Mata 11

Nda ge Yohana ba ge kee nda baptem teme num ya ma

Luk 7.18-35

1Guwa̰ ge Zeso ho̰ na nda ge ame hateya ge wol pɔgwa zi ma yuwaleya go, ɗege ge sok mbe go, ndwa mbo hate nda mage oy fare ge suwal ga̰a̰l ma diŋ.

2Ajo̰o̰ Yohana wa ya daŋay zì puy ɗe, tèmel keeya ge Krist, ndu ge Dok taa ne fare ma deɗ ne tɔgwa zì yà. Sok mbe go, Yohana teme na nda ge ame hateya ma mbo ele ne go, 3ne daa ndu ge nda no ge kuwaya go, ne mbo ya mon Izrayel van ma ne ɗer ɓade? Koo ndu mbe gale mbo ya de? 4Zeso gwan ge num janna go: Ḛ guwa̰ mbo wan Yohana fare ge ḛ za̰a̰ mage kaŋ ge ḛ kuwa num no ma pe go: 5Ɓaal ma kuwa sok no, giɗi ma mbo vin̰a no, nda ge kṵṵ swàm ma haɗ-ɗa kɔn̰al mage num bol haɗ-ɗa somndol no, gisil ma za̰a̰ fare no, nda ge suu ma tan-na no, nda ge a̰se ma za̰a̰ Fare ge Kwaɗa no me. 6Laa saal a ge ndu ge mbi mbo kaɗ-ɗa kaŋ chal ko ge ne pe to.

Zeso faa fare ge Yohana ba ge kee nda baptem ne

7Guwa̰ ge nda ge ame hateya ge Yohana ne ma guwa̰ mboya go, Zeso ɗege faa ɓase ma fare ge Yohana ne, ele num go: Sok ge ḛ mbo ge babur pul yà, ḛ mbo ndil ndu ge tuguɗi a̰me ge dḭḭ ge kɔn̰a go, ge sa̰a̰m fii ne se, ka gwan ge ne ya digi bàŋ de? 8Kaɗɗa na mbe go to, ḛ mbo ndil sḛ ma̰ kaŋ tem de? Ndu a̰me ge ka̰a̰ ba̰a̰ ge siŋli ma de? Ḛ za̰a̰ gale! Nda ge kan ba̰a̰ ge siŋli ma kaɗ ge zok ge gan ga̰a̰l ma way ma diŋ. 9Go mbe no, ḛ mbo ndil ma̰ kaŋ sḛ tem de? Ndu ge zwagre Dok wa a̰me de? Ḛ ɓyare kuwa ndu ge zwagre Dok wa de? Mbi jan ḛ go, ndu ge ḛ kuwa ne waɗe ndu ge zwagre Dok wa waɗe. 10Ago, Dok jin̰a ge na maktub zì ge ne pe go: «Kuwa, mbi doo yà mbi ndu ge vin̰a ndwa go ne nuusi vin̰a ge mo pe, ge mo ndwa zḛḛ.»#Mal 3.1. 11Zeso gwan jan go, fareba mbi jan ḛ ne no, Yohana ba ge kee nda baptem ciciliŋ waɗe nda ge wuwa no ge laa zì ma kakaɗag. Go no puy ɗe, ndu ge fare a̰me pe to peɗ, ge mbo seɗ vin̰a ya waɗ muluk ge Dok ne zì, mbo kaɗ ciciliŋ waɗe ne. 12Ge dwam ge Yohana ba ge kee nda baptem ee pe oy fare ge muluk ge Dok ne pe ya day ɗiŋ màno, àa kee muluk ge Dok ne mbe ho̰o̰l, nda duwana ge kee fare pool ma ɓyare harge ne ge maa pool me. 13Ago, Eeya ge Moyiz ne mage nda ge zwagre Dok wa ma peɗ ka faa fare ge muluk mbe pe, zḛḛ ge go Yohana dee ya ee pe jan nda ne fare. 14Kaɗɗa ḛ vin mbi ya, maktub ge Dok ne ma ɓyare faa fare ge Yohana ne, sok ge àa ka janna go Eli mbo gwanna ne. 15Kaɗɗa ndu ge tɔgwa ge za̰a̰ fare mbe ma, ne za̰a̰ num kwaɗa.

