Luka 11

Yesu Kwen Iken Risu Iken ti Jwam

(Matiyu 6:9-13; 7:7-11)

1Usir iki Yesu ku jwam Rimam uwog iki. Isim ti awu jwam mam pu wu, kinjo uwae ande-wu ri te wu baa, “Itsekuru, kwen na ti fengo ti ati u jwam Rimam pangma ti Yohana kwen na ande-wu.” 2Yesu ri te ba baa, “Kiye ti ani a ku jwam Rimam, ni ri baa,

‘Itse-ti,

ande ā nda rinyi-fu rurob.

Kujwokwe-fu ā ru ba.

3Nda ti wuci ti usirsir.

4Yata na ti ikentitibi-ti, ikyaen ti,

ati ama ku yata na ande

ti ku raen ti ira.

Pu ti ka-fu uwog

ti ati u kyen kufxen atang be.’ ”

5Yesu ri te ba baa, “Aye uwae-ni ti site urwan-wu iki, ama u ru ka tu wu uka utitang, u ri te wu baa, ‘Urwan-m, ci na m ripab buredi ita, be 6rikyen sang m ureb ne. Awu si urwan-m iki ti ru fengo ti rwen ba. Ame shanum te iken ti m nde na wu.’ 7Asiti urwan-fu awu a cwe ira uwae kusog u ri te fu baa, ‘Nde-fu ame rikaen be. A cwunnkyi pu ba ufu kusog, ame te anyisu-m sang pu ti kicwag, ame u nwunn tu-m ti m ru ka sha na fu iken iki be.’ 8Ame ku ri te ni baa, asiti afu a tsikunn ti ku jwam wu, u wae-fu rukwae be, awu u nwunn kang u nda fu iken ti afu ku sha. Ayi si-yi ikyaen ti afu si urwan-wu be. Ayi si ikyaen ti afu tsikunn ti ku jwam wu, u wae-fu rukwae be.

9“Cwucwo ame ku ri te ni baa, asiti ani a jwam, a u sha na ni. Asiti ani a sha, ani u tu. Asiti ani a kwer kujwo ufu kusog, a u mbubta na ni. 10Ikyaen ti, unde titini ti a jwam, a u si na wu. Asiti awu a sha, awu u tu. Awu a kwer kujwo ufu kusog, a u mbubta na wu. 11Aye uwae-ni ti site umbae, asiti umbae-wu a jwam wu iwag, awu u nda wu ikentibi? 12Ko asiti umbae-wu a jwam wu kukyi mbakunn, awu u ye na wu kinang? 13Asiti ani ande ti ku tang ira ti titibi a ku pu na anyisu-ni iken ti tinyang, Itse-ti ti ta apupwen ama re? Awu u tom kang Kusung-wu si ba-wu risu ande ti jwam wu be a.”

Yesu ti Baal Zabul

(Matiyu 12:22-30; 12:43-45; Markus 3:20-27)

14Kiye iki Yesu ku jae ru rijwen titibi uwae unde ti tsi unju. Isim ti rijwen wu ruye pu wu, unde wu nwunn u ta ira ti ti ri. Ayib fur ande ti ta atang. 15Ama ariki uwae ande ba ri baa, “Beyel Zebul,#11:15 Baal Zabul si rinyi iki na Shetann. ukwe ajwen titibi, ti nda wu kuko titawe awu ku jae ruye ajwen titibi uwae ande.” 16Ariki ama ku sha ti a txae wu kutxae. A jwam wu baa, awu na nde iken iki ti u tso baa, kuko-wu na ru uwog Rimam ba. 17Ama Yesu nungye pu wu ira ti tang-ba u ri te ba baa, “Uten ti ande-wu a kata kumbub kumbub u ku ta rika te atso, uten wu u twenji uwae utense. Cwucwo ande ti a ku cwe-ba ira atso be, kununn-ba u mbub si si. 18Asiti ajwen titibi ti ta imbyi Shetann a kanta atso ama, kujwokwe-wu u tsi wu be. Ame ri ira yine ikyaen ti, ani ku ri baa, ame na ku jae ruye rijwen titibi uwae kuko na Beyel Zebul. 19Asiti ame a ku jae ruye rijwen titibi uwae kuko na Beyel Zebul, ande ti imbyi-ni ama ku jae ruye rijwen titibi uwae kuko aye? Aba ti risu-ba tatso baa, ani na raen pu ni. 20Asiti kuko na Rimam ku nda m jae ruye ajwen titibi, ayi ku tso baa, Kujwokwe Rimam na ru ba pu wu uwog-ni.

