Matio 9
9
Jesos okigean a8ian ega ka mazikandjin
(Inabin acitc Mak 2.1-12; Lok 5.17-26)
1Kegapitc dac Jesos ki pozigoban tcimanikag kidji ajo8aag sagaigani. Ogi oditan dac ododenam. 2Ki pidji8idama8agani8i pejig a8ian ega e mazikandjin tesiniganikag. Apitc Jesos 8eabamadjin ini a8iagon kagi pidji8inandjin ini naben adi epitci sogi teb8etamindjin, ogi inan ini8e ega ka mazikandjin: “Nig8izis! Ka8in ana8endjigeken! Aja ki kasiigade8an kipatado8inan.”
3Nandam dac Coda8inni kikinoamage8innig ki inidi8ag: “Omanazoman Kije Manidon aa nabe!”
4Jesos okikendanagoban adi enendaminigobanen acitc ogi inan: “8egonen 8edji madji inendameg? 5Na8adj na 8edandok kidji inag: ‘Aja ki kasiigade8an kipatado8inan,’ kek8an: ‘8anickan acitc pimosen’ kidji inag? 6Kinada8eniminom mega kidji kikendameg Aa8e Ka pi Anicinabe8iidizodj e kackitodj kidji kasiamagedj patado8ini ooma 8akidakamig,” ki ikido.
Ogi inan dac ini8e ega ka mazikandjin: “8anickan, odapinan kitesinigan, acitc ki8en kimigi8amikag.”
7Ki 8anicka dac aa nabe acitc ki ki8e. 8Apitc ka 8abadamo8adj ii, kakina a8iagog ki kitci segizi8ag. Ogi icpenima8an dac Kije Manidon egi minandjin a8ian ii macka8izi8ini.
Jesos onad8e8eman Mation
(Inabin acitc Mak 2.13-17; Lok 5.27-32)
9Jesos iima ki odji madja, acitc meg8adj e pimaadodj, ogi odji 8abaman pejig naben, Matio e ijinikazonigobanen. Ojibiige8igi8amikag ka iji ma8adjiagani8indjin conian e kijikaomagani8indjin kitci ogiman taji abigoban. Jesos dac ogi inan: “Nosoneocin.”
Matio dac ki pazig8i acitc ogi nosone8an.
10Kegapitc Jesos ki nda 8isinigoban Mation omigi8aminikag. Kitci mane8agoban ka ma8adjia8adjin conian kitci ogiman odji acitc kodagiag madji a8iagog ka inenimagani8i8apan e pi nda 8idji 8isinima8adjin Jesosan acitc okikinoamaganan. 11Coda8innig dac ka nagadjito8agobanen inakonige8inan ogi 8abama8agoban, acitc ogi ina8agoban Jesosan okikinoamaganan: “8egonen kikikinoamage8innimi8a 8edji 8idji 8isinimadjin ini8e ka ma8adjiandjin conian kitci ogiman odji acitc ini8e ka madji inadizindjin?”
12Jesos dac ogi noda8an acitc ki ikido: “A8iagog ka mino pimadizi8adj ka8in onada8enimasi8a8an mackiki8innin, mi eta ka akozi8adj. 13K8ag8e nisidotamok adi 8a ikidomaganig kagi ojibiigadenig Kije Manido Omazinaiganikag:
‘Kinada8eniminom kidji kije8adizieg,
acitc ega mamakadj kidji pagidinigetamaojieg a8esizag.’ Osée 6.6
Ka8in mega nidodji pijasi kidji nd8e8emag8a ka kitci k8aiak8enimidizo8adj a8iagog, tiegodj nigi pija kidji nd8e8emag8a ka patadi8adj.”
Jesos omikodan pagidadjige8ini
(Inabin acitc Mak 2.18-22; Lok 5.33-39)
14Nigodin Cabadis okikinoamaganan ogi nazika8a8agoban Jesosan. Ogi k8ag8edjima8an dac: “Mojag nipagidadjigemin nina8it acitc ke8ina8a ka nagadjito8adjin inakonige8inan. 8egonen dac 8edji ega pagidadjige8adj kikikinoamaganag?”
15Jesos dac ogi nak8e8ajian: “Kidinendana8a na kadagi kackendamog igi8e kagi nd8e8emagani8i8adj e niba8inani8anig, meg8adj ini naben ka niba8indjin e 8idji8a8adjin? Ketcinadj ka8in ii ijisesinon! Kegapitc dac kada odjitcise panima kidji madjadj aa ka niba8idj. Midac pidjinag ke pagidadjige8adj ka nd8e8emagani8i8adj.”
16“Ka8in a8iag odabadjitosin ocki kegojicini kidji pag8aag kete kegojicini. Ii mega ocki kegojic kada odji manise kete kegojicikag. Midac kiabadj kada ani magi tadocka. 17Acitc dac ka8in kete nibi8ajikag ka pack8egino8agin iji siginigadesinon ocki cominabo. Kicpin mega iidi todjigadeg, mi ke iji pakodjisegin ini. Motcikag dac kada inajiga8in ii cominabo, acitc mi eck8a abadagin ini nibi8ajan. Tiegodj, ocki pack8egino nibi8ajikag iji siginigade ocki cominabo. Ka8in dac nigodisinon cominabo acitc kin8ej kada min8acinon pack8egino nibi8ajan.”
