Mateo 10

Jesús kjueyá teyó ti sin tsꞌajiko

(Mr. 3:13-19; Lc. 6:12-16)

1Ndá chꞌin Jesús kꞌuéye̱he̱ ti teyó sin kꞌuájiko, la kjuajon kjuachaxin kixin jína tsakítsje sin ncha̱kuén jínahña la ko sinchekito̱he sin jína chojni chónta kaín ichin la ko kaín kjuatjoté.

2Tíhi ti teyó sin kꞌuájiko chꞌan mé xi̱kihi itꞌin sin: sa̱o la Simón, mé kjuínchekꞌin sin Pedro, la ko ti kícho chꞌan Andrés, Jacobo la ko ti kícho chꞌan Juan xje̱en chꞌin Zebedeo, 3Felipe la ko Bartolomé, Tomás, Mateo ti chꞌin nchekjènki̱, Jacobo xje̱en Alfeo, Tadeo, 4Simón, kuènté ti sin Cananista, la ko Judas Iscariote, ti nkexro kjuínchekji ti chꞌin Jesús.

Jesús kꞌue̱tue̱hen ti teyó sin kixin sátsjikjako

(Mr. 6:7-13; Lc. 9:1-6)

5Ndá chꞌin Jesús kꞌue̱tue̱hen ti teyó sin kixin sátsjikjako sin la ndáchro chꞌan:

―Tjihyara ti tjejó ti sin jehya judío la ko tꞌixe̱nhñara ti chjasin Samaria. 6Ícha jína sátjira ti tjejó ti sin Israel kixin jehe sin tjejó sin éxi kolélo tsíkjichròe. 7Kjónté nketí sátsjira la chenkara sin kixin ti kjuachaxin kuènté Díos itjen nkaya nka̱jní la ó kuichjina. 8Nchekito̱héra jína ti chojni níhi la ko ti chojni chónta chin lepra, Nchexechónra ti chojni tsíkꞌen la ko takítsjera ncha̱kuén jínahña. Jahara la kui̱to̱nhanra ti kjuachaxin kuènté Díos; méxra̱ tjanchahyara ninkehó kixin ti ixra̱ si̱chꞌera.

9’Tjiko̱ahyara ninkehó chichaon oro, plata la o̱ chichaon cobre, 10#1Co. 9:14; 1Ti. 5:18.*la ko ti sátsjira nti̱a la tákjáhyara ika bolsa la nkoko̱a ika chrókjuiko̱ara la chrókjuankahyara to̱ka̱te̱ la ko tjiko̱ahyara inta tsjíxinra kixin ti nkexro ichꞌe ixra̱ la chónta kjuachaxin kixin ntiha tsoxrajon ti nkehe tsicháxi̱hin sin.

11’Ndá ti ó tsjasánra ijnko chjasin ijié o̱ ijnko chjasin intsí la tjéyára ijnko nkexro jína, la ndo̱e sin ó tito̱hara hasta tsjixinjña ti ixra̱ ndá sátjira. 12Ti ó tsꞌixe̱hénra ndo̱e sin la nixjehéra sin nkojína la tjájonra ti kjuaxróxin 13Landá ti sin ndo̱e ntiha, la ti chaxín jína a̱sén sin, la tsꞌáyéhe̱ sin ti kjuaxróxin, a̱ndá ti náhí, la tsochóntahya sin ti kjuaxróxin. 14#Hch. 13:51.*A̱ndá ti tsochrohya sin tsjajon sin kjuachaxin tsíto̱hára la ko tjinkakonhña sin tsihin sin ti nkehe tso̱chro̱nkara la tꞌaxrjéxinra ti ndo̱e sin o̱ ti chjasén sin la tꞌoxènjinra ti inche chónta to̱tára. 15#Mt. 11:24; Gn. 19:24-28; Lc. 10:4-12.*Chaxín ndáxrja̱n kixin ti ó tsjixraká ti ña̱o tsjixixín, la ti sin Sodoma la ko Gomorra, kjónté imá kꞌuéchónta sin ijie̱, la kanhñó tsjasóte sin, a̱ndá ti sin chjasin a, la a̱ntsí tsjasóte sin kixin kuítekakonhña sin.

