路加 24
24
耶穌復活
(馬太 28:1-10；馬可 16:1-8；約翰 20:1-10)
1禮拜日打早，該兜婦人家帶等所準備个香料去墓地。 2姖等發現石頭已經對墓門徙開， 3就行入去，總係無看到主耶穌个遺體。 4姖等發咄愕个時，忽然有兩個衫發光个人企在姖等塍頭； 5姖等非常著驚，就伏在地上。該兩個人對姖等講：「你等做麼介在死人中尋生人哪？ 6佢無在這位，已經復活了！愛記得佢還在加利利个時節識對你等講： 7『人子一定會被人交在罪人个手中，釘死在十字架頂，第三日愛復活。』」
8姖等這時正想起耶穌个話， 9就對墳墓轉去，將所堵到个一切事情報給十一個使徒㧯其他个人知。 10對使徒報告這一切个婦人家係：抹大拉个馬利亞、約亞娜、雅各个阿姆馬利亞，㧯別个婦人家。 11該兜使徒恅到這兜婦人家亂講，就毋信姖等所講个話。 12總係彼得䟘起來，走到墓地去，探身看墳墓底背，看到只有賸麻紗。佢就倒轉去，非常希奇所發生个事。#24:12 有兜古卷無這節。
在以馬忤斯个路上
(馬可 16:12-13)
13共日，學生中有兩個人愛去一個村莊。這村莊名安到以馬忤斯，離耶路撒冷約十一公里。 14佢兩儕透路討論所發生个一切事情。 15緊講緊論个時，耶穌親身行近佢等，同佢等共下行； 16佢等面對佢，總係目珠矇矇毋識佢。 17耶穌問佢等講：「你等緊行緊講个係麼介事情？」
佢等就停下來，面帶憂愁。 18其中一個名安到革流巴个，問耶穌講：「這幾日在耶路撒冷發生个事情，敢講只有你一個做人客个毋知係麼？」
19耶穌講：「麼介事情？」
佢等應講：「係拿撒勒人耶穌个事啊！佢係一個先知，在上帝㧯眾人个面前，無論講話抑係做事攏總盡有能力； 20該兜祭司長㧯𠊎等个領袖卻解送佢去判死刑，釘佢在十字架頂。 21𠊎等原來希望佢就係該愛來拯救以色列个！毋單淨恁樣，這事情个發生已經經過三日。 22還有，𠊎等當中有幾個婦人家，使𠊎等盡著驚。姖等打早去墳墓該位， 23總係無看到佢个遺體。姖等倒轉來報告講，姖等看到天使出現，天使㧯姖等講，耶穌已經復活了。 24𠊎等中間有人去墳墓看，所看到个同該兜婦人家所講个共樣，只係無看到佢。」
25該時，耶穌對佢等講：「你等樣般恁鈍！先知所講个話，你等樣般恁難相信呢？ 26基督毋係定著愛經歷這一切苦難，然後正進入佢个榮耀嗎？」 27接下去，佢照摩西㧯眾先知所寫个開始，對佢等解釋聖經所記關係佢自家个一切事情。
28佢等行近所愛去个村莊，耶穌像還愛繼續向前行， 29佢等就強強留佢，講：「日頭已經落山，天會暗了，同𠊎等共下住哪！」耶穌就入去，同佢等共下住。 30佢等坐下來食夜个時，耶穌拿起餅仔，感謝上帝後，就擘開，交給佢等。 31佢等个目珠忽然金起來，正認到佢；總係耶穌一下就毋見掉去。 32佢等彼此講：「佢在路上㧯𠊎等講話，為𠊎等解釋聖經个時，𠊎等个心毋係像火恁樣𤏸起來嗎？」
33佢等黏時就出發，轉耶路撒冷去。在該位，佢等看到十一個使徒㧯另外一兜人聚集共下， 34堵好在該位講：「主斷真復活了；佢已經顯現給西門看了！」
35該兩儕也將路上所堵到个，並佢等樣般在主擘開餅仔个時認到佢个經過，㧯大家講。
耶穌對學生顯現
(馬太 28:16-20；馬可 16:14-18；約翰 20:19-23；使徒行傳 1:6-8)
36佢等講等這兜事，耶穌親身企在佢等中間，對佢等講：「願你等平安！」#24:36 有兜古卷無：「對佢等講：『願你等平安！』」
37佢等驚到愊愊掣，恅到係看到魂魄。 38耶穌對佢等講：「你等做麼介恁愁呢？樣般心肝疑狐呢？ 39看𠊎个手，𠊎个腳！確實係𠊎！摸𠊎看仔，你等就知；魂魄無肉也無骨，你等看，𠊎兩樣都有。」
40講了，佢就將手㧯腳給佢等看 #24:40 有兜古卷無這節。。 41佢等忒歡喜又想毋通，還係毋敢相信。佢問佢等講：「你等這位有麼介好食个麼？」 42佢等拿一垤焙好个魚給佢。 43佢就接過來，在佢等个面前食。
44然後，耶穌對佢等講：「這一切就係頭擺𠊎同你等共下个時㧯你等講个：摩西个法律、先知个書，㧯《詩篇》所寫个，關係𠊎个逐件事情一定愛實現。」
45耶穌就開佢等个心竅，使佢等了解聖經个話， 46又對佢等講：「照聖經所寫个，基督定著會受害，第三日對死復活， 47人也愛奉佢个名傳悔改㧯赦罪个道理，對耶路撒冷開始，直到萬國。 48你等就係這兜事个見證人。 49𠊎愛將吾爸所應許个，親自賜給你等；你等愛在城內等候，直到該對頂高來个能力臨到你等。」
耶穌受接升天
(馬可 16:19-20；使徒行傳 1:9-11)
50接等，耶穌帶佢等出城，去到伯大尼。在該位，佢擎手為佢等祝福。 51祝福个時節，佢就離開佢等，受接上天頂去 #24:51 有兜古卷無：「受接上天頂去」。。 52佢等就敬拜佢，滿心歡喜轉耶路撒冷去， 53常常在聖殿肚頌讚上帝。
Поточний вибір:
路加 24: THV12Hdb
Позначайте
Поділитись
Копіювати
Хочете, щоб ваші позначення зберігалися на всіх ваших пристроях? Зареєструйтеся або увійдіть
© The Bible Society in Taiwan, 2012
All rights reserved
© 台灣聖經公會版權所有 2012
