Text: © L'Alliance Biblique du Tchad 2006 Audio: ℗ 2008 Hosanna

Sar - 2008 Edition (NT)

Bibəl ta Sar̄ © L'Alliance Biblique du Tchad, 2006, 2010.

Jeju aw̄ dɔ mbal̄ kāgə̄ olibə gə̄ tə́. Banī dəloí ɓatə anī, tél aw̄ kem kújə yā Kɔ́ɔ̄ɓē tə́. Kósə de gə̄ malang reēn̄ rɔ̄n tə́, anī ni-ndi nang tə́ ba a ndóōdə́ yá̰a̰. Anī ngé ndóō de gə̄ ndū najə̄ gə̄ kə Parijiyḛ gə̄ reēn̄ kə dəyá̰ kógə̄ḿ kə́ əhɔnən̄ dɔ rāȳ tə́. Əndānən̄ dandə́ tə́, ba ədan̄ Jeju na:
Ngoljí, j-əhɔ dəyá̰ ń toō i dɔ rāȳ tə́. Moijə ədají kem makətūbə̄ ndū najə̄ tə́ kadə̄ jə-tə́nā dəyá̰ kə́ beé gə̄ kə mbalá jə-tɔ̄l̄də́ kɔ̄ɔ́. Ba ḭ̄ ā ə́da yāí na i rí?
Nin̄-ədan̄ nge ń noō i yā nāānəń kadə̄ əngenə̄ń najə̄ kə́ yā sekə́nneé. Banī Jeju rugə nang tə́, ndang yá̰a̰ kə ta ngōn̄ jīneé dɔ nang tə́.
Nin̄-dəjenən̄ ɓáý to̰, anī ɔr̄ tan dɔɔ́, ba ədadə́ na:
De kə́ dansí tə́ ń rāā yá̰á̰ kə́ majaĺ nja kógə̄ḿ aĺ ní, ādə̄ kɔ́ɔ̄ ənīn kə kūbə̄rū mbalá kété.
Tél rugə nang tə́ a ndang yá̰a̰ dɔ nang tə́ ɓáý to̰. De gə̄ ń oōn̄ najə̄ ń noō ní ɔrə̄n̄ rɔ̄də́ kógə̄ḿ kógə̄ḿ kɔ̄ɔ́, nga tɔ́gə gə̄ aw̄n̄ kété, pá tá gotə gə̄ aw̄n̄ gōdə́ tə́, adə̄ na̰y i Jeju ngóy nin̄ kə dəyá̰ ń əndānən̄ dandə́ tə́ ní.
Jeju ɔr̄ tan dɔɔ́ ba ədan na:
Dəyá̰, aw̄n̄ i rá? Deē kógə̄ḿ kə́ gān̄g sarya dɔí tə́ gətóo a?
Dəyá̰ ní tél ədan na:
Kɔ́ɔ̄ɓē, deē gətóo.
Anī Jeju ədan na:
Mā m̄-gān̄g sarya dɔí tə́ aĺ ō, āw̄, ba ī-rāā yá̰á̰ kə́ majaĺ to̰ alé.

