If you would like a copy of this version please contact info@davaraudiobibles.org

Tavoyan: Dawei Bible, CC-BY-SA-4.0, The Word for the World International, 2024. (Text)
Tavoyan: Dawei New Testament Audio Bible, CC-BY-SA-4.0, Davar Partners International, 2025. (Audio)

Tavoyan: Dawei New Testament

“နန်းနို့လေဟှာ ကောန်းဇာလေလောက်ဟှူ ခီမာ လူလေဗြင်အောန် လောက်မိဘဲနေဟှို့ ဒိထားဂေ့ပါ။ နန်းနို့ဟှာ လူလေဗြင်အောန် လောက်မယ် ဆိုဟှာ ကောန်းဂန်ဘောင်မာ ရှိတော်မူဟှူ နန်းနို့ဖနားဟှ ကျိုးဟှို ခံစားရဂေ့ဟှို့ မှုဟှ။
“အယ်ကြောန့် နန်းနို့ လှူဒါနပေးဟှူ ခီမာ သူတော်ကောန်း ယောန်ဆောန်ဟှူ သူလေ လောက်ဂေ့ဟှူမျိုး လူလေထန်ကီးဇာခံရဟှို့ ဝါလယ်ဇရပ်လေန လမ်းဆောင်လမ်းခွလေမာ တံပိုးမှုဘီး ကြေညာဂေ့န။ သူးနို့လေဟှာ လူလေရဲ့ထန်ကီးဘီး ချီးမွမ်းခံရအောန်ဘဲ့ လောက်ဂေ့လေဟှယ်။ ငါမှန်တိုင်းပြောမယ် အယ်သူလေဟှာ ခုဘဝကျိုးဟှိုဘဲ့ ရဂေ့လေဟှယ်။ နန်းနို့လေဟှာ လှူဒါနပေးဟှူ ခီမာ ဘယ်ဖတ်လတ်န ပေးဟှူဇာဟှို ညာဖတ်လတ်ဟှို သိစေန။ ထန်ရှားဘဲဇာဟှို ဗြင်တော်မူဟှူ နန်းနို့ဖဟှာ ကျိုးဟှို ထန်ရှားအောန် ပေးတော်မူလေ့မယ်။


