Tsutɨarika 43
43
Kutse 'iwamama kememɨte'u'axɨa hutarieka 'Ekipitu
1Naitsarie Kanani kwieyaritsie matsi waɨkawa mepɨyehaakakwitɨwekai. 2Merikɨte kepauka tɨriku memuxɨ, memeikuxɨawiekai 'Ekipitu, mɨpaɨ katiniwarutahɨawe wapaapa:
—Xekenehuta hutarieka tawarita xekenexɨawiyu tɨriku temeixeiyanikɨ ta'ikwai.
3Matsi Kura mɨpaɨ katinitahɨawe:
—'Iya tewi heitseriemekɨ mɨpaɨ pɨtaretahɨawixɨ kename tawariri tekaheuhunikekai, ta'iwa xeikɨa Wenikamini te'awitɨtɨ teyɨwawekai. 4Xɨka 'ekɨ pe'itaunieka tamuta, tekatenixɨawiyuni. 5Ya pɨtikatixaɨ, titayari teteheuhuni. Mɨkɨ tewi heitserie mɨpaɨ painekai kename tekahauhunikekai, tamuta xɨka tekahawitɨkɨni.
6'Ixaheri mɨpaɨ katiniwarutahɨawe:
—¿Titayari mɨpaɨ xeteheitahɨawixɨ mɨkɨ tewi, kename yu'iwa xeime xehexeiya? 'Uximatɨarika waɨkawa xepɨnetsiwiwirie.
7Mɨkɨ mɨpaɨ mepɨte'ita'ei:
—Mɨkɨ tewi pɨtatsiheku'iwawiyakai waɨkawa tahepaɨtsita: “¿Xepaapa 'akuxi reyeika? ¿Xemuta 'akuxi, xewitɨ reyeika?” 'Utaitɨ, ta'iwama tatɨɨriyama wahepaɨtsita. Tame tepɨkaheyɨwawekai yɨkɨ temetiyuanikekai. Ta'iwa tatsihetawawirienike tepɨkahe'eriekai.
8Yuhetsiemieme Kura yupaapa 'Ixaheri mɨpaɨ katiniutahɨawe:
—Wenikamini keheyani tahamatɨa. Keneneuhɨritɨa, kwitɨwa tekaniyehuni temɨwikwekakɨ tame meta taniwema. 9Ne hetsiena mieme nekaninehɨritɨamɨkɨ. Xɨka nekamatsi'atɨirieni 'ena, ne hetsiena mieme nerapitɨ nekanayeimɨkɨ neheyemekɨ. 10Xɨka niuki tekaxɨatɨakake waɨkawa, 'ari hutakɨa tepakunuaxɨanike.
11Hikɨ 'Ixaheri wapaapa mɨpaɨ katiniwarutahɨawe:
—Kamɨtsɨ mɨpaɨ xeketeneuyuri, yu'iwa xekenanuwitɨki. Takwiepa mɨtixuawe 'aixɨa mɨti'anene xeketeneuka'ikata yukuxitariteta. Xeketenanutɨkiri 'iya tewi, xekenemikwa waritsamu 'etsiwa, xiete, witsimu'ɨa, mixaxi, pitsitatsi, 'erimenitɨra nuetsi hepaɨ mɨ'anene. 12Tawarita pɨrata hepaɨna paɨmeme xekenanu'ɨiri. Mɨkɨ xepeiyetuirieni mamayatsie yukuxitariteta xemeitaxei, tietɨtsɨ mɨpaɨ kara'eriwatɨ muwa mɨneikamanaxɨ. 13Yumuta xekenanuwitɨki mɨkɨ tewi hetsɨa. 14Kakaɨyari Naimekɨmɨtɨrɨkaɨye mɨkɨ tewi 'aixɨa mɨtixexeiyanikɨ ke'upitɨani, Wenikamini xeime meta 'iwaya, meke'akunuaxɨani xehamatɨa. Xɨkari ne neniwema newareuyehɨamɨkɨ, ¿ketsɨari ne'uyɨni? Tsepari.
15'Ixaheri niwemama mekatenetɨni 'imikierite, tawarita pɨrata hepaɨna paɨmeme, Wenikamini me'awitɨtɨ, meyumexɨitɨatɨ mekanekɨne 'Ekipitu. Me'uta'axɨaka Kutse hɨxie mekaniti'uni. 16Kepauka Kutse Wenikamini muxei yunaime wahamatɨa, yuparewiwame mɨpaɨ katiniutahɨawe: «Keniwaranuwitɨki 'ikɨ teɨteri nekie, kenemi'a tuuru muwaiya 'ikwai kenekawewi, tuka nehamatɨa mekatenekwaikuni».
