Lukas 24

Yesus hidup ulang

(Mat. 28:1-10; Mrk. 16:1-8; Yoh. 20:1-10)

1Hari Minggu waktu masi pagi-pagi skali, parampuang-parampuang itu pigi di kubur bawa minya wangi yang dong so biking. 2Pas so sampe di kubur goa, dorang dapa batu yang ada kase tutu kubur itu so taguling dari pintu goa pe muka. 3Dorang maso ka dalam kubur goa itu, kong dorang lia Tuhan Yesus pe mayat so tarada di situ. 4Sementara dorang bingung karna samua itu, kage-kage ada dua orang yang pake baju mangkilat badiri di dekat pa dorang. 5Parampuang-parampuang itu tako skali kong dorang berlutut sampe dong pe muka kanal di tana. Kong dua orang itu bilang pa dorang, “Orang yang so hidup, ngoni tara usa cari di tampa ini, karna di sini orang mati pe tampa. 6#Mat. 16:21, 17:22-23, 20:18-19; Mrk. 8:31, 9:31, 10:33-34; Luk. 9:22, 18:31-33 Dia tara ada di sini, Dia so hidup ulang! Coba ngoni inga apa yang Dia so perna bilang pa ngoni waktu Dia masi di Galilea. 7Dia bilang, ‘Orang mo serakan Anak Manusia pa orang-orang berdosa, kong dorang mo kase salib pa Dia. Tapi di hari yang ketiga Dia itu mo hidup ulang.’ ” 8Pe dengar bagitu, baru dorang dapa inga apa yang Yesus perna bilang pa dorang.

9Abis itu, dorang bale dari kubur kong kase carita samua itu pa seblas murit deng pa orang laeng yang ada sama-sama di situ. 10Parampuang-parampuang itu: Maria dari Magdala, Yohana, Maria Yakobus pe mama deng parampuang laeng. Dorang itu yang kase tau pa Tuhan Yesus pe utusan-utusan yang orang sebut rasul-rasul.

11Tapi waktu Yesus pe rasul-rasul dengar parampuang-parampuang pe carita itu, dorang tara percaya, dong kira kata, parampuang-parampuang itu cuma karang carita yang tara maso akal.

12Tapi Simon Petrus badiri kong pigi capat-capat di kubur. Waktu dia maruku kong hoba ka dalam kubur, dia cuma lia kaeng puti saja, bakas kase bungkus Yesus pe mayat saja. Kong dia pulang deng batanya di dia pe dalam hati, kira-kira apa yang so jadi.

Yesus kase tunju Dia pe diri pa dua orang yang ada bajalang pigi di Emaus

(Mrk. 16:12-13)

13 # Mrk. 16:12 Hari itu lagi, ada dua orang dari dorang yang jaga iko pa Yesus pigi di kampong satu yang dia pe nama Emaus. Kampong itu dia pe jao kira-kira seblas kilo dari kota Yerusalem. 14Sementara dorang dua bajalang, dorang bacarita samua yang so jadi pa Yesus. 15Kong waktu dorang sementara bacarita deng baku tukar pikiran, Yesus sandiri datang badekat pa dorang kong bajalang sama-sama deng dorang. 16Dorang lia pa Yesus tapi Tuhan Allah biking dorang tara kanal, Dia itu Yesus. 17Turus Yesus bilang pa dorang, “Sementara ngoni bajalang ini, ngoni ada bacarita apa?”

Kong dorang berenti deng muka sedi. 18Turus satu orang dari dorang, dia pe nama Kleopas, bilang pa Yesus, “Cuma Bapa saja yang datang di Yerusalem yang tara tau apa yang so jadi baru-baru ini?”

19Yesus tanya pa dorang, “Apa yang so jadi kong?”

Dorang jawab, “Ini tentang apa yang jadi pa Yesus dari Nazaret, Dia itu Nabi, yang jaga kase turus Tuhan Allah pe pasáng. Dia ponong deng kuasa waktu Dia mangajar deng waktu Dia biking mujizat. Tuhan Allah deng samua orang me bilang apa yang Dia biking itu butul samua. 20Tapi torang agama Yahudi pe imam-imam kapala deng pemimpin-pemimpin Yahudi so serakan Dia pa pemerinta Roma la dapa hukum mati, kong dorang salib pa Dia. 21Padahal dulu torang so baharap Dia yang mo kase bebas pa torang bangsa Israel dari pemerinta Roma yang jaja pa torang. Kong skarang so tiga hari Dia mati.

22Tapi babarapa parampuang dari torang pe kelompok so biking kage pa torang. Waktu masi pagi-pagi skali dorang so pi di kubur, 23tapi dorang lia Yesus pe mayat so tarada di situ. Turus dorang bale pa torang kong kase tau dorang lia malaekat di sana. Kong malaekat itu bilang pa dorang, Yesus so hidup ulang. 24Pe dengar bagitu, ada babarapa dari torang pe tamang pigi di kubur itu. Kong sampe di sana dorang lia samua sama deng yang parampuang ada bilang itu. Tapi dorang me tara lia pa Yesus.”