21“Kiye ti unde ti kpakang a pu usu rika-wu kyae ijwe u tsi kyi kununn-wu, usu-wu ti uwae kusog-wu u tsi nyinyang uwae kujimshwur. 22Amaa asiti unde ti bom skeb wu a ka ru ba ye wu si, awu ti ifaen wune u fxaembe usu rika-wu ti awu ti kucang ku tang baa, ayi na u ndeya wu. Awu unde ti bom skeb u pu usu-wu ru kaa kan na arwan-wu. 23Unde ti a si-wu ana-m be, awu si ana ande ti rika-m. Unde ti a ku byir ya-wu ame iken be, awu ku shag yi shag.”

24Yesu ri kyi cwucwo baa, “Kiye ti kusung titibi a ruye pu wu uwae unde, awu ku kyang ru fe yi uwae kutur khika u ku sha uwog ti awu u som atang u pu unyang. Asiti awu a ru ka shanum uwog, awu u ri te ijwe-wu baa, ‘Ame u kafe ru ti yi kusog-m ti ame yata.’ 25Kiye ti awu a kafe ba ye, awu u tu, a kyae nyang u fen saen tag pu ba kusog wu ti awu yata. 26Tiri awu u ru u ka kunn ajwen titibi itsongfaen ti beb skeb pu yi awu ru ba sang te wu kusog atang. Meme-ba u ru ba nae kusog wu. Ama kijaen unde wu u byag beb skeb kyi ti kucang cwucwo.”

Itinyang ti Kubenti

27Isim ti Yesu ri mam ira yine, unda iki ti ta uwae ande ti funn atang sa ra unju tso u ri te Yesu baa, “Titinyang ā si ana unda ti mbae fu, ti afu nyam abyaen-wu!” 28Yesu ri te wu baa, “Iyee, itinyang si ana ande ti ku fxen ira Rimam u nae risu riben te yi!”

Ande Sha Wande ti ku Fur Ayib Uwog Yesu

(Matiyu 12:38-42)

29Kiye wune ande funn ko ku fa ko ku fa, ama Yesu nwunn u ri baa, “Ande ti kiyiku ne si ande titibi. A ku sha ti a u nung wande ti ku fur ayib titawe aba u ru kubenti. Amaa, iken kinjo amam ti ani u tu. Ayi si ira na Jona. 30Pangma ti Jona si iken ti tatso kuko Rimam uwog ande ti Nineve, Umbae Unde u si iken ti u tso kuko Rimam ama uwog ande ti utense tine. 31Uwae usir rikwen, Ukwe ti unda ti uten Sheba#11:31 Sheba ta uten ti kujwo isi. Ariki ku ri baa, Sheba na ta uwog ti a ku kunn wu tine baa, Yemen. u nwunn u rimbeb ande ti kiyuku ne. Ikyaen ti, awu nwunn fengo ti rwen ba ikyaen ti wu na u ba fxen ira ti ben ayib ana Ukwe Solomon. Tine unde iki ta ike ti skeb pu wu Solomon ama ani ru-ni uwae kinjo be. 32Usir Rikwen ande ti Nineve u nwunn u rimbeb ni ikyaen ti, aba ya ikentitibi-ba ta isim ti Jona ri ira Rimam te ba. Tine unde iki ta ike ti skeb pu wu Jona, ama ani ru-ni uwae kinjo be.”

Ayib Si Fitila Rimenn Ijwe

(Matiyu 5:15; 6:22-23)

33Yesu ri te ba baa, “Unde u yen-wu urwa fitila u sa titam umbyi iken ti nae, ko u sa kitutong burkyi wu kyi be. Awu u sa wu tsitsa risu tebur ikyaen ti ande ā sae uwog farang kiye ti aba a sang ku ba. 34Ayib-ni si urwa fitila na rimenn-ni. Asiti ayib-ni a site kpakang, meme rimenn ijwe-ni u munnkyi te uwog ti saen kyag, amaa, asiti ayib-ni a nyang-yi be, meme rimenn-ni u si kufub. 35Ni ye su ijwe-ni nyinyang ikyaen ti uwog ti saen kyag ti ta rimenn-ni ā kafe-wu kufub be. 36Asiti meme ijwe-ni a saen kyag u site-wu kufub be, meme rimenn-ni u saen pangma itisaen kyag na fitila ti a yen tsi.”