Jeju ɔr̄ najə̄ kə kósə de gēé ɓáý to̰, ədadə́ na:
Mā i loo kə́ unjə̄ kow yā de kə́ dɔ nang tə́ gə̄. Nge ń a un gōḿ anī, a njə̄rā kum til tə́ alé, ba a ənge loo kə́ unjə̄ kow kə́ rāā kadə̄ deē a ndi kə kumneé.
Anī Parijiyḛ gə̄ ədanən̄ na:
Ḭ̄ ɔ̄r̄ i najə̄ kə́ kum tə́ kə́ dɔ rɔ̄í īkɔ́ tə́, adə̄ najə̄ kə́ kum tə́ yāí i rɔ̄kum alé.
Jeju tél ədadə́ na:
Ré m-ɔ̄r̄ i najə̄ kə́ kum tə́ kə́ dɔ rɔ̄ḿ mə̄kɔ́ tə́ gə̄gē anī, najə̄ kə́ kum tə́ yāḿ i kə́ rɔ̄kum. Tɔdɔ̄ m̄-ger̄ loo ń m-ḭ́ḭ tū tə́ ní ō, loo ń m-ā m-āw̄ kə̄ tū tə́ ní ō. Banī sḭḭ̄ ī-gerī loo ń m-ḭ́ḭ tū tə́ ní aĺ ō, loo ń m-ā m-āw̄ kə̄ tū tə́ ní aĺ ō. Sḭḭ̄ ī-gāngī sarya i kə gō gír̄ yā de gēé, ba mā m̄-gān̄g sarya dɔ deē kógə̄ḿ tə́ alé. Ba ré mā m̄-gān̄g sarya anī, m̄-gān̄g i sarya kə́ rɔ̄kum. Tɔdɔ̄ mā i kə kérə́ḿ alé, banī Bɔbə́ḿ ń əlam̄ ní i seḿ. Ndangən̄ kem makətūbə̄ ndū najə̄ yāsí tə́ na najə̄ kə́ kum tə́ yā de kə́ jōó gə̄ i kə́ rɔ̄kum. Mā m-ɔ̄r̄ najə̄ kə́ kum tə́ dɔ rɔ̄ḿ mə̄kɔ́ tə́ ō, Bɔbə́ḿ ń əlam̄ ní ɔr̄ najə̄ kə́ kum tə́ dɔḿ tə́ ō.
Anī nin̄-ədanən̄ na:
Bɔbí i rá?
Anī Jeju tél ədadə́ na:
Ī-ger̄mī aĺ ō, ī-gerī Bɔbə́ḿ aĺ ō. Ré ī-ger̄mī anī, ā ī-gerī Bɔbə́ḿ ō.
Jeju ɔr̄ najə̄ ń toō i dan ń ni a ndóōń de gə̄ yá̰a̰ kem kújə yā Kɔ́ɔ̄ɓē tə́, loo ń a ɓōkə́n̄ nar kə́ ndējə̄ Nə́ɓā tū tə́ ní. Ba deē kógə̄ḿ kə́ əhɔn gətóo, tām̄ kum mbang yān asə aĺ ɓáý.

Jeju ɔr̄ najə̄ sedə́ ɓáý to̰, ədadə́ na:
M-ā m-āw̄, ba ā ī-sāāmī, banī ā óyiī kum majaĺ yāsí tə́. Loo ń m-ā m-āw̄ kə̄ tū tə́ ní, sḭḭ̄ ásiī kugə̄ tū tə́ alé.
Loo ń noō tə́ Jipə gə̄ ədan̄ naā dɔ dáńdə́ tə́ na: Gír̄ i tɔ̄l̄ rɔ̄n a, tām̄ əda na loo ń m-ā m-aw̄ kə̄ tū tə́ ní, sḭḭ̄ ásiī kugə̄ tū tə́ alé.
Jeju tūr̄ ədadə́ na:
Sḭḭ̄ ī-teēī i nang tə́ laā, ba mā m-ḭ́ḭ i dɔɔ́. Sḭḭ̄ i de kə́ dɔ nang tə́ gə̄, ba mā i de kə́ dɔ nang tə́ alé. I tām̄ najə̄ ń noō tə́ n m-ə́dásí na ā óyiī kum majaĺ yāsí gə̄ tə́ ní. Ré ī-taāī kem kadə̄ Mā i Mā ń m̄-ndi noó ní aĺ anī, ā óyiī kum majaĺ yāsí gə̄ tə́. Anī nin̄-dəjenən̄ na ké ni i náā wa.
Jeju tél ədadə́ na:
Mā i nge ń m-ə́dásí najə̄ yān ta kəla gíŕ tə́ ní. Mā i kə yá̰á̰ ngá̰ý yā kəda dɔsí tə́ ō, yā gāngəń sarya dɔsí tə́ ō. Banī nge ń əlam̄ ní, najə̄ yān i najə̄ kə́ rɔ̄kum. Adə̄ yá̰á̰ ń m-ōō tan tə́ ní, m-ā m-ə́da de kə́ dɔ nang tə́ gə̄.
Ni-ɔr̄ i najə̄ yā Bɔbə̄ Ngōn̄ sedə́, banī nin̄-gerə̄n̄ kum alé.
Anī Jeju ədadə́ na:
Loo ń ā ə́laī Ngōn̄ Deē dɔɔ́ anī, ā ī-gerī kadə̄ Mā i Mā ń m̄-ndi noó ní ō, kadə̄ m̄-rāā yá̰á̰ kógə̄ḿ kə deē dɔḿ alé, banī m-ɔ̄r̄ najə̄ i kə gō nəkɔ́ ń Bɔbə́ḿ ndóōm̄neé ní ō. Nge ń əlam̄ ní i seḿ, ni-əya̰m̄ kə kerə́ḿ alé. Tɔdɔ̄ m̄-rāā yá̰á̰ kə́ nelə̄n kə ndɔ̄ gə̄.
Dan ń Jeju ɔr̄ najə̄ beé anī, de gə̄ ngá̰ý taān̄ kemən.

