Luka 17

Ande ti ku Nda Ariki Nde Ikentitibi

(Matiyu 18:6-7; 18:21-22; Markus 9:42)

1Yesu ri te ande ti putsa wu baa, “Iken ti ku nda ande nde ikentitibi u ru ba kang, amaa kufaen Rimam u ta risu unde wu ti ku sa kumbwa ba. 2Unde ti kyaefa kinjo uwae anyisu tinying bane ti a nde ikentitibi, á baa, a na ye ricwo tiyang kya fa wu ukwae u sa wu jwunnsi uwae uyinn, ayine ú nyang siskeb! 3Ni tsi ti ujwin!

“Asiti inja-fu a nde fu ikentitibi, fwan wu kibyag; asiti awu a ya ikentitibi-wu ta, yata na wu. 4Asiti awu a nde fu ikentitibi ka atsepu itsongfaen uwae usir kinjo, ko kiye titini ti awu a nde fu ikentitibi u ru ba ri baa, ‘Ame raen pu m, ame u nde-m cwucwo be,’ yata na kang wu.”

Uwae Kinjo

5Ande ti atom na Itsekuru-ti Yesu jwam wu baa, “Nda uwae kinjo-ti ti ā ko fufa.” 6Yesu ri te ba baa, “Ko uwae kinjo-ni a yib pangma isinn utong musita, ani u nde tu ti ni ri te kutuku tiyang wune baa, ‘Mbub nwunn ti ipab imbyi-fu ti ru ka yen ijwe-fu tsi uwae uyinn,’ awu u nde pangma ti ani ri.

Ira ti Kab na Unde ti ku Nde Wande na Rimam

7“A baa, uriki uwae-ni na site umbae ti kununn ti ku tom na wu ritom ko ku shi na wu iwen, ama kiye ti umbae wu a ka ru uwog wande ba uwae kununn, unde ti kununn u ri rimang te wu? Ko awu u ri te umbae wu ti wu na ru ba fife ba ci wuci-wu a? 8Iyee. Awu u ri-wu baa, ‘Ru ka nde wuci, ti kyae ijwe-fu, ti su ba na m, ti m ci u ngwa titawe fu ru ka ci ana fu be a.’ 9Cwucwo, unde ti kununn ku nde na umbae ti kununn-wu fxaefa isim ti upyi-wu a nae risu riben te ira-wu a. 10Ayi ā si ahan ama uwog-ni, kiye ti ani a nde mam pu ni wande ti a nda ni, i nyang skeb ti ni ri baa, ‘Ati si anyisu kununn ti ukaen. Ati nde nyang iken ti a tso ti amam!’ ”

Yesu Nwangru Ande Rijwe ti Site Kicaeb Ikum

11Ti Yesu nwunn u kyang ku ru yi Urushelima, awu ru ba ru tsa ice ti kata uten Samariya ti Galili. 12Ti awu ku sisang imbae uten iki, awu tu ande rijwe ti site ti kicaeb ikum. Aba tsi ti fengo ti rwen 13u taen ira baa, “Yesu, Itsekuru-ti! Nung ti te ayibrisi!” 14Yesu nungye ba u ri te ba baa, “Ni ru ka uwog akwen Rimam, ti aba ā myae rimenn-ni.” Aba ande ti kicaeb ikum bane nwunn ku ru. Ti aba nwunn ku ru, kicaeb-ba yagta. 15Kinjo uwae-ba, kiye ti awu nung kicaeb-wu yagta pu yi, awu kafe ba ti isim u ku teb Rimam ti afxenjwin ti ribom. 16Awu ru ba jwunn ikyig uwe Yesu, ku tso wu fxaefa. Unde wu si urae Samariya, ti Mbayawuda ku saeruru.#17:16 Mbayawuda saeru ande ti Samariya baa, aba na si ande ti ajib. 17Yesu rang baa, “A si-ba ande rijwe ti tu itinwangru uwae kicaeb-ba be a? Amaa itsongnje ti tsitsi ta-ba aka? 18Imi ti nde itawe kum unde ti rikyen wune kinjo-wu ti kafe ba ku tso Rimam fxaefa-wu?” 19Tiri Yesu ri te wu baa, “Sunwunn ritsen ti fu ru-fu iken-fu. Uwae kinjo-fu nwangru pu wu afu.”

