एहुन्‍ना 5

ईसु अड़तीस साल हसु तनायिय चिकन तेडा

1हेना वरी तयोम ते एहूदिकू राः मियाँटंग परब दोहो एना, हेनाते ईसु हो एरूसलेमिय सेनेना। 2अवुर एरुसलेम रे भेंड़ दुवर मेनते कू ञुमू केडा, हेना दुवर बँदे रे मियाँटंग तलवा इदाना, हेना इबरानी भासा ते बयेतसदा मेनते कू कहनी वआ। हेना तलवा राः चरियो गतर रे पाँच गोटंग झोपड़ी इदाना। 3नेन ते अखीर रोगियाकू, अंद्हाकू, लंगड़ाकू अवुर लवका ञेंडतड कुआ हेंकू [दाः हिलकोसुः राः असरा तेकू] उलटो कोः दोहो एनु। 4[कहेकि भगवान रेनकू सरगदूतकू दिन जन दिन तलवा रे अगड़ू कोःते दाः कू हिलकोस दोहो एनु। अवुर दाः हिलकोसुः सी जे मड़ंग तेय अगड़ुआ, हेंय चिकन जोम दोहो एनु। भले न हेंय राः कनर बेमारी दोहोनू।] 5हें-डे मियाँहोड़ होड़ दोहो एना, हेंय हसु केनते अड़तीस साल यन दोहो एनु। 6तहाँ ईसु हेंय होड़ टेपटेपो तना ञेंलके ते अवुर नआँ दसा रे अखीर दिन वरिय पड़ो केना मेनाआँ पपाड़ी केनते, हेंयिय होंबोर तेडा, “एगा, अम चिकन गिसन यडमिआँ किदो?” 7हेना वरी हेंय हसु तनाय होड़ ईसु थरेय कहनी तेडा, “ए साहेब, दाः कू हिलकोस तोलोग ईदींञ लगड कनय होड़ कोवा कुआ, इंञ अगड़ुः अगड़ुः दो एटाःकू अगड़ू मड़ंग जोमा।” 8हेना वरी ईसु हेंय थरेय कहनी तेडा, “रिमुःमी, अमाः परकोम रिमके तेम सेन बेड़ायू।” 9तहाँ हेंय तुरेत्तेय चिकन यनु, अवुर परकोम तय अलगो केतेय सेन बेड़ा तेडा।

10हेना चेका सब्द#5:10 एहूदिकू राः लुड़ूआ दिन राः दिन दोहो एना। हेनाते हेंय चिकन तनाय होड़ थरे एहूदिकू कहनी तेडा, “तेसींञ दो सब्द राः दिन हवे, तेसिञाँः दिन ची लगड डसना रिमके तेम सेनियाडा? नआँ अम अबू एहूदिकू राः नियम मी उजड़ यडा।” 11हेना वरी हेंय हेंकुय जबाब वडा, “जे ईंञिय चिकन तेडा, हें-नी इंञ थरेय कहनी तेडा, ‘अमाः डसनाम रीमू, अवुर सेन बेड़ाः मी’ मेनते।” 12हेना वरी हेंकू होंबोर तेडिया, “डसना रिमकेते सेन बेड़ा मी मेनते कहनी तेड हेनी काय होड़ हवे?” 13लेकिन जे होड़ चिकन तनायू, हेंय ईया चिकन तेडिया, हेना मेनेय पपाड़ी दोहो एनु। हेना रे भीड़ दोहो एना ते ईसु हेना जघा वरिय अड़ी यनु। 14चिकन एनय हेनी होड़ तयोम ते ईसु मँडिल रेय ञँमतेडिया। हेना वरी हेंय थरेय कहनी तेडा, “अँजोमेमू, अम चिकन यनामू, हेनाते फेर अलोम पापे, नहीं तदो पहील वरी हो अवुर कनारा बडेआ बिपेत मेज सकोआ।” 15हेना वरी हेंय होड़ एहूदिकू थरे सेनकेन ते, जे होड़ चिकन तेडिञाँ हेंय ईसु हवे मेनतेय लाय तेडा। 16ईसु न घियाआ काम सब्द राः दिन रेय करोवे दोहो एनु, हेनाते एहूदिकू ईसु कू सतो बोंहड़ी तेडिया। 17हेना वरी ईसु हेंकुय कहनी वडा, “अपुंञ कानम दरवर यडायू, अवुर इंञ होंञ काम यडा।” 18ने-ना राः चलते ते एहूदी नेताकू ईसु कू ञेंड गोज मेनते, केय गोटंग उपाय कू छपा तेडा, कहेकि ईसु सब्द दिन राः नियम दोय टोनोविजे दोहो एनु, लेकिन हेंय भगवान अपुंञ हवे, मेनतेय कहनी केते, अनानेज भगवान सुदाय बरोबारुः दोहो एनु।

