Luka 13

Ikentitibi

1Uwae kiye wu ariki uwae ande ti som atang tsag te Yesu ira risu ande ti Galili iki ti Bilatus wen ba kiye ti aba ku yerwen iken na Rimam. 2Yesu ri te ba baa, “Ande ti Galili bane ti Herodus wen, ani ku tang baa, ikentitibi-ba na skeb pu yi ana ande ti Galili ti tsitsi a. 3Iyee! Ame ku ri te ni, asiti ani a ya ikentitibi-ni ta-ni be, meme-ni u cwu pangma ti aba cwu. 4Aba ande rijwe asu itsongta ama ti kusog ti apupwen kyaen si u sher wen ba uwae uka Silowam ama re. Ani ku tang baa, iticwu-ba na tso baa, ikentitibi-ba na skeb tag ana ande meme ti tsitsi ti som uwae Urushelima kiye wu a. 5Iyee, ame ku ri te ni, se ani a ya ikentitibi-ni ta titawe be, meme-ni u cwu pangma ti aba cwu!”

Kutuku ti Waen-wu Awaen be

6Tiri Yesu sunn na ba ira baa, “Unde iki yen kutuku kututung uwae risaen-wu. Awu nwunn ti wu ru ka kwaen awaen-wu, ama awu ru ka shanum. 7Ikyaen yine awu tso rinae u ri te unde ti ku nungkyi risaen wu baa, ‘Nung, ayi ka pu yi asang ita ti ame ku kyang ike ikyaen ti m u kwaen awaen kutuku wune, ama ko kinjo ame tu-m be. Yer ra wu si yi riben! Awu tsi kyi uwog ti ukaen.’ 8Ama unde ti ku nungkyi risaen wu jwam wu baa, ‘Itsekuru, ya wu ta kyi ti m tom isa sang pakob wu kiyiku cwucwo, ti ame wen ajib si umbyi-wu. 9Asiti awu a waen awaen kiyuku, i si ti tinyang, amaa, awu a waen-wu be, afu u yer wu tika-fu tiri.’ ”

Yesu Nwangru Unda ti Kicaeb

10Usir ikyinn iki Yesu nwunn ku kwen na ande iken kusog Rimam uwog iki. 11Unda iki ta atang ama, rijwen titibi ku nde wu ira, awu furmbeb u ku ndabta tu-wu ijwe be ka asang rijwe asu itsongta. 12Ti Yesu nung wu, awu kunn wu ira baa, “Iya, tine kicaeb-fu ya ta pu yi.” 13Awu pu ajwo cwutsa unda wu, ama ti ritsen, ijwe unda wu ndabta, awu nwunn u teb rinyi Rimam.

14Amaa, unde ti uwe kusog Rimam atang tso rinae ikyaen ti Yesu nwangru unde ti kicaeb Usir ikyinn. Awu ri te ande ti funn atang baa, “Usir itsongnjo si usir ti ati ku nde wande atang. Ni ru ba ti ni sha itinwangru uwae usir yine, ni ba-ni Usir ikyinn be.” 15Yesu ri te wu baa, “Ani ande ti kufur! Ani ku saen ta mbawen-ni ti indag-ni u ku pu yi ru ka ngwa-ni ambyi Usir ikyinn be a? 16Asiti ani a ku nde itso iken yine, ama unda wune ti si umbae Ibrahim, ti nde ka asang rijwe asu itsongta ne, awu ko-wu ti a nwangru wu Usir ikyinn be a?” 17Ira yine nda ande ti tsi ukub te wu wae rukwae, ama ande ti tsitsi tsen utob risu meme wande yi ti ku fur ayib ti Yesu ku nde.

Yesu Sunn Ira Risu Isinn Utong ti Yisiti

(Matiyu 13:31-33; Markus 4:30-32)

18Yesu ri baa, “Kujwokwe Rimam pangma imi? Imi ti ame u sa Kujwokwe Rimam myae te wu? 19Awu pangma isinn utong musita ti unde iki sa u sa tso riben. Ayi ru u ser ben u kafe ituku tiyang ti inung ru ka kyae afug-yi atang.” 20Cwucwo, Yesu ri kyi baa, “Naa atong ti m u myae kyi ira risu Kujwokwe Rimam cwucwo. 21Awu si pangma yisiti ti fyin ahan ti unda iki sa yi tsinnfa ijwe umung awum tasa rijwe, ama ayi ndub munn kyi iken ti a tsinn yi atang.”