Kujwokwe Rimam

(Matiyu 24:23-28; 24:37-41)

20Ande ti kumbub Farisi iki rang Yesu ira baa, isinn ti kujwokwe Rimam na u ru ba bara? Awu ri te ba baa, “Kujwokwe Rimam u ru ba-yi ti fengo ti ande u nungye itiba-yi atang be. 21Unde iki u ri-wu baa, ‘Ni sae ike, awu ta ri’ ko, ‘Ni nung, awu ta uwe akwen ta ri’ be. Kujwokwe Rimam ta kutampwa-ni tine.”

22Isim ayine Yesu ri te ande ti putsa-wu baa, “Usir ku ba ti ani u ba sha ti ni u nung ayib Umbae Unde, ko uwae usir kinjo amam, amaa ayi u nde fob-yi be. 23Ariki u ri te ni baa, ‘Ni sae, awu ti ta uwe akwen,’ ko ‘Ni nung, awu ti ta ri.’ Amaa ni ruye ka-ni uwog iki ti ni ka sha wu atang be. 24Pangma ti imam ku jaen wur apwa apupwen, u ku nda apupwen meme tsi farang, ru iyenkyab ne ka kwer iyen ikyaeb akwen. Ti mbwe-yi ama usir ti Umbae Unde u kafe ru ba. 25Ama awu tawe u ngwa kang rikaen ko tag. Ande ti utense wune u sae ru wu. 26Iken ti nde kiye na Nuhu kute, si si ayi ti u nde kiye ti Umbae Unde u ru ba. 27Kiye Nuhu, ande som kunn ku ci u ku ngwa, arom te anda ku mbe atso sa sa sa ba sang ti usir ti Nuhu sang uwae kuyae-wu. Ama tiri, upwen tsa munn kyi uwog u wen tag ba meme. 28Cwucwo, ayi u nde pangma ti ayi nde kiye Lotu kute. Ande som kunn ku ci ku ngwa, ku jab kijab-ba u ku tom ritom-ba. 29Ama usir ti Lotu nwunn u ya uten ti Sodom ta, urwa ti atxom ti ku tutwen#17:29 atxom ti ku tutwen. Unju Mbahelene, a bae baa, teyon, ti si umung tibyaen ti a ku nde umung ikping te yi. sī apupwen ba twenji ba meme.

30“Kubenti, usir ti Umbae Unde u ru ba tso risu-wu, awu u kpugfa ba ahan ama. 31Usir wu, unde ti ta usen rukub ā si ba-wu riben ikyaen ti wu u pu isu-wu ti ta uwae kusog be. Unde ti ta uwae risaen ufang ama ā ru ba-wu kununn cwucwo be. 32Ni tangsom ti iken ti tu uwa Lotu! 33Unde titini ti a kwab baa, awu na u txin ijwe-wu txin, awu u yag byinn, amaa unde titini ti a sae ru ijwe-wu, awu u nwangru. 34Ame ku ri te ni, utitang usir ti Umbae Unde a ba pu wu, ande ifaen u nae te atso ijwe iken ti nae, a u ye ra kinjo nwunn u ya itifaen ta ti atang. 35Ande ifaen u ku pwa awum te atso ricwo, a u ye ra kinjo nwunn u ya itifaen ta.#17:35 Uriki uwae atsingken ti kucang site ira iki uwog ne baa, 36 Ande ifaen u ta uwae risaen ufang u ku tom ritom. A u ye ra kinjo ru u ya itifaen ta.” 37Aba rang wu baa, “I si aka ti iken yine u nde?” Yesu ri te ba baa, “Uwog ti rukom a nae atang si uwog ti indo ku ru ba funn atang.”

Поточний вибір:

Luka 17: kubNT

Позначайте

Поділитись

Копіювати