text: copyright The Konta New Testament The Word for the World,  audio: copyright The Konta New Testament ℗ 2018, Davar Partners International 

Ooratsa C’aak’uwa Kontaso Doona

«ፆሳይ ሂንቴንቱ ቦላ ፒርዴና ማላ፥ ሂንቴካ ሃራቱዋ ቦላ ፒርዶፒቴ። ኣዪሲ ጎፔ፥ ሂንቴንቱ ሃራቱዋ ቦላ ፒርዲያዋዳን፥ ፆሳይ ሂንቴንቱ ቦላ ፒርዳና፤ ቃሲ ሂንቴንቱ ሃራቱዋሲ ኢማናው ማኪያባን ኢ ሂንቴው ማካና። ኔ ኣይፊያን ዴዒያ ቱሳ ቤዓካ፤ ሺን ኔ ኢሻ ኣይፊያን ዴዒያ ሱላ ኣዪሲ ፄላይ? ዎይ ኔ ኣይፊያን ቱሳይ ዴዒሺን፥ ኔኒ ኔ ኢሻ፥ ‹ታኒ ኔ ኣይፊያፔ ሱላ ኬሶ› ዋናዴ ጋናው ዳንዳያይ? ላ ሃ ሎዑዋ ማላቲያ ኢታው! ካሴታዴ ኔ ኣይፊያፔ ቱሳ ኬሳዲጋ፤ ሄዋፔ ጉዪያን፥ ኔ ኢሻ ኣይፊያፔ ሱላ ኬሳናው ጌሻዴ ፄላናው ዳንዳያ።
«ጌሻባ ካናቱዋሲ ኢሞፒቴ፤ ኡንቱንቱ ጉዬ ሲሚዴ፥ ሂንቴና ሳዓና። ቃሲ ኢንቁዋ ጌቴቲያ ሂንቴንቱ ኣልዖ ሹቻ ጉዱንቱዋ ሲንን ኦሎፒቴ፤ ኡንቱንቱ ባሬንቱ ጌዲያን ዬና።


«ዎሲቴ፤ ሂንቴ ኣካና። ኮዪቴ፤ ሂንቴ ዴማና። ካሪያኮ ዪዴ ፄሲቴ፤ ሂንቴው ፔንጊ ዶዬታና። ኣዪሲ ጎፔ፥ ዎሲያ ኡባይ ኣካና፤ ኮዪያ ኡራይ ዴማና፤ ቃሲ ካሪያኮ ዪዴ ፄሲያ ኡራው ፔንጊ ዶዬታና። ዎይ ሂንቴንቱ ጊዶን ባሬ ናዓይ፥ ‹ኡኪ ኢማ› ጎፔ፥ ሹቻ ኢሚያ ኣዉ ዴዒ? ቃሲ፥ ‹ሞሊያ ኢማ› ጎፔ፥ ኣው ሾሻ ኢማናዌ? ሂንቴንቱ ኢታ ጊዲዴ፥ ሂንቴንቱ ናናቱዋሲ ሎዖባ ኢሚያዋ ኤሮፔ፥ ያቲና፥ ሳሉዋን ዴዒያ ሂንቴንቱ ኣዉ ባሬና ዎሲያዋንቱሲ ሎዖባ ዎቲ ዳሪሲ ኢሜኔ!
«ሄዋ ዲራው፥ ሃራ ኣሳይ ሂንቴው ኦናው ኮዪያ ኡባባ ሂንቴካ ኣሳው ኦቴ፤ ኣዪሲ ጎፔ፥ ሙሴ ሂጊያ ቢሌይኔ ናባቱ ታማሪሲያዌ ሃዋ።


«ኡንዓ ፔንጊያና ጌሊቴ። ኣዪሲ ጎፔ፥ ባዬው ኣፊያ ፔንጊ ኣኩዋ፤ ኦጊካ ዎጋ። ሄዋና ጌሊያ ኣሳይካ ጮራ።
«ሺን፥ ዴዖ ኣፊያ ፔንጊ ኡንዓ፤ ኦጊካ ፁን። ቃሲ ሄዋ ዴሚያዋንቱካ ጉ።


