Quechua, Huaylas Ancash 2019 WBT; Non-Drama (NT)

Quechua, Huaylas

Quechua, Huaylas Ancash 2019 WBT; Drama (NT)

Fariseukuna contran kayaptinpis Jesús yachatsishqanta wiyëta munarmi nunakuna waranqa waranqapayan ëllukar kikinkunapura kumanakur jalunakuyarqan. Tsëchönam discïpulunkunata yachatsirnin Jesús kënö nirqan: <<Fariseukunapa levadüranta paqtam chaskiyankiman. Tsë levadüraqa alli tukuq këninkunam. Imapis pakëllapa rurayanqanqa rikakanqam. Pipis mana rikëkaptin rurayanqanpis llapanmi musyakanqa. Paqaspa pakëllapa parlayanqëkitam atsikyaqchöna wiyayanqa. Y pakëllapa wayi rurinchö parlayanqëkitanam wayikunapa jananman lloqarkur qaparipa willakuyanqa.


<<Yanasäkuna, qamkunatam niyaq: Ama mantsayankitsu pipis wanutsiyäshunëkipaq jurapäyäshuptiki. Wanuratsiyäshurniki mananam ni imata rurayäshunkinatsu. Tsëpa rantinqa Teyta Diosta mantsakuyë. Pëmi sï puëdiq këkan wanuratsiyäshurniki infiernuman qarpuyäshunëkipaq. Tsëmi pëllata mantsakuyänëki.
<<¿Manaku pitsqa pishqukunata ishkë centimullachö rantikuyan? Tsënö kaptinpis pishqukunataqa Teyta Dios imëpis rikëkanmi. Aqtsëkikunapis pëpaqqa yupashqam këkan. Qamkunaqa atska pishqukunapitapis masmi väliyanki. Tsënö këkaptinqa ama mantsakuyëtsu.


<<Noqam niyaq: Pipis nunakunapa nöpanchö favornï parlaptinqa Nunapa Tsurinpis Teyta Diospa angelninkunapa nöpanchömi pëkunapa favornin parlanqa. Pipis nunakunapa nöpanchö negamaptinqa noqapis Teyta Diospa angelninkunapa nöpanchömi negashaq.
<<Pipis Nunapa Tsurinpa contran parlayaptinqa Teyta Dios perdonanqam. Peru Espíritu Santupa contran parlayaptinqa Teyta Dios imëpis manam perdonanqatsu.
<<Sinagögakunaman, juezkunaman y autoridäkunaman apayäshuptikipis ama llakikuyankitsu: <¿Imataraq nishaq? ¿Imanöraq yaskishaq?> nir. Parlayänëki höram Espíritu Santu käyitsiyäshunki imata parlayänëkipaqpis>>.

Nunakunapa chöpinpitanam Jesústa juk nuna kënö nirqan: <<Rabí, wawqïta nïkï tocamashqan herenciata rakimänanpaq>>.
Tsënam Jesús nirqan: <<Tëtë, noqaqa manam jueztsu kä herenciëkikunata rakiyänaqpaq>>.
Tsëpitanam nunakunatana kënö nirqan: <<Paqtam mallaqashqa kayankiman. Alli kawëqa manam kapuqyuq këraqtsu>>.
Tsënö nirirnam iwalatsikïwan kënö yachatsikurqan: <<Juk rïcupash chakranchö alläpa atska cosechan kanaq. Tsënash yarpakachar kënö ninaq: <Këtsika cosëchäwanqa ¿imataraq rurashaq? Wayïpis manataq tinkuntsu churanäpaq>. Tsënö yarpärirnash ninaq: <Tröjäkunata shoqllirirninmi mas jatuntana rurashaq. Tsëmannam cosëchäkunata y llapan kapamaqnïta churashaq. Atska watapaq churakïkurqa mana yarpakachashpanam mikur upur kushishqalla kawakushaq>. Tsënö niptinpis Teyta Diosnash kënö ninaq: <¡Mana alli yarpëyuq nuna! ¡Kanan paqasmi wanunki! Llapan churashqëkikunapis ¿pipaqraq kanqa?> >>
Jesús tsënö parlar usharirnam nirqan: <<Tsënömi imëkatapis kikinllapaq ëlluq nunataqa pasan. Rïcu karpis Teyta Diospaqqa waktsapitapis mas ankupëpaqmi këkan>>.


Jesús tsënö yachatsikïkarnam discïpulunkunata nirqan: <<Ama yarpakachäyëtsu: <¿Imanöraq kawashaq? ¿Imataraq mikushaq? ¿Imataraq yakakushaq?> Manam mikïllapaq ni ratashllapaq yarpakachänantsikpaqtsu këkantsik. Pishqukuna imanö kawayashqantapis käyikuyë. Pëkunaqa manam murukuyantsu ni ëllupakuyantsu ni churakuyantsu. Tsënö kaptinpis Teyta Diosmi mikïta qon. Teyta Diospaqqa pishqukunapitapis masmi väliyanki.
<<Alläpa yarpakacharpis ¿piraq ichiklla masqa winarkunman? Sï tsëllatapis mana puëdikarqa ¿imapaqtaq kë vïdachö kaqkunapaq yarpakachäyanki?
<<Wëtakuna imanö winayashqantapis käyikuyë. Wëtakunaqa manam uryayantsu ni putskayantsu. Noqam niyaq: Wëtakuna kuyëllapaq kayashqannöqa manam rey Salomónpa ratashninkunapis kuyëllapaq karqantsu. Ichiklla markäkïyuq nunakuna, sitsun warë warätin rupar ushakashqa kananllapaq këkaptinpis qorakunata kuyëllapaqta Teyta Dios winëkätsin, qamkunatanäqa ¿manatsuraq wanayanqëkikunata qoyäshunkiman?
<<Tsënö këkaptinqa ama yarpakachäyankitsu: <¿Imataraq mikushun? ¿Imataraq upushun?> nirnin. Kë patsachöqa llapan nunakunapis tsënömi llakikuyan. Qamkunapa Teytëkikunaqa imata wanayashqëkitapis musyanmi. Tsëpa rantin Teyta Diospa mandakïninchö kawayänëkipaq yarpakachäyë. Tsënö kawayaptikiqa imata wanayanqëkitapis qoykuyäshunkim.


