Популярні біблійні вірші з Matius 6

Поділитись

Nga podulio mujupo marong do i Kinoringan monguasa dikovu om vajano di kouvanganJo, om mantad diri onuu nopo i kosimpitan muju nga onuan Disido kosukupan.

Irino komoionKu do ada kou kosurau minsoromo di kovijaan do suvab, do suvab nopo nga kivaro kosuraan sondiang. Pabagalonpo tadau maino do osurau kou minsoromo dino kovijaan muju,” kadi Yisus.

Om kadi Yisus kavagu, “Sabap diri patangaronKu marong dikovu iti do ada kouno kosurau minsoromo do kosimpitan dino kovivijaan do kojuvan muju, irad do auso akanon, auso iupon, om auso pakaian. Do irino kovijaan do tatod kiguna mantad di taakanon om i kojuvanno kiguna mantad di pakaian.

Nga ika nopo sumambayang om suvangno siri biliknu pantok diri auso koontong, om tutubonno i pintu om sumambayang di Tama tokou iri au antangan, do koontongi i Tama tokou dika om manaak di pokionuonnu.

Nga aandai do sumambayang kou do irad diti, ‘Tamaja soi suruga, rojoonja Ika do olidang ino ngaranNu. Rikotno kosikap do momorinta dagai. Om mokianu ikoi supaya maja i tongotulun di kouvanganNu siti vonuvo inong soi suruga.

Onuai ikoino do taakanon i kabagal dagai do tadau maino.

Om ompunaino i salaja inong dagai do mangampun di kasalaan do tulun si dagai.

Om poiduo ikoi mantad siri ponsubaan do rogon, om intirungai ikoino supaya au kaasu si kuasa di kotua do rogon. [Ikano i monguasa, om i ogirot om i kivinaang gosob salaid-laid. Amin,]’ kanto nono sumambayang.

Do nong mangampun kou nopo di tulun kisala si dikovu, i Tama tokou silo suruga nogi nga mangampuni di kasalaan muju.

Do antangaino ilo tombolog songintulud silo savat do okoniko mongumo om okoniko kivaro poijanan do pountunan do paraipo nga iolo nogi paakanoni di Tama tokou silo suruga. Nga ikovu nopo om kitorogo marong mantad di tombolog.

Om kadi Yisus kavagu, “Adano ponguntun do arata muju siti vonuvo, do siti nopo vonuvo nga kivaropo lipos om togor do mongorobuk, om aanupo do tulun monguyas om manakau. Nga ponguntunno do arata muju do potoouon silo suruga, do silo nopo auso mongorobuk, om monguyas om manakau. Do inombo nopo pantok di arata muju om sirino i ginavo muju,” kadi Yisus.

Ausoi tulun do monontuan do duvo tuan, do nong duvo tuan, au kojuu isido diri kotiso nga iri koduvo au kaandaianjo; ko rumalan marong isido diri isuu di kotiso tuan, om tolikudanjo iri isuu di koduvo. Nong irad dino au kadapat kou do monontuan di Kinoringan nong monontuan kou do siin,” kadi Yisus.

Antangaino ilo sakot iri sumobul si dumo, do sumobul tadau maino, om lumonot irad suvab om sorobon pun piarawoni di Kinoringan. Nong irad dino makinpo do onuan kou Disido do pakaian. Nokuroi do au aparsaya kou marong?

Nga manaakko nopo do tulun, ada do koilo iri tulun sino somoknu. Ada do antanganko do tulun ontok do manaakko do tulun vokon om antangan kovi di Tama tokou, om sumuli Isido do manaak dika,” kadi Yisus.

Om monuduk i Yisus diolo kavagu, “Ondodomo mujuno nong popoimbulai kou nopo do gaagaya di aandai, ada kou mokiontongo do tulun, do au kovi kaanu diri isuli di Tama tokou silo suruga nong mokiontongo kou noopo.

Om kadi Yisus vagu, “Sombia do mogpuasa kou do sumambayang di di Kinoringan, ada do au tandaian ino pamarasan muju supaya auno otutunan di tulun do minogpuasa kou, do tulun nopo di puupura om iradno dii iolo mogpuasa gosob do sumondiang i pamarasan diolo. Nga patangaronKu marong dikovu iti do irino rarajou do tulun aanu do isuli diri gaagaya diolo. Nga mogpuasako nopo, lidangonno i pamarasannu om sudaionno ino tobuknu, supaya auno otutunan do mogpuasako. Irino i Tama tokou iri au antangan koilo nong potingkuroko ontok do auso koontong dika om manaak Isido di pokionuonnu,” kadi Yisus.