約翰 2
2
迦拿婚姻个筵席
1兩日後，在加利利个迦拿城，有人結婚。耶穌个阿姆在該位； 2耶穌㧯厥學生也被佢等請去參加婚姻个筵席。 3酒啉淨淨，耶穌个阿姆㧯佢講：「佢等無酒囉。」
4耶穌講：「阿姆 #2:4 「阿姆」原文係「婦人家」。，這㧯𠊎兩儕有麼介關係，𠊎个時節還吂到。」
5耶穌个阿姆就吩咐僕人講：「佢喊你等做麼介，就照佢个話去做。」
6在該位有六隻石醃缸，係猶太人行潔淨禮个時用个，每隻可以裝大約一百公升个水。 7耶穌㧯僕人講：「將這兜醃缸裝滿水。」佢等就倒水入去，直到淰起來。 8耶穌又講：「這下，舀兜出來，送給管筵席个。」佢等就送過去。 9管筵席个試啉該已經變做酒个水，毋知這酒係對㖠位來个 (只有舀水个僕人知)，就喊新郎來， 10㧯佢講：「別人全部係先上好酒，等人客啉到差毋多正上普通个酒；你反轉將最好个酒留到這下！」
11這係耶穌所行个第一個神蹟，係在加利利个迦拿城行个。這個事顯出佢个榮光；厥學生就信佢。
12這事以後，耶穌㧯厥姆、老弟，並學生下去迦百農，在該位住幾日。
耶穌潔淨聖殿
(馬太 21:12-13；馬可 11:15-17；路加 19:45-46)
13 猶太人个𨃟過節會到了，耶穌上耶路撒冷去。 14在聖殿底背，佢看到有人在該位賣牛、羊、月鴿仔，也有兌換銀錢个人坐在該位。 15佢就拿索仔做鞭仔，將牛羊逐到聖殿外背去，又到換錢个人該位，倒出佢等个銀錢，㩳橫佢等个桌仔。 16然後佢對賣月鴿仔个人講：「將這兜東西搬走，莫將吾爸个聖殿變做市場！」 17厥學生想起聖經有話講：「上帝啊，𠊎為你个聖殿大發熱心，就像火燒！」
18 猶太人个領袖就質問佢講：「你能顯麼介神蹟給𠊎等看，來證明你有權好做這兜事呢？」 19耶穌應講：「你等拆掉這聖殿，三日內，𠊎會將它重建起來。」
20佢等講：「這聖殿已經起了四十六年，你三日內就會重建起來係麼？」
21其實，耶穌所講个聖殿係指佢自家个身體。 22所以，耶穌對死復活以後，厥學生想起佢所講過个這句話，就信聖經㧯耶穌所講个。
耶穌對人心个了解
23耶穌在耶路撒冷過𨃟過節个時，盡多人看到佢所行个神蹟，就信佢。 24總係耶穌對佢等毋放心，因為佢對所有个人有盡深个認識。 25佢無需要麼人㧯佢講關係人个事，因為佢深深了解人个內心。
Поточний вибір:
約翰 2: THV12Hdb
Позначайте
Поділитись
Копіювати
Хочете, щоб ваші позначення зберігалися на всіх ваших пристроях? Зареєструйтеся або увійдіть
© The Bible Society in Taiwan, 2012
All rights reserved
© 台灣聖經公會版權所有 2012
