Text: © The Bible Society of Nigeria, 2008 Audio: ℗ 2008 Hosanna

Rubassa - 2008 Edition (NT)

Rubassa Bible © Bible Society of Nigeria, 2008

Aka na ti isene iyimɛyɛ uzawa Ifucingɛ, nɛ ɛɛ hiɛŋ, Iyimɛyɛ Tɛkashɛka gwumwonu. Nazhɛ ehiu onongbo ne embisegeni Undwa ajalakaka gana na ɛɛ zhɛ a nda maa a kwụnɛ Jisus, aba kaa a nda inyɛsɛ ya atwa.


Na aka ata ge Setan teni na amɛ Judas na shɛ bụtụ bu ko na ashashɛ eseshi-iyi umpwa-na-ba-eyebi. Bee hwuri baa njɛ ushaura ne ehiu onongbo keeni edegeri gana na shɛ maa sangana bu aŋ ne tidere. Ibɛ po aa nda unyasa, aa twa-unu maa ɛ zhɛ a pana bụ ukwuribi. Baa jalakaka ya ohwolu na maa shapa bu pana aŋ, na aka na atwa ofwugwo zasaba.


Tụ ụjita iyimɛyɛ uzawa Ifucingɛ ci, aa kwụnɛ agwụdụ Isene Tɛkashɛka. Ge Jisus tumwanɛ Pita na Jon utumwa, bɛɛ hiɛŋ aŋ, Zhaga imanganga ma Iyimɛyɛ Tɛkashɛka maa tɛ yɛ ma.
Ɛɛ hiɛŋ bụ, Ce ubu kwụlanɛ maa ta imanga iiŋ?
Bɛɛ hiɛŋ aŋ, Hioko ma, aka na ohio tono nu ụshɛpwụ ga, hi zhɛ hia twa ne butubwenyi bu ko na 'waŋnɛ ihiulwe meni. 'Wa bu ma ni ihwɛ nɛ bee teni. Hoŋtono ma agwuma-ihwɛ ɛtɛ maa, Bimbisegeni hiɛŋ, Ce umwono wa agaiŋ na Ngɛɛ zhɛ ma ya iyimɛyɛ Tɛkashɛka ne eseshi-iyi mi namɛɛ? Nazhɛ bụtụ ata zhɛ mo hi mbisono umwono wa azuba ụ'wụtụ, na iyi ya ajɛjɛ tulonowoŋ. Apata ɛhi zhɛ hia imanga iŋ.
Ee zhe, aa kwụbɛ ga gana na ti bee ge mbishi aŋ. Aa imanjɛ iyimɛyɛ ɛtɛ Tɛkashɛka.


Aka na ta aka ata ci, ge Jisus jɛjɛ na atumwa ubwa. Bɛɛ hiɛŋ aŋ, I n kwụlanɛ tebiye tebiye maa ma ya Iyimɛyɛ gɛ Tɛkashɛka ne hiŋ nazhɛ Ma nda ụbaụta. Mo hi mbiso maa, N zha shɛ ma ya iŋ ya ne hiŋ sasana uuwa i ci aka na iyi elele zhɛ ya ulwa na Cɛnjɛ-ta-tugwama ta Agwatana o.
Aka na ti ge Jisus shepi ukwopi, baa njɛ ugwoje na Agwatana, bɛɛ hiɛŋ aŋ, M ma ma, swa uŋ ma hwɛɛ hiŋ. Mo hi mbiso maa, te kwuni na aka ga, N zha shɛ ma swa ya meni mụ tụ'walụ ta afwafwa uuwa i ci aka na Cɛnjɛ-ta-tugwama ta Agwatana ti zhɛ ta zhajɛ o.
Bee shepi ibrɛd, aka na tu baa njɛ ugwoje na Agwatana, boo dwonu iŋ, bee peni aŋ, bɛɛ hiɛŋ aŋ, Inɛ gɛ shɛ tu'waba ti mi [tu na Nga ma pana iwe hiŋ, na nda ma inɛ gɛ iwɛ titeyinje ti mi. Gobwonu du bee shepi ukwopi na aba na te e hwuwi iyimɛyɛ ɛtɛ ụrụmɛ tiya, bɛɛ hiɛŋ aŋ, Ukwopi ga shɛ unu ufwo tutwa ne mehieŋ mi mi, mu na Ama 'waŋ iwe hiŋ.]
Ama hioko ma, bụtụ na zhɛ ma n shapa maa pana atwa, namba ne mi nu uteburu ga. Yɛu bụtụ zhɛ ya zhaga kaa gana na te e shiri iwɛ ubwa gom, ama bụtụ ata na ba sanga bu ne tidere zhɛ ba nda hwuŋ adangboo!
Ee kwuni tumomo hoŋtongonu iwɛ bụtụ na zhɛ ba nda ijɛ na ashashɛ aba.