17Ti'uximayatame katinaye'atɨani kemɨtiu'aitɨarie. Kaniwarewitɨni Kutse kie. 18Mɨkɨ metehetimaika Kutse kie memewitɨkiekaikɨ waɨkawa mekanimamakaitɨni. Mɨpaɨ mepɨte'u'eri: «'Ikɨ tewi pɨtatsi'atɨa yukie tapɨrata mɨkahe'ɨikɨ matɨari mieme. 'Ikɨ xɨari pɨtatsikwini 'uximayatsikakɨ waɨriyarika tati'aitɨatɨ meta tapuxurima».
19'Ayumieme kiita meheutahaxɨanike 'ahurawa mekaniukɨne, Kutse kie ti'uximayatame mɨpaɨ mekateniutahɨawe:
20—Neuxei ti'aitame, 'ekɨ pekatinimaika xeimiemeri tepeɨkɨkɨnixɨa, tɨriku tepekunanai. 21Kepauka mana temeta'axɨa hakewa temekuhenikekai tɨkarikɨ, hikɨ takuxitarite temanukɨxɨnaxɨa. Muwa kanatimanekaitɨni pɨrata, kepaɨmemekɨ temɨteyutuakai. Hikɨ tekane'ɨka mɨkɨ pɨrata. 22Hipameta pɨrata tekana'ɨka, tawarita tɨriku teminanenikɨ. 'Atsitepɨkatemate kemɨ'ane muwa meikamanaxɨ.
23Ti'uximayatame mɨhɨritɨarie mɨpaɨ katiniwarutahɨawe:
—Xepɨkayu'iyaritɨaka, ne nekanenɨ'ɨni mɨkɨ pɨrata kɨmana xemɨte'uyutua. Xekakaɨyari xepaapa kakaɨyarieya muwa xɨari peikamanaxɨa mɨkɨ 'imikieri.
Ti'uximayatame Tsimehuni kaniwa'atɨirieni, 24'ana kaniwarewitɨni memeutahaxɨanikɨ Kutse kiita. Haa meta kaniwaruhanitɨani yuketate memɨtihauxinikɨ, wapuxurimata katiniwarutimini. 25Mɨkɨri mepɨtemaikai Kutse wahamatɨa mɨtikwanikekaikɨ tuka. Mekateniukuha'aritɨani 'imikieri kepauka munuanikekai.
26Kepauka Kutse munua yukie, mɨkɨ mekaniukahɨxima'uni hɨxiena. Mekaniyetuirieni 'imikieri memeiyetɨkiriekai meta mekanitawaɨritɨani. 27Kutse kaniwaruta'iwawiya kememɨteheu'eriekai. Mɨpaɨta katiniwaruta'iwawiya:
—¿'Aixɨa reu'eriekai xepaapa, mɨkɨ 'ukiratsi xemɨnetsihaxaxatɨwakai? ¿Rayeyuri 'akuxi?
28Mɨkɨ mekatenita'eiya:
—Mɨkɨtsɨ tapaapa payeyuri, 'aixɨa katineu'erieka.
'Ana hutarieka hɨxiena mekaniukahɨxima'uni. 29Kutse waranuxeiyatɨyaka, kepauka Wenikamini yu'iwa muxei paapaya warutsieya hetsiemieme, mɨpaɨ katiniwaruta'iwawiya:
—¿'Ikɨ tihɨkɨ xe'iwa 'etsimɨyumate xemɨnetsihaxaxatɨwakai? Kakaɨyari kematsi'ɨwiyani neniwe —katinitahɨawe.
30Kutse kaneyukaheiwerietɨyani yumuta xeiyatɨ 'inaki'erietɨ. Yapauka kanewayeyani, mɨwayehuputsie heutahaka, kaniutatsuani. 31'Uyunɨtɨaka 'anaka'ɨtaimaka, kaniwayeyani. Mɨpaɨ kaniutayɨni: «'Ikwai xekenakatuaxɨa».
32Kutse 'ikwaiya yuxaɨtame kanamaniyarieni, 'ekipitutari wa'ikwai yuxaɨtameta. Hepɨrayutsixi meta Kutse 'iwamama wa'ikwai yuxaɨta mepamaniyariexɨa, 'ekipitutari wahepaɨtsita 'axapɨ'anekai hipame wahamatɨa xɨka mete'ukwani. 33Kutse 'iwamama hɨxiena mekanayaxe, kememɨte'ununuiwaxɨ, kwimeniyuxexeiyakaitɨni mehɨxiyatɨ. 34Kepauka 'ikwai Kutse mamaniyarie mexayatsie, Wenikamini kanamaniyarieni 'auxɨwime xakɨyari Kutse mexayatsie miemetɨme, 'iwamamata xeixakɨyari xeikɨa mekanamaniyariexɨani yuxexuitɨ. Kaxie winuyari mekananu'ieni Kutse hamatɨa.
Seçili Olanlar:
Tsutɨarika 43: hch
Vurgu
Paylaş
Kopyala
Önemli anlarınızın tüm cihazlarınıza kaydedilmesini mi istiyorsunuz? Kayıt olun ya da giriş yapın
© 2020, Wycliffe Bible Translators, Inc.