Yala - 1979 BSNIG (NT) Non Drama

Iji̍sɔ̄ɔsi koko̍o de a̍chi̍kpo̍ yī nū bɛ̍ɛ̄nɛ̄ hīka, “Ala̍ ma̍ ko̍ō! Lɛlā nīi ē ya̍ nīi ɔ̄chɛ ē ngma̍ ta̍tū la lɛlā ɔdwɔ̄bi̍ ɔyɔ̍ɔ̄ya̍ ma̍ i̍ ge̍ē wīyā ē tū la ɔyɔ̍ɔ̄ya̍ ni̍. I̍īyo̍ de ɔ̄chɛ nīi chī ge̍ē ya̍ nīi lɛlā ɛla̍ā ge̍ē ya̍ ma̍! O̍ ngma̍ lɛbɛ nīi e̍ ē nāa lɛchɔ̄ ɛdɛ̄ to̍ōrī pla ɔlɔjā la ɔkɔ, ē nāa anu̍ ē ta̍tū ga u̍nyi. Ɔla̍ā hwɔhi hi̍ ɔkɔkɔ nīi ɔlɔjā ge̍ē ya̍ nīi enīchi̍chɛ̍ nūma̍ ē yɛ̍ɛ̄lā ɔdwɔ̄bi̍. Ala̍ ā du̍mɔ̍-du̍mɔ̍!
“Ɔɔ̍nɛ̍ yī ala̍ ɔha̍ ge̍ yɛ ē yɛ̍ɛ̄lā ɔdwɔ̄bi̍, ala̍ ā ka tāa anu̍. O̍ ge̍ pīyabɔ̄ta̍ hī lɛlā ɔdwɔ̄bi̍ ɔyɔ̍ɔ̄ya̍, ala̍ de kɔ̄ de ɔ̍. Ɔ̄chɛ ge̍ yɔ̍ɔ̄yɛ̍ɛ̄lā ɔdwɔ̄bi̍ igbarāapa la ɔ̄chī ūkpo̍he ku wɔ nīi o̍ ge̍ wā dikpo̍ba̍ wɔ ge̍ ka hīka anɔ̍lɔ pīyabɔ̄ta̍ hī lɛlā ɔdwɔ̄bi̍ ɛla̍ā mɛ̍, de lɛlā ɔdwɔ̄bi̍ yī nū kɔ̄ de ɔ̍.”

A̍chi̍kpo̍ yī Iji̍sɔ̄ɔsi da ɔ̍ bɛ̍ɛ̄nɛ̄ hīka, “Ādā, ya̍ nīi ɔtū ode chōche yī alɔ ge̍ lɔ̄kū ga iyɔ̄bū iyɔ̄bū gɛ!”
Ādā Iji̍sɔ̄ɔsi ka bɛ̍ɛ̄nɛ̄ hīka, “Ala̍ ma̍ ko̍ō! Ɔtū ode chōche yī ala̍ ge̍ bo̍ōbi̍hi, o̍ ge̍ lɔ̄lɛ bāa īkpɔ̄ɔ̄chi̍ nīi re̍ka imɔ̍si̍tāadi nīi bi̍hi ka̍ka̍ ma̍, ala̍ ge̍ ka de ɔchi̍ ɔnɔ̄kɔ̄kū nūma̍ hīka, ‘Hu iyī wɔ lɛgba-lɛgba ge̍ ta̍ tū la li̍hu’, o̍ ge̍ē de otūlichō de ala̍ i̍ngɔ̍ɔ ke̍e̍.