“နန်းနို့လေဟှာ ဆုတောန်းဟှူ ခီမာ သူတော်ကောန်း ယောန်ဆောန်သူလေမျိုး လောက်ဂေ့န! အယ်သူလေဟှာ လူလေဗြင်အောန် ဆိုဘီး ဝါလယ်ဇရပ်လေ၊ လမ်းဆောင်လမ်းခွလေမာ ရပ်ဘီးဟှာ ဆုတောန်းဂေ့လေဟှယ်။ ငါမှန်တိုင်းပြောမယ် အယ်သူလေဟှာ လူလေရဲ့ ထန်ကီးဇာလေန ချီးမွမ်းဇာလေဟှို ခံရဂေ့လေဟှယ်။ နန်းနို့လေ ဆုတောန်းဟှူ ခီမာ တိဆိဟှူ အီခန်းထဲဟှိုဝမ်ဘီး ခွဗော့‑က်ဟှို လောင်အောန်ပိဘီးဟှာ ထန်ရှားဘဲဟှူရပ်မာ ရှိတော်မူဟှူ နန်းနို့ဖနားမာ ဆုတောန်းဂေ့ပါ။ ထန်ရှားဘဲဇာဟှို ဗြင်တော်မူဟှူ နန်းနို့ဖဟှာ ကျိုးဟှို ထန်းထန်ရှားရှား ပေးလေ့မယ်။
“နန်းနို့လေဟှာ ဆုတောန်းဟှူ ခီမာ ဘုရားသိဘဲဟှူလူလေမျိုး ဓိပါယ်မှေ့ဘဲဟှူ စကားလေန ထပ်ခါထပ်ခါ တောန်းဂေ့န။ အယ်သူလေဟှာ ရရာတိုင်းရှယ်ဟှူ စကားန ခီကြာဂီး ဆုတောန်းဟှယ် ဆိုဟှာ သူးနို့လိုရှင်ဇာဟှို ရလေ့မယ် ဆိုဘီး ထန်မှတ်ဂေ့ဟှယ်။ သူးနို့လေမျိုး လောက်ဂေ့န။ နန်းနို့လိုအပ်ဟှူ ဇာလေဟှို နန်းနို့တောန်းခန်ဂဒဲဟှ နန်းနို့ရဲ့ဖ သိတော်မူလေဟှယ်။ အယ်ကြော့န် နန်းနို့လေ ဆုတောန်းဟှူ ခီမာ၊
“‘ကောန်းဂန်ဘောင်မာ ရှိတော်မူဟှူဖ၊
ကိုယ်တော်ရဲ့ နာမတော်ဟှို ရိုသေလေးမြတ်ရှင်း ရှိပါစေ။
နိုင်ငံတော် တည်ထောန်ပါစေ။
လိုတော်ဟှာ ကောန်းဂန်နိုင်ငံမာ ပ္လဲ့ဇောင်ဟှူမျိုးဘဲ့ မ္လေဂီးထတ်မာလည်း ပ္လဲ့ဇောင်ပါစေ။
ကျွန်တော့်ဟှားလေ လိုအပ်ဟှူစားဇာဟှို အယ်နေ့တွပ် ပေးသနားတော်မူပါ။
ကျွန်တော့်ဟှားလေဟှို ပြစ်မှားဟှူ သူလေရဲ့ ပြစ်လေဟှို ကျွန်တော်ဟှားလေ ခွမ့်လွှတ်ပေးဟှူမျိုးဘဲ့
ကျွန်တော်ဟှားလေရဲ့ ပြစ်လေဟှို ခွမ့်လွှတ်ပေးပါ။
ပြစ်သွီးဆောန်ဟှူနော့‑က်ဟှို လိုက်ပါသွားစေဘဲန၊
ကောန်းဘဲဟှူဇာလေဟှလည်း ကယ်နှုပေးပါ’ ဆိုဘီး ဆုတောန်းဂေ့ပါ။
“နန်းနို့လေဟှာ သူများလေရဲ့ ပြစ်မှားဇာဟှို ခွမ့်လွှတ်ပေးဟှယ် ဆိုဟှာ ကောန်းဂန်ဘောင်မာ ရှိဟှူ နန်းနို့ဖလည်း နန်းနို့လေရဲ့ ပြစ်လေဟှို ခွမ့်လွှတ်ပေးလေ့မယ်။ အယ်ဘေမဲ့ နန်းနို့လေဟှာ သူများလေ ပြစ်မှားဟှူဇာဟှို ခွမ့်လွှတ်ပေးဟှ ဆိုဟှာ နန်းနို့ဖလည်း နန်းနို့လေရဲ့ပြစ်ဟှို ခွမ့်လွှတ်ပေးလေ့ မှုဟှ။

“နန်းနို့လေဟှာ စာရှောန်ခီမာ သူတော်ကောန်းယောန်ဆောန်ဟှူ သူလေမျိုး သူများလေရဲ့ရှေ့မာ မျစ်နှာညှိုးငယ်ဘီး နေဂေ့န။ အယ်သူလေဟှာ သူးနို့စာရှောန်ဇာဟှို သူများလေသိအောန် ရရာတိုင်း ဗိုက်ဆာဘီး အားနဲနေဟှူပေါင်ဇံမျိုးန သူများလေရှေ့မာ ပြသတတ်ဟှယ်။ ငါမှန်တိုင်းပြောမယ် အယ်သူလေဟှာ လူလေရဲ့ ထန်ကီးဇာလေ၊ ချီးမွမ်းဇာလေဟှို ခံရလေဟှယ်။ နန်းနို့လေဟှာ စာရှောန်ဟှူ ခီမာ စာရှောန်ဟှူကြောန်းဟှို သူများလေဟှို သိစေန။ ထန်ရှားဘဲရပ်မာရှိဟှူ နန်းနို့ဖရှေ့မာ ထန်ရှားစေဟှို့တွပ် မျစ်နှာဟှိုသစ်၊ ခေါန်းဟှို ဆီန လူးဘီးဟှာ လန်းလန်းဆန်းဆန်းဟှား နေဂေ့ပါ။ ထန်ရှားဘဲဇာဟှို ဗြင်တော်မူဟှူ နန်းနို့ဖဟှာ ကျိုးဟှို ထန်းထန်ရှားရှား ပေးလေ့မယ်။