Ibɛ ashamanjɛ ishijɛ na ashashɛ eseshi-iyi Jisus iwɛ bụtụ na hwuri binya tusara na ashashɛ aba.
Ibɛ po ge Jisus hiɛŋ aŋ, Shɛgwuma sha atwa na shɛ shɛ Eju shɛ mama nda shɛgwangwama sha aba, atwa na 'yajɛ ụhwada wa aba mama suyana maa atwa na a nda iyi ibiye. Ama shɛ gana ata yaa shɛ na ashashɛ hiŋ o. Ama ga bụtụ na hwuri atwa vwɛ na ashashɛ hiŋ, i shɛ maa ubwa shɛ yɛu ya atwa vwɛ, bụtụ na kaa shɛ uhiu hiŋ, ga sha maa ubwa ba ndana atwa vwɛ iyi. Gaaba hwuri binya nu ụjɛrụmaa? Bụtụ na jɛjɛ ba ya iyimɛyɛ suu okwo bụtụ na ba ndana bu iyi? Shɛ bụtụ na jɛjɛ ba ya iyimɛyɛ suu? Ama N namɛ na ashashɛ hiŋ gana-bụ tụ na ba ndana atwa iyi. Ama ahiɛba hiɛ shɛ atwa na namɛ ne mi na aka tumanga te elele tu na tu ma manga. N zhɛ mo hi shilono Cɛnjɛ-ta-tugwama gana na Bishi mi n shileni, iwɛ maa hiɛ yɛ, hi swe nu uteburu mu na Cɛnjɛ-ta-tugwama ti mi. Ahiɛba kaa hi zhɛ hia gɛgaga hwuŋ nu n-ndwụtwụ maa hiɛ jɛmɛ ụshɛrɛya wa alamụ Isrɛl umpwa-na-ba-eyebi.


Ge Jisus hiɛŋ, A-Saimon, A-Saimon! Ge Setan lụpɛ tebiye maa ma hi hikita gana na aa hikita ohiu. Ama M bu ndanɛ adua iwɛ maa kede rishe rụ bụ tɛtɛtana ri leyi o. Ama aka na ɛbi jishirijɛ hwuŋ sasana pi mi, shikicingo miaụŋ-mo-bino bu.
Ga Pita hiɛŋ bụ, Agwangwama, M mama 'imɛ kaa maa ma zhagaga na bu, okwo nu umwono-tishi, kwo kaa no tu'wo.
Agwangwama jishijɛ bụ, bɛɛ hiɛŋ, A-Pita, N zhɛ mo bu mbiso maa, bi zhɛ ba tala ashamanjɛ mi kpalụ tatụ nụ ụjita go maa bu m mepi shi nazhɛ alụma uganɛ.