«ቦላ ባጋና ዶርሳ ማላቲዴ፥ ሂንቴኮ ዪያ ዎርዶ ናባቱዋፔ ናጌቲቴ፤ ሺን ኡንቱንቱ ጋርሳ ባጋና ዋላቱዋ ማላ። ኡንቱንቱ ኣይፊያ ኣይፊያዋን ሂንቴ ኡንቱንታ ኤራና፤ ኣጉንይ ዎዴን ኣይፊያ ኣይፌና፤ ጎሚዖሪካ ኮኪያ ኣይፊያ ኣይፌና። ሄዋዳንካ፥ ሎዖ ሚ ኡባይ ሎዖ ኣይፊያ ኣይፌ፤ ሺን ኢታ ሚይ ኢታ ኣይፊያ ኣይፌ። ሎዖ ሚይ ኢታ ኣይፊያ ኣይፋናው ዳንዳዬና፤ ቃሲ ኢታ ሚይካ ሎዖ ኣይፊያ ኣይፋናው ዳንዳዬና። ሎዖ ኣይፊያ ኣይፌና ሚ ኡባይ ቃንፄቲዴ፥ ታማን ዬጌታና። ሄዋ ዲራው፥ ሂንቴ ኡንቱንቱ ኣይፊያ ኣይፊያዋን ኡንቱንታ ኤራኒታ።
«ሳሉዋን ዴዒያ ታ ኣቡ ጌዳዋ ኦያ ኡራይ ሳሉዋ ካዉቴ ጌላናፔ ኣቲን፥ ‹ጎዳው፥ ጎዳው› ጊያ ኡባይ ጌሌና። ፒርዳ ጋላሲ ዳሮ ኣሳይ ታና፥ ‹ጎዳው፥ ጎዳው፥ ኑኒ ኔ ሱንን ፆሳይ ኪቶዋ ኦዲቤይኮ? ኔ ሱንን ፃላሃቱዋ ኬሲቤይኮ? ቃሲ ኑኒ ፆሳይ ኦያ ማላሊሲያባ ኔ ሱንን ኦቤይኮ?› ያጋናዋንታ። ታኒ ሄ ዎዴ ኡንቱንታ፥ ‹ታኒ ሂንቴና ኡባካ ኤሪኬ፤ ኢታባ ኦያዋንቱ ሂንቴ ታ ማታፔ ሃኪቴ› ያጋና።


«ሄዋ ዲራው፥ ሃዋ ታ ቃላ ሲሲዴ ኦያ ኡባይ ሚኖ ዛላ ቦላ ባሬ ጎሊያ ኬፄዳ ዎዛናማ ኣሳ ማላ። ኢራይ ቡኪዴ፥ ዲዑ ዲዔዳ፤ ጫርኩካ ጫርኪዴ፥ ሄ ጎሊያ ሱጌዳ። ሺን ጎሊ ሚኖ ዛላ ቦላ ኬፄቴዳ ዲራው፥ ኩንዲቤና።
«ሃዋ ታ ቃላ ሲሲዴ ኦና ኣሳይ ኡባይ፥ ባሬ ጎሊያ ሻፊያ ቦላ ኬፄዳ ቦዛ ኣሳ ማላ። ኢራይ ቡኪዴ፥ ዲዑ ዲዔዳ፤ ጫርኩካ ጫርኪዴ፥ ሄ ጎሊያ ሱጊና፥ ጎሊ ኤሌካ ኩንዴዳ። ሄ ጎሊ ዎልቃማ ኩንዴ ኩንዴዳ።»
ዬሱሲ ባሬ ሃሳዪያዋ ዉርሴዳ ዎዴ፥ ኣሳይ ኢ ታማሪሲያዋን ማላሌቴዲኖ። ኣዪሲ ጎፔ፥ ኢ ኡንቱንታ ታማሪሲዴ፥ ሙሴ ሂጊያ ታማሪሲያዋንቱዳን ጊዴናን፥ ማታይ ዴዒያ ኣሳዳን ታማሪሶ ዲራሳ።

Слухайте ማቶሳ 7