New Testament in Chayahuita (PE:cbt:Chayahuita)

Yosë nanamën

Iꞌhuasoꞌ naꞌa piyapiꞌsaꞌ Coansha imapi. Naꞌa aporintërin. Iporasoꞌ naꞌcon naꞌcon Quisoso imasapi. Co Quisoso chachin aporintërinhuëꞌ. Ina shaꞌhuitohuachincoi, caꞌtanoꞌsanënpitacoi aporintarai. Naꞌcon naꞌcon aporintarai. Parisioroꞌsarintaꞌ natantopi. Ina nitotaton, Quisoso paꞌnin. Cotia parti quëran pipirahuaton, Cariria parti paantarin.
Inatohua paꞌpachina, Samaria parti naꞌhuëcasoꞌ yaꞌhuërin. Inatohuaꞌ aꞌna ninanoꞌ yaꞌhuërin, Sicarë itopisoꞌ. Ina yaꞌcariya Cosi noꞌpanën yaꞌhuërin. Iráca paꞌpin Cacopo itopisori quëtërinsoꞌ. Inaquë aꞌna poso yaꞌhuërin. Cacopo posonën itopi. Camotëchin inaquë canconai. Quisoso canotaton, posoquë huënsëconin.
Caꞌtanoꞌsanënpitacoisoꞌ, ninanoquë paꞌnai cosharoꞌ paꞌanaꞌhuaiso marëꞌ. Paꞌnaisoꞌ, Samaria sanapi iꞌsha macapon huëꞌnin. Nani mapachina, Quisosori itapon:
—Imoya, iꞌsha mananso cantaꞌ oꞌoi topirahuë, itërin.
—Casoꞌ Samaria sanapico nipirahuëꞌ: “Iꞌsha mananso cantaꞌ oꞌoi,” ¿itëranco ti? itërin inarintaꞌ. Cotioroꞌsasoꞌ Samariaroꞌsarëꞌ co noya ninontopihuëꞌ niꞌton, napotërin.
—Yosë yanicanapirinquënhuëꞌ, co quëmasoꞌ nitotëranhuëꞌ. “Iꞌsha mananso cantaꞌ oꞌoi,” itëranquën nipirinhuëꞌ, co nohuitërancohuëꞌ. Nohuitëranco naporini, quëma nataintoncohuëꞌ. Carinquën nanpirin iꞌsha quëchitënquënhuëꞌ, itërin Quisosori.
—Quëmasoꞌ co mantaꞌ yaꞌhuëtërinquënhuëꞌ iꞌsha macamasoꞌ. Iꞌshasoꞌ acopoꞌ yaꞌhuërin. ¿Onporahuatoncha nanpirin iꞌsha manëꞌponquënya? Iráca Tata Cacopo iso poso ninin. Isëquëran iꞌsha macaton, oꞌorin. Huiꞌninpita, pëꞌtahuanënpita inapitantaꞌ isëquë oꞌopi. Inasoꞌ chiníquën nanantërin, topi. ¿Ina quëran naꞌcon naꞌcon quëmasoꞌ nanitaparan ti? itërin sanapiri.
—Iꞌshamia imoya oꞌopatëra, naquëranchin yamoroantarëꞌ. Nisha iꞌsha carinquën quëtaranquën. Ina yaꞌhuëtohuachinquën, co huachi yamororëso pochin cancantaranhuëꞌ. Niꞌquëꞌ. Pancaiꞌ noꞌpa quëran pipihuachina, noyápiachin pipirárin. Co onporontaꞌ yanimarinhuëꞌ. Inapochachin nanpirin iꞌsha quëtohuatënquën, cancanënquë chachin yaꞌhuëtarinquën. Inaquë yaꞌhuápon huachi. Yosë nohuitaton, nanpimiataran, itërin.
—Ina iꞌsha sinioro quëtoco ama yamoroto, iꞌsha masaꞌisohuëꞌ, itërin.
—Paaton imoya soꞌyan maconquëꞌ huëꞌin, itërin.
—Co casoꞌ soꞌyahuancohuëꞌ, itërin.
—Noꞌtëquën naporan. Co soꞌyahuanquënhuëꞌ. Nani aꞌnatërápo quëmapi soꞌyataponahuëꞌ, iporasoꞌ quëmapi yacaparansoꞌ co soꞌyanhuëꞌ. Noꞌtëquën nonan, itërin.
—Quëmasoꞌ sinioro ninotonaꞌpinquën, tënahuë. Shimashonëhuëipita paso motopiquë Yosë chinotopi. Yaꞌhuërë cotioroꞌsanquëmasoꞌ: “Quirosarinquëráchin Yosë chinotacasoꞌ yaꞌhuërin,” tënamaꞌ, itërin.
