 If you would like a copy of this version please contact info@davaraudiobibles.org

Adamawa Fulfulde Bible

Fulfulde Bible Ajamiya © Bible Society of Cameroon, 2016.

وٛودِنٛ غٛطّٛ ندٜرْ ڢَرِسَعٜنْ، عِنْدٜ مَاکٛ نِکٛدٜمُسْ، عٛ غٛوتٛ ندٜرْ عَرْدِيࢡٜ يَحُودُعٜنْ؞ عٛوَرِ حَا عِيسَى بٜى جٜمَّ، عٛوِعِمٛ‏: «مٛودِبّٛ، مِنْ عَنْدِ عَ عٜکِّتِنٛووٛ مٛ اَللَّه نٜلِ طُمْ، نغَمْ وَلَا کٛو غٛوتٛ وَاوَتَ وَطُغٛ کَايٜىٰڢِيجِ بَنَ طِ عَوَطَتَ، سٛنَا تٛ اَللَّه طٛنْ وٛنْدِ بٜى مَاکٛ؞» عِيسَى جَابِمٛ‏: «غٛونغَ مِوِعَتَ مَ‏: تٛ نٜطّٛ دَࢩَاکَ طِطَوْرٜ، عٛوَاوَتَا يِعُغٛ لَامُ اَللَّه؞» نِکٛدٜمُسْ ࢨَمِمٛ‏: «تٛ نٜطّٛ ندٛتِّدِ، نٛيْ عٛحٜࢡْرَتَ دَࢩٜىٰغٛ ڢَحِنْ؟ عٛوَاوَنْ نَسْتُغٛ رٜىٰدُ دَادَ مَاکٛ، عٛدَࢩٜ ڢَحِنْ نَ؟» عِيسَى جَابِمٛ‏: «غٛونغَ مِوِعَتَ مَ‏: تٛ نٜطّٛ دَࢩَاکَ ڢَحِنْ بٜى ندِيَمْ عٜ بٜى رُوحُ، ندٜنْ کَمْ عٛوَاوَتَا نَسْتُغٛ لَامُ اَللَّه؞ کٛ دَࢩَ عٜ يِمْࢡٜ، طُمْ ࢡَنْدُ تَنْ؞ کٛ دَࢩَ عٜ رُوحُ، طُمْ رُوحُ؞ تَا حَيْطِنْ نغَمْ مِوِعِ مَ‏: حَانِ عٛنْ ندَࢩٜ طِطَوْرٜ؞ حٜنْدُ طٛنْ وِڢَ حَا ندُ مُويِ ڢُو، عَطٛنْ نَنَ سٛࢩٛ مَارُ، عَمَّا عَحٜࢡْتَتَا تٛيْ ندُ عِوِ مَلَّ تٛيْ ندُ يَحَتَ؞ بَنَ نٛنْ طُمْ لَاتَنْتٛ دَࢩَاطٛ دِغَ رُوحُ؞» نِکٛدٜمُسْ ࢨَمِمٛ‏: «نٛيْ طُمْ وَارٛتٛ؟» عِيسَى جَابِمٛ‏: «عَنْ عَ مٛودِبّٛ إِسْرَاءِيلَعٜنْ، عَعَنْدَا طُمْ نَ؟ غٛونغَ مِوِعَتَ مَ‏: مِنِنْ مِنْ طٛنْ مبٛلْوَ کٛ مِنْ عَنْدِ، مِنْ طٛنْ شٜىٰدٛ کٛ مِنْ نغِعِ بٜى غِتٜ عَمِنْ، عَمَّا بٜى نٛنْ ڢُو عٛنْ نجَࢡَتَا سٜىٰدَمْکُ عَمِنْ؞ تٛ عٛنْ نُطِّنَايْ يَمْ ندٜ مِوٛلْوَنِ عٛنْ حَالَ کُوجٜ دُنِيَارُ، نٛيْ عٛنْ نُطِّنِرْتَ تٛ مِوٛلْوَنَنْ عٛنْ حَالَ کُوجٜ عَسَمَ؟ وَلَا مٛ مٜىٰطِ يَحُغٛ حَا عَسَمَ، سٛنَا مٛ عِوِ حَا عَسَمَ، وَاتٛ ࢡِي-نٜطّٛ ؞
«بَنَ نٛ مُوسَى ࢡِلِرِ مبٛودِ نجَمْندِ مبٛطٜىٰرِ دٛوْ لٜغَّلْ ندٜرْ لَدّٜ، بَنَ نٛنْ بٛو سٜيْ ࢡِي-نٜطّٛ ࢡِلٜ، نغَمْ حَا کٛو مٛيْ نُطِّنِمٛ حٜࢡَ نغٜىٰندَمْ ندُومِيطَمْ؞ اَللَّه يِطِ دُنِيَارُ مَسِنْ؞ نغَمْ مَاجُمْ عٛحٛکِّ ࢡِطّٛ مَاکٛ بَجّٛ؞ کٛو مٛيْ نُطِّنِ ࢡِطّٛ عٛو، حَلْکَتَا، عَمَّا عٛحٜࢡَنْ نغٜىٰندَمْ ندُومِيطَمْ؞ اَللَّه نٜلَايْ ࢡِطّٛ مُمْ ندٜرْ دُنِيَارُ نغَمْ حِيتَاغٛ ندُ، عَمَّا نغَمْ حَا دُنِيَارُ حٜࢡْرَ کِسْندَمْ بٜى مَاکٛ؞
«کٛو مٛيْ نُطِّنِ ࢡِطّٛ عٛو، عٛحِيتَتَاکٜ؞ عَمَّا مٛ نُطِّنَايْ مٛ، عٛحِيتَامَ، نغَمْ عٛنُطِّنَايْ ࢡِطّٛ اَللَّه بَجّٛ؞ ندَا نٛ کِيتَ مَنْ وَعِ‏: أَلنّٛورَ وَرِ ندٜرْ دُنِيَارُ، عَمَّا يِمْࢡٜ دُنِيَارُ ࢡُرِ يِطُغٛ ࢩِࢡْرٜ دٛوْ أَلنّٛورَ، نغَمْ کُوطٜ مَࢡّٜ طٜ کَلُّطٜ؞ نغَمْ کٛو مٛيْ تٛ طٛنْ وَطَ حَلّٜىٰندٜ، طٛنْ وَࢩَ أَلنّٛورَ، عٛوَرَتَا حَا أَلنّٛورَ، نغَمْ عٛحُلَنْ تَا کُوطٜ مَاکٛ کَلُّطٜ مبَنغَ؞ عَمَّا مٛ طٛنْ وَطَ غٛونغَ، وَرَنْ حَا أَلنّٛورَ، نغَمْ حَا طُمْ وَنغَ نٛ عٛطٛوْتَنِ اَللَّه بٜى کُوطٜ مَاکٛ، کُوطٜ مَاکٛ کُووَامَ بٜى يٜرْدُيٜ اَللَّه؞»