“သံခ္လေး၊ ခြလေ၊ ခိုးလေ၊ မ္လလေ ဖော့‑က်ထွမ်းဘီး ခိုးယူနိုင်ဟှူ လောကီဘဏ္ဍာဟှို စုဂေ့န။ အယ်ဘေမဲ့ သံခ္လေး၊ ပိုးလေ၊ ခိုးလေ၊ မ္လလေလည်း ခိုးယူနိုင်ဘဲဟှူ ကောန်းဂန်ဘဏ္ဍာဟှို စုဂေ့ပါ။ ဖြားဖြစ်ကြောန့်နူးဆိုဟှာ နန်းနို့လေဟှာ ဘဏ္ဍာရှိဟှူ နေရာဟှိုဘဲ့ နန်းနို့စိနှလောင်းဟှာ ရော့‑က်တတ်ဟှယ်။


“မျစ်စိဟှာ ကိုယ်ခန္ဓာတွပ် ဆီမီးအီန တူဟှယ်။ မျစ်စိကောန်းဟှယ် ဆိုဟှာ နန်းနို့ရဲ့ ကိုယ်ခန္ဓာ တခုလောင်း လန်းလေ့မယ်။ အယ်ဘေမဲ့ မျစ်စိကောန်းဂေ့ဟှ ဆိုဟှာ ကိုယ်ခန္ဓာ တခုလောင်း မှောန်လေ့မယ်။ နန်းနို့လေရဲ့ လန်းရောန်ဟှာ မှောန်မိုက်ဖြစ်နေဟှယ် ဆိုဟှာ အယ်မှောန်မိုက်ဟှာ ရရာတိုင်း မိုက်လေဟှယ်!