ईसु अनेज राः अधिकार राः बारे तेय लाय तेडा

19हेना वरी ईसु हेंकू थरेय कहनी तेडा, “इंञ अपे थरे सही सही तेंञ कहनी यडा, होपोन तू अनानेज ते कनर एरोय करो सको एना, जेयसे अपत करोवे तोलोगिय ञेंलेया, हेन घयतेय करो वेआ। कहेकि जे-ना अपत करो वेआ, हे-ना होपोन तुहो हेन घयतेय करो वेआ। #5:19 ना रे होपोन ईसु मसीह हवे, अपत भगवान हवे। 20कहेकि अपत होपोन तुय दुलारिया, अवुर जे-ना अपत करो वेआ, हेना सींड़ होपोन तुय तिःवाआ। नआँ वरी हो हेंय अवुर बडे बडेआ कामिय तिःवाया, हेनाते अपे अहचराजुआ पे। 21कहेकि जे घयते अपत गोजकोःकुय रीमा अवुरिय जियो कुआ, हेन घयते होपोन तुहो जेयिय चाड वआ, हें-नी जीवानिय ओवाआ। 22अवुर अपत कनय राः मेनेय न्यायेआ, लेकिन न्यायेः राः सींड़ काम होपोन तू ती रेय जिमा केडा, 23कि जेयसे सींड़ होड़कू अपत कू मान मरजादा, हेन घयते होपोन तुहो कू मान मरजादियू। अवुर कनय हो कोड़ा होपोन तू मेनेय मान मरजादिया, हेंय कुकूलय हेनी अपा हो मेनेय मान मरजाद यडिया। 24इंञ अपे थरे सही सही तेंञ कहनी यडा, कनय ईञाः टेबोः अँजोम केते ईंञिय कुलकेडा, हेंय थरेय बिसवास यडा, अनन्त जीवन हें-नी राः हवे, अवुर हेंय सजा एरोय ञँमतेडा, हेंय मिरतू वरी खँडा केनते जीवानिय ञँमकेडा।”

25“इंञ अपे थरे सही सही तेंञ कहनी यडा, हेना समय मेजुः तना, गोजकेनकू भगवान होपोन राः आवाज कू अँजोमा, अवुर अँजोमेःकू जियोअकू, अवुर हेना समय निहों मेजियाना। 26कहेकि जीवन ए-माय दो अपा हवे, अवुर हेंय होपोन तुहो जीवन एम लगड अधिकारिय ओवाडिया।#5:26 अपा जेयसे अनानेज ते जीवत गिआयू, हेन घयते होपोन तुहो अपने अपन ते जीवत ते दोहोन लगड अपा हाँकिय ओवाडिया। 27अवुर हेंय मनवाँ होपोनिय बनो एना ते, अपत न्यायेः राः अधिकारिय ओवाडिया। 28नआँ टेबोः ते अलोपे अहचराजुऊ; कहेकि होपोन तू राः आवाज अँजोम केते मरघटी रे इदान कुआ, हेंकू उडूंग मेजुअकू, हेना समय मेजुः तना। 29अवुर जे जे बढ़ियाँ काम कू करो केडा, हेंकू अनन्त जीवन ञँम लगड कू जियो रिमुआ, अवुर जे जे गलती केडकू सजा ञँम लगड कू जियो रिमुआ।”