ࢡَاوٛ مَنْ عِيسَى يَحْدِ بٜى ݠُکَرَعٜنْ مُوطُمْ حَا لٜسْدِ يَحُدِيَ؞ عٛڢَࢡِّدِ بٜى مَࢡّٜ تٛنْ سٜطَّ، عٛوَطَنِ يِمْࢡٜ بَݠْتِسْمَ؞ يُحَنَّ بٛو وَطَنِ يِمْࢡٜ بَݠْتِسْمَ حَا عَيْنٛنْ، ࢡَدِيطُمْ بٜى سَلِمْ، نغَمْ ندِيَمْ طُوطَّمْ طٛنْ تٛنْ؞ يِمْࢡٜ طٛنْ نجَحَ حَا مَاکٛ نغَمْ وَطَنٜىٰغٛ بَݠْتِسْمَ؞ سَاعِ مَنْ ࢡٜنَسْتِنَايْنٛ يُحَنَّ حَا ڢُرْسِنَ تَوٛنْ؞
تٛنْ، نغَابَ عُمِّ حَکُّندٜ ݠُکَرَعٜنْ يُحَنَّ عٜ يَحُودُوجٛ دٛوْ حَالَ لَࢡِّنٜىٰکِ؞ ࢡٜنجٜحِ حَا يُحَنَّ، ࢡٜمبِعِمٛ‏: «مٛودِبّٛ، مٛ وٛنْدُنٛ بٜى مَاطَ غَطَ مَايٛ عُرْدُنْ، مٛ عَسٜىٰدِنٛ طُمْ، ندَا عٛطٛنْ وَطَنَ يِمْࢡٜ بَݠْتِسْمَ، يِمْࢡٜ ڢُو طٛنْ نجَحَ حَا مَاکٛ؞» يُحَنَّ جَابِ ࢡٜ‏: «وَلَا مٛ حٜࢡَتَ کٛو طُمٜ سٛنَا تٛ اَللَّه حٛکِّمٛ طُمْ؞ عٛنٛنْ بٜى کٛعٜ مٛنْ عٛنْ مبَاوَنْ سٜىٰدَاغٛ نٛ مِ بِعْطٛ‏: نَا مِنْ وٛنِ اَلْمَسِيحُ، عَمَّا مِنٜلَامَ نغَمْ مِعَارْتَ مٛ؞ ࢡَنغْطٛ، کَنغْکٛ وٛنِ مَرْطٛ دٜبّٛ مَنْ؞ عَمَّا سٛوبَاجٛ ࢡَنغْطٛ دَرِيطٛ کٛمْبِ مَاکٛ، نَنَنْطٛ سَوْتُ ࢡَنغْطٛ، سٜيٛرْتٛ نَنُغٛ سَوْتُ ࢡَنغْطٛ مَسِنْ؞ بَنَ نٛنْ سٜيٛ عَمْ بٛو، نغٛ حٜىٰوِ جٛنْتَ؞ سٜيْ مَنغُ مَاکٛ ࢡٜسْدٛ، نغُ عَمْ بٛو عُسْتٛ؞»