“Ɔ̄chɛ ɔha̍ lipu̍ yī ala̍ ge̍ lɛ ɔ̍chɛ̍ nīi yɛ ē gɔ̄ iwu̍ kɛ̄ɛ ē deyīrɛ yɛwū de ɔ̍ bɛ̍ɛ! Ɔ̍chɛ̍ yī nū ɔla̍ā ge̍ cha la u̍ku̍rɔ̍ ɔpɔ̄ɔpɛ̄ ma̍, o̍ ē ka ē de ɔ̍ hīka, ‘Pa̍pa̍! Yewā ge̍ re̍ ojōre̍ gɛ’? Īchāha̍-īchāha̍! Je̍ka aa̍ ala̍ ge̍ē ka hīka, ‘Gāa ge̍ de ojōre̍ yī u ya̍ gɛ! Tībi̍īyē nīi a ā chrāa ami ɛrɔ̄ kpɛɛ nīi n ē kwɛ̍ɛjī la ojōre̍ ba̍la ɔjā ɔgwɔ̍ɔ̄gwa̍ yī u o̍bū nīi a ā kū la ojōre̍ oro̍ōre̍ ba̍la ɔjā ɔgwɔ̍ɔ̄gwa̍ yī wɔ’ Ɔ̄chɛ gba̍a ē de ɔ̍chɛ̍ yī nū o̍be yī ɔjā nīi o̍ ka ɔ̍lɔ ge̍ ya̍ de anu̍ nīi o̍ de ya̍ ma̍? I̍ngi̍ngɔ̍ɔ nīi iyī ala̍ titi lɛ a̍nɛ. Ala̍ ge̍ kwɛ̍ɛjī la ɔjā nīi e̍ ka ala̍ ɔ̍lɔ ge̍ ya̍ ma̍ mɛ̍, ala̍ ā ka hīka, ‘Chāa! Je̍ka aa̍ alɔ - a̍chɛ̍ ji nɛ. U̍ku̍rɔ̍ nīi - iyī alɔ ma̍ nīi alɔ ya̍ ke̍e̍ a̍nɛ.’ ”

Iji̍sɔ̄ɔsi ga ɔpɛ̄ yī nū yɛ gāa Ijɛru̍sālɛm ma̍, o̍ ga la ɔprɛ̍ɛpa yī Isame̍riya ba̍la Iga̍līli. O̍ yɛ ge̍ē chɛ̄ ga ipwo̍gra ɔha̍ ma̍, alimada āchɛ igwo̍ wā ge̍ grāa anu̍. E̍ gblāa abɔ̍ɔ hwɛɛ. E̍ ka gbōō grāa anu̍ hīka, “Iji̍sɔ̄ɔsi! Ādā, chu̍chu̍u ma̍ alɔ lɛha̍ oo!”
Iji̍sɔ̄ɔsi ma̍ wā ma̍, o̍ koko̍o de wa̍ hīka, “Ala̍ ā pīya gɛ! Ala̍ ā gāa nīi oligbe yī Ɔwɔ ge̍ jiya ala̍ ma̍!”
E̍ yɛ la ɔpɔ̄pū yɛ gāa ma̍, aa̍ wa̍a̍ de lɛ cha̍cha̍. Ɔ̄chɛ ɔha̍ lipu̍ yī wā ma̍ hīka Iji̍sɔ̄ɔsi ɔ̍lɔ de anu̍ nyiya a̍nɛ ma̍, o̍ ku̍chē. O̍ yɛ ē kā Ɔwɔ ɔkɔ̄kā bāa ohwōhwō ma̍. O̍ gāa ge̍ ngma̍ ta̍gbo la ajɛ la apli̍kpo̍ yī Iji̍sɔ̄ɔsi, da ɔ̍ o̍be yī u̍ku̍rɔ̍. Ɔngrɔ̄ɔ ɔla̍ā pi̍i̍ - Olisame̍riya nɛ. Iji̍sɔ̄ɔsi hu oko̍o kpa̍ ka bɛ̍ɛ̄nɛ̄ hīka, “Je̍ka aa̍ āchɛ nīi de lɛ cha̍cha̍ u̍uma ma̍ lɛ āchɛ igwo̍? Āchɛ arāanɛ ehēhī ma̍ chī kɔ̍ɔ̄? Oji̍ - ohu̍ nīi Ɔchɔkɔcha nūma̍ lōri̍īnū re̍ka ɔ̄chɛ nīi ku̍chē wā ge̍ē da Ɔwɔ o̍be u̍ku̍rɔ̍ ma̍/?” O̍ ka de ɔngrɔ̄ɔ ɔla̍ā bɛ̍ɛ̄nɛ̄ hīka, “Nīichō nīi a ā pīya chɔ̍ɔ! Ma̍ ɔtū ode chōche yī wɔ ya̍ nīi a de lɛ cha̍cha̍ mɛ̍!”


