Mata 6

Vin̰a ge mbaa nda ge hoɗegeya ma

Luk 11.2-4

1Zeso gwan jan go, ḛ koy ta ge ngay temel ge ḛ ḛ ge nda duwana ma ndwa go, ge dwaɗɗa ge go num dore ḛ. Kaɗɗa go to, ḛ mbo seɗ poɗɗa ge ḛ Ba ge no pḭḭ ma zì yà ta to.

2Sok ge mo ɗege mbaa ndu ge hoɗegeya a̰me go, kaa ge mo sun ne tuŋ ge mo ndwa zḛḛ dinna ge nda ge mbuɗi nda ndwa ma kee ge zok kee kaɗeya ge Yahuɗ ma way ma zì, ge vin̰a kin̰a ma go go to me. Àa kee ano mbe ndwa go maa see doreya ge nda duwana ma ta. Fareba mbi jan ḛ ne no: Àa seɗ maa tok kon̰a ma ya seɗ zoo. 3Ɗaŋɗe, sok ge mo ɗege mbaa ndu ge hoɗegeya a̰me go, ne kaa ge mo tok magul kuwa kaŋ ge mo tok matoson zige to. 4Go mbe no, mo mbaaya mbe wa kaɗ wayya zì. Mo Ba ge kuwa kaŋ ge mo kee ne wayya zì mbo poɗ mo.

Vin̰a ge kee kaɗeya

5Sok ge ḛ kaɗ kee kaɗeya go, ḛ ke ge mojo̰o̰ nda ge mbuɗi nda ndwa ma kee go to. Num laa wa̰a̰ kee kaɗeya mḛḛya digi ge zok kee kaɗeya ge Yahuɗ ma way ma zì, ge vin̰a ga̰a̰ ma go ndwa go nda duwana ma kuwa maa. Fareba mbi jan ḛ ne no: Àa seɗ maa tok kon̰a ma ya seɗ zoo. 6Kaɗɗa ge mo, sok ge mo ɗege kee kaɗeya, guwa̰ tene ge mo zok wa zì, wa̰a̰ zok wa ya ge mo pagal, kaɗe ge mo Ba ge ndu kuwa ne to ta, mo Ba ge kuwa kaŋ ge mo kee ne wayya zì mbo poɗ mo. 7Sok kee kaɗeya go, ne kaa ge mo zuli fare ge bàŋ kay ma se janna dinna ge nda ge kuwa Dok to ma go to. Àa dwaɗ go Dok za̰a̰ maa ge fare janna ge maa way ge gḛḛ ma ta. 8Ne kaa ge ḛ ke dinna ca ge num sḛ ma kee go to. Ago zḛḛ ge go ḛ kaɗe ne a̰me, ḛ Ba kuwa kaŋ ge ḛ ɓyare ne kuwa. 9Ḛ kuwa go ḛ mbiya kee kaɗeya pe gyana de:

«I Ba ge no pḭḭ ma zì yà!

N̰a mo dḭḭl ne kaa harcal.

10N̰a mo muluk ne mbo ya.

N̰a ndu ge diige ne ke laa ɓyareya ge amo

Ge suwa pagal dinna ge a kee no ge pḭḭ zì yà go.

11Ho̰ i kaŋ zam mà ge mbyaɗ dwam.

12Pore i n̰aal ma dinna ge i pore nda ge ke i n̰aal ma go waɗme.

13N̰a i deɗ ge pe heeya zì to.

Ɗaŋɗe, mo̰o̰ i ge Ba ge zwam tok go.

[Ago muluk, pool ge ɓaŋlaŋ, pateya me,

Àa amo ma ne ge zaman ma go peɗ. Amin!]»

14Mbi jan ḛ ano mbe ge dape, kaɗɗa ḛ pore ḛ ka̰a̰m n̰aal ge kee ḛ num ma ya, ḛ Ba ge no pḭḭ ma zì yà mbo pore ḛ waɗme. 15Ɗaŋɗe, kaɗɗa ḛ pore num ya to, ḛ Ba ge no ge pḭḭ ma zì yà mbo pore ḛ n̰aal ma to baɗ.

Vin̰a ge wan mam njuwal

16Sok ge ḛ wan mam njuwal, ḛ suwa̰me ḛ ndwa ma dinna ge nda ge mbuɗi nda ndwa ma go to. Àa suu maa ndwa ma se leɗeɗ, ndwa ngay nda go maa wa̰a̰ mam njuwal. Fareba mbi jan ḛ ne no: Àa seɗ maa tok kon̰a ma ya seɗ zoo. 17Sok ge mo ɗege wan mam njuwal, usi mo ndwa gezi, mo naŋe mo pagal nùm, 18ne kaa ge mo ngay nda go mo wa̰a̰ mam njuwal to, ɗeŋew mo Ba ge no sok wayya zì kuwa nee ne. Ne ge kuwa kaŋ ge mo kee ne sok wayya zì mbo poɗ mo.

