Matiyew 4
4
Setene a pafa wuiya ka Yezu
(Mk 1.12-13; Lk 4.1-13)
1Arka na Mesəfrey Kokwoɗ ana ma dahəɗa Yezu a palah, ma aza Setene ka pafa wuiya. 2A dəba ma me key sumaya ŋga dəvaɗ kokurow faɗ, rəpas kokurow faɗ na, may ma tsafa. 3Arka ndaw me pey wuiya ma gurafa, ma ləvar: «Haɗaw kah Bəzey ma Bay ma Bəla na, ləvatar a ŋgwa na ɗey hay ka təram peŋ aha kwa.» 4Ama ŋga ma mbəɗafara: «Ma winda ha da Mewindey Kokwoɗ ana hay na: ndaw a ndzey na ta tek me zəmey dada kakay, amana ta guma ma bawa da huɗa mey ma Bay ma Bəla ana hay tabiyaha na.» 5Arka Setene ana hana ma dada a Zeruzalem, wuraw kokuwoɗ ana, ma pada ka 'ar ma 'Ay me key Kuley. 6Arka ma ləvar: «Haɗaw kah Bəzey ma Bay ma Bəla na, kəley a gwadaw, hərway ma winda ha na:
‹a da vəlatar slam har a madurlam aŋga hay kavəday ɗek,
ka ndawəmaka a har ata,
ma aza kah ka da tsey metsembeɗ ta ŋgwa hay zlay.›»
7Yezu ma ləvar: «Ma winda ha da Mewindey Kokwoɗ ana hay tiyatsa na: Ka da həlafa suwet ka Bay’ərlam, Bay ɗek zlay.» 8Arka Setene ma zəga satsa ka 'ar ma mamba sololo ha, ma ɓafara har ka slala ma bəla hay tabiyaha ta maram a ta adzay, 9ma ləvar: «Tek a neney hay tabiya ha na, i da vəladaka, haɗaw ha gərdey ba, ha naya dəba ba na» 10Arka Yezu ma ləvar: «Daw ba Sataŋ eɗey! Hərway ma winda ha na: Ka da nar dəba na a Bay’ərlam, Bay ɗek, ka da kar kuley na a ŋga asləta.» 11Arka Setene a hana na ma mbəkada Yezu. Madurlam hay ma səmawa ka tsakay ŋga, ma vəlamar tek me zəmey.
Yezu ma zlar a mber aŋga da Galiley
(Mk 1.14-15; Lk 4.14-15)
12Andza Yezu ma tsənada Zaŋ ŋga da daŋgay na, ŋga ma daw təŋga a Galiley. 13Ŋga me lətsey ba da Nazaret, ma daw mendzey təŋga da Kafarnawom, wuraw na ka mey ma bəlay ma Galiley, da dala ma Zabuloŋ ta Nefətali. 14Ma ka ndesley andza ma ndaw sek Ezayi ma tsərawa na:
15«Ŋgwa ma Zabuloŋ ta Nefətali,
buwal ma tsakay ma bəlay, dala ma diya ma Zurdeŋ,
Galiley mezlezleŋ tsəveɗ ma ndaw bəra na hay!
16Səkway na ma ndza ha da ləvaŋ ana,
ka nəkadərawa waw me nəkey dey ɗuhwa ha ba.
Ma ndaw ma ndza hiya da dala ma ləvaŋ ma memətsey ana hay na, waw me nəkey dey ka sləlawa ba.»
17A zəgawa zla da na ŋga na na, Yezu ma zlar me tələkey mey waya: «Mbəɗadama mendzey kwar ba, Slala ma 'ərlam ka gura ba»
Yezu a zəley gawla ŋga faɗ ana tsəfəmey ana hay
(Mk 1.16-20; Lk 5.1-11)
18Andza Yezu a daway aha ka mey ma bəlay ma Galiley na, ma nəkadata ndaw hay tsew ta malam aŋga, Simoŋ na ma zəlamar Piyer ana, ta malam aŋga Andrey, a kəlam aha zəva ta hay a bəlay: taya ndaw me həley kəlef hay. 19Yezu ma ləvatar: «Səmawa səpəmaya bəzay, i da təradakwar ndaw me həley ndaw hay ahiya.» 20Arka tsana ma mbəkadama zəva ta hay ŋguɗek, taya ma səpamar bəzay. 21Me gurey ka mey satsa na, ma nəkadata ndaw hay tsew ta malam aŋga: Zak bəzey ma Zebedey ta malam aŋga Zaŋ, taya da kombiwal andza baba ta Zebedey, a ləmam aha zəva ta. Ŋga ma zəlata. 22Taya na ŋguɗek ma mbəkadama kombiwal ata ta baba ta adzay tsana, ma səpamar bəzay.
Yezu a ta ndaw ma kusa ahiya
(Mk 1.39; Lk 4.44; 6.17-18)
23Arka Yezu ma hala dala ma Galiley tabiyaha, a tatəkadata ndaw hay da 'ay me ɗuley mey ta hay, a tələkada mey ta Mey Hayna Wayna ma Slala ma 'ərlam, a ndaladata ndaw dzedzey ana hay tabiya ha, ta ndaw ma təra na hay, da walaŋ ma səkway. 24Tek aŋga na hay me key na me pey mey, me husey a dala ma Siri tabiyaha. Ma sadəmərawa ndaw ma kam tsetseh ana hay, ma ndalamam ta dzedzey gle gle ma sadata banay: ndaw ta fakalaw da 'ar ana hay, ndaw bəzey kiya ma katar ana hay, ta ndaw ma mbara vaw ana hay, arka ŋga ma ndaladata. 25Ndaw ana ma kusa na hay tabiyaha a səpamar bəzay deɓ deɓ. Ndaw ana hay na, a səmawa na da Galiley, da Dekapol, da Zeruzalem, da Zudey ta ndaw ma diya ma wayaŋ ma Zurdeŋ hay.
Seçili Olanlar:
Matiyew 4: MOF
Vurgu
Paylaş
Kopyala
Önemli anlarınızın tüm cihazlarınıza kaydedilmesini mi istiyorsunuz? Kayıt olun ya da giriş yapın
Le Nouveau Testament en langue Mofu © 2007 Alliance Biblique du Cameroun