Tso̱nínkakohen chojni ti sin kuènté Cristo

16 # Lc. 10:3. *’Janhan tsochrꞌan ti jahara éxi kolélo chríkjan ti siín konda̱níxra. Listo chrókꞌuejora éxi konche la chrókójia̱hyara éxi kontóá. 17#Mr. 13:9-11; Lc. 12:11, 12; 21:12-15.*Chrókóxakohanra kixin tsotsé sin ti jahara la tsjiko sin ti jahara ti tjejó ti sin tꞌe̱to̱an la nkaxehen ni̱nkué sin tsjatíaxínra sin. 18La tsjikaán sin ti jahara ti tjejó ti sin tꞌe̱to̱an la ko ti siín ti sin rey kixin tinkachónkira ti janhan. Ndá ntiha tso̱chro̱nkara kixin tinkachónkira ti janhan nkayakon sin la ko nkayakon ti sin chónhña Díos. 19A̱ndá ti ó sátsjiko sin ti jahara ti tjejó ti sin tꞌe̱to̱an la chrókóxakuanhñara nkehe tsondáchrora o̱ nkexrín tsonixjara kixin ti ó tsjixraká ti hora la Díos tsjajon ti nkehe tsonixjara 20kixin jehya jahóra ti tsonixjara. Náhí. Ti ncha̱kuén Itꞌéni mé tsonixja̱xi̱n ti jahara.

21 # Mr. 13:12; Lc. 21:16. *’Ndá iso chojni mé tsjikaán sin ti kícho sin kixin itsꞌen, ti itꞌé ixjan la tsjikaán sin ti xje̱en sin, ti ixjan la tsokjan tso̱nínkakohen ti itꞌé la tsjikaán kixin itsꞌen. 22#Mt. 24:9; Mr. 13:13; Lc. 21:17; Mt. 24:13; Mr. 13:13.*Itsjé chojni tso̱nínkakohanra kixin tinkachónkira ti janhan. Kjánchó ti nkexro tsíto̱ehya tsinkáchónki ti janhan hasta tsjeje̱ chjasintajni la tsaá. 23Ti imá tso̱nínkakohanra chojni la tsochónkíhara sin ijnko chjasin, la sátjira íjnko chjasin. Chaxín ndáxrja̱n kixin ti Xje̱en Díos kꞌóna Chojni la ó tsokjan chꞌan ti na̱xa̱ tsjixinhña tsꞌaxrjéntára kaín ti chjasin kuènté Israel.

24 # Lc. 6:40; Jn. 13:16; 15:20. *’Ti nkexro xráko̱he̱ la kanhñó tjetoan ke ti maestro, la ko ti nkexro ichꞌe ixra̱ la kanhñó tjetoan ke ti lamo imá tjetoan. 25#Mt. 9:34; 12:24; Mr. 3:22; Lc. 11:15.*Méxra̱ ti nkexro xráko̱he̱ la chrókjua̱ko̱xi̱n éxi ti nkexro kjua̱ko̱he̱, la ko ti nkexro chꞌexón ixra̱ la chrókjua̱ko̱xi̱n éxi ti làmoé. Ti nchekꞌin sin ti ìnché nchia Beelzebú la ti sin kjéhya chꞌan, la kjá a̱ntsí xi̱kaha tsixro sin.

Nkexro ti chróchrako̱hénra

(Lc. 12:2-9)

26 # Mr. 4:22; Lc. 8:17. *’Méxra̱ chróchrakue̱nhñara ninkexró kixin kohya nkehe imó ichꞌe chojni chrókónoxínhña la ko kohya nkehe imó siín chrókónoxínhña chrꞌéxi̱n. 27Ti nkehe tso̱tjo̱nkara sítie la ticháxi̱n chro̱nkara ti ó tsꞌinkaséña. La ko ti nkehe tjo̱nka̱ra ijie ninkexró noehña la ticháxi̱n itsen tso̱chro̱nkara chritaón nchia kixin chrókuihin kaín chojni. 28Chróchrakue̱nhñara ti chojni tꞌóñá ti cuerpo ó a̱ndá ti a̱séni la xrokjuahya tsꞌóñá sin. Ícha jína chróchrako̱hénra ti nkexro tsjacha sinchekꞌitjáñaxín ti cuerpoéni la ko ti a̱séni ti siín xrohi nkochríxín tsꞌankahya.

