuno tulun do maino do araat om au rumalan maja di Kinoringan, do mokiintalang kou noopo daa do pongintutunan. Nga auso nunu pongintutunan ipoontongKu dikovu, nga irino pongintutunan irad di nabi Yunus, i popolombus di tinangaran do Kinoringan pogulu. 40Do i Yunus nopo om tolu tadau om tolu sodop saralom do tijan di sada agaajo, om Ioku nogi, i Sinumiliu do Tulun, nga inong do tolu tadau om tolu sodop saralom tana. 41Nga i tongotulun silo Bandar Niniwino nga mingkakat do papasala dikovu ontok do Tadau Kopongukuman, do iolo nopo om rinumorogo do mamaal do duso ontok di korongou iolo di pangabaran di Yunus. Nga maino Ioku kondiri agajo kuasa mantad di Yunus siti dikovu, nga au kovi mongkinongou di ponudukanKu. 42Om kivaro iso raja tongondu mantad soi salatan nogi do mingkakat do papasala dikovu ontok do Tadau Kopongukuman, do insan silopo isido disan tana nga rinumikoti siri di Raja Suliman do mongoi mongkinongou nong potingkuro kopintaran di Suliman mitangar. Nga maino Ioku kondiri nga agajo kuasa mantad di Suliman siti dikovu, nga au kovi mongkinongou di ponudukanKu,” kadi Yisus.
Kogulian Kavagu di Rogon
(Luk. 11:24-26)
43Om pitangar i Yisus kavagu diri tongotulun do iolo nopo nga araat, irad do iso tulun rinosukan do rogon do ka, “I rogon rinumasuk si tulun nga mogidu mantad siri tulun inijononjo, om miombo-ombo dii siri auso vaig do mogium daa do ingkojodonjo. Nga sabap do auso aayanganjo, 44om kadii disido mitangar do, ‘Gaam nogi do gumuli oku kavagu si inijononku laid,’ kadi rogon. Jadi gunggulino dii kavagu isido siri kinoijonojo laid. Korikot nopo dii isido siri om kaantangai dii do aandaino dii iri tulun irad do valai do auso nuunu si saralom, do nosopuvanno om natandaianno dii marong. 45Om labusno dii kavagu iri rogon do mongoi mangangat di turu rogon vokon do kumoruang disido mijon siri tulun, om makinpo dii kororongit diri rogon vagu mantad diri rogon laid. Om siri-sirino dii i tongorogon diri do mijon si kojuvan di tulun. Koompusan nopo dii diri tulun rinosukan nga makinpo dii kararaat mantad di togina. Iradno dino kojodian diri tongotulun do araat do maso maino,” kadi Yisus.
IinoJo om OiadiJo di Yisus
(Mar. 3:31-35; Luk. 8:19-21)
46Ontok diri mangar-tangar i Yisus di tulun toguu nga nokorikot dii iinoJo om oiadiJo kusai songingkakat siri navauon do mongoi daa mitangar Disido. 47Nga kadiri iso tulun, “Alono iinoNu om oiadiNu kusai diri songingkakat silo labus do uvang daa mitangar Dika,” ka.#12:47 Kivaro piipiro solinan di poguluupo di auso diti ayat 47.
48-49Om jawapno dii i Yisus di tulun minangaabar Disido, “PoiloonKu ika nong isai iinoKu om oiadiKu,” ka. Om tudukono dii di Yisus ikoi tongotulunJo, om kaDisido, “Itino pinokotidiKu, om pinakatadiKu! 50Do isai-isai nopo iri maja do kouvangan diAmoKu#12:50 diAmo: diApa silo suruga, irino sumiliu irad diinoKu om sulodKu kusai om tongondu,” kadi Yisus.
Поточний вибір:
Matius 12: LabukPKV
Позначайте
Поділитись
Копіювати
Хочете, щоб ваші позначення зберігалися на всіх ваших пристроях? Зареєструйтеся або увійдіть
© 1995, Wycliffe Bible Translators, Inc. All rights reserved.
