Саалтыр 25
25
1Давид псалома.
Айыы Тойон, мин кырдьыкпын таһаар;
мин эҥкилэ суох көнө суолунан сылдьарым,
Айыы Тойоҥҥо, халбаҥнаабакка, эрэнэрим.
2Холоон көр миигин, Айыы Тойон, тургутан көр,
ис дууһабын, сүрэхпин чинчийэн көр.
3Мин өрүү Эн бигэ тапталгын көрөрүм,
Эн кырдьыккынан сирдэтэрим.
4Сымыйаччылары кытта сэргэстэһэ олорсубатаҕым,
кубулҕаттары кытта куодарыспатаҕым;
5куһаҕан санаалаахтар сугулааннарын абааһы көрөбүн,
нэгэйдэри кытта кэккэлэһэ олоруом суоҕа.
6Буруйа суохпун туоһулаан, мин илиибин суунабын
уонна, Айыы Тойон, Эн сиэртибэнньиккин эргийэ хаамабын;
7махтал ырыатын Эйиэхэ дьиэрэччи ыллыыбын,
Эн бары сөҕүмэр дьиктигин кэпсиибин.
8 Айыы Тойон, мин таптаатым Эн олорор Дьиэҕин,
Эн кэрэмэн килбиэниҥ сатыылаабыт сирин.
9Өлөрүмэ миигин аньыылаахтары кытары,
өһөрүмэ олохпун хаанымсахтары кытары;
10кинилэр хара дьайдаахтык быһыыланаллар,
уҥа ытыстарынан тобус-толору бэрик ылаллар.
11Оттон мин омнуота суох көнө суоллаахпын;
өрүһүй миигин, абыраа-аһын.
12Мин дэхси сиргэ үктэнэн турабын;
улуу түмсүүгэ мин Айыы Тойону алгыаҕым.
Поточний вибір:
Саалтыр 25: СБК
Позначайте
Поділитись
Копіювати
Хочете, щоб ваші позначення зберігалися на всіх ваших пристроях? Зареєструйтеся або увійдіть
© Институт перевода Библии, 2008-2022