Komo: Ɔngana á Kɛ̌kɛ (New Testament+)

Ɔngana á Kɛ̌kɛ

Mbusa índɔ, Yéso áokáia etǔ á Galiláya, nnde ɓá phɔtɔ ɔɔphana Tibɛlía. Usɛsɛ ángbó á ɓakpa ɓáomɓea nga, ɗáɓáɔni mphangiɔ á ketangaɔ nde ɗáɔtɔtɔkisa ka amisa á ɓato á esambɔ. Yéso na ɓagoigi nɛkɛ, ɓáoɓamba mamba, ɓáoika kó. Maseye á Pasáka ndea Ɓayúda ɗátú bíbí.
Yéso áomesia iso, áɔɔna usɛsɛ á ɓakpa na ɓáombikia. Mpɔ, áongea Philípɔ: «Cɔ, ɓesombande eea ka isa á ɓakpa nde súwani?» Ɗáyɔngi ɓó ka tomba akɛ nga, ɗáoúba kema nde ageande. Philípɔ â gǎkɛ onsikisia: «Nanga ɓéɓá na imɔna mia iɓɛ (200), nnaɔtɔka n'asombi mokati nde nkpa na nkpa atɔande miki á gbútuka í.» Ka ɓagoigi nɛkɛ moci, ina akɛ Andeé, muna-amakɛ na Simɔ́ni Pɛ́tɛɛ, áongoɗea Yéso gea: «Moganda moci a wani. Ana mokati ɓɔku na ɓasú ɓaɓɛ. Cɔ, nndɔ a gǎkɛ kema sina ka ɓakpa ɓásii ɓende?»
Yéso áogea: «Cɔ, óikisani ka oɗo.» (Ɔma ndɔ ɗátú phɔtɔ na manganga ásii.) Mpɔ ɓáoika, ɓǒko ɗáɓátú ɓea ɓakpa ɛlɛphu ɓɔku (5.000). Mpɔ, Yéso áoɓoa mokati ndɔ, áonsega Mokonga k'ɛ́mɛmi, áogaba ú ka ɓakpa nde ɗáɓátú wa. Â phɔtɔ ogea ɓó na ɓasú, nkpa na nkpa áoea ɓíndɔ akondi. Ɓî ɓákuti ye, Yéso áǒngoɗea ɓagoigi nɛkɛ: «Kɔngɔani due ka gea, kau kaújukanɛmbɛ.» Ɓáɔkɔngɔa due á mokati ɓɔku nde ɓáí, ɓáotúmisa jɔ nkama na iɓɛ (12).
Ɓî ɓakpa ɓáɔni ye Yéso n'atɔtɔkisi ketangaɔ ndɔ, ɓáogea: «Ɗoni, mmbé ande Mɔtu-nyɔngɔ ndea Mokonga mmbé ɗákeni bika ka mokonda.» Ɓî Yéso ɗáúbi gea, ɓakpa ɗáɓáogea ɓábikɛ mbɛɗɛ ka bisa akɛ moamɛ ka ɓukpɛkpɛ nɛɓɔ, kaɓondɔ, â goto oɓamba mamba yɛ sasakɛ.


Cɔ, ɗáɓi ye ɔgɔgɔ, ɓagoigi nɛkɛ ɓáodida na motii á etǔ. Kó, ɓáokambea ka koko, ka gǎ nci á na Kapɛɛnaúmu. Esa ɗágeoípha Yéso na k'édondimbɛ. Kɛtɛmbɔ áoɗengisa etǔ phɛɛ nga, sumbu ɗátú akpɛ. Mbusa á tamba á ɓɔ ka koko ɓea kilɔmɛtɛɛ ɓɔku, kaɓɛ ngianjaga (6), ɓáɔmɔna Yéso n'aotamba gǔ á iɓo ka bîmisia á koko. Mpɔ, ɓáoɓá na kɔɓɔɓɔkɔ. Yéso â gǎkɛ ǒngoɗea: «Ɓókóɓangɛmbɛ, eme aámbɔ!» Ɓî ɗáɓáokonda kambisa akɛ ka koko, kɛ̌kɛndɔ tɔ, koko â gǎkɛ odunduia ɔma nde ɗáɓágɛndɛi.

Mama í, usɛsɛ á ɓakpa nde ɗáɓájigi kubi étǔ, ɓáoengekisa gea, koko ɗátú tɔ wa moci. Ɗáɓáúbi gǎkɛ gea, Yéso ɗákákǎmbi na ɓagoigi nɛkɛ suɓi í. Ɓagoigi sasaɓɔ tɔndɔ ɓáunge ɗáɓáge. Mpɔ, koko nengbo ásii nnde atóki ka ntanga-nji á Tibɛlía áokiɗia bíbí á ɔma nde ɗáɓáigi mokati mbusa á Mɔkɔta sega á Mokonga. Mbenɔ nde usɛsɛ á ɓakpa ndɔ ɗáɓáɔni gea, Yéso kaɓɛ ɓagoigi nɛkɛ, ɗáɓákátú wa, ɓáokambea ka koko ndɔ, ɓáoga onkaɓa Yéso na Kapɛɛnaúmu.