Ge Jisus hiɛŋ eseshi-iyi ubwa, Aka na Ngaa hi tumwanɛ la utumwa, Ngɛɛ hiɛŋ ta 'waŋna ma arɛta ukwuribi o, tu ulapa, ta abida, i 'yajɛ suu iyi elele nɛ ihi 'nyananɛ la?
Ɛɛ jishijɛ bụ, ɛɛ hiɛŋ, Awo, i zasa iyi elele iti 'nyananɛ o.
Ge Jisus hiɛŋ aŋ, Ama hwuwayɛ go, bụtụ na 'yajɛ ya arɛta ukwuribi, okwo ulapa, ga shapa, bụtụ na kaa zasa, ga sanga utogwo ubwa maa sa utokwobi. Mo hi mbiso maa, i shɛ tilɛɛ maa gɛ iyi nɛ oo 'nywotwo iwe mi i sɛ, inɛ hiɛŋ, A rɛcɛ bụ na atwa na bweji undwa. Tisɛ iyi elele nɛ oo 'nywotwo iwe mi kaa te ci ba.
Eseshi-iyi ubwa jishijɛ bụ, ɛɛ hiɛŋ, Agwangwama, hioko, otokwobi eyebi na.
Bɛɛ jishijɛ aŋ, bɛɛ hiɛŋ, Ana ata gwumwa.


Ti ge Jisus beni nu ụshɛpwụ ata, bee zhe ni Ishɛmɛ Buta, gana na tu baa shana baa nda, eseshi-iyi ubwa 'wa bụ. Aka na ti ge Jisus ci apata, bɛɛ hiɛŋ aŋ, Na nda ma adua, maa kede hi teni na tumanga o.
Nazhɛ bee meme deshigeni i ci ụdụlụ na bụtụ eri ba kala utayɛ, nazhɛ bee kwuzhi baa njɛ adua, bɛɛ hiɛŋ, Ada, yaa shɛ yaa bu kwụlanɛ, asha shapa ukwopi ga ụbaụta no olugwo mi. Ama shɛ nu ukwulana mu o, ama ga shɛ nu ukwulana bu. Nazhɛ butumwa banɛ na azuba bee keeni bu ikɛnyi. Tu baa namɛ na amɛ-tụhaŋtụ ata a'wụtụ, bee keeni adua tɛnda tebiye. Ibɛ po ibwɛzu ibwɛ nɛ baa bwaza ya layaga na cɛnjɛ gana akpụsụlụ mehieŋ.
Aka na ti bɛɛ ishijɛ na adua ata, baa zhajɛ no ofwo eseshi-iyi ubwa, bee jiteni aŋ to o woto malabụ ma amɛ-tụhaŋtụ. Bɛɛ hiɛŋ aŋ, Iwembe po ohio woto malabụụ? Ishijɛ ma hiɛ njɛ adua, iwɛ maa kede hi teni na tumanga o.


Ti ge Jisus ta duma iwɛ etɛ, baa kwụbɛ ta atwa ofwugwo zhagajɛ na bụtụ ata ɛɛ hiɛŋ go Judas, na shɛ bụtụ bu ko na ashashɛ eseshi-iyi ubwa umpwa-na-ba-eyebi, bee hwure umbe na aba. Boo gwumwonu ne Jisus maa ruwanɛ bụ.
Ama ge Jisus heŋteni bu, bɛɛ hiɛŋ, A-Judas, na turuwanɛ suu ɛbi zhɛ ba sanga Yɛu Bụtụ ne tidere?
Aka na ta atwa na rungwutwonu Jisus kwụbɛ iyi nɛ ye ci, ɛɛ hiɛŋ, Agwangwama, ta pa aŋ suu utokwobi? Ibɛ po bụtụ aba bu ko po yɛu-ugondu Bunongbo bụ 'wụtụ utokwobi, bee vweri ụcɛbɛ ubwa u'ala ubiye.
Ama ge Jisus jishijɛ aŋ, bɛɛ hiɛŋ, Inɛ ɛtɛ gwumwa ya! Nazhɛ bee timengeni ụcɛbɛ ata ubwa, baa nɛnjɛ uuŋ.
Ge Jisus hiɛŋ ehiu onongbo, ne ehiu edegeri Umwono wa Agwatana keeni n-nyarɛ a na bananjɛ maa a 'imɛ bụ, Hi bananjɛ no otokwobi, ne shekwute maa hi n 'imɛ gana bɛshɛrɛ suu? Aka na Ama nama la ne hiŋ nu Umwono wa Agwatana iyi-heri iyi-heri, hi n timengeni shi o. Ama aka hiŋ na ya keeni ụhwada tishi.


