Ge’ez - 2021 - BSE (NT) Non Drama

Ge’ez - 2021 - BSE (NT) Drama

ወበይእቲ ሰዓት ቀርቡ ኀቤሁ አርዳኢሁ ለእግዚእ ኢየሱስ እንዘ ይብሉ መኑ እንጋ የዐቢ በመንግሥተ ሰማያት። ወጸውዐ ሕፃነ ወአቀሞ ማእከሎሙ። ወይቤ አማን እብለክሙ እመ ኢተመየጥክሙ ወኢኮንክሙ ከመ ዝንቱ ሕፃን ኢትበውኡ ውስተ መንግሥተ ሰማያት። ወዘአትሐተ ርእሶ ከመ ዝንቱ ሕፃን ዝ ውእቱ ዘየዐቢ በመንግሥተ ሰማያት። ወዘሂ ተወክፈ አሐደ ሕፃነ ዘከመዝ በስምየ ኪያየ ተወክፈ። ወለዘሂ አስሐቶ ለአሐዱ እምእሉ ንኡሳን እለ የአምኑ ብየ ይኄይሶ ከመ ይእስሩ በክሣዱ ማኅረጸ አድግ ወያስጥምዎ ውስተ ልጐተ ባሕር። አሌ ሎቱ ለዓለም እመንሱት ዘይመጽእ እስመ ግብር ይመጽእ መንሱት ወባሕቱ አሌ ሎ ለውእቱ ብእሲ ዘያመጽኣ ለመንሱት። ወእመኒ እዴከ አው እግርከ ታስሕተከ ምትራ ወግድፋ እምላዕሌከ እስመ ይኄይሰከ ትባእ ውስተ ሕይወት ሐንካሰከ ወፅዉሰከ እምእንዘ ብከ ክልኤ እድ ወክልኤ እግር ትትወደይ ውስተ እሳት ዘለዓለም። ወእመኒ ዐይንከ ታስሕተከ ምልሓ ወግድፋ እምላዕሌከ እስመ ይኄይሰከ ነቋረከ ትባእ ውስተ ሕይወት እምእንዘ ክልኤ ዐይን ብከ ትትወደይ ውስተ እሳተ ገሃነም። ዑቁ ኢታስተሐቅርዎ ለአሐዱ እምእሉ ንኡሳን እብለክሙ ከመ መላእክቲሆሙ በሰማያት ወትረ ይሬእዩ ገጾ ለአቡየ ዘበሰማያት። እስመ መጽአ ወልደ ዕጓለ እመሕያው ከመ ይኅሥሥ ወያድኅን ዘተኀጕለ።

ምንተ ትብሉ እመቦ ብእሲ ዘቦቱ ምእት አባግዕ ወእመ ተገድፈ አሐዱ እምውስቴቶሙ አኮሁ የኀድግ ተስዓ ወተስዐተ ውስተ ገዳም ወየሐውር ይኅሥሥ ዘተገድፎ። ወእምከመ ረከቦ አማን እብለክሙ ከመ ይትፌሣሕ በእንቲኣሁ ፈድፋደ እምተስዓ ወተስዐቱ እለ ኢተገድፉ። ከማሁኬ ኢይፈቅድ አቡየኒ ዘበሰማያት ከመ ይትኀጐል አሐዱ እምእሉ ንኡሳን።

ወእመኒ አበሰ ለከ እኁከ ሑር ወገሥጾ በባሕቲትከ በባሕቲቱ አንተ ወውእቱ ወእመ ሰምዐከ ረባኅኮ ለእኁከ። ወእመሰ ኢሰምዐከ ንሣእ ምስሌከ በዳግም አሐደ አው ክልኤተ እስመ በአፈ ክልኤቱ ወሠለስቱ ሰማዕት ይቀውም ኵሉ ነገር። ወእመሰ ኢሰምዖሙ ሎሙሂ ንግራ ለቤተ ክርስቲያን ወእመሰ ለቤተ ክርስቲያንሂ ኢሰምዓ ይኩን ከመ አረማዊ ወመጸብሓዊ። አማን እብለክሙ ዘአሰርክሙ በምድር ይከውን እሱረ በሰማያት ወዘፈታሕክሙ በምድር ይከውን ፍቱሐ በሰማያት። ወዓዲ እብለክሙ ለእመ ኀብሩ ክልኤቱ አው ሠለስቱ እምኔክሙ በውስተ ምድር በእንተ ኵሉ ግብር ዘሰአሉ ይትገበር ሎሙ በኀበ አቡየ ዘበሰማያት። እስመ ኀበ ሀለዉ ክልኤቱ ወሠለስቱ ጉቡኣን በስምየ ህየ እሄሉ አነ ማእከሎሙ። ወእምዝ ቀርበ ኀቤሁ ጴጥሮስ ወይቤሎ እግዚኦ ስፍነ እመ አበሰ ሊተ እኁየ እኅድግ ሎቱ እስከ ስብዕኑ። ወይቤሎ እግዚእ ኢየሱስ ኢይብለከ እስከ ስብዕ አላ እስከ ሰብዓ በበስብዕ።

በእንተዝ ትመስል መንግሥተ ሰማያት ብእሴ ንጉሠ ዘፈቀደ ይትሐሰቦሙ ለአግብርቲሁ። ወሶበ አኀዘ ይትሐሰቦሙ አምጽኡ ሎቱ አሐደ ዘይፈድዮ እልፈ መካልየ። ወኀጢኦ ዘይፈድዮ አዘዘ እግዚኡ ይሢጥዎ ምስለ ብእሲቱ ወምስለ ውሉዱ ወኵሎ ዘቦ እስከ ይፈዲ። ወወድቀ እንከ ውእቱ ገብር ታሕተ እገሪሁ ወሰገደ ሎቱ ወአስተብቍዖ እንዘ ይብል እግዚኦ ተዐገሠኒ ወኵሎ እፈድየከ። ወምሕሮ እግዚኡ ለውእቱ ገብር ወፈትሖ ወዕዳሁኒ ኀደገ ሎቱ። ወወፂኦ ውእቱ ገብር ረከበ አሐደ ገብረ እምነ አብያጺሁ ዘይፈድዮ ምእተ ዲናረ ወአኀዞ ወኀነቆ እንዘ ይብል ሀበኒ ዘትፈድየኒ። ወወድቀ ውእቱ ገብር ታሕተ እገሪሁ ወአስተብቍዖ እንዘ ይብል ተዐገሠኒ ወኵሎ እፈድየከ። ወአበዮ ወሖረ ወሞቅሖ እስከ ይፈድዮ። ወርእዮሙ አብያጺሁ ዘገብረ ተከዙ ጥቀ ወሐዊሮሙ ነገርዎ ለእግዚኦሙ ኵሎ ዘገብረ። ወእምዝ ጸውዖ እግዚኡ ወይቤሎ ኦ ገብር እኩይ ኵሎ ዕዳከ ኀደጉ ለከ እስመ አስተብቋዕከኒ። አኮሁ መፍትው አንተሂ ትምሀር ቢጸከ በከመ አነ መሐርኩከ። ወተምዐ እግዚኡ ወመጠዎ ለእለ ይሣቅይዎ እስከ አመ ይሤልጥ ኵሎ ዘይፈድዮ። ከማሁኬ አቡየኒ ሰማያዊ ይገብር ብክሙ እመ ኢኀደግሙ አበሳሆሙ ለቢጽክሙ እምኵሉ ልብክሙ።

Слухайте ወንጌል ዘማቴዎስ 18