Jesos okigean Tcerosan (Jaïrus) odanisini acitc pejig ik8e8an
(Inabin acitc Mak 5.21-43; Lok 8.40-56)
18Meg8adj Jesos e taji ikidodj oo8eni, pejig Coda8inni ka niganizidj ki pi tag8icin, acitc ogi nibak8ita8an Jesosan. Ki ikido dac aa nabe: “Nidanis nogom maia odji nibo. Pijan dac kidji pi nda taginadj, midac kada koki pimadizi.”
19Jesos ki pazig8i kigi okikinoamaganan, ogi 8idji8an dac.
20Pejig dac ik8e, aja midatcin acitc nijopibon inigik o8anitonagoban omisk8i, odakanag ogi pi odji nazika8an Jesosan, acitc ogi taginan 8ajagameig okonasini. 21Inendamogoban mega: “Kicpin iaga taginam8ag Jesos okonas, mi ke iji kigeian.”
22Jesos ki k8ekigaba8i, acitc ogi odji 8abaman ini ik8e8an. Ogi inan dac: “Nidanis! Ka8in ana8endjigeken! Kiteb8etamo8in kigi kigeigon.” Teci8ag dac ki kige aa ik8e.
23Jesos dac ki odji tag8icin 8edi Coda8inni ka niganizindjin omigi8aminikag. Ogi 8abaman nodag8atcige8innin e ick8atandjin kidji nodag8atcigendjin meg8adj e nig8aakani8anig, acitc a8iagon e kitci mad8etondjin. 24Ki ikido dac: “Kakina ka tacieg, sagaamok ooma! Ka8in mega nibosi aa ik8eses, motci niba eta.” Kakina dac ogi maskita8a8an Jesosan. 25Apitc ka ick8a sagidjinija8adjin kakina a8iagon, Jesos ki pidige ik8esesan opakesagamini. Ogi na8adjindjibinan acitc ki pazig8i8an. 26Mizi8e dac iima akikag ki nodagani8an oo kagi iji8ebanig.
Jesos okigean nijin a8iagon ega ka 8abindjin
27Jesos dac ki odji madja iima migi8amikag. Meg8adj dac e ani pimosedj, nijin a8iagon ega ka 8abindjin ogi madji nosoneogon, e pabibagimigodjin: “Kin ogima David odanike ojisan! Kidimagenimicinam!” 28Apitc Jesos ka oditag migi8amikag, ogi pi nazikagon ini8e ega ka 8abindjin. Jesos dac ogi k8ag8edjiman: “Kiteb8etana8a na e kackito8an kidji kigeinagok?”
“Ee, Tebendjigean! Niteb8etananan!” ki ikido8ag.
29Jesos dac ogi tagickijig8enan, acitc ki ikido: “Kiga iji8ebizim adi ka iji teb8etameg.” 30Ki odji 8abi8agoban dac. Jesos dac ogi kitci sogi aiamian: “Ndotaocik 8e8enda! Ka8in a8iag 8idama8akegon adi ka ijiseieg.”
31Misa8adj dac, apitc ka ick8a sagaamo8adj, ogi paba mikoma8an Jesosan mizi8e iima akikag.
Jesos okigean pejig naben ega ka nta8endjin
32Meg8adj e ani sagaamo8apan igi nabeg ega ka 8abi8apan, Jesos ki pidama8agani8i pejig a8ian ega ka nta8endjin, e kigickagondjin madji manidon. 33Apitc dac Jesos ka ick8a sagidjinija8adjin madji manidon, aa nabe okackitonagoban aja kidji anim8edj. Kakina dac a8iagog iima ka te8agobanen ki kitci mamakadendamog, acitc ki ikido8ag: “Ka8in 8ikad ooma Israel akikag kidodji 8abadasinanan kegon e apitci mamakadendag8ag!”
34Anic dac Coda8innig ka nagadjito8agobanen inakonige8inan ki ikido8ag: “Aa8e ka kackakanadjin madji manidon, mi aa8e ka minadjin Jesosan macka8izi8ini kidji gi sagidjinija8andjin madji manidon.”
Jesos okidimageniman a8iagon ka pi nda 8abamigodjin
35Jesos paba ijagoban kakina odenakag acitc odenajicikag iima akikag. Paba kikinoamagegoban Coda8inni aiamiemigi8amikag, acitc paba kagik8egoban min8adjimo8ini, ka odji kikendjigadenig Kije Manidon Odogima8i8ini. Okigeagoban kakina ka akozindjin adigotc ka inapinendjin. 36Kitci mane a8iagon ogi 8abaman egi pi nda nagickagodjin, acitc ogi kitci kidimageniman. Kitci aiekozi8agoban mega igi a8iagog acitc 8i ani ana8endjigebanig, tabickotc mantcenicag ega ka tendjin a8ian kidji kana8enimigo8adjin ijinagozi8agoban. 37Jesos dac ogi inan okikinoamaganan: “Mi maia kitiganan ejinagozi8adj igi a8iagog. Kitci manedon kitiganan ke ma8adjitcigadegin, midac eta ka8in tibisesi8ag mikimo8innig. 38Pagosenimik dac Kije Manido, 8in ka tibendagin kitiganan, kidji ijinija8adjin mane kodagian mikimo8innin kidji ma8adjitondjin okitiganan.”
Seçili Olanlar:
Matio 9: ALGNT
Vurgu
Paylaş
Kopyala
Önemli anlarınızın tüm cihazlarınıza kaydedilmesini mi istiyorsunuz? Kayıt olun ya da giriş yapın
Algonquin New Testament © 1998 Canadian Bible Society