Ufu Kusog na Kujwokwe Rimam

(Matiyu 7:13-14; 7:21-23)

22Yesu nwunn u ru tsa uwae uten tiyang ti imbae uten u ku kwen na ande iken u putsa ku ru yi Urushelima. 23Uwog iki unde iki rang wu baa, “Itsekuru, ande ti u tu itinwangru u ko-ba ko be a.”

Yesu sunn ira te ba baa, 24“Ufu kusog wu yib timambe. Ni kwab kang ti ni sang atang, ikyaen ti, ame ku ri te ni, ande ko timambe u kwab ti a u ru kaa sang atang, amaa, aba u nde num. 25Cwucwo, kiye ti unde ti kununn a cwunnkyi pu wu ufu, ama ani tsi ise ku kwer kujwo ufu ku ri baa, ‘Itsekuru, mbubta na ti ufu,’ awu u ri te ni baa, ‘Ame nung-m ani usir iki be, ani ru aka ba?’ 26Tiri, ani u ri te wu baa, ‘Ati ci u ngwa te fu, afu ama kwen na ti iken uwae uten-ti!’ 27Ama awu u ri kyi cwucwo baa, ‘Ame nung-m uwog ti ani ru atang ba be. Ni nwunn ike, ani ande ti ku nde ikentitibi!’ 28Uwog atang ani u jwub ira u kub kujwo inyi#13:28 kub kujwo inyi. Unju Helene, a bae uwae atang baa, kub inger. ikyaen ti, ani u nung Ibrahim ti Ishaku ti Yakubu fa ti meme ande ti ya iskin ira Rimam som uwae Kujwokwe Rimam atang, amaa ani u som ti ise. 29Ande u ru uwog ti usir ti kiskinn ti usir ti ureb ba, ariki ama u ru isku ti isi ba. Meme-ba u funn uwog ukwab, u ci u ngwa uwae Kujwokwe Rimam. 30Tiri ande ti uwe u ba kafe ande ti isim; ande ti isim u ba kafe ande ti uwe ama.”

Yesu Jwub Ira Risu Urushelima

(Matiyu 23:37-39)

31Uwae kiye wu, ande iki ti kumbub Farisi ru ba tu wu u ri te wu baa, “I nyang skeb ti fu nwunn ike ti kyang ikyin-fu ru yi uwog iki, be, Herodus ku sha ti wu u wen fu.” 32Yesu ri te ba baa, “Ni ru ka ri te ujwong wune baa, ame ku jim acaeb ande yaka ne. Ucwe ame u ku jae rijwen titibi ruye ande. Se utsowen titawe ame u nde tag wande-m. 33Ame ku ri te ni baa, ame u nwunn kang ikyin-m yaka ti ucwe ru ka utsowen, iken iki u nde-yi ame ike be. A u wen tu-ba unde ti ku ya iskin ira Rimam uwog iki be, se uwae Urushelima.

34“Kukuuwu-fu Urushelima, Urushelima ti utob uwae-m! Ani ande ti jwunn wen ande ti ku ya iskin ira Rimam te ande ti atom-wu meme. Ko kiye titini ame ku sha ti m kunn byir ni uwog-m pangma ti mbakunn ku byir imbae-wu sang yi asae-wu, amaa ani cwe na-ni ame be. 35Ni sae! Rimam u ya uten-ni ta ti wu kafe uwog ti ukaen. Ame ku ri te ni, ani u nung-ni ayib-m cwucwo be, se kiye ti ani a ri baa, ‘Itinyang ā si ana awu ti ru ku ba uwae rinyi Itsekuru.’ ”

Поточний вибір:

Luka 13: kubNT

Позначайте

Поділитись

Копіювати