—Natanco imoya. Nani tahuëri naniarin. Yosë yachinotohuatamaꞌ, co paso motopiquë paꞌsaramahuëꞌ. Co Quirosarinquë tërantaꞌ pacacaso yaꞌhuërinhuëꞌ. Canpitasoꞌ Yosë chinotopiramahuëꞌ, co nohuitëramahuëꞌ. Cotioroꞌsacoisoꞌ, Yosë nohuitërai. Cotio quëmapi nichaꞌësarinquëmaꞌ canpitantaꞌ. Ipora quëran huarëꞌ Yosë yachinotohuatamaꞌ, yaꞌipi cancanëma quëran huarëꞌ chinotocoꞌ. Ispirito Santo catahuarinquëmaꞌ niꞌton, noꞌtëquën yonquiatomaꞌ, Yosë chinotocoꞌ. Ina pochin nohuantërin chinotacasoꞌ. Yosë co nonën yaꞌhuëtërinhuëꞌ. Co quënanarihuarahuëꞌ, yaꞌhuërárin. Ispirito Santo chachin catahuarinquëmaꞌ noꞌtëquën yonquiatomaꞌ, ina chinotacasoꞌ, itërin Quisosori.
—Aꞌna tahuëri Cristo huëꞌsarin, Yosëri aꞌpaimarinsoꞌ. Ina huëꞌpachin, yaꞌipiya aꞌchintarinpoaꞌ, tënin Samaria sanapi.
—Ca mini inaco, nontaranquënsoꞌ, itërin.
Naporo chachin caꞌtanoꞌsanënpitacoi oꞌmantarai. Sanapi nontarin, quënanquimarai. “¿Maꞌmarëtaꞌ iso sanapi nontarin? ¿Maꞌtaꞌ nohuantërin?” taꞌtoi, yonquinëhuëi quëran paꞌyanpiraihuëꞌ, co natanaihuëꞌ. Sanapiso nipirinhuëꞌ yonshanën patahuaton, ninanoquë pantarahuaton, piyapiꞌsaꞌ shaꞌhuitërin.
—Huëcoꞌ paꞌahuaꞌ. Pasëquë quëmapi nohuitocoꞌ. Co nohuitaponcorahuëꞌ, “Nani aꞌnatërápo soꞌyahuanquën,” itërinco. Yaꞌipiya ninorin. ¿Inasoꞌ Cristo nimara ti? itërin.
Natanahuatonaꞌ, naꞌa yaꞌhuëhuanoꞌsaꞌ oꞌmapi Quisoso nicaponaꞌ. Coꞌhuara canquiyatërasoihuëꞌ, Quisoso yaaꞌcapiraihuëꞌ.
—Caꞌquëꞌ Maistro, itopiraihuëꞌ, co nohuantërinhuëꞌ.
—Cosharo pochin nininsoꞌ yaꞌhuëtërinco, co nohuitëramasohuëꞌ, itërincoi.
—¿Aꞌnapitari cosharoꞌ quëtiimara? nitopiraihuëꞌ, co coshachatërarinhuëꞌ.
—Yosë aꞌpaimarinco nohuantërinsoꞌ nicaꞌhuasoꞌ. Yaꞌipiya yanatërahuë. Ina yonquiato, co huachi cosharoꞌ yonquirahuëꞌ. Cosharo pochin achinirinco. “Catapini yoqui pahuanarin cayarinsoꞌ macacasoꞌ,” topiramahuëꞌ. Ipora chachin cayarinso pochin nininsoꞌ macacasoꞌ yaꞌhuërin, tënahuë casoꞌ. ¡Niꞌcochi! Isoroꞌpaꞌ panca imin pochin ninin. Cayarinsoꞌ manëso pochachin piyapiꞌsaꞌ manëꞌ Yosë imacaiso marëꞌ. Ipora tahuëriꞌsa chachin naꞌa piyapiꞌsaꞌ yaꞌhuërarin Yosë imacaiso marëꞌ. Inapita aꞌchintacasoꞌ yaꞌhuërin. Piyapiꞌsaꞌ aꞌchintohuatamaꞌ, Yosëꞌpaꞌ canaaramaꞌ. Noya noya nanpimiataramaꞌ. Catoꞌ piyapi sacatërinso pochin nisaramaꞌ. “Aꞌnasoꞌ yaꞌpirin shaꞌnin. Cayahuachina, aꞌnarintaꞌ manin,” topi. Napohuachina, catoꞌ aꞌchinaꞌpiroꞌsa chachin nóya cancantapi. Naꞌa piyapiꞌsaꞌ yaꞌhuërin, co Yosë nohuitopisohuëꞌ. Aꞌnaquëni nani aꞌchintopirinahuëꞌ, co yanatëpihuëꞌ. Iporaso nipirinhuëꞌ aꞌparanquëmaꞌ aꞌchintantacamaso marëꞌ. Yosë huëntonënquë yaꞌconacaiso marëꞌ aꞌchintocoꞌ. Aꞌchintohuatamaꞌ, imasapi huachi, itërincoi.
