Популярні біблійні вірші з Mateo 6

Поділитись

Ñaxan sajcanla i yumʌntel Dios yic'ot i tojel. Che' jiñi ti wi'il mi caj la' wʌq'uentel pejtelel chuqui tac añ to yom la' cha'añ.

Mach mi la' mel la' pusic'al cha'añ jiñi mu' bʌ caj i yujtel ijc'ʌl, come ijc'ʌl añʌch i bajñel wocol mu' bʌ i ch'ʌm tilel. Jasʌlʌch jiñi wocol mu' bʌ i ñumel ti jujump'ejl q'uiñ.

Jiñi cha'añ mic su'beñetla mach mi la' mel la' pusic'al cha'añ la' cuxtʌlel wʌ' ti pañimil, mi cha'añ chuqui mi la' c'ux, mi cha'añ chuqui mi la' jap, mi cha'añ chuqui mi la' xoj cha'añ la' bʌc'tal. ¿Mach ba ñumeñic i c'ʌjñibal la' cuxtʌlel bajche' i bʌl la' ñʌc'? ¿Mach ba ñumeñic i c'ʌjñibal la' bʌc'tal bajche' la' pislel?

Pero jatet, che' ma' cha'len oración, ochen ti' mal a wotot, mʌcʌ i ti' a wotot, pejcan a Tat am bʌ ti mucul. Jiñi a Tat woli bʌ i q'uel pejtelel mucul tac bʌ mi caj i yʌq'ueñet a chobejtʌbal [ti jamʌl.]

Cha'lenla oración che' bajche' iliyi: C Tat lojon añet bʌ ti panchan, la' ch'ujutesʌntic a c'aba'. La' tilic a yumʌntel. La' mejlic chuqui awom ti pañimil che' bajche' ti panchan.

Aq'ueñon lojon c waj cha'añ ili q'uiñ.

Ñusʌbeñon lojon c mul che' bajche' mic ñusʌbeñob i mul c pi'ʌlob lojon.

Mach ma' wʌc'on lojon ba' mic pʌjyel lojon ti mulil. Cʌntañon lojon ame yajlicon lojon ti jontolil. [Come a cha'añʌch a yumʌntel yic'ot a p'ʌtʌlel yic'ot a ñuclel, ti pejtelel ora. Amén.]

Come mi woli la' ñusʌben i mul la' pi'ʌlob, la' Tat ti panchan mi' ñusʌbeñetla la' mul.

Q'uelela jiñi te'lemut, ma'añic mi' cha'len pac' mi c'ajbal, ma'añic mi' tempan i buc'bal ti yotlel. La' Tat am bʌ ti panchan mi' yʌq'ueñ i buc'bal te'lemut. ¿Mach ba ñumeñic la' c'ʌjñibal bajche' te'lemut?

Mach mi la' tempan la' chu'bʌañ ti pañimil ba' mi' jisan i chʌñil, ba' mi' cajel ti ta', ba' mi' yochelob xujch' i xujch'iñob loq'uel, tempan la' chu'bʌañ ti panchan ba' ma'añic mi yochel i chʌñil, ba' ma'añic mi' cajel ti ta', ba' ma'añic mi yochelob xujch' i xujch'iñob loq'uel. Baqui jach tempʌbil la' chu'bʌañ, ya' mi la' teñe ac' la' pusic'al.

Ma'añic juntiquil x'e'tel mu' bʌ i yuman cha'tiquil yumʌl, come mi' ts'a'len juntiquil, mi' c'uxbin yam bʌ. Mi' q'uel ti ñuc juntiquil, mi' q'uel ti lolom jiñi yam bʌ. Mach mejlic la' yuman Dios che' woli la' yuman chu'bʌañʌl.

Dios mi' mel i t'ojol jax bʌ pimel, jiñi poj cuxul bʌ wʌle mu' bʌ i chojquel ti c'ajc ti yijc'ʌlal, ¿mach ba muq'uic i yʌq'ueñetla ja'el chuqui mi la' xoj jatetla mach bʌ añic mi la' ñop ti pejtelel la' pusic'al?

Che' ma' wʌq'uen a chu'bʌañ p'ump'uño' bʌ, mach ma' wʌc' ti q'uejlel jiñi woli bʌ a wʌc'. Ti mucul yom ma' wʌc' a chu'bʌañ. Jiñi a Tat woli bʌ i q'uel pejtelel mucul tac bʌ mi caj i yʌq'ueñet a chobejtʌbal [ti jamʌl.]

Chʌcʌ q'uele la' bʌ cha'añ mi la' mel chuqui toj, pero mach cojic jach ti' wut la' pi'ʌlob cha'añ mi' q'ueletla, come che' jiñi ma'añic mi yʌq'ueñetla la' chobejtʌbal la' Tat am bʌ ti panchan.

Che' ja'el che' woliyetla ti ch'ajb, mach yomic ch'ijiyem la' wut che' bajche' jiñi cha'chajpob jax bʌ i pusic'al. Leco mi' melob i wut cha'añ mi' q'uejlelob woliyob ti ch'ajb. Isujm mic su'beñetla, tsa'ix i tajayob i chobejtʌbal. Pero jatet, che' woliyet ti ch'ajb boño a jol yic'ot wajyun a wut. Che' jiñi ma'añic mi' tsictiyel ti' wut wiñicob x'ixicob mi woliyet ti ch'ajb. Pero mi' tsictiyel ti' wut a Tat am bʌ ti mucul. Jiñi a Tat, mu' bʌ i q'uel pejtelel mucul tac bʌ, mi caj i yʌq'ueñet a chobejtʌbal [ti jamʌl.]