Ɓî ɓándondi ye Yéso kubi á etǔ, ɓáomúsia: «Ngoisigi, mbenɔ sina nde okiɗimá koni?» Yéso áǒsikisia gea: «Eya, nenóngoɗi ɗoni gea, ɓoomokaɓa nga, ɗóɓoí mokati, ɓóokúta, nna ndiu gea, ɓoengekisi kantíti á mphangiɔ á ketangaɔ nde nɛtɔtɔkisi. Ɓɔ́kɔbɛɗanɛgɛmbɛ ka nyɔngɔ á eea nde aoújukana, áɓɛ ndiu ka nyɔngɔ á eea nde aoendisa mɛyɔ. Eea ndɔ, eme Muna-Nkpa, aámbé nenóphande nga, Abɛ Mokonga amopi kɔkɔta í.»
Mpɔ, ɓáomúsia: «Ka bɛɗanaga ekuma ndea Mokonga, ɓegeande ɓo?» Yéso áǒsikisia te: «Ekuma nde Mokonga akondi ka ɓenu, ande ɓeekea á mmbé anteki.»
Ɓâ gǎkɛ ongea: «Cɔ, mphangiɔ á ketangaɔ sina nde ɔtɔtɔkisande ka gea te, ɓɛ́ɔnɛ ú na ɓeekea akɔ? Kema sina nde ɔtɔtɔkisande? Ɓatatasu ɗáɓáí mána ka nkanda, ɓíndɔ ɓáɗundu suɓi á Ɓuku á Mokonga: Ɗéɓophi mokati, n'atóki na koba ka ea í.» Mpɔ Yéso áǒgea: «Nenóngoɗi ɗoni gea, nna Mósa aámbé ɗánophi mokati n'atóki na koba. Abɛ ndiu aámbé aonopha mokati á ɗoni, nnde á na koba. Nga, mokati ndea Mokonga aunge aotóka na koba, áǒɓopha ɓato á ka mokonda enda.» Ɓâ gǎkɛ ongoɗea: «Mɔkɔta, ósopha mokati ndɔ esa bubui.»
Mpɔ, Yéso áɔ̌tɔmia ɓe: «Nende Mokati á endisa. Mmbé amobikíí, kákuwɛku tanda na nja na mmbé amoɓeeki, kákuwɛku tanda n'ɛnyɔta. Ɗénóngoɗi gǎkɛ nndɔ: Nanga ɓɔmɔɔni ye, ɓókóomoɓeekea. Ɓakpa ɓɔbu ɓunde Abɛ amopi, ɓámobikiande. Mmbé amobikíí kémɓeɛgɛku tanda. Nga, ɓî nedidi ka toka na koba, nna ka tɔtɔkisa á mɔphɛ nɛmɔ, a ndiu ka tɔtɔkisa á mɔphɛ á mmbé ɗámoteki. Mɔphɛ á mmbé ɗámoteki ande gea te, kémɓungisɛmbɛ mɔnɔ ka ɓunde ɗámopi. Nénjujukisɛ ndiu ka kukuwa k'ésa á sungiaga á mokonda. Cɔ, mɔphɛ á Abɛ a ɓe: Mmbé aɔmɔna Muna-Mokonga na ɓeekea akɛ, áɓɛ na enda á mɛyɔ na nenjujukisande k'ésa á sungiaga á mokonda.»
Cɔ, Ɓayúda ɓáɔngɔngɔnɛaga Yéso ka nyɔngɔ nde ɗági: «Nende mokati nde atóki na koba.» Ɓáɔyɔnga gea: «Nga Yéso aámbé, muna-Yɔsɛ́phu na Malía. Cɔ, kɛ̌kɛnde agi, atóki na koba ka ɓo?» Yéso áǒsikisia te: «Ɓɔ́kɔngɔngɔnɛgɛmbɛ sɔsɔɓɛ anu. Nna na nkpa nde aɔtɔka n'abiki mɔtɛ-amɔ, Abɛ mmbé amoteki na kámɔphani. Na eme, nenjujukisaeka ka kukuwa esa á sungiaga á mokonda. Cɔ, ɓaɔtu-nyɔngɔ ndea Mokonga ɗáɓáɗundu ɓe: ‹Mokonga aámbé aegoisagande ɓakpa ɓɔbu.› Nkpa buakɛ mmbé aɔ́ki nyɔngɔ ndea Abɛ na ɓɔphɛi nɛkɛ, aámbé abikande mɔtɛ-amɔ. Ka ɓakpa kámɔnimbɛ mɔnɔ Abɛ, na nna tɔndɔ mmbé atóki mɔtɛ á Mokonga, yɛ tɔ aámbé amɔni Abɛ. Eya, nenóngoɗi ɗoni gea, mmbé aɓeeki, ana enda á mɛyɔ.
Eme nende mokati á endisa. Ɓatatanu ɗáɓáí mána ka nkanda, ɓâ gǎkɛ okuwa. Cɔ, mokati nde atóki na koba, nkpa nde aoea ú, kákuwɛku. Nende mokati á endisa, nnde atóki na koba. Aoɓá nkpa n'aí ka mokati ndɔ, aendande mɛyɔ. Mokati ndɔ, ande kesuku ani, nnde něgabeande ɓato á ka mokonda ka gea, ɓáɓɛ na enda.»
Kaɓondɔ, Ɓayúda ɓáokpanga púa ngǔngu aɓɔ phɛɛ. Ɓáoúsianaga: «Mogaa nde aɔtɔka opha asu kesuku akɛ gea, ɓéeɛ ka ɓo?» Yéso áǒgea: «Nenóngoɗi ɗoni gea, aoɓá na ɓókóí kesuku á Muna-Nkpa na noa magia akɛ, ɓókóɓɛku na enda. Mmbé aoea kesuku ani na noa á magia ani, ana enda á mɛyɔ, na nenjujukisande ka kukuwa esa á sungiaga á mokonda. Nga, kesuku ani ande eea á ɗoni, na magia ani ande kema á onoa á ɗoni. Mmbé aoea kesuku ani na noa á magia ani, eme neiki suɓi akɛ na yɛ aiki suɓi ani.
Abɛ mmbé amoteki ana enda, na enda ani atóki ka yɛ. A phɔtɔ ɓó ka mmbé aoea kesuku ani, aɓande na enda ka nyɔngɔ ani. Cɔ, ɔ́nani mokati nde ɗátóki na koba. Nna ɓíndɔ ɓatatanu ɗáɓáí ɓáokuwa. Mmbé a gǎkɛ oea mokati nde, aendande mɛyɔ.» Ɗáyɔngi nndɔ ɓî ɗátú ogoisaga k'éndu á madondanɔ ndea Ɓayúda ka nyɔngɔ á Mokonga ka Kapɛɛnaúmu.