Āchɛ yī Ifa̍rasīi ɛha̍ che Iji̍sɔ̄ɔsi ikpo̍ ka yɛ̄grāa ɔna̍ nīi Ɔchwɔ̄lɛ̍ Oro̍ōre̍ yī Ɔwɔ ɔ̍lɔ chī ge̍ē wā ma̍? Ɔkɔ nīi o̍ hīya aa̍ ma̍ hɔ̄ ma̍ a̍nɛ: “Ala̍ ma̍ ko̍ō! Ɔchwɔ̄lɛ̍ Oro̍ōre̍ yī Ɔwɔ ma̍ i̍ ge̍ē wā nīi ala̍ ē ma̍ ɔ̄ ɔmɔ̍ɔ̄ma̍ ni̍. Ɔ̄chɔ̄chɛ i̍ ge̍ē ka hīka, ‘Mɔ̍ɔkɔ nīi o̍ yɛ ma̍,’ kɛ̄ɛ ‘Ma̍ ɔ̄ anu̍’ mɛ ni̍. Wu̍chē oji̍ nɛ, Ɔchwɔ̄lɛ̍ Oro̍ōre̍ yī Ɔwɔ hɔ̄ amu ba̍la ala̍ mɛ̍.”
Iji̍sɔ̄ɔsi ka de a̍chi̍kpo̍ yī nū bɛ̍ɛ̄nɛ̄ hīka, “Yɛ̄grāa ɔha̍ hɔ̄ abɔ̍ɔ nīi ala̍ ge̍ē chikpo̍ ka ala̍ ɔ̍lɔ ge̍ē ma̍ ɔ̄chī ɔha̍ lipu̍ yī Ɔ̄chī yī Ɔwɔ̄wā yī Ɔyi̍ yī Ɔngrɔ̄ɔ, ala̍ i̍ chī ge̍ē ma̍ ɔ̄ ni̍. Āchɛ ɛha̍ ge̍ē nōnuni̍ ka hīka ala̍ ɔ̍lɔ ge̍ ma̍ ɔ̍lɔ a̍nū; ala̍ ɔ̍lɔ ge̍ ma̍ ɔ̍lɔ aa̍mā! Ala̍ e̍e gblāa abɔ̍ɔ deyīrɔ̄ɔ̄rɛ ji ni̍. Wu̍chē oji̍ nɛ, o̍ lɛ lɔkɔ nīi yakpla̍ ge̍ gbo nīi o̍ nya̍bɔ̄ hɛ̍ akpɔ̍ɔwɔ ārɛ̄ nīi ɔla̍ yī nū bū la oe̍ ɔha̍ wa̍a̍ ge̍ē chɛ̄ la oe̍ ɔha̍ ma̍. I̍ngi̍ngɔ̍ɔ nīi ɔwɔ̄wā yī Ɔyi̍ yī Ɔngrɔ̄ɔ ge̍ē lɛ la Ɔ̄chī ɔla̍ā a̍nɛ. Ɔyi̍ yī Ɔngrɔ̄ɔ chī ge̍ē mi̍chi̍ gba̍a̍. Alyɛchɛ nūma̍ ge̍ē ta̍ ɔ̄. Lɔkɔ nīi o̍ lɛ la yɛ̄grāa yī Ino̍a ma̍, i̍ngi̍ngɔ̍ɔ nīi o̍ ge̍ē lɛ la Ɔ̄chī Ɔwɔ̄wā yī Ɔyi̍ yī Ɔngrɔ̄ɔ a̍nɛ. Āchɛ ehēhī wa̍a̍ gblāa abɔ̍ɔ ē re̍ ɔjā, ē gwa̍ ɔjā; anyā ba̍la angrɔ̄ɔ gblāa abɔ̍ɔ ē wu̍ iyī wā. O̍ lɛ i̍ngɔ̍ɔ kpɛɛ ge̍ ku ɔ̄chī ɔla̍ā nīi Ino̍a gatū ga wɔwu̍ ɔnɔ̄kɔ̄kū ɔla̍ā. Yenyi Ɔhɛ̍rɛ̍ ɔla̍ā mu wā ge̍ de aa̍ āchɛ ehēhī kpo̍ ngmo̍ cha̍cha̍. O̍ ge̍ē gba̍a lɛ bāa ɔ̄chī yī Ilɔ̍ɔti ma̍. Āchɛ gblāa abɔ̍ɔ ē re̍ ɔjā, ē gwa̍ ɔjā; ibiha̍ gblāa abɔ̍ɔ ra̍ iho̍ la lihī, ē bī ɛjā ra̍; ibiha̍ gblāa abɔ̍ɔ ē nyi ɔjā la yɛrɔ̄, ē gwo̍ wɔlɛ̍ bɛ̍ɛ̍. I̍chi̍chɛ ɔha̍, Ilɔ̍ɔti wā ge̍ pīya hī ipwo̍gra yī Iso̍dɔm. Ɔla̍ ba̍la Isɔ̍fɔ ha̍ābɔ̄ bū la ichō ge̍ de āchɛ ehēhī ɛla̍ā kpo̍ ngmo̍ cha̍cha̍. I̍ngi̍ngɔ̍ɔ nīi o̍ ge̍ē lɛ la Ɔ̄chī ɔla̍ā nīi Ɔwɔ ge̍ē de Ɔyi̍ yī Ɔngrɔ̄ɔ ē hi̍yɛchɛ ma̍ a̍nɛ.
“Ɔ̄chɛ nīi hɔ̄ abɔ̍ɔ la ɔda i̍chi̍chɛ ɔla̍ā ma̍ ge̍ e̍e chɛ̄ ga u̍nu̍ ge̍ kpo̍ āɛ̄jā yī nū ɔha̍lɔha̍ ni̍. Ɔ̄chɛ nīi chī hɔ̄ abɔ̍ɔ la yɛrɔ̄ ma̍ ge̍ e̍e ku̍chē wā la wɔlɛ̍ ni̍. Je̍ka aa̍ ala̍ bla lɛlā yī ɔnyā yī Ilɔ̍ɔti! Ɔ̄chaha̍-ɔ̄chaha̍ nīi ge̍ chikpo̍ ge̍ē de ɔhɔ̄leyī yī anu̍ ɔlɔjā gbōgbō, o̍ ge̍ē ngmla̍a anu̍ ē pīyēbi̍. Ɔ̄chɛ nīi ge̍ chī de ɔhɔ̄leyī yī nū pīyabi̍, o̍ re̍ka o̍ de ɔ̍ gbōgbō. N ā koko̍o de ala̍. La otu̍ ɔla̍ā, angrɔ̄ɔ āchɛ ɛpa ge̍ē gbwɔlā abɔ̍ɔ la u̍bwɔ̍ ūkpo̍he; e̍ chī ge̍ē de ɔha̍ ē nāa pīya ē hī ɔha̍ gbo abɔ̍ɔ. Anyā āchɛ ɛpa ge̍ē bɔ̍ɔ̄ba̍ kū abɔ̍ɔ ē gbɔ̄jā lɛchɔ̄; e̍ chī ge̍ē de ɔha̍ ē nāa pīya ē hī ɔha̍ kū abɔ̍ɔ. [Angrɔ̄ɔ āchɛ ɛpa ge̍ē gblāa abɔ̍ɔ la yɛrɔ̄; e̍ chī ge̍ē de ɔha̍ ē nāa pīya ē hī ɔha̍ kū abɔ̍ɔ.]”
A̍chi̍kpo̍ yī nū che ɔ̍ ikpo̍ hīka, ɔ̍lɔ - aba̍ nɛ, Ādā?
Iji̍sɔ̄ɔsi hīyɔkɔ bɛ̍ɛ̄nɛ̄ hīka, “Ɛbɛ nīi okū ge̍ gbo mɛ̍, abɔ̍ɔ nīi upu ē grēeyī a̍nɛ.”

Слухайте Ilu̍uku 17