Geenesis 4
4
Caiin, tarajanu Abelnio
1Pa supuetana Adaanri neco Eva canuquiaari. Neconiyojuaari manajeree. Evaari na jiyapueranu raquiaari. Na jiyaniquiriiri Caiin. Evaari sequequiaari: “Cayaniyojua rareenijia. Pueyasoori cua niquitioreenoj.” 2Na nuhuaji raquiaari neyanu Abelri, Caiin tarajanutuhuaj. Mashiquiori nojori quishacari, Abelri borreecohua seeto quijia. Tarajanu Caiin saniniuujia, nojuajaari miasanoocuaji cuhuarajojua quijia.
3Na nuhuaji tamacari, Caiinri na nataacuacajinijinio jiyataquiaari, Pueyasora na catijiasocoriquiano. 4Abel naajaajuhuaj, nojuajaari na jiyapuerapue na seyajinijinio quiooquiaari. Borreecohua maniniu quiquiaariiri cuno na seya, Pueyasora na catijiasocoriquianoni. Naa Abel miiniuucuatej, Pueyasoori na timitiaree, nera na catijiasocoriquiano seya timitiareejaariuhuaj. 5Maja cutaraari na timitianu quirii Caiin, nera na catijiasocoriquiano na nataacuacanio. Caiinri naacua juaarii jiyanohuatej. Najiquia niquiriquiaari. 6Pueyasoori Caiin sequeree:
—¿Casaa quia juaatiaani? Quiaari najiquia niquiya. 7Quiaa jaara maninia miijia quiri, quiaa maara juhuajaniya shuquiriaatia niquinijiorej. Saninuujia, maninia miijia quia quiyaquiniuucuani, quiaari cocuaatia miya. Nio quia niishiri. Sesa miiniuuri quia shanacuya sesa na miitiniuria quiajaniya. Quiaa jaara cuno niishiri, quiaa maara na nujuatare quia shocotanura nojuaja.
8Tamonu juuca, Caiinri tarajanu Abel masuuquiaari nata na rucuanejonura. Tari nojori quishacari tamama nojori tiajiniji, Caiinri tarajanu Abel quiaree, na moreeri. 9Na nuhuaji Pueyasoori Caiin nequesotaree:
—¿Teetej quia tarajanu Abelni?
Caiinri Pueyaso riucuaree:
—Johuaj, maja cua niishiniu. ¿Cua tarajanuteeri naatujua cua cojuasocoriquianoniqui?
10Pueyasoori Caiin sequeree:
—¡Juhuej, casaa quia miirii puereetacuaani sej! Quia tarajanu quia mosaquijini, quia shootesano na nanacaari jiyocuaji taraatia mareteya, nocua cua naminiuria saniniuujia. 11Quiarijianij, janiyajanaari quia sesacaani. Naacuatej, janiyari quia tarajanu nanaca ratuno jiyajiniji quia taanuyani; teyano quia moreecuajani. 12Quiarijia cutara, majaari quia nataacuaca moritianu quiniutianiya quiara juhua coteenujua. Quiaari tiquiyocua rucuanejoriquiano pueyaracaanu juhua tashucuano. Majaari tojetaarucuajanaa quenaaja samaatenuniyojua quia naata quiniutianiya.
13Caiinri naa Pueyaso riucuaree:
—Maja cua naata rejeretanu naa puera quia saniitionu janiyatej. 14Quiaari quiarijia nio jiyajiniji cua taanuuree. Naa tiquiyocua tucuacaanu nio jiyajiniji rucuanejoreeraquij, taa quia sequeree janiyacuajani; tucuacaanu quiajaniyajinijijiuhuaj, samaraatia cua rucuanejosacari pueyaracaanu. Naacuatej, cante cua riuriataani, cunoori cua moriquiano.
15Pueyasoori Caiin riucuaree:
—Teyano pueyanoteja quia moyani, cuno pueyanoori socua jiyanohua saniitiosaariquiano.
Jiyacaritij, Pueyasoori Caiincua naajioquiaari na riuriatanaa moyaquiiniuria nojuaja. 16Caiinri Pueyasota na pocoojosaquiji quiaquee. Nod jiyanishano jiyajinia quishiiri. Cunoori Edeen cuhuariquiajiniji pananu muetasamajiria.
Eva pacutesacari socua muetanu
25Adaanri necocua pacutequiaariuhua canunu. Evaari caya raquiaari. Na jiyaniquiriiri Set. Evaari sequeree:
—Pueyaso cua pacuteterohua cayaniyojuani, quiyanu Abel niti, tarajanu Caiin mosanotej.
26Na nuhuaji Setri camiquiaarijuhuaj. Caya mueratureejaariuhuaj. Na jiyaniquiriiri Enos. Jiyacaritij, pueyari shushajanaa coteequiaari Pueyaso secojonura.
Seçili Olanlar:
Geenesis 4: arl
Vurgu
Paylaş
Kopyala
Önemli anlarınızın tüm cihazlarınıza kaydedilmesini mi istiyorsunuz? Kayıt olun ya da giriş yapın
© 1986, 2008, Wycliffe Bible Translators, Inc. All rights reserved.