Jeju ɔr̄ najə̄ kə Jipə gə̄ ń taān̄ kemən ní, ədadə́ na:
Ré ī-ngɔ̄mī najə̄ yāḿ anī, sḭḭ̄ i ngé ndóō yá̰a̰ yāḿ kə́ rɔ̄kum gə̄. Ā ī-gerī najə̄ kə́ rɔ̄kum ō, najə̄ kə́ rɔ̄kum a rāāsí kadə̄ sḭḭ̄ i de kə́ kɔ́ɔ̄ rɔ̄də́ gə̄ ō.
Nin̄-tél ədanən̄ na:
Jḭḭ i ngán kaa Abəraham gə̄, jə-rāā ɓəlo yā deē nja kógə̄ḿ alé. Ba i ba̰ý á ə́da na j-a jə-tél kɔ́ɔ̄ rɔ̄jí gə̄ ní?
Jeju tél ədadə́ na:
Ādə̄ m-ə́dásí najə̄ kə́ bo ngá̰ý, deē ń rāā majaĺ ní i ɓəlo yā majaĺ. Ɓəlo a ndi ɓē deé ngándáńg alé. I ngōn̄ deē n a ndi ɓē deé ngándáńg ní. Ré Ngōn̄ Nə́ɓā ɔr̄sí ɓəloó anī, sḭḭ̄ i kɔ́ɔ̄ rɔ̄sí gə̄ rɔ̄kum. m̄-ger̄ kadə̄ sḭḭ̄ i ngán kaa Abəraham gə̄, banī ī-sāāī tɔ̄lə̄m̄. Tɔdɔ̄ najə̄ yāḿ ənge loo kemsí tə́ alé. M-ə́dásí i yá̰á̰ ń m-á̰a̰ rɔ̄ Bɔbə́ḿ tə́ ní, ba sḭḭ̄ ī-rāāī i yá̰á̰ ń ōōī ta bɔbə̄sí tə́ ní.
Nin̄-tél ədanən̄ na:
Bɔbə̄jí i Abəraham.
Jeju ədadə́ na:
Ré sḭḭ̄ i ngán Abəraham gə̄ anī, ā ī-rāāī kəla gə̄ ń Abəraham rāā ní. Ba ń toō ɓáa, dan ń m-ə́dásí najə̄ kə́ rɔ̄kum ń m-ōō ta Nə́ɓā tə́ ní, anī sḭḭ̄ ī-sāāī tɔ̄lə̄m̄. Banī yá̰á̰ ń noō Abəraham rāā alé. Sḭḭ̄ ī-rāāī i kəla ń bɔbə̄sí rāā ní. Nin̄-ədan̄ na:
Jḭ̄ i ngáń kə́ ojən̄jí loo kaya tə́ alé, bɔbə̄jí i kógə̄ḿ beē, i Nə́ɓā.
Jeju tél ədadə́ na:
Ré bɔbə̄sí i Nə́ɓā anī, ā ī-tármī, tām̄ m̄-teē i rɔ̄ Nə́ɓā tə́ n m̄-reē toó. m̄-reē i kə dɔḿ alé, banī i ni n əlam̄ ní. I tām̄ rí tə́ á sḭḭ̄ ī-gerī kum najə̄ yāḿ aĺ ní? I tɔdɔ̄ sḭḭ̄ ásiī koō najə̄ yāḿ alé. Bɔbə̄sí i diabəl, ba ī-ndigiī i rāā yá̰á̰ ń kem bɔbə̄sí gḛy ní. Ni i nge tɔ̄l̄ de gə̄ i ta kəla gíŕ tə́ nú bátə́ ngɔlaā. Usən dɔ najə̄ kə́ rɔ̄kum tə́ alé, tɔdɔ̄ najə̄ kə́ rɔ̄kum gətóo kemən tə́. Loo ń a tə́da najə̄ kə́ sor̄ gə̄ anī, ɔr̄ i najə̄ yān nəkɔ́. Tɔdɔ̄ ni i nge sor̄ ō, ni i bɔbə̄ sor̄ ō. Banī i tām̄ kəda ń m-ə́da najə̄ kə́ rɔ̄kum ní n sḭḭ̄ ī-taāiń kemḿ aĺ ní. I náā kə́ dansí tə́ n asə kɔjəm̄ dɔ majaĺ kə́ m̄-rāā ní? Ré m-ə́dásí najə̄ kə́ rɔ̄kum anī, i tām̄ rí tə́ á ī-taāī kemḿ aĺ ní? Nge ń i deē yā Nə́ɓā ní, a oō najə̄ yā Nə́ɓā. Banī sḭḭ̄ ōōī alé, i tɔdɔ̄ sḭḭ̄ i yā Nə́ɓā alé.

