Neto'te 7
7
Noa tsho ntùm kanu
1Tshùaben tshob Noa ndù: Tsho ntùm sitima, wù mba njoṅ tunndà o fa. Nummbe me yen ndù o lo be mèn netsine mbwe àm num yen zwiaṅ njù li. 2Num njoṅ nyàm nelàn fa, lo' tsho bwe bàa bàa yoṅ sammbàa, mandum bo mènnzwi. Mbe se' mba tse kelàn nà, lo' yub bàa, mandum bo mènnzwi. 3Be ndaṅndaṅ lo' nsaṅ bàa bàa, mandum bo mènnzwi, ndù o ghù nzwit yub yôg num njoṅ nsitsha' fa. 4Nummb'a tù' lé'njù sammbàa me ghù mbaṅ lo num nsitsha' num lé'njù ṅam nkuà, mbwôgtshù bo tèttswe'. Me nsi biagte njoṅ tshu fa tse me na' nabte là num nsitsha'a.
5Noa ghù njoṅ i fa ndaṅndaṅ mba Tshùaben tshob yi là.
6Noa lo tswe ngu'njù nkù ntôg kà ntse dibambaṅ nse' num nsitsha'a.
Dibambaṅ
7Ndùlala #Mat. 24.38-39; Luk. 17.27Noa tsho ntùm sitima, yi, bon tse tse bandum, nzwi i boa zwi bon tse, ndù bo tum ntshu ntse mi dibambaṅ se' yi là. 8Nyàm tse nelàne, nyàm tse kelàn, nsaṅ boa njoṅ tshu fa tse bo be nsoṅ bam sob nsi là. 9Njoṅ yub fa se' mbaṅ Noa bàa bàa mum sitima, mandum bo mènnzwi ndaṅndaṅ mba Nsi na' ntshob Noa là. 10Lé'njù sammbàa be tshùa, ntse dibambaṅ be num njoṅ nsitsha' fa.
11A #2 Pét. 3.6lo be kum ngu'njù nkù ntôg ṅwù bàa lé'njù ntshob sammbàa gham mba Noa tswe ntùm njù là, num sen lé'njù là, njoṅ tumnsi ntse fa fag, ntse sa mum njù, ntôndà kamànyam tsho' nte nge.
12Mbaṅ lo num nsitsha' lé'njù ṅam nkuà, mbwôgtshù bo tèttswe'.
13Be num sen lé'njù là, Noa tsho ntùm sitima boa Sém, Kam, Yafét bon tse, ngù nzwi i boa zwi bon tse tat, 14mba njoṅ nyàm fa num yub tshaṅ i, njoṅ nyàm nke'nke' fa num yub tshaṅ i, njoṅ nyàm fa tse bo be nsoṅ bam sob nsi là num yub tshaṅ i, njoṅ nsaṅ fa num yub tshaṅ i, njoṅ ntôgzin fa mba njoṅ bon tshu nefùtte fa. 15Njoṅ tshu fa ts'a ghù zwiag nke njôg là nèn mbaṅ Noa ntùm sitima bàa bàa, 16tshu tse bo ke ntsho là ke mb'a mandum bo mènnzwi num njoṅ tshu fa tse bo ghù zwiag là; njoṅ i fa b'a mba Nsi na' ntshob là. Ndùlala Tshùaben fùn nze sitima njam njù num Noa.
17Dibambaṅ tswe num nsitsha' lé'njù ṅam nkuà, ntse dun, nko' nket sitima a ko' ntsin tà mfe num tsha'a. 18Ntse yàm, ndun njoṅ dù' fa num nsitsha'a, sitima nke nda mfe num ntse. 19Ntse yàm num nsitsha' nga' mbu, nko' tà nkabte tu njoṅ mbat ndùbndùb ts'a be tun kamànyam nà. 20Ntse lo nèn tù ntshùa mbat ma' sammbàa kam, nkabte njoṅ yub fa. 21Ndùlala njoṅ tshu fa tse bo be nzinte là mi: Nsaṅe, nyàm nke'nke'e, nyàm tshwèt, nyàm tse bo be nsoṅ bam sob nsi là boa njoṅ benntùn fa num nsitsha'a.
22Njoṅ tshu fa tse bo be njôge, nke nzwiag ntselag yub là, njoṅ i fa netèt tshu bo ke njôg num nsitsha' là kwù. 23Tshù mba Tshùaben biagte njoṅ bon tshu neyôg fa num nsitsha'a, neto' num mènntùn tà nèn nkum num nyàm, nyàm tse bo be nsoṅ bam sob nsi là. A biagte mba nsaṅ mi a mfe kamànyam nà. Tshùaben biagte yub num nsitsha'a. Nda' Noa boa njoṅ tshu fa ts'a ghù ntùm sitima là na' mbèn ntù'.
24Ntse dun num nsitsha' num lé'njù bon tàn nkù.
Поточний вибір:
Neto'te 7: BMa
Позначайте
Поділитись
Копіювати
Хочете, щоб ваші позначення зберігалися на всіх ваших пристроях? Зареєструйтеся або увійдіть
La Sainte Bible en Bamiléké-Medùmba © Alliance Biblique du Cameroun, 1993. All rights reserved.