“ဖယ်သူဟှလည်း သခင်နှေ့ယော့‑က်ရဲ့ စေဟှို ခံနိုင်ဟှ။ သခင်တယော့‑က်ဟှို မူးဘီး တယော့‑က်ဟှို ရှစ်လေ့မယ်။ သခင်တယော့‑က်ဟှို သစ်စာစောန့်ဘီးဟှာ တယော့‑က်ဟှို ထီမဲ့မြင်လောက်လေ့မယ်။ နန်းနို့လေဟှာ ဘုရားသခင်န လောကစည်းဇိမ်လေဟှို တပြိုင်ဒဲ စေခံနိုင်ဂေ့ဟှ။
“အယ်ကြောန့် နန်းနို့ဟှို ငါပြောမယ်။ ဖယ်မျိုးစားရဟှို့၊ ဖယ်မျိုးသော့‑က်ရဟှို့ ဆိုဘီး သတ်တွပ် စိုးရိမ်ဂေ့န။ ဖယ်မျိုးဝတ်ရဟှို့ ဆိုဘီးလည်း ကိုယ်ခန္ဓာတွပ် စိုးရိမ်ဂေ့န။ စာထတ် သတ်ဟှ ပိုမြတ်ဟှယ် မှုဟှလော။ ဝတ်ထတ်လည်း ကိုယ်ခန္ဓာဟှာ ပိုဘီး မြတ်ဟှယ် မှုဟှလော။ ကောန်းဂန်မာရှိဟှူ ငှတ်လေဟှို ကေ့ဘီးဟှာ ဆင်ခြင်ကေ့ဂေ့ပါ။ သူးနို့လေဟှာ မျိုးစေ့လည်း ကြဲဟှ။ သီးနှံလည်း ရိဟှ။ သိုဘီးလည်း ထားဟှ။ အယ်ဘေမဲ့ ကောန်းဂန်ဘောင်ဟှ နန်းနို့လေရဲ့ ဖဟှာ သူးနို့လေဟှို ကျွေးမွေးလေဟှယ်! အယ်ငှတ်လေထတ် နန်းနို့လေဟှာ ပိုဘီး မြတ်ဟှယ် မှုဟှလော။ နန်းနို့လေထဲမာ ဖယ်သူဟှ စိုးရိမ်နေဇာအားဖြင့် သတ်နဲနဲပိုရှယ်လာနိုင်မယ်နူး။
“နန်းနို့လေ ဖြားဖြစ်ကြောန့် ဝတ်တွပ် စိုးရိမ်နေဂေ့နူး။ တောပန်းလေဟှာ ဖယ်မျိုးရှင်ဘီး ဖယ်မျိုး ကီးလာဇာဟှို ကေ့ဘီးဟှာ ဆင်ခြင်ဂေ့ပါ။ အယ်တောပန်းလေဟှာ လောက်လည်းလောက်ဟှ။ ခယ်ဖြစ်အောန်လည်း တတ်နိုင်ဟှ။ အယ်ဘေမဲ့ ရှောလမုန်မန်းဂီးရဲ့ ဖောင်းစည်းဇိမ်လေ ဂူလောင်းဟှို ဆင်ဟှယ်ဟှိုမှ အယ်တောပန်းလေထဲဟှ တဗန်မျိုး လှပတင့်တယ်ဟှ ဆိုဘီး နန်းနို့လေဟှို ငါပြောဟှယ်။ ယောင်ကြည်ရှင်း အားနဲဟှူလူလေ! အယ်နေ့သတ်ရှင်ဘီး နတ်ကီးတိုင်ဟှာ မီးဖိုထဲဟှို ရော့‑က်ရဟှူ တောဗြစ်ပန်လေဟှို ဘုရားသခင်ဟှာ အယ်မျိုးဆင်ပေးဟှယ် ဆိုဟှာ နန်းနို့လေဟှို အယ်ထတ်မက ဆင်ပေးမယ် မှုဟှလော။
“အယ်ကြောန့် ဖယ်မျိုးစားရဟှို့နူး၊ ဖယ်မျိုးသော့‑က်ရဟှို့နူး၊ ဖယ်မျိုးဝတ်ရဟှို့နူး ဆိုဘီး စိုးရိမ်ဂေ့န။ (ဘုရားသိဘဲဟှူလူလေဟှဘဲ့ အယ်မူဇာလေဟှို စိုးရိမ်တတ်ဂေ့ဟှယ်။) အယ်မူဇာလေဟှို နန်းနို့လေ လိုအပ်ဟှယ် ဆိုဇာဟှို ကောန်းဂန်ဘောင်ဟှ နန်းနို့ဖ သိတော်မူဟှယ်။ ဘုရားသခင်ရဲ့ နိုင်ငံတော်န ဖြောန့်မတ်ရှင်းဟှို ဦးဆောင်း ရှာဂေ့ပါ။ နော့‑က်မှ နန်းနို့လိုအပ်ဟှူဇာလေဟှို ထပ်ဘီးပေးလေ့မယ်။ အယ်ကြောန့် နတ်ကီးတိုင်တွပ် စိုးရိမ်ဂေ့န။ နတ်ကီးတိုင်ဟှဘဲ့ သူ့တွပ်စိုးရိမ်လေ့မယ်။ အယ်မူနေ့မာ တွိကြောင်ရင်ဆိုင်ရဟှူ ဇာလေဟှာ အယ်နေ့တွပ် လောင်လော့‑က်လေဟှယ်။

Слухайте မဿဲ 6