Mbusa á ɔ́ka á nyɔngɔ ndɔ, ka ɓagoigi nɛkɛ ɓásii ɓáogea: «Yɔnga nde aákpɛ. Ani mmbé aɔtɔka n'aɓeeki ú?» Ɓî Yéso aúbi ye gea, ɓagoigi nɛkɛ ɓáɔngɔngɔnɛaga ka nyɔngɔ ndɔ, áǒgea: «Nyɔngɔ ndɔ anóphi ngǎka? Cɔ, aɓande ɓo aoɓá na ɓɔɔmɔɔna eme, Muna-Nkpa na neotáia ɔma nde ɗétú mosá? Měma á kanga ɓojeɗe aunge aoendisa. Nga, nkpa sasakɛ nnaɔtɔka ka kema. Nyɔngɔ nde ɗénóngoɗi, ande á Měma na anóphande enda. Nyɔngɔ ndɔ gǎkɛ ungɔ ɓunɛngbo sɔsɔɓɛ anu ɓánáoɓeekea.» Nga, Yéso ɗáeɓúbi kpanga á kala ɓunde ɗáɓákáɓeeki, na mmbé antɔngande. Mpɔ, Yéso â goto ǒgea: «Ka nyɔngɔ índɔ unge ɗénóngoɗi gea, nkpa nnaɔtɔka n'amobikíí aoɓá Abɛ n'akámophi aphe.»
Kpanga á mbenɔ ndɔ, ka ɓagoigi nɛkɛ ɓásii ɓáǒjujia na ɗeketa á tamba kimoci na yɛ. Mpɔ, Yéso áǒɓúsia ɓagoigi nkama na ɓaɓɛ (12): «Ɓenu phɔtɔ, ɓookonda ɓógɛ?» Simɔ́ni Pɛ́tɛɛ â gǎkɛ onsikisia: «Cɔ, Mɔkɔta, ɓegande mɔtɛ á ani? Nga, ona nyɔngɔ á endisa á mɛyɔ. Ɓeɓeeki ú na úba í gea, onde Nto á kanga ɓojeɗe ndea Mokonga.» Yéso áǒsikisia: «Ɗékénɔsɔmbu phɔ́ ɓenu Nkama na ɓaɓɛ (12), nanga moci sɔsɔɓɛ anu ande nketi?» Ɗáɔyɔnga ka phɔa á Yúda muna Simɔ́ni Isikaliɔ́ta. Nanga ɗátú sɔsɔɓɛ á ɓagoigi nkama na ɓaɓɛ (12), yɛ aámbé antɔngaeka.

Слухайте Yoáni 6