عِوْطٛ دِغَ دٛوْ طٛنْ دٛوْ کٛو طُمٜ ڢُو؞ عِوْطٛ حَا دُنِيَارُ بٛو عٛ غٛطّٛ دُنِيَارُ، عٛطٛنْ وٛلْوَ حَالَ دُنِيَارُ بٛو؞ عِوْطٛ دِغَ عَسَمَ طٛنْ دٛوْ کٛو طُمٜ ڢُو؞ عٛطٛنْ سٜىٰدٛ کٛ عٛيِعِ عٜ کٛ عٛنَنِ، عَمَّا وَلَا جَࢡَنْطٛ سٜىٰدَمْکُ مَاکٛ؞ مٛ جَࢡِ سٜىٰدَمْکُ مَاکٛ، غٛونغْطِنِ اَللَّه عٛ غٛونغَاجٛ؞ نغَمْ مٛ اَللَّه نٜلِ طٛنْ وٛلْوَ حَالَ اَللَّه، نغَمْ اَللَّه طٛنْ حٜبِّنَ مٛ بٜى رُوحُ مُوطُمْ بِلَا کٜىٰرٛلْ؞ بَابِرَاوٛ يِطِ ࢡِطّٛ ، حٛکِّمٛ بَاوْطٜ دٛوْ کٛو طُمٜ ڢُو؞ مٛ نُطِّنِ ࢡِطّٛ، حٜࢡِ نغٜىٰندَمْ ندُومِيطَمْ؞ مٛ نُطِّنَايْ ࢡِطّٛ حٜࢡَتَا نغٜىٰندَمْ، عَمَّا تِکّٜرٜ اَللَّه طٛنْ تَبِتِ دٛوْ مَاکٛ؞

Слухайте يُحَنَّ 3