Naꞌa yaꞌhuëhuanoꞌsaꞌ Quisoso natëpi. Sanapiri: “Yaꞌipi ninorinco,” itërinso marëꞌ natëpi. Quisoso niꞌquihuachinara, “Huëquëꞌ isëquë yacapatoncoi, aꞌchintocoi,” itopi. Itohuachinara, catoꞌ tahuëri aꞌchintacaso marëꞌ inaquë iꞌhuatërai. Aꞌchintohuachina, naꞌcon naꞌcon piyapiꞌsaꞌ natëpi. Sanapi itaponaꞌ:
—Quëma shaꞌhuitërancoi niꞌtoi, piꞌpian Quisoso natërai. Iporaso nipirinhuëꞌ quiyaora chachin natanai. Nani nohuitatoi, cancanëhuëi quëran huarëꞌ natërai huachi: “Tëhuënchachin isosoꞌ nichaꞌërinpoaꞌ. Insosona imapachinaꞌ, oshanën inquitaton, anoyacancantarin, tënai,” itopi.

Catoꞌ tahuëri quëran paantarahuatoi, Cariria parti canconai. Caririaroꞌsari nohuitatonaꞌ, noya natanpi. Iꞌhua chachin Pascoa tahuëri naꞌhuëhuachina, inahuantaꞌ Quirosarinquë paꞌpi. Naporoꞌ Quisoso nohuitopi. Nani maꞌsha Yosë pochin nininsoꞌ niꞌpi niꞌton, iporasoꞌ aꞌchintohuachina, noya natanpi. Ninanonënquë chachinso nipirinhuëꞌ co aꞌchininhuëꞌ. “Yaꞌhuërinquësoꞌ pënëntonaꞌpi co yanatëpihuëꞌ,” taꞌton, co inaquë aꞌchininhuëꞌ.
Ina quëran Canaquë cancoantarai. Inaquë iꞌhua iꞌsha huino atarantërin. Inaquë canconpatoira, aꞌna capitan copirno piyapinën nininsoari huëcapairin. Huiꞌnin quëmapiaꞌhua nininsoꞌ, Capinaomoquë chiníquën caniorin. “Quisoso Cotia parti quëran pipirahuaton, Cariria parti canquirin,” topi, natantërin. Natantahuaton, paahuarin:
—Huëquëꞌ Maistro huiꞌnahuë anoyatiimaco. Nani yachiminin, itërin.
—Canpitasoꞌ co aꞌnaroáchin natëramacohuëꞌ. Coꞌsoꞌ Yosë pochin nipatohuëꞌ, co natëaramacohuëꞌ, itërin inarintaꞌ.
—Manóton Sinioro huëquëꞌ. Huiꞌnahuë chiminpachin, itaantarin.
Napotaantahuachina:
—Yaꞌhuëranꞌpaꞌ paꞌmantaquëꞌ. Huiꞌnan co chiminaponhuëꞌ. Noyatarin, itërin. Napotohuachina: “Noꞌtëquën nontërinco,” taꞌton, yaꞌhuërinꞌpaꞌ paꞌmantarin. Yacanconahuasoꞌ, inpriatonënpitari nacapiatonaꞌ:
—Huiꞌnan nani noyatërin, itiipi.
—¿Insëchintaꞌ piꞌi nisahuasoꞌ noyatërin? itërin.
—Iꞌhuara piꞌi yatëhuërënahuasoꞌ sapo otanotërin, itopi.
“Naporo chachin Quisoso nontërinco. ‘Huiꞌnan noyatarin,’ itërinco,” taꞌton, Quisoso natërin. Yaꞌipi pëinënquë yaꞌhuëpisopitantaꞌ natëpi.
Iꞌhua chachin iꞌsha huino atarantërin. Iporasoꞌ Cotia parti quëran huëntarahuaton, capitan huiꞌnin yaꞌhuërëꞌ aꞌnaroáchin anoyatërin. Inapoaton catoroꞌ huachi Caririaquë Yosë pochin nisarin piyapiꞌsari nohuitacaiso marëꞌ.

Слухайте Juan 4