<<Qatirämaqnïkuna, wallka üshanölla karpis ama llakikuyëtsu. Teytëkim qamkunata akrayäshushqanki pëpa mandakïninchö kayänëkipaq.
<<Imëkikunatapis rantikïkur waktsakunata qellëninkuna rakiyë. Tsënö rurarqa riquëzëkikuna ciëlumanmi churëkäyanki. Tsëtaqa manam suwapis apanqatsu ni puyupis ushanqatsu. Mëmanmi riquëzëkita churayanki tsëllamanmi shonqïkipis yarparëkanqa.

<<Tseqllëkikunata alli watarkur aktsikikunapis tsaritsishqa listullana këkäyë. Casakï fiestapita patronnin kutirinanta shuyarëkaq sirwiqnö këkäyë. Tsë sirwipakuqkunam patronnin chärir punkuta tsaktakuriptin jinallachö punkuta kichariyanqa. Patronnin chärir shuyëkäyanqanta tarinqanpitam sirwiqninkuna alläpa kushikuyanqa. Rasunpam niyaq: Kikin patronmi sirwiqninkunata mësaman tëkatsir mandilnin churakurkur sirwinqa. Pullan paqas o madrugädu patronnin chärir mäkuq mäkuq këkaqta tariptinqa sirwiqninkuna alläpam kushikuyanqa.
<<Käyikuyë. Imë höra suwa shamunanpaq kanqanta musyarqa mana punushpam wayinta pipis täpanman. Tsënölla qamkunapis mäkuq mäkuq këkäyë. Mana musyayashqëki höram Nunapa Tsurin shamunqa>>.


Tsënö niptinnam Pedro kënö tapurqan: <<Teyta, ¿noqakunallataku tsë iwalatsikïwan yachatsiyämanki o llapan nunakunatawanku?>>
Jesúsnam nirqan: <<Mas markäkunqan y käyikuq sirwiqnintam wayinman patrón churan wakin sirwikuqkunatapis höranchö qarananpaq. Patronnin kutimur käyitsishqannö llapantapis rurëkaqta tarïkuptinqa tsë sirwikuq alläpam kushikunqa. Rasunpam niyaq: Tsë sirwiqninpa poderninmanmi llapan imëkantapis patronnin churanqa. Mana markäkïpaq sirwikuqqa <patronnï manaran kutimunqaraqtsu> nirmi sirwikuq mayinkunata warmitapis ollqutapis maqan y upyaq mayinkunawan mikur upyar jitaräkun. Tsënö këkaptinmi mana yarpashqan höra patronnin kutimur wakin mana cäsukuqkunatawan juntu tsë sirwiqninta mana ankupashpa castiganqa.
<<Patronnin munashqanta musyëkarnin mana wiyakushpa llutankunata ruraq sirwiqnintaqa feyupam castiganqa. Mandakushqankunata mana musyar llutanta ruraq sirwiqnintaqa alläpaqa manam castiganqatsu. Tsënöllam Teyta Diospis mas markäkunqan kaqkunata cuentata mas mañanqa.


<<Noqaqa kë patsachö ninata tsaritsinäpaqmi shamurqü. ¡Mënapis rupëkänantam munä! Tsënö kaptinpis alläpa jipakïkunata pasanäran precisan. Tsëtam alläpa llakikur shuyëkä.
<<¿Kë patsachö nunakuna alli pasakïchö kawakuyänanpaq shamushqätaku yarpäyanki? Manam tsëpaqtsu shamurqü, sinöqa kikinkunapura chikinakuyänanpaqmi. Kananpita witsëpam juk wayichö pitsqaq tärarqa ishkaqpa contran kimaq kayanqa. Y ishkaq kaqnam kimaqpa contran kayanqa. Tsurinpa contranmi tëtan, tëtanpa contrannam tsurin, wawanpa contranmi mamänin, mamäninpa contrannam wawan, llumtsïninpa contranmi suegran y suegranpa contrannam llumtsïnin>>.


Tsëchö juntarëkaq atska nunakunatam Jesús nirqan: <<Inti jeqanan läduchö pukutë shäriqta rikarmi: <Tamyamunqam> niyanki y niyanqëkinöllam tamyan. Sur kaq lädupita vienturamuptinnam <achachämunqam> niyanki y niyanqëkinöllam achachan. ¡Alli tukuqkuna! Tsëkunataqa allim musyayanki. Tsëkunata musyarqa ¿imanirtaq rurashqäkunata rikëkarpis Teyta Dios kachamashqantaqa käyiyankitsu?


<<¿Imanirtaq yarpakachäyankitsu shumaq kawayänëkipaq?
<<Pipis demandayäshuptiki autoridäman manaraq char juklla arreglayë. Mana arreglayaptikiqa juezmanmi apatsiyäshunki. Jueznam wardiakunawan carcelman llawitsiyäshunki. Noqam niyaq: Tsëpitaqa manam yarquyankitsu llapan jaqanta manaraq pagakurqa>>.

Слухайте Lucas 12