25Kong Yesus bilang pa dorang, “Wah, ngoni memang bodo skali. Pe lama ngoni masi bolong percaya samua yang nabi-nabi so tulis di Kitab Suci. 26Nabi-nabi so bilang Mesias, Raja yang Tuhan Allah janji mo kase slamat pa manusia, Dia itu musti dapa siksa dulu, baru Dia dapa puji deng hormat di sorga.” 27Abis bilang bagitu, turus Yesus kase jelas pa dorang apa yang tatulis tentang Dia di samua Kitab Suci, mulai dari kitab-kitab yang nabi Musa tulis sampe di kitab-kitab yang nabi-nabi laeng ada tulis.

28Waktu dorang so dekat di kampong Emaus yang dua orang itu mo pigi, Yesus biking sama deng Dia mo pigi bajalang turus. 29Tapi dong paksa skali pa Dia, dong bilang, “Tinggal dulu deng torang, barang skarang so sore, kong matahari so mo maso.” Turus Yesus maso untuk tinggal sama-sama deng dorang dua.

30Waktu Yesus dudu makang sama-sama deng dorang, Dia ambe roti kong bilang tarimakasi pa Tuhan Allah. Turus, Yesus pela-pela roti itu kong kase barbage pa dong dua. 31Kong waktu itu suda Tuhan Allah biking dorang sadar kong dorang tau itu Yesus. Tapi kage Yesus langsung ilang dari dorang pe tenga-tenga. 32Kong dorang baku bilang, “Pantas waktu Dia ada bacarita deng torang di jalang deng kase jelas Kitab Suci itu, torang pe hati smangat skali!”

33 # Mrk. 16:13 Abis itu langsung dong dua badiri kong bale ulang di Yerusalem. Di sana dong baku dapa deng seblas murit deng orang laeng yang jaga iko pa Yesus ada bakumpul di situ. 34Kong dong dengar kabar dari kelompok itu bagini, “Memang butul, Tuhan Yesus so hidup ulang, Dia so kase tunju Dia pe diri pa Simon Petrus.”

35Turus dorang dua kase carita apa yang so jadi pa dorang di tenga jalang tadi, deng bagimana dorang dapa kanal pa Tuhan Yesus waktu Dia kase pela-pela roti itu.

Yesus utus Dia pe murit-murit

(Mat. 28:16-20; Mrk. 16:14-18; Yoh. 20:19-23; Kis. 1:6-8)

36Sementara dorang bacarita tentang samua yang so jadi itu, kage-kage Yesus badiri pa dong pe tenga-tenga kong bilang pa dorang, “Dame dari Tuhan Allah ada pa ngoni!”

37Dorang kage deng tako, karna dorang kira dong lia spok.

38Tapi Yesus bilang pa dorang, “Bikiapa kong ngoni tako deng ngoni ragu di ngoni pe hati? 39Coba ngoni lia Kita pe tangan deng kaki, ini memang Kita. Coba ngoni lia deng raba pa Kita. Kita ada daging deng tulang, beda deng spok.”

40Sementara Yesus bilang bagitu, Dia kase tunju Dia pe tangan deng kaki pa dorang. 41Waktu itu, dorang sanang skali, tapi dorang bolong percaya deng masi herang. Karna itu, Yesus tanya pa dorang, “Ada makanang apa pa ngoni di sini?” 42Turus dorang kase pa Dia ikang bakar satu potong. 43Yesus ambe ikang itu kong makang di dorang pe muka-muka.

44Kong Dia bilang pa dorang, “Kita bilang ini pa ngoni waktu Kita masi sama-sama deng ngoni: samua yang tatulis tentang Kita di lima kitab Musa, nabi-nabi laeng pe kitab, deng kitab Mazmur, samua itu musti mo jadi.”

45Di situ Yesus biking dorang dapa mangarti Kitab Suci pe arti. 46Dia bilang pa dorang, “Di Kitab Suci tatulis, Kita, Mesias, Raja yang Tuhan Allah janji mo kase slamat pa manusia musti menderita, mati, kong di hari yang ketiga Kita mo hidup ulang. 47Deng nanti Kita pe umat mo bawa Kabar Bae pake Kita pe nama pa samua suku bangsa di dunia supaya dorang bertobat dari dorang pe dosa kong Tuhan Allah mo kase ampun pa dorang. Kong dorang mo kase tau Kabar Bae itu pa orang-orang, mulai dari kota Yerusalem. 48Kong ngoni yang so lia deng mata kapala sandiri apa yang so jadi pa Kita, ngoni musti kase carita pa orang-orang apa yang ngoni so lia itu. 49#Kis. 1:4 Turus Kita sandiri yang mo kase turung Roh Kudus pa ngoni, yang Kita pe Bapa so janji dari dulu. Tapi ngoni musti tinggal di kota ini dulu, sampe kuasa yang dari Tuhan Allah itu turung kuasai pa ngoni.”

Yesus taangka ka sorga

(Mrk. 16:19-20; Kis. 1:9-11)

50 # Kis. 1:9-11 Kong Yesus bawa Dia pe murit-murit kaluar kota. Waktu so dekat di kampong Betania, dorang berenti. Di situ, Yesus angka Dia pe tangan, turus berkati pa dorang. 51Waktu Yesus sementara kase berkat, Dia taangka ka sorga, kong mulai tapisa dari dorang. 52Kong di situ dorang berlutut semba pa Dia. Abis itu, dorang pulang di Yerusalem deng hati yang sanang skali. 53Dorang salalu ada di Ruma Ibada Pusat pe kompleks, deng dong salalu puji deng hormat pa Tuhan Allah.

Поточний вибір:

Lukas 24: PB MMU

Позначайте

Поділитись

Копіювати