Luuka 24

Kifyukha kwa Yeesu

(Mataayo 28:1-10; Maluko 16:1-8; Yohana 20:1-10)

1Ilisiku ilya Nguluvi pina kuhenga kunena, avashimaayi valutile ku lijooja. Avashimaayi awo, vasumwile amafuta nu mugoda guna vaali vapinyanjile ugwa kisusuuta umufimba, kiija vasivile guleshe kiwola. 2Pina vafishile, valyajile ilingʼanga lina vadindiile libilusiiwe palubali pa mulyango gwa lijooja. 3Baheene, vayinjila mukhati, vasikhagwajile umufimba gwa Mutwa uYeesu, vaswiga mandu! 4Pina viswiga, vatinushila avagoosi vavili vina vafwalile amenda amavalafu, gina gingʼaala mandu, vayiimile nkholeela na woope. 5Avashimaayi awo, vatiila. Vasungamya amatwe gaanave mbakha pansi. Baheene avagoosi vala vavajovela vaaja, “Kwashi mukimusakula yuna muumi mu luvala lwa vina vafwile? 6Akwasiina apa! Wáfyukha! Mukumbukhaje amaswi gina akhavajoveele pina akhandi ali ku Galilaya lumo noomwe, kiiva, 7‘Yisakulwa one Lusawo lwa Muunu niviikhwe mu mawokho ga vanansi, na kikhomeelelwa pa musalaaba, ilijuva ilya wutatu nifyushe’!”

8Baheene avashimaayi vala vakumbukha amaswi ga Yeesu. 9Baheene vaahuma mu lijooja. Vaaluta kivataviilila imola sila soona avamanyisiwa va Yeesu ishumi na yumo, lumo na vanji woona. 10Avashimaayi awo vakhandi, uMaliya uwa ku Magidala, uYowana, uMaliya umaayi wa Yaakobo lumo na vashimaayi avanji vina vakhandi lumo na woope. 11Avamanyisiwa pina vipulikha imola sila, vaawona sa wunamunamu, vasikhavahuviliile. 12Leelo uPetulo wáyiima nyangu, wáaluta luvilo ku lijooja. Pina wáfishile, wáhunjisa mu lijooja, wágaagaga menda geene duguli gina vakhamusiliile uYeesu. Wáwuukha pala, iswiga gina gasenjekha.

UYeesu itwiwukha kwa vavanda vavili

(Maluko 16:12-13)

13Ilisiku liilyo ilya Nguluvi, avavanda vavili va Yeesu vakhandi viiluta ku lujinji ulwa Emawu. Ulujinji ulo, lukhandi kutali, lujendo lwa masala gavili kihuma ku Yelusalemu. 14Mu nsila avavanda vala, vaava vilogola imola sina sikhandi sisenjeeshe. 15Pina vashaanali vilogola ago, uYeesu wáafikha, wáava ijenda lumo na woope, 16leelo vagahaagwa kigombola kimumanya kiija yu Yeesu.

17UYeesu wávaposa wáaja, “Mwilogola mola nshi kuno mwijenda?” Avaanu vala vayiima, kuno vasugumiilwe. 18Umunyaayumo mu veene, ilitaawa lyakwe yu Kilyopa, wámugomosesa wáaja, “Yuuwe duguli mu vaanu woona va ku Yelusalemu, yuna usimeenye gina gasenjekha mu luhaavi ulu?” 19Woope uYeesu wáaja, “Kuli mola nshi?” Vamugomosesa vaaja, “Injowo sina vamugahila uYeesu uwa ku Nasaleti. Umuunu yuna akhandi mukuwamalago, khanji akhandi ni ngufu nyinshi isa kisenga insengo na kilogola amaswi gaakwe na kimushendeefya uNguluvi na vaanu. 20Leelo, avatambule avakhome na valongosaaji veesu, vamuhumya kiija ahigwe kiifwa, vamukhomeelela pa musalaaba. 21Uyo yumwene yuna tikhandi timuhuviliile kiija, akhatukulusa ose ti Vaisilaheli. Lino, iminsiyaano lijuva lya wutatu kihuma ago goona gasenjeshe.

22“Khanji avashimaayi avanji mu shipuga sheesu vatutinusa, kiija iminsiyaano pina kuhenga kunena, vaava valutile ku lijooja, 23leelo vasagwaga umufimba. Vayinsa kitujovela kiija, vatwiwushilwa na vamalayikha vina vavajovela kiija, uYeesu muumi. 24Baheene avanji mu shipuga sheesu vaava viiluta ku lijooja, vagaaga ngaja shina vataviilila avashimaayi vala, leelo umwene vasamwaga.”

25Baheene uYeesu wávakhajila wáaja, “Omwe muli vayasu! Kwashi inumbula seenyu nyuumu kihuviilila ago goona gina gakhandi gajoviilwe na vakuwamalago! 26Aasi, uMukulusaaji#24:26 UMukulusaaji: Kwa Shiyunaani yiyandiikhwe Kilisito. Yimba iliswi Kilisito mu Maswi aMahensa. asikhandi isakulwa kishilila mu malava na kwa nsila iyo ayinjile mu wutupikho waakwe?” 27Baheene, uYeesu wávajovela imola soona isa mwene sina siyandiikhwe mu Mayandikhwa aManofu aga Musa na vakuwamalago woona.