Kaŋ gan ge fareba ma

Luk 11.34-36; 12.15-34; 1Ti 6.9-10

19Ne kaa ge ḛ kwate kaŋ gan ma ge ta pe ge suwa pagal to. Ago àa ge pool wan kaareya koo wagal zam num, àa vḛḛne gezi. Kaɗɗa go to puy, chala ma zuɗ zok, àa ɔwabe num. 20Ɗaŋɗe, ḛ kwate kaŋ gan ma ge pḭḭ zì yà. Ge sok mbe yà, àa kaare to, buli zam num koo chala ma zuɗ zok mbo chel num to me. 21Ago, sok ge mo kaŋ gan ma no ne go, mo dwaɗɗa ma mɔɗwag gaa sok mbe yà waɗme.

Kɔn̰al ge ndu duwana ne

22Ndwa a dinna ge lampe go ge ndu duwana pe. Kaɗɗa mo ndwa tuguɗi to, mo sḛ duul ge ɓul mɔɗwag a ge kɔn̰al go. 23Ɗaŋɗe, kaɗɗa mo ndwa tuguɗi, mo duul ge ɓul mɔɗwag a ge tṵṵ ge ɗeɗeg zì. Kaɗɗa kɔn̰al ge mo zige a tṵṵ ge ɗeɗeg ne, tṵṵ ge ɗeɗeg mbe ge mo zige kaɗ pisil mà ndwa gyana ga de?

Iigiya ma

Luk 16.13; 12.22-31

24Ndu a̰me ge kaɗ moor ge nda zi diŋ to, ago mbo seŋe ge ɗu na guwa̰, ne laa wan gegene. To puy, mbo mbarge tene ge ɗu, mbo kuri gegene me. Ḛ ge pool kee tèmel ge Dok mage bware pe go jwàg to. 25A ge pe mbi jan ḛ no go: «Ne kaa ge ḛ iigi ta ge kaŋ ge mbiya ḛ zamma mage njoɗɗa pe ɗoo, ḛ wa mbo kaɗ ge ndwa to, koo ge ba̰a̰ ge mbiya ḛ laa ḛ pe pe to me.» Kàɗɗa ge ndwa ge ndu duwana ne waɗe kaŋ zam to de? Sḛ duul ge ne ne waɗe ba̰a̰ to de? 26Ḛ ndi njoole ge ɗege no pḭḭ zì ma gale! Àa zare kaŋ rusu to, àa syaɗ a̰me to me, koo àa kwate a̰me ge hal ma se to, go no puy, ḛ Ba ge no pḭḭ zì yà ka wal num. Ndwa gyana ga ge ḛ waɗe num no de? 27A huɗi ne ge ḛ buwal zì sok iigi tene go ɗoo, wa seɗ vin̰a ge dol dwam ya koo ɗu ge dwam kàɗɗa ge Dok ho̰ na num ma pagal de? 28Ge dape, ḛ wa ka iigi ta ge fare ge ba̰a̰ ne pe de? Ḛ kuwa buu ge don no ge ful zì ma wa folla ma kale gale! Àa kee tèmel to me no, àa paare ba̰a̰ to me, 29go no puy ɗe, mbi jan ḛ go koo gan ga̰a̰l Salomo̰ sḛ ge na pagal, ge kaŋ kwaɗa ge na no ge num ma peɗ puy, be kan ba̰a̰ ge siŋli dinna ge a̰me ɗu ge num buwal zige go to. 30Kaɗɗa Dok nuusi buu ge don no ful zì ma siŋli mbe go ɗe, num ge nè kuwa num no màno ma, kin̰are àa goole num kan ol zì, go mbe no, ne sḛ ge pool hon ḛ ba̰a̰ ge siŋli waɗeya ma to de? Ḛ nda ge hoɗ fareba hoɗege guwa ma! 31Ne kaa ge ḛ sṵṵ ta, sok janna go: I mà mbo zam da de? Koo i mà mbo njoɗ da de? Koo ge i mà seɗ ma̰ kaŋ ge kan ge i ta de to? 32Ago, ḛ Ba ge no pḭḭ ma zì yà ge kuwaya go ḛ ɓyare kaŋ mbe ma ɓyare peɗ. Kaŋ mbe ma no peɗ, a nda ge kuwa Dok to ma iigi ta ge num pe ne. 33Ɗaŋɗe, kaŋ ge waɗe, ge ḛ mbiya kee ne, a yan muluk ge Dok ne pe mage ngay temel ge ne ne. Kaŋ gegene mbe ma no peɗ, Dok mbo hon ḛ num waɗme. 34Go mbe no, ne kaa ge ḛ iigi ta ge dwam ge kin̰are pe to, ge dape, dwam ge kin̰are ge na fare ma waɗme. Dwam ge diige mbiya tene ge na yal ma.

Поточний вибір:

Mata 6: kiaGRB

Позначайте

Поділитись

Копіювати