Yesu Fwan Ande ti Uwe Ira

(Matiyu 23:1-36; Markus 12:38-40)

37Isim ti Yesu ri mam ira, unde iki ti ta kumbub Farisi yae wu ti wu na ru ba ci wuci te wu. Ikyaen ayine, awu nwunn ru yi kununn unde wu u ka som ti wu u ci wuci. 38Ayib fur unde wu kiye ti awu nung Yesu ku ci wuci, ikyaen ti, Yesu putsa-wu icwe na ajwo ti jwo itawe u ku ci wuci be. 39Ama ri te wu baa, “Ani ande ti kumbub Farisi ku jwo saen isim atu ti ikyig kiraen, amaa ani ti risu-ni, uwae-ni munn te kufum, ti ikentitibi. Ani ku jang ise jang uwae. 40Ani ande ti askwab! Rimam kyae isim atu. Ayi si-yi si awu Rimam ti kyae uwae atu ama be a? 41Ame ku fwa ni kusen baa, ni pu wuci-ni na ande ti rikaen. Ani a nde ayine, iken meme u saen kyag uwog-ni ise ti uwae meme.

42“Ayae-ni ande ti kumbub Farisi! Ani ku kwab ku sa kinjo uwae rijwe ana atsing utong-ni ti tsotso ba na Rimam,#11:42 Uwae unju Helene, a kunn rinyi atsing utong yine baa, minti ti ruwe. ku sae ru-ni kubenti ti ti nde, u ku tso-ni ure na Rimam be. Ani ye-ni ure te Rimam be. Ayi nyang skeb ti ani ú nde iken tiyang ayine u sae ru-ni iken ti tsitsi be.

43“Ayae-ni ande ti kumbub Farisi! Uwae asog Rimam-ni, ani ku tsab uwog ti som ti tinyang. Ani ku sha ti ande na kunnji ni ira u nda ni rurob uwae ritug. Ayib u byaen ni! 44Ani pangma askab ti a nji ande atang u takyi yi, ande ku kyang risu-yi u nung-ba be.”

45Kinjo uwae ande ba ti ku kwen na ande Icwe Rimam ri te Yesu baa, “Unde ti uwe, uwae ira yi ti afu ri ne, afu ku txun ti asu ama.”

46Yesu ri te wu baa, “Ani ande ti ku kwen na ande Icwe Rimam sa pu ni ayi ama! Ani ku ye usu ti rurob nae tsa ande ti a na su, amaa ani ti risu-ni, ko kukyikyin kujwo kinjo ani u ndab ta-ni ti ni ndeya ba be. 47Ayae-ni! Abitse-ni wen ande ti ku ya iskin ira Rimam, ani ru ba ku mbye iken ti tinyang pakob askab-ba. 48Ayine tatso baa, ani ti risu-ni cwe baa, iken ti abitse-ni na nde te ande ti ku ya iskin ira Rimam na nyang. Enheen! Abitse-ni wen ande ti ku ya iskin ira Rimam, ama tine ani ru ba ku kyaenyang na ba askab-ba. 49Ayine si iken ti nde nee Rimam ri ira uwae ben-ayib-wu baa, ‘Ame u tom na ba ande ti ku ya iskin ira-m ti ande ti atom-m, aba u ye ariki uwae-ba wen u nde ariki rikaen.’ 50Ikyaen iken yine, usir rikwen, a u waen kimbab byinn ande ti kiye wune ikyaen iticwu na ande ti ku ya iskin ira Rimam meme ti abitse-ba sa wen wen wen ti ti Rimam mam utense, 51sa kiye ti a wen Abila ru ba kiye ti a wen Zakariya, unde wu ti a wen wu uwae Kusog Rimam kutampwa kuta ti ukag ti sisaen. Kubenti ti ame ku ri te ni, ikyaen-ba, ande ti uwae kiye wune u ngwa rikaen timambe.

52“Ani ande ti ku kwen na ande Icwe Rimam, ayae-ni! Ani mbe ra pu ni imbae ufu kusog na ira ti nung, ani ti risu-ni sang-ni be. Cwucwo ani byang kyi ande ti ku kwab ti a sang.”

53Isim ti Yesu nwunn u ya riben atang ta, ande ti kumbub Farisi ti ande ti ku kwen na ande Icwe Rimam sub ye wu ti ira titibi ti ri, u ku rang wu ira munnae munnae. 54Aba ku kwab ti aba na u tu wu ti riraen.

Поточний вибір:

Luka 11: kubNT

Позначайте

Поділитись

Копіювати