28Pina vali nkholeela kifikha ku lujinji luna vakhandi viiluta, uYeesu wáava ngaja apishilinkhania. 29Leelo aveene vamulomba mandu vaaja, “Ukhale baaha lumo noose! Kiiva kutinala, inshiisi yili nkholeela.”

Baheene, uYeesu wáhuluta mu litembe, wáakhala na veene. 30Pina vakheele lumo kiilya ishakiilya, uYeesu wátoola umukhaate, wámuhonjesa uNguluvi, wágumenyulania, wáava ikivapeela. 31Uluhaavi luulo, vaagahwa kimanya kiija yu Yeesu. Umwene baaho wáyajilinkhana paveene. 32Baheene vaposania vaajova, “Lulwene pina wáava ilogola noose mu nsila ulwa gina gali mu Mayandikhwa aManofu, inumbula seesu saava sijilimukha kwa wushendeefu!”

33Uluhaavi luulo vawuukha viiwuya ku Yelusalemu. Ukho vavaaga avamanyisiwa va Yeesu ishumi na yumo vakungaanile lumo na vanji, 34viijova, “Shiyooli uMutwa weesu wáfyukha! Wámutwiwushila uSimoni.”

35Baheene woope vavataviilila goona gina gasenjekha mu nsila, na shina vaagahwa kimanya kiija yu Yeesu, pina imenyulania umukhaate na kivapeela.

UYeesu ikivatwiwushila avamanyisiwa vaakwe

(Mataayo 28:16-20; Maluko 16:14-18; Yohana 20:19-23; Nsengo sa Vanandeje 1:6-8)

36Avamanyisiwa va Yeesu pina vikiyitenekha kilogola ago, baaho uYeesu wátwiwukha wáyiima paakhati naakhati yaanave. Wávajovela wáaja, “Uwulindamafu wuve lumo noomwe!” 37Vatinukha na kitiila, kwa kiiva vakhandi vihiiva kiija valyaga linguluvi.

38Leelo uYeesu wávajovela wáaja, “Kwashi mwilava? Kwashi muna muninu mu numbula seenyu? 39Loleeli, munipyase amawokho gangu na magulu gangu, baheene mumanye kiija yuune, kwa kiiva ilinguluvi lingaya muvili na mafupa ngaja shina mukinyaaga one.”

40UYeesu pina wáamala kivajovela amaswi ago, wávawonensa amavamba ga mu mawokho na magulu gaakwe. 41Kwa kiiva avamanyisiwa vaakwe vashendeevaga na kiswiga mandu, vasikhagahuviliile gina vakhagaweene. Ndeeno uYeesu wávaposa wáaja, “Muna shakiilya shoshoona apa?” 42Baheene vamupeela ishipilije isha nswi imbanishe. 43Wáshiyanushila na kiilya baaho. 44Baheene wávajovela wáaja, “Pina nikhandi nishaanali lumo noomwe, nikhavajoveele kiija, injowo soona sina siyandiikhwe isa one mu ndaji sa Musa, mu mataafili ga vakuwamalago na mu litaafili lya Sabuli, mbakha sisenjeshe.”

45Baheene wávapeela uwumanyi uwa kigamanya aMayandikhwa aManofu. 46Wávajovela wáaja, “Yiyandiikhwe kiija, uMukulusaaji#24:46 UMukulusaaji: Kwa Shiyunaani yiyandiikhwe Kilisito. akhalafisiwa, akhafwa. Ilijuva lya wutatu, akhafyukha kihuma kwa vina vafwile. 47Khanji mu litaawa lyakwe, avaanu va nyi soona, kiyansisa ku Yelusalemu, vakhakhomwa kiija, valambiisile uwunansi waanave, baheene uNguluvi avasaajile. 48Aga gina gasenjekha omwe muli valunjikhaaji, muvabedelaje avanji.

49“Puliisi! Lino one nisimufilishe kunyeenyu uNumbula uMunofu, yuna uDaada uNguluvi akhavatahisiise kiija, akhavapeela. Lino, khalaji mu lijumbi ili ilya Yelusalemu, mbakha pina mukhapeelwa ingufu kihuma kushaanya.”

UYeesu itupulwa iiluta kushaanya

(Maluko 16:19-20; Nsengo sa Vanandeje 1:9-11)

50Baheene uYeesu wáahuma na woope mu lijumbi, iiluta mu lujinji lwa Betaniya. Vaganile kifikha pala, wányenyula amawokho gaakwe kushaanya, wávayimiilila. 51Wáganile kivayimiilila, wábaagukha padoodo, baheene wátupulwa kiluta kushaanya.

52Apo aveene vamufuunya, baheene vaatina ku Yelusalemu, kuno vashendeevile mandu. 53Woope vakhandi viikhala mu lukeeke lwa nanda imbaagule iya kifuunyila luhaavi loona, vikimusufya uNguluvi.

Поточний вибір:

Luuka 24: Shisangu

Позначайте

Поділитись

Копіювати