Nazhɛ aa 'imɛ Jisus, ee zeriji bu ni ihwɛ Bunongbo bụ 'wụtụ. Ama ga Pita 'wa bu ne ekwunyi na hanga na dụlụmɛ nu bwa. Aka na ta a shanɛ ulwa na ashashɛ umwamwa ata, aa gɛgajɛ hwɛɛ aba, ga Pita jɛjɛ du na ashashɛ aba. Ibɛ po yɛu towo ugondu ike kwụbɛ Pita tu baa jɛjɛ nu uhioko-hwaŋna ulwa ata, baa ngbaracɛ bu zenjizenji, bɛɛ hiɛŋ, Bụtụ ga namɛ du nu bwa.
Ama ga Pita teri ashamanjɛ, bɛɛ hiɛŋ, E-biyikwo ga, m mepi shi bu o.
Ti yaa namɛ fwalaa, binya bụtụ kwụbɛ bụ, bɛɛ hiɛŋ bụ, Bɛ shɛ du bụtụ bu ko na ashashɛ aba.
Ama ga Pita hiɛŋ bụ, A-bụtụ ga, shɛ Gamba o.
Ti yaa namananɛ aka fwalaa, binya bụtụ jɛmɛ ya ta 'yajɛ ikɛnyi, bɛɛ hiɛŋ, Iwɛ-tɛkana, bụtụ ga namɛ du ne Jisus, iwɛnɛ po bụtụ bu Galili baa shɛ gom.
Ama ga Pita jishijɛ bụ, bɛɛ hiɛŋ, A-bụtụ ga, M mepi shi iwɛ gɛ aba duma o!
Gunu ata tu baa ta duma iwɛ ɛtɛ, alụma uganɛ. Nazhɛ Agwangwama mbiyanɛ Pita, baa ngbaracɛ bụ. Nazhɛ ga Pita teyinje iwɛ ɛtɛ Agwangwama mbishi bu la, bɛɛ hiɛŋ, Bi zhɛ ba tala ashamanjɛ kpalụ tatụ nụ ụjita go maa bu m mepi shi o, nazhɛ alụma uganɛ. Ga Pita beni no tupohondo, bee tileni nu u'wo gboo.


Atwa na untanganɛ Jisus a nda bu asada, oo dubo bu. Ee uteji bu eshe, ɛɛ hiɛŋ, Utu dumanganɛ tigesere, gaaba ubu po iyii? Aa jɛmɛ tugbozhigo tu bwa tu ofwugwo ti nya.


Nazhɛ n-nyarɛ ma atwa ata, te ehiu onongbo, te embisegeni Undwa ụlwatagwụ, ee zeriji Jisus no ofwo ajɛmɛ-ụshɛrɛya, gunu ga ti iyi kwuni tusuje, ɛɛ hiɛŋ Jisus, Yaa shɛ gabụ bɛ shɛ ga Krast, iti mbishi.
Ama ge Jisus jishijɛ aŋ, bɛɛ hiɛŋ, Okwo Ngee hi mbishi hwayɛ, hi zha shɛ hia tɛtana-rishe o. Ngee hi heŋteni hwayɛ kaa iheŋtene ike, hi zha shɛ hi mɛ n tɛrɛ, hi zha shɛ kaa hi ma n ganga. Ama te kwuni na aka ga, Yɛu Bụtụ zhɛ ya gɛga nu u'ala ubiye ukpahiŋ wa Agwatana.
Nazhɛ kpaaŋ aba heŋteni bu, ɛɛ hiɛŋ, Asha gabụ suu bwonu bɛ shɛ ya Yɛu ya Agwatana?
Bɛɛ jishijɛ aŋ, bɛɛ hiɛŋ, hi teni cɛŋ, tɛ hi hiɛŋ Gamba n shɛ bụ.
Nazhɛ ɛɛ hiɛŋ, Ukekeshi eseyida to tu to waa hŋ hwuwayɛ go? Tu hwugwa kaa ni ikɛnyi tu tu baa dumwa nu unu ubwa ni ikɛnyi ibwɛ.

Слухайте LUK 22