ईसु राः बारे ते गोवाही

30“इंञ ईनिंञ ते कनर मेनेंञ बनो सकोआ; जेयसे अपुंञ वरिंञ अँजोमेआँ, हेन घयतेंञ न्यायेआ; अवुर इंञ न्यायेः हेना सीरित गिआ, कहेकि इंञ ईनिञाँः मरजी मेने, लेकिन जे ईञिय कुलकेडा, हें-नी राः मरजी पूरा लगाडिंञ चहोः तना। 31अगर इंञ खुद ईनिञाँः गोवाहिंञ#5:31 एहूदिकू राः नियम रे कम सेकम बा होड़ राः गोवाही जरूरी दोहो एना, बेवास्था 17:6, 19:16 मत्ती 18:16 एम रेदो, ईञाः गोवाही सही कोवाआ। 32मियाँहोड़ अवुर इदानिया, हेंय ईञाः गोवाहिय एमियाडा, अवुर ईञाः गोवाहिय एमियाडा हेना, सीरित गिआ, नआँ इंञ पपाड़ी तनाञूँ। 33#एहुन्‍ना 1:19-27; 3:27-30अपे होंहोंबोर लगड एहुन्‍ना थरे होड़कू पे कुलतेडा, अवुर हेंय सत राः गोवाहिय एमतेडा।#5:33 सत राः बारे ते गोवाही एम राः मतलोब ईसु मसीह राः बारे ते गोवाही एम हेना। 34इंञ दो ईनिञाँः बारे ते होड़कू राः गोवाही मेनेंञ ञँम बेड़ा यडा; हेंडे रेहो अपे पाप वरी उबारुः लगड एहुन्‍ना राः नआँ टेबोईंञ कहनी यडा। 35एहुन्‍ना दो धरोआ बती घयतेय दोहो एना, अवुर हेंय राः टेबोः तरासेआ बती घयते दोहो एना। अवुर अपे हेंय कुछ दिन अँगम भगवान राः सातिय चेड अगतेड पेआ, अवुर अपे हेना तरस बेस वडपेआ। 36लेकिन जे काम भगवान अपुंञ पूराय लगाडिय जिमा वडिञाँ, हे-ना कामिंञ काम यडा, अवुर भगवान अपुंञ कुलकेडिञाँ मेनाआँ, ने-ना काम ईञाः गोवाही एमियाडा, नआँ गोवाही एहुन्‍ना राः गोवाही वरी हो बडे गिआ। 37#मत्ती 3:17; मरकुस 1:11; लूका 3:22अवुर अपुंञ कुलकेडिञाँ, हें-नी ईञाः गोवाही एमकेडा, अवुर अपे हेंय राः टेबोः कबोह बेगर पे अँजोमा, अवुर हेंय राः रूप हो बेगर पे ञें-ला। 38अवुर हेंय राः टेबोः अपे राः मन रे मेने पे जोगो यडा, कहेकि हेंय जेयिय कुलकेडा, हेंय थरे अपे मेने पे बिसवास यडा। 39अपे अनन्त जीवन ञँम राः बिचार ते धरमग्रंथ पे पड़हो वेआ, नआँ दो ईनिञाँः गोवाही ए-मा। 40हेंडे रेहो इंञ थरे जीवन ञँम लगड अपे मेने मेज गिसन पेआ। 41इंञ होड़कू वरी मान मरजाद मेनेंञ ञँम बेड़ा यडा। 42इंञ पपाड़ी तना, अपे सही मेते अपे भगवान मेने पे मया वया। 43इंञ अपुंञ राः अधिकार तेंञ मेजकेना, अवुर अपे मेने पे अपनो यडिञाँ, अगर कनय अनेज राः अधिकार तेय मेजुः रेदो हेंय पे अपनो विया। 44अपे दो होड़कू वरी मान मरजाद पे ञँम बेड़ाआ, लेकिन भगवान दो मिनियेंटंग गिआयू, हेंय हनवरी ञँमुः हेना मान मरजाद मेने पे चहोआ, फेर अपे काःतेपे बिसवासेआ? 45अपे अलोपे अड़ींग जहानू कि इंञ अपुंञ मड़ंग रेंञ दोस पेआ मेनते, अपे दोसाय दो मूसा हवे, जे थरे अपे भरोसाया। 46मूसा ईञाः बारे तेय लिखो केडा, अपे मूसा लिखो केडा टेबोः रेपे बिसवास तेड रेदो, ईञाः टेबोः रेहो पे बिसवास तेड मेनू। 47अपे हेंय लिखो केडा हेना टेबोः घली मेने पे बिसवास यडा, दो ईञाः टेबोः रे काःतेपे बिसवासेआ?”

Поточний вибір:

एहुन्‍ना 5: ksz

Позначайте

Поділитись

Копіювати