Nda gḛḛ kuri fare ge muluk ge Dok ne kuri

16Guwa̰, Zeso jan go: Ge sego, mbi mà mbo jan ma̰ fare ge nda ge doŋ pe ge màge mbe no ma pe de? Àa dḭḭ ge mojo̰o̰ nda jabso a̰me ge kaɗ no kee vḛḛso dàa se ma go, a̰me ma ka oy maa ka̰a̰m gegene ma janna go: 17I sṵṵ gal go ḛ mà ndal kaŋ ne wa go de puy, ḛ ko be hee digi to. I mbaa baŋay no puy ɗe, ḛ be gwan kee kiimi to peɗ. 18Ago, sok ge Yohana mbo ya, be ka zam kaŋ zam koo njoɗ on̰or jin̰al ge nda gegene ma go to, ndwa kee laa ɓyareya ge Dok ne. Ge ano mbe no pe, nda ka janna no go, ne ge on̰om ge sone ge na zì. 19Mbi, Van ge Ndu ne, sok ge mbi mbo ya, mbi ka paa mbi tok dagre ge nda duwana ma, sok zam kaŋ mage njoɗ kaŋ go. Nda a̰me ma ka janna go, ḛ ndi ndu ge vagal mage fere jìn̰al mbe ɗoo me, gwan kee kondore ge nda ge chal siyal mage nda ge kee sone ma. Go no puy, andaŋ ge Dok ne haa temel ge kaŋ keeya ge ne ne ma ta go.

Dṵṵl ge Dok mbo ee ne ya ge ndage kuri be hoɗ fareba ma pagal

Luk 10.13-16

20Ge sok mbe go, Zeso ɗege mḛḛre nda ge no suwal ga̰a̰l ge na kê kaŋ ajab ge num diŋ gḛḛ ma ol kekeŋ, ge dape, num be vin seŋe ta ya se ge Dok ta to. 21Jan num go: Woo ge ḛ ḛ, ḛ nda ge suwal Korazḛ mage Betsayda ma! Daa no go mbi kê kaŋ ajab mbe ma ge nda ge laa pisil ge suwal Tir mage Sido̰ diŋ-ge ma buwal zì, ge mojo̰o̰ mbi kee num ya ge ḛ suwal ma diŋ no go ɗe, àa dee seŋe ta ja se ge maa sone keeya ma go, sok kan kacigri mage ɔwabe siyam kanna ge maa pagal digi. 22Ɗaŋɗe, fareba mbi jan ḛ ne no: Ge dwam kun sariya go, Dok mbo ee dṵṵl ge yan̰a ge ḛ pagal waɗe nda mbe ge suwal Tir mage Sido̰ ma way ma.

23Kaɗɗa ge ḛ ge suwal Kapernawom ma ɗe, ḛ dwaɗ go Dok mbo hee ḛ suwal pḭḭ digi ya caɗ ɗaŋ de? Ḛ kee hày ya go, mbo ɓyan ḛ ɗiŋ ge sok kàɗɗa ge nda ge swày ma way se yà. Ago, kaŋ ajab ge mbi kê num mbe ma daa kee ge nda ge suwal Sodom diŋ-ge ma buwal zì, suwal mbe wa daa ya mḛḛya be burmiya gezi. 24Ɗaŋɗe, fareba mbi jan ḛ ne no: Ge dwam kun sariya go, Dok mbo ee dṵṵl ge yan̰a ge ḛ pagal waɗe nda mbe ge suwal Sodom ma way ma.

Ɗwabeya ge fareba

Luk 10.21-22; 1Ko 1.26-29

25Guwa̰, Zeso hee na ka̰a̰l digi kee kaɗeya, jan go: Bagezok, Dok Ba ge kee muluk no pḭḭ zì yà mage suwa pagal, mbi kee mo mersi ge mo n̰a kaŋ mbe ma wayya ge nda ge andaŋ mage nda ge no ge kuwaya ɗugul ma ndwa zḛḛ, ge mo dyan num ja ge nda ge no ge mojo̰o̰ nda jabso go ma ta no pe. 26Baa, mbi kee mo mersi ge dape, a laa ɓyareya ge amo ne.

27Zeso gwan jan num go, mbi Ba hon mbi kaŋ ma ya mɔɗwag. Ndu ge kuwa Dok Van tyatyaɗ, a Dok Ba ɗu. Ndu ge kuwa Dok Ba tyatyaɗ me ɗe, a Dok Van sḛ ɗu me, ndu ge Van ɓyare tyan ne ndwa gezi ge na Ba ta me.

28Ḛ ge tane ya kakatag sok in kaŋ dṵṵl go ma peɗ, ḛ mbo ya mbi ta, mbi mbo hon ḛ ɗwabeya. 29Ḛ doo mbi zug ḛ ka̰a̰l go, ḛ ame mbi hateya ma, ago ḛ mbo seɗ go, mbi suul, mbi be ndu ge fare ne to, ḛ mbo seɗ ɗwabeya ge ḛ sḛ ma pe me. 30O̰o̰, mbi zug inna mbo kaɗ haŋle to, dṵṵl ge mbi mbo ee ne ya ḛ pagal, ne inna mbo kaɗ fogol haraw.

Поточний вибір:

Mata 11: kiaGRB

Позначайте

Поділитись

Копіювати