Jipə gə̄ tél ədanən̄ na:
Dan ń j-əda na ḭ̄ i de kə́ Samari ō, ndíĺ kə́ majaĺ i kemií tə́ ō ní, i gōtə́ aĺ a?
Jeju tél ədadə́ na:
Ndíĺ kə́ majaĺ i kemḿ tə́ alé, banī m̄-rɔȳ i Bɔbə́ḿ, ba sḭḭ̄ ī-rɔyīmī alé. Mā m̄-sāā kɔsə gɔn yāḿ alé. I deē kógə̄ḿ n a sāā tām̄ yāḿ tə́ ō, a gān̄g sarya ō ní. Ādə̄ m-ə́dásí najə̄ kə́ bo ngá̰ý, deē ń rāā yá̰a̰ gə̄ ń m-ə́dá ní anī, a oy aĺ bátə́.
Jipə gə̄ ədanən̄ na:
Ngɔlaā jə-ger̄ kadə̄ ndíĺ kə́ majaĺ i kemií tə́. Abəraham oy ō, ngé koō ta gə̄ oyn̄ ō, ba ḭ̄ ə́da na deē ń rāā yá̰a̰ gə̄ ń ə́dá ní anī, a oy aĺ bátə́. Ḭ̄ i kə́ bo tɔȳ kaají Abəraham ń oy ní a? Ngé koō ta gə̄ oyn̄ ō, ba ḭ̄ ī-rāā rɔ̄í i rí tə́?
Jeju tél ədadə́ na:
Ré i mə̄kɔ́ n m-ɔ́sə gɔn rɔ̄ḿ anī, kɔsə gɔn yāḿ i yá̰á̰ kə́ karī. Deē ń ɔsə gɔnəḿ ní i Bɔbə́ḿ ń sḭḭ̄ ə́daī na i Nə́ɓā yāsí kanjə̄ gerə̄n, ba mā m̄-gerə̄n ní. Ré m-ə́da na m̄-gerə̄n aĺ anī, mā i nge sor̄ tītə̄sí. Banī m̄-gerə̄n ō, m̄-rāā yá̰a̰ gə̄ ń ni-əda ní ō. Kaasí Abəraham rāā walya loo ń ni gír̄ ka̰a̰ ndɔ̄ yāḿ ní. Ni-a̰a̰ ndɔ̄ ní, ba rāā rɔ̄nel̄.
Anī Jipə gə̄ ədanən̄ na:
Ɓālīí i kutə mí aĺ ɓáý anī, á̰a̰ Abəraham a?
Jeju tél ədadə́ na:
Ādə̄ m-ə́dásí najə̄ kə́ bo ngá̰ý, kété tá kadə̄ ojən̄ Abəraham ní, Mā i Mā ń m̄-ndi noó ní kɔ̄ɔ́.
Loo ń noō tə́ nin̄-ɔyn̄ kūbə̄rū mbal̄ gə̄ yā tə́nīnneé. Banī Jeju ɓɔ̄ɔ̄ rɔ̄n ba teē kɔ̄ɔ́ kem kújə yā Kɔ́ɔ̄ɓē tə́.

Слухайте JA̰A̰ 8