29’¿Á tjetehya chrókóxi̱xi̱n yaá koxroxe ntsíntsí ní? A̱ndá kjónté xi̱kaha, la nijnko va tꞌenhña va ti tjajonhña Itꞌéni kjuachaxin. 30Kaín ti ka̱xi̱hi chónta ikjára la nohe Itꞌéni nkekja̱ín. 31Méxra̱ chróchrakonhñara kixin a̱ntsí tjete sínkíra, a̱ndá ti koxroxe, la kjónté nchónhña va, la kanhñó sínkí va.

Chrókósuèhyani chróchronkani kixin tinkáchónkini Cristo

(Lc. 12:8-9)

32’Kaín ti nkexro tsochronka kixin tinkáchónki ti janhan nkayakon chojni la janhan kja̱xin tso̱xrja̱nka kixin choxián ti jehe sin nkayakon Tꞌaná itjen nkaya nka̱jní. 33#2Ti. 2:12.*A̱ndá ti nkexro sinchemá tsondáchro kixin chónhña ti janhan nkayakon chojni, la kja̱xin janhan tsondáxrja̱n kixin chonhña ti jehe sin nkayakon Tꞌaná itjen nkaya nka̱jní.

Nkoko̱ahya tjenka̱yáxin chojni kixin ó ikui Ìnchéni Jesús

(Lc. 12:51-53; 14:26-27)

34’Á tjénka̱yáxinhñara kixin kꞌuinkakian kjuaxróxin ti chjasintajni. Náhí. Kꞌuinkakianhña kjuaxróxin, jehó kjuanínkaon. 35#Mi. 7:6.*Janhan kꞌuinka kixin ti ixjan la tso̱nínkakohen itꞌé, la ti cháchjin la tso̱nínkakohen ti ìñé, la ko ti tikìnta tso̱nínkakohen ichꞌe̱e. 36Mé xi̱kaha ti nkexro a̱ntsí tso̱nínkakohanra la ti sin na̱xa̱ kjéhyara.

37’Ti nkexro a̱ntsí tjue̱he itꞌé o̱ ìñé, la kanhñó tjue̱he ti janhan la xitjahya tsꞌóna sin chojni kuénta̱na la ko ti nkexro a̱ntsí tjue̱he ti xje̱en ndoa o̱ xje̱en ichjin la kanhñó tjue̱he sin ti janhan, la xitjahya tsꞌóna sin chojni kuénta̱na. 38#Mt. 16:24; Mr. 8:34; Lc. 9:23.*Ti nkexro tamáhña ti ntacruz, la chrèhya ti janhan la xrokjuahya tsꞌóna kuénta̱na. 39#Mt. 16:25; Mr. 8:35; Lc. 9:24; 17:33; Jn. 12:25.*Ti nkexro tjinkaon kixin kohya nkehe chrókóhen mé tsꞌitjáña, a̱ndá ti nkexro hasta chrókjuinchekꞌitjáña a̱sén kixin tinkáchónki ti janhan mé tsaá.

Ti nkehe tsꞌáyéhe̱ni

(Mr. 9:41)

40 # Lc. 10:16; Jn. 13:20; Mr. 9:37; Lc. 9:48. *’Ti nkexro tjajon kjuachaxin tsíto̱hára ndo̱e la kja̱xin tjajon kjuachaxin tsito̱na janhan la ko ti nkexro tjajon kjuachaxin tsito̱na ndo̱e la kja̱xin tsjajon sin kjuachaxin tsito̱he ti nkexro ichrꞌán ti janhan kꞌuinka. 41Ti nkexro tjajon kjuachaxin tsito̱he ndo̱e sin ijnko nkexro nixja itén Díos kixin tíha la Díos ichrꞌán, mé kja̱xin tsꞌáyéhe̱ sin ti nkehe jína éxi tsꞌáyéhe̱ ti nkexro a. La ko ti nkexro tsjajon kjuachaxin tsito̱he ijnko chojni jína ti ndo̱e kixin jína, mé xi̱kaha tsꞌáyéhe̱ sin ti nkehe jína éxi tsꞌáyéhe̱ ti nkexro jína. 42La ko ti nkexro sincheki̱to̱nhe̱n kjónté ijnko vaso ìnta̱ ikin, ti nkexro kanhñó tjetoan chréhe̱ ti janhan, la chaxín ndáxrja̱n kixin ti nkexro a la tsꞌáyéhe̱ ti nkehe jína.

Поточний вибір:

Mateo 10: poeNTplus

Позначайте

Поділитись

Копіювати